依度就係羅平縣睇油菜花三大景點之一「牛街螺絲田」，其餘兩個叫「十萬大山」、「金雞峰叢」，其實，全縣開咗成四十萬畂油菜花，即係開到周圍都係，差唔多有農田嘅地方，就係種咗油菜花，所以去到邊，就睇到邊，只不過上述所謂三大景點，係形態方面各有特色，唔係就咁得片花海咁簡單！

之前上網睇天氣預測，都話羅平依幾日會落雨，我哋都算好彩，今日第一日天晴，聽日第二日先陰陰天，起碼無雨，係第三日走嘅時候先落毛毛雨，個天真係唔話得！

毛師傅車我哋到半山位，就係睇牛街螺絲田嘅心水位，當場都見唔少龍友係度影相，我哋都第一時間落車睇睇啦！景觀真係一流，180度景觀，廣闊開揚，全片山谷下嘅農田都係一片金黃，幾壯觀，最獨特之處，就係油菜花田嘅形狀一個圈一個圈咁，加上又一層一層，好似啲螺絲，所以叫螺絲田！

晌高位睇完牛街螺絲田睇油菜花全景，再落去下面田間睇油菜花嘅真身，感覺又唔同咗，各有睇頭，真係影相都影唔停！唔好以為油菜花得個睇字，毛師傅話油菜花本身個價值比一般農作物高，主因係可以用嚟生產食油「菜籽油」（唔係芥花籽油，係兩樣嘢），所以每年進入花期，就會全縣人都種油菜花。