周氐蝦捲同陳家蚵捲，都稱得上台南必食名物。啱啱落車見到周氐蝦捲，就費事諗，揀咗佢嚟試！

因為志在一試，所以唔會話叫太多，其實周氐蝦捲都有好多經典產品，如：黃金海鮮派、白北魚羹、枸杞貢丸湯、八寶鳳翅……，但我哋都係揀番佢經典中嘅人氣食物。店舖怏餐形式，無加一，部份食物要等（如炸花枝丸），其他即叫即有！

炸花枝丸（兩粒）TWD40，好大粒，大過個乒乓波，店舖話堅持人手製作，不含任何防腐劑、化學添加劑及人工色素，依個當然要真係走去化驗過先知，不過，佢仲話精選新鮮花枝肉製造，依個我又信喎，因為食到啖啖墨魚粒，質感爽口唔粉，外層炸得金香，味道嚟得自然。

周氏蝦捲TWD50，一客有兩大條，每條一開二，睇番佢嘅介紹，原來餡料有鮮蝦肉、上等豬絞肉、魚漿、芹菜、蔥等材料充分攪拌混合而成，再以特選豬腹膜作為包裹蝦捲嘅外皮，經高溫油炸後腹膜上嘅油脂溶化並滲入內餡，再加上祖傳配方嘅特製粉漿，作為蝦捲最外層。真係唔睇唔知咁犀利！確實，食落蝦肉鮮甜，皮薄酥脆，抵讚！

虱目魚丸湯TWD40，本身唔知咩係虱目魚，更唔知佢本身係咩味，好似食魚蛋咁，咬落都有啲爽彈，所以食落無乜驚喜。不過，湯頭幾香，唔好錯過。