23/07那晚7:50pm才在香港出發至亞庇, 要到10:45 pm才到達, 訂了洪叔的包車RM50/Van, 由於海關的 "超慢" 動作, 差不多成11:45 pm才到Gaya Central Hotel, 好彩只須10分鐘便到, 要馬上梳洗, 食個杯麪, 就即刻上床瞓覺, 第二日最遲要5:00 am起床, 搭7:00 am班機去山打根.......

講番間酒店, 在goholiday網站用超值價 - HK$84訂的普通雙人房(仲包稅), 3呎半床兩張, 但酒店話普通雙人房已full booking, 所以提升了房間至Delux Family Room; 嘩! 好大的房間, 有兩張5呎Queen Size床, 不過咁 "正" 都享受唔到8個鐘........

原本想訂較近機場的 Borneo Beach House 床位, 每人RM25, 共用浴室, 步行至機場只須10分鐘左右, 但Gaya Central Hotel個價實在吸引, 計埋車錢都抵過住床位啦......

唯一缺憾是房間浴室的坐廁有好勁的嗅坑渠味及去水聲好大, 令人較難入睡, 不過咁平咁筍, 收貨啦!

一早5:00 am 就起身, 再約洪叔的車(10人Van)去機場, 由於凌晨時份, 洪叔話佢哋7時前call車都要加50%, 所以要RM70/程去機場, 真係好執, 如果跟住再做多單接送, 咁司機咪可以提早收工啦!

由於太早, 基本上所有店舖都未開門, 枉論想食早餐, 唯有睇吓機場有咩嘢食, 6:00 am, check 完 in, 見到呢間Donut店, 上次喺Phuket機場都買咗6個上機食, 今次見到仲有買6送3, 平均HK$4.9一個, 就買咗嚟當早餐前奏.......

朱古力味同沙翁較好味, 好colourful的較甜!!!

Air Aisa 準時7:35 am 到達山打根機場, 好細同冇冷氣的機場,  的士由機場到市中心公價RM26.4, 見有時間, 試吓走出去機場右邊的迴旋處截公車, 據講約RM2就得;  出到去迴旋處, 等咗半小時, 有3架mini bus經過, 但都full 嘅;  其實我們一行7人, 都唔應該搭mini bus, mini bus只是一般像香港的貨Van, 只得座位, 根本冇位放行李;  後來有架Taxi (馬拉司機)經過, 佢開價RM25去town,  最後RM20/的士, 兩架RM40; 原來路程都幾遠, 都行咗差唔多20分鐘至到中環酒店 (去完Sakau第二日才住的酒店), 的士錢算合理;

另由Town去機場, 基本上是公價的RM25, 冇得講價.......

Sukau Greenview B&B 是search咁多間Sukau 區B&B 最抵最平的, 原先在舊年聖誕已向佢吔預訂, 仲落咗10% deposit; 當初佢哋老闆Jamal 報價比我要RM325/2日1夜/成人, 後來減價至RM285/成人&小童, 兩日1夜, 包3次river cruise (早, 黃昏及夜晚), 山打根市接送, 早午晚3餐, 冇冷氣房及早上森林行; 到咗今年7月初, 再send email reconfirm, Ms Suhaydah回覆話RM135/人, 同樣包以上項目, 要有冷氣就RM289; 嘩! 攪鬼咩! 差咁遠嘅! 真係比佢攪到一頭霧水, 網友話佢較平, 網上寫佢offer兩日1夜起碼都要RM189/人; 點知最後埋單真係用RM135計, 真係平過跟Local Tour呀!

約咗B&B 12:00 pm喺中環酒店接我們, 我們只拿一個小的行李上路, 其餘留在酒店; 佢哋用部7人車載我們, 但部車內部較小, 大家都坐得好逼, 仲要 "傲" 兩個多小時, 都幾難頂; 其實馬拉人揸車好慢, 如果由我哋揸車, 實質路程只須1.5小時便可到達, 冇計啦!

去到半路, 佢哋會放人落車去洗手間及買嘢食, 所以約在3:00 pm才到達B&B; 由於我們是包午餐的, 所以可以食剩下來的 "冷飯菜汁", "奄尖"的我哋又點會食喎!

去完黃昏river cruise, 約7:00 pm, 就食晚餐, Buffet形式, 只有5款, 包括白飯, 另有什果沙律, 茶及咖啡無限供應, 味道是OK的, 較合亞洲人口味, 西方人未必啱食, 環觀B&B, 共有約廿多人, 只有我們7個中國人, 其餘都是歐洲人......

晚上蟲鳥蛙聲四起, 房間燈光昏暗, 有好多會飛的虫蟻伏在牆上, 用了一點時間消滅佢哋, 才去沖涼, 水是涼涼的, 要先開水一會才好沖, 因河水是泥黃的, 但由於太累, 10:30pm 已瞓著咗, 其實除了那些飛虫外, 房間都算係咁, 起碼張床同個枕頭好啱瞓!!!

第一次咁近距離接觸D動物, 由於B&B 包3次 river cruise, 分黃昏4:00 pm, 晚上 9:00 pm 及 早上6:00 am, 三次river cruise 的氣氛, 動物 及景色都不同, 所以所看的都各有特色;

黃昏遊, 可看到動物歸家情況, 如長鼻猴中的 "大佬" 一聲長嘯, 所有該族的長鼻猴就逐隻沿其 "大佬" 所走的路線回家去, 睇住佢哋遂隻由一棵樹跳至另一棵樹, 像連環圖般, 真係同動物園睇動物的感覺完全不同;

晚上遊, 完全感受到黑暗中河上的 "鬼秘", 伸手不見五指, 只能用leader的強燈照住兩旁樹林, 周圍靜悄悄的, 起初leader找不到動物, 較沉悶, 後來發現有成年鱷魚在船旁, 大家開始緊張, leader把燈熄滅片刻, 當再開燈時, 條超過2米長的鱷魚就在船旁, 班港童開始驚, 不敢挨近船邊, 跟住又再發現多兩次鱷踪, 呢兩條同樣超過兩米, 班港童已驚到嚷著馬上要離開;

早上遊, 由於未日出, 天氣頗涼, 要著風縷, 周圍一片霧氣, 完全與白天不同, 上船後, 出發去熱帶雨林, 沿途見到D動物睡醒出外搵食;

今次都算見到好多動物, 如蜥蝪, 大小鱷魚, 長鼻猴, 長尾猴, 蛇, 多種鳥類, 螢火虫及貓頭鷹等, 只是未能見到大象及紅毛猩猩, 都算係已經"親親大自然"!!

早上坐船, 就上岸步入熱帶雨林區, 入森林前, Leader就講解入森林前有咩嘢要注意, 特別向我哋介紹個條吸血虫, 長條狀似牙籤般幼, 棲息在樹林的中間位, 容易依附在身上, 雖然冇毒, 但被佢吸住, 就要有技巧咁拔佢出嚟, 然後用森林裡嘅草葯外敷, 就可止血, 不然就會流血不止;  所以昨晚, Leader已一再叮囑一定要穿長袖衣及長褲, 另要租用佢哋嘅水靴, 每對RM5行森林.........

我哋當然有所準備, 全部都著晒橡筋袖風褸同窄腳褲 + 長襪套住小腿, 用毛巾包住衣領, 以防蟲蟻走入身體, 但都..........人算不如天算

整個森林都係沼澤地, 第一次行, 真係感受到舉步維艱的苦處, 不但全身都易沾泥漿, 而且仲容易high到D蟲同撞到D樹, 走咗冇耐, 一行十人裡, 個個都 "中招", 其中朋友發現條吸血蟲鑽進其腋窩, 好彩未吸血, 但皮膚已 "紅"曬, 所以個個都好驚........

在沼澤森林行走, 見到有3個月前曾到過呢處的大象及剛走過的野豬腳印, 而紅毛猩猩就留下了食完的果殼, 離開了其巢穴, 出去搵食, Leader仲介紹樹林裡的植物, 不過由於朋友同班細路行得較慢, 跟唔到Leader, 所以佢哋基本上係學唔到聽唔到咩嘢, 只有我同4個外國人跟得上Leader嘅步伐........

行到約8:20am, 回程喇, 班港童開心到不得了, 由於個個都包到實, 個個都焗到 "標" 曬汗, 想快D除咗件風縷, 上船前仲要通通除矖所有水靴, 因為要保持船內清潔, 當每個人除衫除褲之際, 我嘅另一半就見到條吸血蟲啜實佢隻小腿, 見條蟲已肥大肉口, 已吸了不少血, 個外國人幫佢拔起條蟲, 當然結果是流血不止啦! 當天足足流了整天血才止, 同埋大家都不明白條蟲點樣鑽入衣服裡........

order 了8個餸, 當中6個是海鮮, 10杯桔仔冰, 1支啤, 埋單係RM232.5, 即HK$604.5, 真係勁抵食, D海鮮又新鮮又好味, 對住個海食海鮮, 海風輕吹, 環境不知幾咁好, 依加想起, 都好令人回味無窮

由於第二天要搭8:15 am 回 KK, 所以打算買D乾糧作早餐, 因為山打根機場咩嘢都冇得食;

呢間餅店D麪包同蛋糕真係唔錯, 好軟熟, 又夠飽肚, 價錢大眾化

1:00 pm 由斗湖坐包車去海中屋Singamata Resort在仙本娜的辦事處, 約在2:20 pm 就到喇, 喺辦事處放低D行李, 填埋將出島生死狀, 交埋條尾數, 呢3日兩夜的住宿費用等, 就馬上出去搵食同買乾糧, 再搭5:30 pm嘅 shuttle boat 入resort........

行出去左邊, 就係佢哋嘅碼頭, 對面就係Seafest Hotel, 約坐10分鐘快艇, 就到Resort;  右邊側是漁民碼頭, 漁獲在此零售同批發

由仙本那坐快艇去Resort 約10分鐘, Resort 四面環海, 早上6:00 至旁晚6:00, 可隨便跳入Resort 已圍起鯊魚網的範圍內暢泳, 好方便呀!
 
由於我哋在舊年聖誕節前已預訂, 所以價錢是依舊年個價RM80/人/標準房, 包三餐, 而今年起另要加Shuttle Boat 費每程每人RM10

今年, Singamata 已將標準房加至RM100/人, 雙人房連露台RM115/人, 呢兩種房都係用公共廁所, 雙人房連厠及私人露台RM160/人, 一樣包三餐; (個公共厠所連浴室係OK同乾淨嘅)

另外我哋仲join 咗佢哋嘅馬寶島浮潛, 下面再講 "經歷", 費用是RM80/人, 包兩程船來回, 浮潛工具及午餐, 但今年佢哋加價驚人至RM130/人, 唔知係咪佢哋攞咗個5星PADI Dive Resort資格呢!

後來在Resort遇見到幾個國內同胞同馬來華僑, 都被問我哋7個人多少錢, 3日兩夜連出馬寶島 + 包車由機場至仙本那一程, 合共如下:

1)  住宿兩晚 7人(大小同價) : RM80 x 2 x 7 = RM1,120

2)  馬寶島浮潛 7人(大小同價) : RM80 x 7 = RM560

3)  包車一程 :  RM150

4)  Shuttle Boat 兩程 (來回 Resort) : RM10 x 2 x 7 = RM140

5)  碼頭費 : RM10 x 7 = RM70

總計 : RM2,040/7人, 即HK$5,304/7 = HK$757.7/人

在聖誕前已比了10% Deposit, 當然咁早訂梗係比一兩個月前訂平好多啦, 連馬來華僑都冇我哋咁平, 真係慳咗好多......

其實當初不是想預訂Singamata的, 它只是心目中第二位, 第一位是想幫 "鯊魚仔" Scuba Junkie訂晒全部的行程的, 住喺佢哋馬寶島嘅Resort處, 出Kapalai Island浮潛, 一樣係響聖誕前問價, 在其網站http://www.scuba-junkie.com 所睇嘅價錢只能參考, 一定要sent email 同佢問價,  經過一輪email交涉(超過8次), 我比佢哋嘅 "出爾反爾" 嘅處事方法激死, 做生意, 講咗個價錢比客人知, 就算定案啦, 每次email話confirm, 又話要加錢;  原本答應話小童唔收船費及半價, 到最後又話要加番原價落去, 係唔係 "言而無信"呀!  問佢哋點解次次個價都唔同, 初頭兩次都同我say sorry, 話睇錯時間同email 嘅意思, 跟住就話暑假係黃金檔期, 好多客人會搵佢哋, 好似唔憂做咁, 算了吧!  又唔係得佢一間做; 後來就選了Singamata, 同主持人Vicky email 3次就成交, 中國人話咁就咁, 要講個 "信" 字呢!

Singamata 包食都算係咁, 不過不失; 由於是中國人開的, D口味較合中國人, 第一晚嘅晚餐有魚有肉有菜有湯, 仲有飯後果添!  第二晚就差D喇, 除魚外, 全部是蔬菜, 南瓜, 茄子, 小白菜, 水草(白色的, 冇味嘅), 算啦, 我收貨喇!!

早餐都係麪包 + 蛋, 或有炒米粉等, 咖啡或茶冇限添飲; 下午茶有餅乾同蛋糕, OK嘅!

用餐時間如下 :

早餐 : 7:00 - 9:00 am                   午餐 : 12:00 - 2:00

下午茶 : 4:00  - 5:00 pm               晚餐 : 6:30 - 8:30 pm

如果仍然覺得唔夠食, 可預早book定其他餸菜, 例如火鍋同海鮮, 當然要另外比錢啦! 火鍋每位RM15, 海鮮就以所選種類及重量計......

27/08  早上食咗少少早餐, 準備出發去馬寶島浮濳, 班細路起初喺架快艇表現雀躍,  但20分鐘之後, 態度反轉, D海浪不停拍打著我哋, 跟住不久仲全身濕透, 而且仲要帶著潛水鏡, 以免鹹水醃眼; 真係好驚D浪打沈隻快艇, 坐在快艇上像度日如年般.......

差唔多1個多小時, 就到了馬寶島, 因為乘客中有兩位外國人打算入住Scuba Junkie的 Mabul Resort, 所以外國人教練就帶佢哋去check in, 好慶幸冇book到此Resort, 否則就出事喇! 為咗喺度住, 攪到D行李背包全部濕透, 我哋D小腰包都統統濕曬, 好彩部相機同Passport放在船頂, 不然就大濟了, 所以在馬寶島上只影咗好少相........

由於馬寶島D沙灘已被人劃為私人地方, 除了沿島居民的沙灘外, 其他位置都禁止我哋留在沙灘同用佢哋嘅廁所; 不過唔緊要, 反正在海邊D水非常差 - 污穢同污染, 冇法啦! 有人住就會係咁差, 另外島上面的居民生活質素都好差, 相信佢哋都好窮, 好多小朋友都冇衫著, 周圍問人攞錢......

由於水質咁差, 我哋最尾都跟番教練所指示, 到海中心浮潛, 由於好大浪, 班細路都唔肯落水, 得我同另一位國內女同胞下水, 其他人就坐在快艇上 "等".....

呢位女同胞真好嘢, 佢唔識游水嘅, 但嚟Singamata處考咗個初級潛水牌, 佢知我識游水, 所以跟住我; 在佢上番艇不久, 我仲唸住潛多一陣, 但冇幾奈, 我開始唔掂喇! 仲喺海中心嘔, 上番艇仲嘔得勁, 跟著其他人都有嘔, 好辛苦呀!

在馬寶島外圍潛, 水質一般, 能見度不遠, 珊瑚礁同海魚都OK嘅, 但唔係想像中咁靚, 教練同其他人深潛返來, 都話水底好"濛", 水流亦好急, 都幾危險; 我哋整船人最失望嘅, 當然係見唔到海龜啦!

由於好多人都不適, 原本仲有一次深潛的國內男同胞都放棄落水, 叫回程, 真係好多謝佢, 最唔滿意嘅, 當然係外國教練啦, 只係1:30 pm, 就叫走人, 佢過嚟問咗我兩次, 是否回航, 我想佢都好失望呀!

而回程只是用了35分鐘, 比去程快咗差唔多45分鐘, 返到上Resort, 都冇胃口食埋個餐盒, 就馬上去沖涼休息, 班細路真係幾好嘢,  上岸後就冇事, 即刻攞個飯盒出嚟食, 其實個飯盒都唔錯, 除咗個白飯凍咗D之外, D餸唔差架, 有南瓜同煎蛋餅, 我就食唔落, 班細路食曬, 好嘢!

原本喺Singamata訂咗車去斗湖市, 由於Vicky誤會咗, 用咗去斗湖機場RM150包車報價比我, 原來斗湖市比斗湖機場仲遠, 所以要RM210; Vicky話叫我哋唔好包車, 行去街市附近的大巴站搭巴士, 仲平靚正......

離開咗Resort, 就由碼頭行去街市, 再經過清真寺, 對面就喺大巴站, 呢度有幾條巴士線去主要沙巴的城市, 如亞庇, 山打根, 斗湖機場等, 我哋就搭斗湖市, RM15/人, 小童仲平D......

巴士公司名稱係Manis Express www.manisexpress.com.my , 其實仲有其他巴士公司, Mini Bus 同白牌響巴士站處, 任君選擇........

架旅遊巴士好新淨, 沿途冇站上人, 但可沿途落車, 車程約1個半小時.......

呢間酒店係冇Web Site 同email address嘅, 要打長途或fax同佢哋預先book定, 今年5月中fax咗比佢哋預定兩間family Room, 等咗成個幾禮拜冇feeback, 就打個電話訂, RM127.60/家庭房, 不須要落deposit, 只須入住當天枱前付款便可

28/07 1:30 pm 由斗湖車站行至Kingston Hotel, 走出大街, 見到May Bank, 對面有間Kingston Executive Hotel, 後面就係Kingston Hotel, 約行10分鐘

Kingston Executive Hotel 同 Kingston Hotel 是同一公司開的, 但Executive Hotel 係冇family room或三人房嘅, 只有Kingston Hotel 先有, 如只定一般雙人房, Executive Hotel 較好

到達後, 比咗兩間Royal Family Room, 其中一間係Diamond Family Room, 裡面好大, 樓底又高, 有一張6呎大床, 一張4呎床及一張3呎床, 大梳化, 大衣櫃等, 唯一唔大係冷氣, 間房起碼有5-600呎, 用一匹半邊夠架, 開咗冷氣成2個鐘, 依然係30度; 馬上換房, 換咗間三人房比我, 而朋友就要咗我間Royal Family 房......

酒店所有的房都是由住宅改成, 樓高兩層, 而2樓走廊是半身圍牆, 冇窗,  好開揚, 但較嘈, 車聲由朝到晚都有, 而2樓所有房的窗都係對住圍住的走廊, 所以唔會打開窗簾的; 其實基本上房間都唔錯, 可惜我所住的三人房有好勁嘅煙味, 同朝早6:00, 有人開工鑿嘢,  要投訴先停手, 攪到瞓得唔好, 但朋友間房就冇事, 佢哋話幾舒服......

"愛"佢咁平又 "企理", 位置仲響市中心,  "恨"佢嘈喧巴閉, 算啦!

住一晚斗湖的主要目的只有一個 - 食平海鮮......

已有年多冇食東星斑喇! 喺香港實在好貴, 上次喺山打根已想order條東星(馬拉叫七星斑), 但咁啱Sim Sim冇貨, 所以唯有寄望喺斗湖食喇! 果然 "夢想成真".....

在斗湖的大排檔, 共有兩間海鮮檔, 一間金陵, 一間叫好景, 網上都較多人讚金陵, 所以就揀咗呢間, 其實當晚較多外國人去好景, 當地人就去金陵;

總括當晚所有的餸菜, 共order了4個海鮮, 4個小菜, 兩個甜品 (A-B-C 同 D-E-F), 桔仔水6杯同兩支啤酒, 每個餸都好食, 尤其是薑蔥蟹, 好有 "鑊氣" , 東星斑個豉油好味過Sim Sim,  所有的餸菜似香港式, 好啱我哋胃口, 全部合計是RM337, 即HK$876.2, 真抵食, 比較貴是啤酒, 每支RM14, 除咗浮羅交怡外, 唔知點解馬來西亞D啤酒咁貴嘅???

A-B-C 即涼粉+淡奶糖水+冰, 同煎芯有D唔同, 冇加顏色糖水, 較天然

去完Kingston check in, 就嚟呢間沙巴雞飯食lunch, 就喺Kingston Hotel 樓下 

見好多人幫襯, 個個都食雞飯, 唐人, 馬拉人都有, 所以就試吓啦!

原來呢間食店係斗湖都幾出名.......

叫咗1個白雞飯, 1個燒雞脾飯, 3個甜酸雞飯, 1個甜酸蝦飯, 1個炸鳳尾蝦, 2碟油菜同桔仔冰等, 共RM82; 最好味是燒雞脾飯, 其次是甜酸雞飯, 個鳳尾蝦唔錯, D炸粉連蝦一齊炸, 炸粉都好有味, 平食雞飯之選

晚上食完金陵個餐海鮮, 再去買咗幾個芒果, 慢慢行番去酒店, 經過Wukka Cafe, 響Heritage Hotel 對面

Wukka Cafe, 以西餐為主, 我哋食完海鮮, 梗係喺呢度食甜品

Wukka Cafe 嘅店舖佈置好雅緻簡潔, 好想令人入去食嘢!!!

點了Moka Coffee Chocolate Cake, Dark Chocolate Cake 同 芒果芝士蛋糕, 全部RM7.5/件

最好味係Moka Coffee Chocolate Cake

Dark Chocolate Cake 較甜

芒果芝士D芒果好酸, 令蛋糕味道都好酸

Secret Recipe 就較多款式同價錢較平

29/07 就喺呢間食檔食早餐,  呢間喺斗湖好出名食龍疐米線做早餐嘅大排檔, 隔離就係金陵同好景....

龍疐湯米線裡面好多料, 湯底好濃魚味, 但由於有鹹酸菜, D米粉有些少酸酸地, 而龍疐就 "鞋" 咗D, 可能係灼熟同魚本身大條有關吧;

老板介紹龍疐炒河粉會較好味, D河粉好入味, 龍疐亦冇咁 "鞋", 果然冇介紹錯, 另外奶油蝦炒米同中蝦炒河粉都好正;

最後連飲品埋單RM82

由於斗湖好多店舖響7:00pm後就陸續關門, 街上都好黑; 食完海鮮, 行番去Kingston途中, 被一排強光所吸引, 五顏六色的水果放在攤檔上, 已多日冇食生果嘅我哋, 被引入去買番幾個......

見到D芒果外表好靚, 就咁被佢欺騙咗; 嘩D芒果真係酸到 "阿媽都唔認得"...........

揀生果時要小心, 生果檔周圍有好多大小老鼠四圍走來走去

食完龍疐做早餐, 就去埋涼茶舖飲番杯涼茶, 就要返酒店check out出斗湖機場搭飛機返KK

order咗三個龜苓糕 RM4/個, 兩杯冬瓜水RM2.5/杯, 正! 正! 正!

玩咗7日, 食咗咁多 "熱氣"嘢, 見到呢D中國文化遺產, 真係"如獲至寶"喇!

29/07 10:45 am check out 咗Kingston Hotel, 便拖唿行去斗湖的巴士總站, 10分鐘之內已行到車站(Kingston Hotel - May Bank - 社區會堂 - 大馬路 - 過對面馬路)

去斗湖機場共有5班車, 分別是 6:30 am, 8:30 am, 11:30 am, 4:00 pm, 都是因應航班時間而定的, 我哋坐13:35 pm 嘅機返KK, 所以我哋就坐11:30 am嘅巴士, 但當日架巴士因塞車而遲到, 成12:00先到車站, 不過都趕得切去到機場......

由斗湖市去機場約半小時, 票價RM10/成人, RM5/小童, 架巴士體積較小

備註 : 海鮮大排檔隔離亦都有個大旅遊巴站, 但只去沙巴其他市鎮, 如山打根同KK, 那處冇車去機場

29/07, 喺斗湖打定電話搵洪叔, 约定佢2:30pm響機場接我哋去Marina Court Resort, 洪叔收我RM40/Van, 由於有少少塞車, 原本只須要唔駛10分鐘嘅車程, 令我哋差不多3:00pm先到

原來Marina Court有好幾間公司負責經營, 我唔知道喺咁, 所以29號同31號晚就經Agoda訂了兩晚KK Suite, 29號嗰晚就$820同31號嗰晚就$790連稅, 兩晚都訂貴咗, 真失策; 而30號就經另一間公司訂了1晚Resort Condominium(下面再講), 所以晚晚既單位都唔同, 要日日響Marina Court 轉房

KK Suite 是其中一間代理, 負責人係謝小姐, 可以叫佢Cecelia,  一位50多歲女士, 好親切,  直接搵佢訂房話可以平D

佢upgrade咗我哋兩晚至海景單位, 可以睇日落, 個view好正, 單位面積約有1,400呎, 好開揚, D床同房間都幾大, 非常適合兩個family一起租住, 好似我哋咁; 而且屋內設備齊全, 最好係有洗衣機, 令我哋D臭衫變番乾淨衫, 唯一是屋內都幾多黃絲蟻, 我相信呢D都係樓齡嘅問題.......

29/07 專承嚟食Cake兼食埋晚餐, D Cake 有好多種類, 迎合個人喜好, 價錢比香港平, 最特別是其榴槤蛋糕同香蕉蛋糕, 兩者能發揮其生果的特別味道, 令個Cake更好味......

02/08 臨去機場前, 都去食多次D cake...... yummy!!!

喺食Cake 之前, 我哋各自order咗主菜, 各有特色, 整體味道都不錯, 推薦沙嗲炒飯, 而且價錢亦合理, 炒飯有少許辣, 好惹味, 沙嗲肉串是雞肉, 肉質不實, 沙嗲味濃但適中

蛋糕 + 主菜連稅服務費15% 共RM176.1, 約HK$457.9, 即約HK$65.4/人, 呢個價錢係不包飲品及餐湯, 其實都唔係咁大眾化.......

30/07 一早就在Jesselton Point Jetty 碼頭出島雙島遊, 去咗馬穆迪島同馬奴干島, 冇去Sipi島

響第8個counter 買咗船票, 係個的士司機黃先生介紹的, 成人RM27 (船費) + RM7.2 (稅) +  RM10 (上島碼頭費) = RM44.2, 即HK$114.9; 小童半價, 無論遊3個島或1個島, 都係收RM10 上島費, 已比跟團平RM100/個人.....

首先去咗馬穆迪島, D水不是太清, 魚亦不太多, 但已比馬寶島的感覺好得多, 起碼有公用枱櫈, 唔駛比人趕, 環境都唔錯.......

而馬奴干島d水清好多, 一上碼頭就有好多魚仔, 不過呢度有好多醉石, 無論岸邊, 海中心, 都好 "吉"腳, 要著埋對拖鞋落水......

出完島, 由碼頭行去Gaya Street, 雖然路程唔係好長, 但烈日當空, 10分鐘路程, 都行到成身濕曬

原本想去富源, 但班細路同另一半唔鍾意, 又話冇冷氣, 實質裝修唔夠隔離間Old Town Coffee好, 而且Old Town 都有少少冷氣, 好過富源熱辣辣得風扇, 咁咪去咗Old Town Coffee, 再去富源買咗兩份咖央奶油多"行街"

喺呢度食少少嘢, 叫咗D多士同涷飲, 感覺好似冇檳城Tune Hotel隔離嗰間咁好食, 又其是D咖啡同拉茶, 唔好飲嘅, 個咖央牛油多士d牛油唔係冰凍嘅, 仲差唔多溶曬添, 而且有D多士好似加咗價

全部共RM40.6/3人, 唔計富源份多士,  即HK$105.6, 淨係食多士同飲杯凍飲, 都唔係咁平喎!

喺Old Town Coffee 食完後, 跟住去斜對面的佑記食肉骨茶, 未行入店舖, 都感受到佢嘅 "熱浪" ,
店裡係冇冷氣, 而且中間位同店的另一面都有兩個火爐煮緊嘢, 令到我哋都有少少卻步, 不過班細路同朋友話未曾食過肉骨茶, 點都要試吓嘅.......

order咗排骨, 豆腐同冬菇, 冇要白飯, 佑記嘅肉骨茶唔係太濃藥材味, 但好易入口, 令我呢個一向不好此味嘅人來講, 都覺不錯, 班細路話唔係之前食咗D多士, 仲可以再加碼, 值得一讚係佢哋杯清茶, 食完D肉, 再飲杯茶, 清清個口d濃味, 唔錯! 唔錯!

雖然如此, 但響個火爐旁食肉骨茶, 雖然好味, 但真係有d頂唔順, 問老闆點解唔安冷氣, 佢話如果安咗, d當地人會覺得間店 "high"咗同貴咗, 感覺唔大眾化, 就唔會嚟幫襯喇!!

行Sundary Market 前, 先去醫肚; 呢間馮業的 "出品"果然名不虛傳

我哋一共幫襯咗三次馮業, 老闆話佢哋嘅鎮店之寶 - 咖央白麪包同喇沙麪係至"正", 白麪包好好食, 個包好軟熟, 比多士仲好味;  喇沙麪個湯濃而不膩; 桔仔冰都唔錯, 佢哋落咗兩粒梅, 同之前飲嘅味道唔同....

行完Sunday Market 同大型新商場Suria Sabah, 就行過對面嘅Wisma Merdekan商場, 呢個商場較舊, 但都好多店舖, 走中下價路線, 今次專誠去食魚片米同牛腩麪, 係朋友強烈推介嘅, 叫我記住一定要去試吓.......

因貪方便, 就係商場旁邊入電梯直上6樓, 一出去只見一個好殘舊嘅停車場, 冇食肆嘅; 後來由商場中間再搭電梯上6樓, 就有店舖喇, 不過大部份都已關門, 其中想去嗰間牛腩專門店都關門了, 只得呢間"甜甜魚頭米線"有開, 後來問老闆點解星期日D舖頭都唔開門做生意嘅?? 佢話當地好多回教徒都想星期日休息, 所以D員工都唔係咁願意星期日返工, 而佢就全家總動員出嚟幫手, 所以就可以開門做生意喇.....

講番碗米粉, 老闆知我哋係香港人, 唔係太鍾意食太濃嘅湯底, 所以介紹用苦瓜+番茄的清湯, 真係好清甜同可口, 老闆仲話佢哋嘅湯底唔落味精, 叫我哋放心飲, 唔好浪費個湯, 佢話個湯係清熱氣兼飲完包唔口喝, 果然係真......

個魚片同魚蛋都係用新鮮嘅材料做, 一D都唔"鯹", D魚片冇斗湖第一嘅龍疐咁 "鞋"

好可惜當日試唔到個牛腩專門店D "牛" 產品.......

備註 : 以上所提的兩間食店都唔係響Wisma Merdekan 商場嘅 Food Court裡, 喺響6樓停車場旁的小商場裡

31/07 又入番KK Suite住, Cecelia 一樣比番間望海單位比我哋

三晚所住的單位間隔都不同, 但都約有1300 - 1400呎, 個廳好闊落, 張床都好大好舒服, 個人覺得較推薦住KK Suite, 雖然唔豪華, 但設備還勝大酒店, 樓下有club house泳池, 交通方便, 如果6-7人兩組家庭, 非常適合租住 

Centre Point 嘅5樓至8樓都係娛樂場, 裡面好大好大, 有迷你戲院8-10間, 兒童天地樂園, 小食店, 桌球館, 保齡球館等, 消費比香港平好多, 所以班細路喺呢處樂而忘返.......

因為Centre Point 個保齡球館連續3日都爆滿(因為五, 六, 日呢),  為有去打桌球, 1個鐘RM5, 佢哋都打咗3晚桌球

1/8 早上, 班細路終於如願去咗Centre Point打保齡球, RM13/3局, 另加租鞋RM2, 好抵打

1/8 一早去Gaya Street 馮業食早餐, 再行番去Marina Court KK Suite check out, 交低條匙比Cecelia個工人, 就去Centre Point 打保齡球3局, 先至去Tune Hotel check in

要去Tune Hotel check in, 就要去撘免費去1 Borneo 嘅shuttle bus

車站就響Warisan Square前面大路, 即Waterfront 對面, 要先去登記攞"飛", 工作人員會問你住邊間酒店, 佢話住喺果度酒店嘅客人方可免費搭Shuttle, 其實求其講間果度嘅酒店名比佢知, 佢都比上車, 我哋都成個遊客款啦!

早在舊年訂完機票後, 就留意Tune Hotel 嘅減價情況, 始終唔夠人快, 喺舊年11月只能訂到一間RM9.9的房,  因受上次檳城的經驗, 所以我哋係想訂4間房, 可以瞓得舒服D呀!

後來在2月再訂多一間RM25但免行政費, 只是貴咗約HK$22; 仲有兩間房未訂....

跟住4月Tune Hotel KK 就加價至RM45/房, 到出發前2個月, 仲加至RM59,  到6月尾, 終於有特價喇, 於是再訂埋餘下嗰兩間房

4間房 + 12小時冷氣 + 稅 +  服務費 + 2套毛巾 = RM159.97 (HK$416)

當然比舊年檳城嘅Tune Hotel 貴咗每間HK$16.5, 其實今年檳城嗰間都加咗價, 算啦! 我哋都覺得好抵住喇!!

呢間1 Borneo商場是新建的, 入面好大, 集娛樂, 購物, 旅遊, 飲食於此, 商場左右兩旁各有兩間酒店, 商場地庫集中好多餐廳, 超市, 大百貨公司, 衣履連鎖店等, 行一日都行唔曬

我哋會係呢度解決三餐, 食完晚飯, 去咗睇場9:30戲, 班細路睇咗套垃圾電影 - 攪笑詠春, 我同另一半就睇咗套"武俠", 係馬拉睇戲真係抵, RM8/張, 約HK21, 嘩! 香港20年前都唔得啦!

去完Tune Hotel check in, 快快出去搵食, 已是下午3:00喇

喺商場地庫有間叫小二肉骨茶嘅食店有下午茶食, 價錢唔貴, 仲係套餐, 有湯有主菜同飲品, 班細路話仲想食肉骨茶, 話上次係佑記食得唔暢快, 所以就幫襯小二喇

雖然價錢平, 但絕不欺場, 分量同用料足, 所order 嘅套餐都好好味, 果然冇入錯舖!

食完下午茶, 就返上房休息一陣, 7:00 pm又再食過.......

今次試吓日本菜, 一樣響商場地庫, 叫 Sushi King, 係迴轉壽司店

order 嘅嘢有好食, 亦有唔好食, 滿意嘅係靖魚同天婦羅喬麥麪定食, 壽司就較失望, 全部食咗RM81.9, 唔算貴, 但冇驚喜, 比泰國布吉Fuji差好遠.......

十多年前來馬來西亞7日自由行, 整個旅程都幫襯咗Pizza Hut 3次;

今次嚟沙巴, 又幫襯佢3次, Centre Point 分店2次同1 Borneo 1次; 就以1 Borneo 嘅Pizza Hut作今次旅程的終結午餐吧!

雖然係連鎖式經營, 但各處鄉村各處例, 各地都有不同風格; 喺馬來西亞的Pizza Hut嘅價錢真係用"平, 靚, 正"嚟形容絕不過份.......

平均每餐都約RM68 for 7個人, 則每人約RM9.7, 認真超值, 返大陸嘅Pizza Hut食個意粉都唔得啦! 以上嘅價錢當然包含大Pizza, 意粉數碟, 飲品同餐湯+甜品, 因為佢哋有特價套餐組合同超值兒童餐, 兒童餐的意粉分量與散叫冇分別, 每個餐都包有一大片蒜蓉包跟上, 香港同大陸都冇咗好耐啦, 而大芝心批亦有特價, 真係自由行, 自由配.......超值之選呀!

5 個趣

最後響Centre Point 嘅Secret Recipe 食完個Cake後, 就響2:30 pm坐洪叔為我哋安排嘅客Van 去機場Terminal 2, 一樣係RM40/Van, 未夠2:40pm就到機場喇!

總結11天嘅旅程, 大致滿意度85%;  去旅行當然想滿足食, 玩, 住啦! 有15%是未能達到我預期嘅效果, 但朋友同班細路都幾滿意今次個Planning, 對佢哋嚟講最辛苦嘅行程, 莫過於在Sukau森林一夜, 其餘都非常啱口味, 今次費用如下:-

1) Air Asia 機票 6程 (HK - KK, KK - Sandakan, KK - Tawau)連行李, 座位及飛機餐 :

    HK$3520.8/6程機/3人  (其實6程機張機票都唔駛HK$1000, 只不過最貴係行李費, 由舊
    年HK$48/15kg 到今年5月加至HK$100/15kg; 留位費由HK$11.X0 加至HK$20/人, 飛機
    餐亦由HK$16加至HK21.4; 加得最勁係行李費, 加幅成100%, 出年旅行成本仲貴咗, 要加埋
    個燃油附加費HK$60/人/程, 相信明年嘅旅遊費又會貴咗好多...)

2) Gaya Centre Hotel : HK84/晚

3) KK Suite Marina Court : HK$1109/3晚

4) Tune Hotel : HK$211/2房

5) Sukau Greenview B&B and Singamata 訂金: HK$441/3人

6) 已用馬幣 (包括吃喝玩樂, 住宿, 交通及買嘢手信等) : HK$9000/3人

以上合共HK$14,365.80/3人, 即每人HK$4,788.60