認識橋香園這餐廳, 是因為在旅遊書中介紹過, 他們出名就是過橋米線, 而且是依中國古時考試的功名來命名他們的米線 (狀元, 進士, 舉人等等), 我覺得好特別, 所以去試試....不過亦有普通的米線...

他們的位置唔算難搵, 你到地鐵「南京東路」站, 1號出口, 轉右, 你會見到一個只有兩條電梯的地方, (你會估唔到橋香園在樓上..), 你上一層就會發現橋香園在你右邊..

你可以到收銀處揀左你想食的東西, 之後買票, 再將票交比服務員, 你一定要主動D比佢, 佢地幾懶, 有時當睇你唔到/扮忙...不過我建議搵左位先, 因為有時都幾多人...

我今次同朋友就揀左進士過橋米線&海鮮過橋米線, 同埋涼拌黃瓜...(之後旅程有1日去橋香園翻食, 就揀左舉人米線同雞鴨血湯) 佢地的米線係將所有的配料分開上, 然後上米線, 再上滾湯, (小心, 真係好熱...)之後就自己放配料, 而放配料的次序係先放肉, 再放菜, 最後落米線...如果你放錯, 佢地的服務員會好激氣, (因為我試過...佢好勞氣咁話我放錯...)..

進士米線: 配料大約有10種, 味道都好好味, 佢地仲送一個烏雞湯比我, (不過唔係個個米線都送的...), 味道好清, 無我想像中咁咸, 因為聽人講話上海的食物好咸...不過小心好熱...($39)

烏雞湯:味道比較咸, 但都覺得似飲開的雞湯味, 不過唔建議飲太多, 可能對身體唔好, 而且會口乾...

海鮮過橋米線: 佢主要係因為有蝦同魚, 所以先叫海鮮米線, 但其實佢係有雞肉, 味道一樣都唔錯, 不過配料就無進士咁多, 好似係5種...($25)

涼拌黃瓜:好好味, 真係好推薦大家試下, 如果你食得辣, 你就會更愛呢個小食, 我自己就鍾意食辣, 所以我幾欣賞....如果食唔到辣, 都可以一試, 我朋友食唔到辣, 但佢覺得唔錯, 可以接受, 不過就飲多d水...($5)

舉人過橋米線: 因為舉人無進士咁叻, 所以配料唔多, 不過都好夠食, 大約3-4種, 好味的...($16.5)

雞鴨血湯: 好似豬紅咁, 味道差唔多, 不過唔建議唔食得辣的人食, 因為佢碗湯, 基本上係辣的, 而且睇落就好似一碗辣椒油...我揀左細碗, 不過都已經好多, 我完全食唔哂....(細:$4, 大:$5)