此外，昆明動物園另一個賣點，就係一個賞櫻勝地，園內種咗上百棵櫻花樹，初春時節，開得正盛嘅櫻花樹，紅嘅白嘅布滿圓通山上，景致煞食到暈。不過，我哋今次到訪算係晌春尾，櫻花無咁盛放，此外，當然規模上未必及得上日本一啲知名嘅賞櫻公園，仲有，花種亦有所不同，日本常見嘅櫻花係五瓣嗰隻，依度見到嘅就成個繡球咁款。所以，整體效果唔算靚到嘩嘩聲，但都叫第一次睇到咁多櫻花，都心足架喇！聽說每年都會搞個櫻花節，有心嘅嚟嘅都可以留意吓。

1953年建園時，展出嘅動物僅有4種，共4只；目前，全園已有動物140多種，大小夾埋近千隻，如大象、野牛、棕頸犀鳥、黑尾蟒、小熊貓、黑長臂猿、金錢豹、葉猴、金絲猴、東北虎、大熊貓、大雕、袋鼠、美洲獅、非洲斑馬……等等，雖然種類多，但打理得唔多好，啲動物睇落好殘、好孤伶伶、兼且無乜精神。仲有個兒童娛樂區，竟然係廿多三十年前荔園見嗰啲，勾起啲孩童回憶。