原本無打算晌酒店食早餐，因為本身唔係完全免費，雖然我哋住家庭三人房，但只送一個早餐，有時啲「國策」真係古怪。結果都係晌番酒店食，除咗費事出去周圍搵之外，落過酒店餐廳望望，雖然地方唔太大，廿零三十個位左右，但都整潔企理唔樣衰，難得一個自助早餐賣RMB15，我哋三個人，只需補番兩個人錢，咁就唔使煩喇，所以就幫襯吓佢。

自助早餐賣個RMB15，究竟有咩食？靠牆長枱一字排開，有咩食一眼見晒仲數得出：烚蛋、煮南瓜、粟米、炒青豆、煎火腿腸仔、炒椰菜菜心、油炸鬼、米線、蒸菜肉包、餐包、蛋糕仔、西瓜，再配咖茶、橙汁、豆漿任斟。話好唔好，話差又唔係好差，咁嘅價，你仲想點！

有時做人嘅嘢，好又一餐，唔好又一餐。至於今餐……OK嘅，至少比我晌內地三線細縣城嘅酒店好，啲嘢唔太齣，油少少就走唔甩架啦，況且啲菜肉包同粟米又幾好食。依啲酒店仔嘅橙汁飲唔過，通常仲係晌搵粉開嘅年代，飲豆漿就應該味道有保證啲！