5：00am起咗身，瞓唔番，比另一半拉咗出露台睇風景。天朗氣清，空氣好fresh，氣溫應只有18或19度左右，仲睇到天空嘅雙彩虹添，成個感覺好舒服呀！早知係咁，應該跟埋朋友上合觀山睇風景啦!

山莊周圍風景好靚，而且有好多好靚嘅花草樹木，配合山莊嘅歐洲建築，特別有思意啊!

呢間渡假山莊嘅自助早餐非常豐富，唔係話佢有好多款式嘅關係，而係佢哋嘅食物做得好精美，每一款食物，甚至係杯茶同咖啡，都好唔錯!

值得推薦嘅係洋蔥圈, 雖然簡單, 佢用油方面唔係選千年油, 又炸得啱啱好, 脆卜卜, 雖然熱氣, 但都受唔住食咗好幾件呢!

食完早餐, 走出餐廳, 隔離就係山莊嘅朱古力屋, 裝修好童話, 好色彩繽紛, 裡面售買好多款式嘅朱古力, 同18度C差唔多, 但比18度C平, 而且絕不遜色, 我亦都係鍾意食65%朱古力, 我真係有d心陏陏買盒75%, 送比另一半做生日禮物, 事關佢係好鍾意食朱古力, 但仲有十日玩, 天氣又咁熱, 溶晒都未返到香港啦, 今次都係同朱古力冇緣囉!

行完山莊周圍, 又影咗好多相, 跟住就check out離開佛羅倫斯渡假山莊, 希望下次再來跁!

朋友一直向合歡山方向走, 話比我哋睇吓合歡山公路沿途風景, 天朗氣清, 涼涼爽爽, 的確好正。

車行咗約30分鐘, 到達一公路旁, 夜晚呢處係觀星佳點, 朝早就可遠眺合歡山, 真係風光宜人。呢處亦離台灣最高山 - 玉山約2.5小時, 所以有好多玉山嘅農民喺呢處擺檔賣生果, 正合我心意, 又有生果食喇!

呢處由一農民家庭佔了整個觀景台主要位置, 佢哋係由玉山過嚟擺檔, 每天揸車2個多小時嚟呢度出售佢哋嘅「心血結晶」, 佢哋嘅主要農作物有蘋果, 玉山沙梨, 玉山水蜜桃, 黃色小梨子等, 另亦有熟食, 如自家烤雞及烤腸等, 以上四種水果除咗黃色小梨子較酸外, 全部都係「傑作」, 沙梨同蘋果爽夾甜又多汁, 又大又可愛, 令人愛不釋手; 水蜜桃又香又甜, 一樣令人一試難忘。

喺合觀山公路買完生果，繼續行程，回到清境著名地標 -青青草原同國民賓館。

由於港童唔肯早起，趕唔切睇早上9：30青青草原綿羊show，要去到下午2：30先至有show睇，太晏了，所以我哋唔入去參觀喇，只在門口影咗張相就走。好彩冇晌山莊買青青草原門票，佢哋賣NT180，而青青草原門口賣NT160，食價NT20。

另去埋國民賓館兜個圈，就落咗去Mos Burger食埋個免費lunch（因為朋友有十幾張coupon，所以唔洗錢食burger）。

我哋優閒地在露天茶座吹吹風，吹吹水，一向唔鍾意食burger嘅我，都覺得個包特別好食，杯檸蜜特別好飲。
 

其實昨日我哋已經嚟過，由於昨日太晏先至到埔里酒廠，酒廠樓上嘅故事館已經關門，我哋為有去樓下買手信，仲買咗支紹興酒、6盒蒟蒻、6包薑糖（好正嘅薑糖，後悔只買6包咁少）同黑糖。

今日再嚟，除咗路經外，亦想參觀故事館。睇酒的故事，先走入一個兩旁堆滿酒罎嘅時光隧道，由以前釀酒嘅舊年代一路介紹到現在，都比到我哋酒的歷史訊息。

睇完歷史，我哋見到 NT50/杯酒，我又飲唔到女兒紅同高粱酒，咪試下梅酒囉！仲有個古代酒杯送添。梅酒味清甜、我覺得好飲過日本梅酒，唔錯! 唔錯!

離開埔里，天開始下著大雨，雨越落越大，原本計劃去台南嘅七股鹽山及連緣香水蓮花園，就因為台南降雨超過300毫米而取消，真可惜; 由於降雨太大，駕車要特別小心，我從未曾見過咁大嘅雨，當時只是3:30左右，但已是天黑的模樣，前面所有嘅行車狀況完全睇唔到，感謝主，最後我哋都平安到了屏東縣。

去平東縣前, 我哋响公路休息站休息咗一陣; 呢個休息站叫東山站, 東山站設計完善, 唔單止有厠所, 便利店在此外, 仲有設計別緻可愛嘅公園同商場, 揸車揸得耐, 嚟呢D休息站歇一歇都唔錯。

 

台灣朋友話帶我哋食地道黑輪, 而黑輪就係台灣南部出名嘅小食, 佢帶我哋去一間叫原味家旗魚黑輪嘅小店

門口就係小食檔, 裡面有6張枱招呼客人, 食物就响小食檔自選, 價錢每串都係NT10, 花枝卷同蝦卷就NT20, 價錢平過香港街邊檔

味道當然掂啦! 旗魚黑輪有魚味但不鯹, 而魚湯係免費無限添飲, 自己喺小食檔倒湯, 自己招呼自己

食完旗魚黑輪等小食，朋友知港童想食冰，就帶咗我哋去呢間有60幾年歷史嘅甜品冰室食冰冰。

一進店內，除咗可以食冰外，仲有強勁嘅wifi提供比客人，令港童可以一舉兩得。

叫咗兩個芒果雪花加布丁底，好大碗，芒果好多，真係好冰，而且仲係幾甜，可能落咗練奶；紅豆牛奶雪花，中間加咗一隻疍黃，幾特別，但一樣咁甜；百香果雪花，好香果味，一樣好冰但亦較甜。

由於此店是朋友親戚開嘅關係，佢哋請我哋食一碗酸芒果冰，全碗都係冰芒果條，好酸好冰，我就麻麻地，朋友話呢個係另類品種嘅芒果，因為台灣大多數都係種甜嘅生果，好少酸生果，所以好難得有得食，所以佢同我嘅另一半解決咗呢碗另類芒果。

老闆除咗請食酸芒果外，仲比咗個八折比我哋，真係Thank you very much!

食完個雪花冰，已經好飽，根本冇位再放嘢落個胃度喇！我哋都未食正式嘅晚餐，真係眼闊肚窄。

其實「走進涼」本身就係屏東夜市裏，行出嚟已經有好多嘢食，可惜！可惜！有得睇，冇「力」食。

屏東夜巿，基本上係屏東人嘅食堂，冇乜外國人嚟呢處搵食，所以價錢冇逢甲、巿林等遊客夜巿咁貴。