夜市就唔一定凈係食，瑞豐依度仲有玩嘅（懷舊玩意彈波波贏獎品）、買嘅（衫褲鞋襪、流行飾品），商品五花八門。不過，檔口雖多，但就過於擠逼，所以，總係人山人海，還好嘅係嚟到嘅人都頗有秩序，唔會左推右擠，算係好有氣氛，非常熱鬧。

無數過有幾多檔小食，總之就多，粗略斷估都上百檔，就係唔知點抉擇，真係心緒交戰。反正小弟食乜都無所謂，重任就交晌老婆手上，由佢發辦，我俾錢。

食過以下幾款，未必係最好，只係想食就想嘅決定：
日式鹽燒雞腿 - 慢工出細貨，等好耐，拎住個籌食完一兩樣嘢返去攞都未遲。TWD40一串，雞肉燒我鹹香惹味，肉質都唔錯，只係唔算太特色！
水煎餃 - 水煎變奏，餃底香脆，肉餡OK，此外就唔算有咩特別。
鹵味大雜會 - 色澤頗深，滷得入味，而無過鹹。
鮮果汁 - 飲嘢晌台灣永遠係最抵，真才實料，睇住佢落，又夠晒大杯喎。芭樂汁（即係番石榴）TWD25、芒果汁TWD30，前者味道帶酸，冰凍醒神；後者味道鮮甜，濃郁果香，正呀！

仲有好多嘢想試，但老婆話夠皮，而且都成十點幾，就咁算住先。