晌羅平嘅第三日，天氣都仍然幾凍，雖話無心水早餐想食乜，但就至少都揀食滾熱辣嘅嘢。出咗酒店斜對面，見到有檔賣粉麵，甚麼餌絲、麵條、卷粉、米線…好似幾得意，儘管鋪面樣衰啲，店內環境污糟啲，整體格局地踎啲，但小鎮小店都係咁上下架啦，咪入鄉隨俗體驗下囉！

首先我哋三人各自叫，有餌絲、麵條、水餃，基本上，都係一大碗粉，上面放少少豬肉碎，配料如雪菜、蘿蔔、蔥粒、薄荷葉、芹菜粒……就放晌入口旁木枱，任意添加，多少隨意。餌絲猶如厚身嘅河粉，係雲南嘅地方麵食，將大米泡浸後蒸熟，磨成糊狀後再搓成方形變成餌塊（晏啲去雲南民族村時就試到燒餌塊），切成條就變成餌絲，放湯煮口感都幾幼滑，但咬落就煙煙韌，其實都幾似食烏冬，只係個樣扁平啲。水餃，唔好搞錯以為同我哋食開嘅水餃有好多餡，查實佢無餡凈係得層皮，同樣當麵食！湯底本身算唔上好鮮甜味美，之但係晌十幾度又雨濕濕嘅天氣下，一碗熱湯已覺好味。跟住大家都知道一陣坐長途車，要食飽少少，所以就加多碗米線一齊分！

以往上開大陸工作，晌小鎮街邊食碗二兩份量嘅羊肉粉，都係大概RMB4左右，所以，依家三個人食四碗粉麵，係無乜餸料嘅粉麵，原本預計都係RMB12左右，最後收廿蚊，成五蚊碗，自覺有啲被劏，不過，事前無問清楚，都無得好講，反正都係幾蚊嘅小事！

由於係套票包嘅酒店，好難講我今次住嘅房價幾多，不過事前都有上去佢個網站睇睇，以雙人房計，門市價就RMB1,200，不過大陸乜都興打折，透過佢個網訂，唔連早餐就大概RMB450，要埋早餐都係RMB550，話晒都5星啦，算抵住喎。

君樂大酒店係今次行程最正嘅酒店，所以梗係留番尾嗰兩晚住啦。除咗客房、服務好之外，最正係個自助早餐，幾豐富，點豐富？留番第六日行程先寫！而佢嘅地點都幾理想，位處昆明較北方置，但對面就正正係翠湖、雲南陸軍講武堂，再行遠少少就係雲南大學、昆明動物園，可以唔使坐車，行路去都得。

食方面，晌東風西路、人民中路交界附近，由酒店行大概十分鐘左右有個嘉香百味小吃城，叫半露天嘅美食廣場，都有成十多檔唔同特色、地道嘅小吃或套餐，可以不妨一試。

顧名思義，雲南民族村相信都唔使多介紹，一個地方睇晒雲南25個少數民族文化嘅主題公園，可謂俾錢入場上一堂雞精班，濃縮了解下雲南少數民族豐富多彩嘅民族風情同民族文化。

雲南民族村離市中心唔遠，大概20min車程，幾方便。側邊係滇池，對面有西山風景區，龍門石窟（有索道連接西山龍門），可一條龍睇晒，不過我哋唔多好寺廟，西山唔啱我哋。如民族村作為獨立一個景點，都要預一個朝旱或一個晏晝，因為除咗有唔同嘅民族村落散居其中，讓你輕輕鬆鬆咁走村串寨，了解各族嘅建築風格、民族服飾、民族風俗之外，周圍仲有園林景觀、秀水綠樹，唔少得梗係唔同民族嘅歌舞表演、或一啲民俗節慶表演，如白族的「三月街」、傣族的「潑水節」。又可以試吓民族風味小食，或者買番啲民族工藝品。

最可惜係我哋因為長途車出咗少少意外而延誤，嚟到民族村都4:00pm，好多表演都完晒。幸好，成個村夠鐘閂門都無人趕，可能地方太大都唔知點清場，再者，村內有間民族餐廳，可以擺結婚酒，我哋走時都仲見有賓客入園赴宴，所以，我估如果你夠膽嘅話，過埋夜都仲得呀！哈哈！

未入雲南民族村，先會經過一個叫昆明故城嘅仿古建築肆，唔係好大，一陣行晒，但就好有種古味盎然。不過，其實全是商鋪，賣紀念品、餐廳、小食店……等等。

其中一間小食店，賣烤餌塊，其實頭兩日晌昆明街邊都見過。今朝晌羅平食早餐就食咗餌絲，依家唔食「絲」，就食「塊」。每塊餌塊都幾大，成張A4紙咁，厚0.5cm左右，放晌碳爐烤熱烤香，再搽啲醬，捲起其他食材就大功告成，夾腸嘅話好似食熱狗咁款！

我哋分別點咗以下兩款：烤餌塊夾油條RMB2.5、烤餌塊夾烤腸RMB3，兩者都幾好食。不過揀醬料要小心，因為醬料有甜有鹹，甜嘅一致認為好食啲，而甜嘅味道類似我哋食開嘅海鮮醬之類；鹹嘅味道就唔多OK，因為類似腐乳味，感覺比較怪怪哋！不過咁平，就幾抵食囉，當下午茶唔錯喎！