遊完赤坎樓，都成7:00pm，其實在附近周圍都好多嘢食，好似民權路、國華街……等等，不過，既然樓旁就有一間度小月擔仔麵，遇其相請，不如偶遇，無謂周圍團團轉，反正台南度小月個名都夠響啦！而依間正正晌1895年由洪芋頭公創立，真係具歷史文化代表性。

依間度小月正正晌角位，都好易搵！街邊檔風格，有肉燥飯、粿仔條、担仔麵、虱目魚丸湯……等等，價位唔貴，飯麵都係TWD50一碗，加蛋就TWD60。

試了一碗擔仔麵（加蛋）同一碗粿仔條，兩者配料都係有蝦，有肉燥，分別在於一個係麵同粿條，前者擔仔麵麵身比我哋廣東麵厚少少，咬落煙韌一啲，嚼勁十足；後者粿仔條似係加厚再加厚版嘅河粉，有咬口，彈性十足，跟台灣人講法，好香Ｑ耶！湯頭醇香不膩，確實好食！無負三代祖傳‧百年老店之名呀！

鍾意食肉燥嘅老友，仲可以晌度買肉燥罐頭走：
TWD130：古早味肉燥，豬油成份拌炒
TWD140：芥花油新配方，植物油成份拌炒
肉燥罐頭附精美禮盒裝，詳洽店內，真係做生意之道！