南翔饅頭店 (上海, 黃浦區)

南翔饅頭店, 最出名就係佢地的小籠包...大家如果去過上海都應該試過, 但如果未去過, 都相信好多人/旅遊書都會叫你地去下試..其實我唔係好喜歡食小籠包, 因為我比較怕食一團肉的東西..所以我今次都係慕名而去...

南翔饅頭店係分3層, 最低一層係外賣部, 佢地只有鮮肉小籠包賣, 而價錢,我好似見係$16/12個, 係唔可以堂食的, 我見有人比人趕番落去...而且你一定見到會排左好長龍..而第2層係一般唔想排隊, 又願意比多少少$$的客人...佢地賣的係蟹粉小籠包 ($25/8個), 另有灌湯包 ($15個, 呢個價錢, 我在上海都係差唔多, 唔會貴左...), 飲品就$6-$8, 有烏龍茶, 七喜, 青島等等...另有蛋絲湯($3), 我見好多人都會叫埋, 但我自己就無叫, 怕太咸...最後第3層就最低消費, 每人$68..而我同朋友仔就揀左第2層喇...

咁當然, 好似我地一樣心態的客人真係好多咖...而且事實上2樓的位真係唔多, 起碼我去那天就好多人, 個個企o係檯邊「跟檯」....而收銀姐姐就會叫你不如去3樓, 有多d位...所以建議分散行動, 一d搵位, 一d就去買食物...

我同朋友仔叫左一籠蟹粉小籠包, 我要左烏龍茶, 朋友仔揀左七喜..(因為我地之後仲會去其他地方食野....) 然後等等等等, 等d姐姐來清潔之前的客人的食物...但佢地係會傾計, 都唔會清理, 朋友仔直接行去叫佢清下我地張檯, 佢地都唔清...終於清理左, 又要等等等等....等d姐姐推一籠籠小籠包出來...所以要有心理準備, 就係等...不停等....(其實你買完食物, 就只需要坐o係度等, 佢地自然會比籠小籠包/其他食物你, 飲品就行去雪櫃, 比張票d姐姐幫你拎...「等」係正常, 唔需要擔心...)

蟹粉小籠包: 我覺得無咩特別, 真係無咩特別, 唔係特別好味, 又唔可以話唔好味, 不過都幾多湯汁...我無買到薑絲($1), 因為我唔鍾意薑味....不過我都係當食佢的名氣, 個人會開心d....