這廣場裡全是本地創作,因大廈外有兩個大"人人"字樣,所以旅客都叫它人人廣場~這裡適合下午來,陽光充足能看到建築物上的藝術品。

因我地約了晚餐在6:30,只能在這裡逛1小時。如果每一間小商店都要停下睇下,這裡應該要花三至四小時,這裡有五層,地庫是食店及工作室,地面至三樓是小店舖,四樓是食店(COFFEE SHOP)。

本地創作多是首飾,衣服,小擺設等~不過價錢卻貴了一點~ 

這裡大概有6間房,有一個小小的花園仔。房間面積細,有簡單的設備,電視機,風筒,毛巾,淋浴露,洗頭水,牙膏。謹記要自己帶牙刷。我就是因為誤聽男朋友話酒店有牙刷,結果無帶,要在韓國買。

每個房間都有廁所,沒有分開淋浴間。廁所都好大,不過花灑用起上來就比較麻煩,因為花灑上有一個掣,要按著才有水出,所以沖完涼隻手指都有點累。

今次來韓國,不住現代酒店,而選韓屋,除了比較特別,可感受一下韓國傳統外,就是被溫暖的地板吸引。每晚一入房間,第一時間就是躺下來取暖,真的很舒服。

這裡的主人很好人,很親切。他們一點便會關上大門。第一晚我地1:30AM先回到,嘈醒了他們為我們開門,真的不好意思。但他們臉上還是掛著親切的笑容。所以到第三日走的時候,特意跟女主人影相道別。

民宿附近是總統的辦公室,所以每一條街都有很多警察巡邏,好安全!

順帶一提,民宿已改名為Duri Guest House (www.durihouse.kr) 

釜山往返濟州其實好方便，第一，有多間航空公司營運，釜山航空（Air Busan）、韓亞航空（Asiana Airlines，不過此航線韓亞喺由釜山航空營運）、濟州航空（Jeju Air）、大韓航空（Korean Air）；第二，每間航空公司每日都多達7、8班機，早午晚任何時段都有。而且，機程短，一般都唔使1小時，所以去得釜山，都值得飛埋過去濟州逛吓、睇吓！

咁多航空公司，最終揀釜山航空，不外乎錢作怪。其實之前準備行程時都有留意幾間航空公司嘅價錢，晌唔同時段大家各有平貴，依家15/12號下午嘅航班，時間較好及價錢較抵就喺釜山航空嘅BX8113（14:45 – 15:40）航班，成人價連稅及燃油附加費都喺KRW64,800（折合港紙HKD480），比早前睇到嘅貴咗少少，但都OK啦！

傍晚到咗民宿之後，都將我哋個情況向屋主崔姐姐講一聲，原本都無打算睇醫生，諗住食啲成葯再算，但最後崔姐姐好熱心，幫我哋搵到間仲有夜診服務嘅診所，仲叫埋本喺朋友嘅梁先生，亦喺我哋一早預先聯絡好嘅包車司機車我哋去，崔姐姐唔放心亦都跟埋嚟幫幫手。

無佢兩個真喺唔知點搞，去到診所非常多人，尤其小朋友。晌診所內全韓文，寫嘅、講嘅都喺，根本無法溝通，真喺叫到我哋都唔識應呀！此外，崔姐姐和梁先生曾晌中國及台灣讀過書，識講國語，跟佢哋溝通絕無問題，所以佢帶我哋搵診所之餘，又可以幫手做翻譯，講解我哋身體有咩問題，啲葯又點食法。擾擾攘攘搞咗成個鐘，確診我哋喺輕度食物中毒，要戒口，只可食粥水。

返到民宿，崔姐姐都知我哋食唔得其他嘢，特別為我哋即時煮咗餐愛心白粥，因為韓國唔似香港，落街就有粥鋪，仲要喺白粥喎，咁我哋都總算有啖食。所以，唔喺有佢哋兩個貴人，不知點算！

題外話講少少韓國啲診所，睇醫生還睇醫生，睇完即晌櫃枱交診金KRW16,000；跟住落去地下間附屬葯房再執葯，葯費盛惠KRW17,500，啲葯丸獨立包裝分好晒，一串3小包相連寫明早午晚分3次食（當然喺韓文啦），一共3串即3日葯，清楚易明唔複雜，更唔會溝亂啲葯有無食多食少。

芒果屋民宿就晌濟州市中心，交通非常方便，附近有Lotte-Mart同E-Mart，入貨買手信唔使煩。濟州市嘅樓一般都唔高，芒果屋民宿位處16/F，窗外景觀已經相當開揚，而且更對住漢拿山。基本上屋主崔姐姐都喺住晌上址，所以一室佈置花咗好多心思，有好多小擺設、掛畫，環境企理整潔，床舖感覺又很乾淨，很有家嘅感覺，令人感到舒適、溫馨。但始終喺人哋嘅屋企，總有少少規矩要留意，無住酒店咁隨便嘅，例如出入輕聲啲，唔好嘈到隔離屋；又例如盡量唔好太夜返，免得影響其他人。

屋內有2床房、4床房、6床房，全以碌架床為主，共可容納24人，而地板裝設咗發熱線，所以依家咁凍，但地方踩落都好暖，果然喺舒適、溫暖呀！收費以人頭計，每人每晚KRW30,000，話平唔平，話貴唔貴，況且有免費wi-fi，簡便零食，仲提供埋豐富韓式早餐，其實好划算。由於依期得我哋4個人，地方有鬆動，所以安排咗兩個房俾我哋。

屋內所有公共空間都可以用，如果想大顯廚藝，亦可以使用廚房內用具煮番幾味，有時，更可跟崔姐姐學整泡菜添。想感受吓韓國家庭氣氛嘅小規模民宿，芒果屋可謂不二之選。

此外，芒果屋仲附設包車轉介服務，因為跟崔姐姐相識嘅梁先生，就喺做包車生意，包車一日8小時收費KRW180,000，包晒所有燃油費、路費、停車場……等等雜費，人多嘅話真喺極划算，而且車內又有免費wi-fi，車廂寬敞，話就話超時要補錢，但兩日我哋都過鐘，梁先生都無收，非常爽快。難得大家溝通到，唔怕雞同鴨講，遊濟州景點散，公車未必咁方便，除非你曉揸車，否則包車都喺幾必需！

去旅行，除地鐵，火車亦都喺另一種重要交通工具。晌釜山有好多火車站，都有晒地鐵接駁，不過如果要搭韓國高鐵KTX，就要去「釜山火車站」，跟地鐵1號線釜山站（#113）相連，個火車站都幾大，一出地面就見。

想由釜山出發往慶洲，交通方面有三個選擇：
- 搭乘釜山地鐵1號線至『釜田站』步行至『釜田火車站』→搭乘火車至『慶州火車站』，車程約1.5 - 2小時，KRW6,800。（分「新村號」特快車、「無窮花號」快車）　
- 搭乘釜山地鐵1號線至『老浦洞站』步行至『釜山綜合巴士客運站』→搭乘巴士至『慶州市高速巴士站』，車程約1小時，約KRW5,000。
- 搭乘釜山地鐵1號線至『釜山站』步行至『釜山KTX站』→搭乘韓國高鐵至『新慶州KTX站』，車程約半小時，KRW10,700。

其實各有長短，舊式火車站站停、慢慢行，天氣好可以睇吓風景，而慶州火車站就在慶州市內，就算晌釜山嘅釜田站都屬市內區域，但班次疏落兼車程太長；而高鐵KTX夠晒快，無乜停站，行車穩定，全程晌山中隧道居多，但零景觀，車費較高，仲有新慶州站設於市外，接駁巴士唔密，又唔喺度度地方都到，我哋打的入市區都要成KRW18,000一程；而高速巴士就介乎兩者之間，不過如遇天雨可免則免，仲有就喺晌釜山嘅接駁點「釜山綜合巴士客運站」（老浦洞站）算喺市郊，都幾遠，所以揀咩車都要視乎時間、車費、方便度……等等。

雖然話KTX貴，不過都唔知因乜，我哋由釜山出發往慶洲，原價KRW10,700一位，每位另減KRW4,000，折後價即喺KRW6,700，仲平過搭舊式火車添。不過，唔知喺咪啲人嫌新慶洲唔方便，到站只有我哋4個人落車，下面大堂又喺空無一人，靜得緊要！

有90年歷史嘅國立慶州博物館，主要展示B.C.57 – A.D.935近千年新羅時期首都慶州地區嘅文化遺産，館內收藏咗10萬餘件物品，而展出嘅都有成3千多件。整個博物館分4部份：本館（考古館）、美術館、月池館及戶外展廳。另外晌本館側仲有個特別展館，不過依期無嘢展，又休館。

1. 考古館 - 到訪當日因耐震建設工程休館，休館期仲要由04-12-2012 ~ 05-08-2013。所以未能欣賞代表性嘅展品「新羅金冠」。
2. 美術館 – 樓高兩層，除好多出土美術工藝品文物，仲有個新羅王城復原模型歷史資料室。
3. 月池館 - 錯過了，其實值得入內一看，因為之後所參觀嘅雁鴨池，基本上空無一物喇，從雁鴨池水塘和周邊嘅建築物遺址中出土咗三萬多件遺物，部份700多件擺咗晌度展出，可以一窺新羅王室同貴族華麗生活嘅生活面貌。
4. 戶外展廳 - 因天雨不停，無乜心機多睇，有啲梵鐘（聖德大王神鐘）、古善寺址三層石塔、慶州地區嘅寺廟及宮殿遺址等搬嚟嘅石雕遺物。

如果對佛教或華麗嘅宮殿文化有興趣者，嚟參觀國立慶州博物館就啱啲。

雁鴨池原喺月城東北部東宮內嘅人造水塘，當時被稱為「月池」，但晌朝鮮時代先被改叫做「雁鴨池」。

據史書記載，新羅嘅文武王在位第14年（A.D.674）命令晌宮城裏挖一個蓮花池，做一座小山，種上花花草草，餵養珍奇動物，為紀念三國統一而下令修建嘅，名為「臨海殿」嘅行宮。不過，後被外族侵略而燒毀。雁鴨池就喺當時所挖出嘅蓮花池，位處月城外側東北部，據1974年挖掘時嘅調查結果，雁鴨池呈球形，東西200M，南北180M，有大小不等嘅3個小島。目前嘅雁鴨池接近圓形，喺沿護岸石重新修建而成。

當中好多殿址都無晒，只喺修復咗幾個，內裡有啲模型及文物簡介（韓英中日文），入到去真喺唔太多嘢睇，幸好大量文物，都被埋晌當年國王飼養寵物嘅池內，免遭洗難，要睇出土文物就要晌國立慶州博物館嘅月池館喇！

半月城，就晌雁鴨池對面，喺新羅時期具有代表性嘅宮殿基地。因為呈半月形，所以被稱為新月城或半月城，亦喺新羅王居住過嘅地方。據書講，以前依度有南門、正門、北門、玄德門、武平門等城門，又有月上樓、忘恩樓、鼓樓等樓閣，仲有談論國家大事嘅朝元殿，以及很更多建築物。不過，現況喺冬天顯得一片荒涼，剩低就得啲基石、石碑。

半月城裡面有個石冰庫，顧名思義就喺石做嘅冰庫，即喺古代冰箱。如果唔講，點都唔信眼前依個咁簡陋成個墓塚就喺個可以存冰嘅地方，望入去完全無乜特別，空空洞洞咁。不過，走近入口附近，陣陣陰風冷氣。又喺據講，石冰庫建晌地氣寒冷嘅地方，一半晌地上，一半晌地下，地面同牆壁喺花崗岩，拱形頂部，設有通風口，又用上很多很多石灰，喺有防止外部嘅濕氣同雨水進入嘅作用，再者，存冰時用咗稻草嚟隔熱，科學家做過試驗證明稻草隔熱存冰喺幾有效，真喺唔到你唔服古人智慧，咁神奇嘅結構就可以存放冰塊。

瞻星臺亦喺象徵慶州嘅代表遺跡之一，建於新羅時期第27代王善德女王（A.D.632~647），至今已有1,400多年歷史，但仲喺完整咁保持原貌。

佢喺東方現存最古老嘅天文臺，主要用於觀測天空中嘅雲氣及星座。石結構建築，呈圓筒井形，但直線同曲線嘅搭配十分和諧，臺高9.4M，底座直徑5.35M，由365塊30cm大小嘅花崗岩石塊分27層堆疊而成。正南側嘅第13至第15層之間有四方形出入口，可以進入內部，出入口下邊兩側配備長梯供人登上瞻星臺，當然依家你就唔會見到有條梯啦。

慶州有咩出名嘅食物？就喺菜包飯（쌈밥, Ssambap）同皇南餠（황남빵, Hwangnam-ppang），晌大陵苑周邊就有好幾間專做菜包飯嘅韓餐館，時值正下大雨，又已經差唔多近1:00pm，所以就搵一間似模似樣嘅店鋪試吓菜包飯，咁啱見其中一間有旅行團幫襯，應該都穩陣啩。

入到去，一貫韓式菜館格局，唔知點解，又被安排坐晌韓式矮枱嗰邊啲位。翻開個餐牌，得一版紙，勁簡單，正當我哋唔知點叫嘢好，隔離團個導遊喺帶台灣團，識講國語，充當我哋嘅臨時翻譯，佢話我哋4個人叫兩份菜包飯（KRW10,000 / 份），加個豆腐鍋（KRW8,000）就夠晒，好彩有佢，唔喺今餐實撐爆肚啦。

之前講過我哋懷疑就喺食咗依餐而又痾又嘔（因為之後除咗試過啲皇南餠，晚餐亦唔喺一齊食，此外就無再食過其他嘢，後來睇醫生亦證實輕度食物中毒），拋開依個事件，其實佢啲食物都幾好食，兩份菜包飯已經包咗好多嘢，兩碗白飯，十多款前菜，又有煎魚、煎蔥餅、醬炆肉，最正有鍋熱辣、清甜嘅牛骨湯，又香又好飲。菜包飯其實喺用菜（如白菜、生菜……）包住米飯同熟肉嚟食，鍾意又可以夾啲泡菜、醃菜，下點甜辣醬，味道變化多，富層次。而豆腐鍋要個走辣版，因為可以揀辣或唔辣都得。雖然未能百分百確實，我哋事後覺得最可疑出事喺啲「生」菜，好彩，都算喺不幸中之大幸，食啲葯都頂得住！

大陵苑喺新羅時代王陵及古墳嘅所在地，大大細細猶如小山丘嘅王陵古墳處處皆是，而周圍環境寧靜盎然，加上今日晏晝煙雨濛濛，感覺更顯淒美！

古墳內嘅壁畫蘊含數千年珍貴嘅歷史資料，晌1973年被發掘嘅古墳天馬塚，喺新羅時期典型嘅積石木棺墳，高12.7M，直徑成50M，周長157M，在封土內部有以石頭堆積成嘅積石層；積石層裡有個長6.5M，寬度4.2M，高度2.1M嘅木房，中央放著木棺同屍體，出土遺物多達11,500多件。天馬塚可以入去參觀，但就唔俾影相，裡面放有主要出土遺物嘅複製品

搭完火車晌釜田站轉地鐵，因為姨仔另有「代友入貨」任務，於是分道揚鑣，我哋3個人就索性返番酒店附近食，因為之前逛過中央洞都有幾多食肆。

兜咗個圈，有幾間心水，其實小弟心儀其中一間夠人氣嘅食店，不過望落非常地道，專做街坊生意，生怕溝通唔掂，結果就搵咗DoMoYa依間日式餐廳。一來單睇門面幾光鮮，二來門口棟咗個餐牌，可以睇啱晒先入去，三來就喺價位平宜，再者我哋又唔喺太想食韓國嘢。

入到去頓時感覺溫暖，因為近門口位就放咗部暖爐，我哋成日飽受風雨煎熬，依部暖爐真喺令人窩心。餐牌雖然全韓文，但靠睇圖都略知一二，食物主要分4類：吉列定食、米飯或便當、烏冬、蕎麥麵。跟個侍應落單，喺雙語廣播，佢講韓文，我講英文，加埋手指指，都OK啦，然後佢放低樽水，我哋就自斟自飲。早前都講過，依個喺韓式餐廳特色，無熱茶，一貫白開水，成樽放低，隔客自便！

김치냄비우동泡菜烏冬鍋 KRW5,000
有時啲圖片都唔太可靠，舅仔以為喺清湯烏冬，原來喺泡菜烏冬鍋，食就幾好食，滾熱燙，辛辣惹味，只喺舅仔都唔喺嗜辣嘅人，食起上嚟當然有點點吃力。依個時候，咪就喺發揮群眾力量囉，大家一人分享啲，唔使一個人獨撐！

해물냄비우동海鮮烏冬鍋 KRW5,000
依個跟圖又喺有啲分別，海鮮配料無圖咁多，但味道唔錯，湯頭幾鮮甜，啲烏冬好滑溜，海鮮有啲蟹柳、魷魚、蝦，以及雞蛋。烏冬鍋均會有醃蘿蔔同泡菜作為伴鍋前菜，兼且烏冬份量十足。

로스까스吉列豬扒定食 KRW6,000
依個吉列定食小弟覺得超值，晌香港點一客有啲質素嘅吉列豬扒定食，閒閒哋都要過百大洋，依家只喺KRW6,000，折番HKD45都未使。一客有齊兩大件吉列豬扒、滿滿嘅沙律汁椰菜絲、麵豉湯、大大碗白飯。吉列豬扒炸得非常脆，又唔油，蘸芝麻醬好正，椰菜絲幼細爽口，飯粒又軟熟綿綿，只欠一客牛乳布甸咋，哈哈！抱歉，店家唔賣甜品。

小店地方闊落，招呼又唔錯，人唔太多食得輕鬆自在，仲唔收加一，食3樣嘢夾埋都喺KRW16,000，即喺百二蚊左右，抵食！唯一唔抵咪就喺第二朝嘔番晒囉！

40階梯文化觀光主題街喺展示充滿韓國戰爭苦難時代嘅哀怨同鄉愁嘅一條主題街道，由國民銀行中央洞分行，經過40階梯，一直走到40階梯文化館，全長都只不過約450M左右，當中豎立咗好幾個當時難民區生活場景嘅雕塑，如「媽媽的心」、「爆米花的人」、「拉手風琴的人」……等等，順路嘅話不妨走走看看。

40階梯文於2004年6月被選定為釜山市綜合評價最優秀嘅街道，60多年前，40階梯於1950年6·25戰爭時位處喺交通行政中心「釜山中區」，當時有好多因躲避戰爭嘅難民逃難至此，晌附近搭咗好多簡陋棚屋聚居，從前方碼頭運嚟嘅貨物及救援物資亦晌度販賣及發放，因此形成咗一個市場。亦由於好多人都逃難於此，許多因逃難分散嘅家庭卻能夠在此重逢。故此，40階梯附近仍有著戰爭時逃難所遺留嘅50~60年代建築，可會勾起老一輩人嘅回憶。

龍頭山公園屬市內地標之一，尤其公園內嘅釜山塔，高度120M，晌上面嘅展望臺可360∘睇晒釜山全景及釜山港口，廣闊開揚，一覽無遺，夜景更喺迷住唔少遊客。夜間，藍色照明燈打晌塔身色彩迷幻，令釜山塔更加迷人。

由於公園形狀有啲似一條從海遊上陸地龍嘅頭部，因而得名，就算唔睇夜景，晌天朗氣清嘅日子，上到嚟公園感覺都好舒服。因為園內約有700多種生長繁茂嘅植物，園藝幾有佈局，深受釜山市民喜愛嘅休憩場所，當日所見都有幾多市民在此休閒、曬太陽、做吓器械運動、捉吓棋、放紙鳶。

除釜山塔，其他設施仲有天空咖啡館、世界文化遺產展示館、世界民俗樂器博物館、世界風俗文物紀行、紀念品館、鼓咖啡店、特別展示館……等等，喺公園晌2007年10月重新組建成嘅「世界文化體驗中心」設施。此外公園內仲豎立著朝鮮時代名將李舜臣將軍嘅銅像（高度12M），以及青銅龍塔、鐘閤（釜山市民的鐘）、花鐘（直徑5M）、文學碑等等。

補充資料：
龍頭山公園（免費參觀）
釜山塔（入場費KRW4,000）
世界民俗樂器博物館（入場費KRW2,500）
世界模型船展示館（入場費KRW1,000）

去完龍頭山公園，從另一邊出口落番去中央洞，附近幾條街都有好多食店，兜咗一個圈，睇見依間門口好似麻雀館，實質喺街坊食堂嘅「中央蕎麥」（註：佢無中文名，店內店外全韓文，極地道，真正街坊鋪，個中文名都喺小弟返嚟再幫佢譯番，再者小弟完全唔識韓文，都喺靠啲網上翻譯系統，下文啲菜式名字亦如是，如有錯誤請更正，多多指教）。食完走出嚟個阿叔一睇就知我哋喺遊客，即刻豎起手指公讚依度喺好嘢，從門縫望入去，真喺好旺、超人氣，膽粗粗走入去試試。

原來依間嘢喺賣烏冬同蕎麥麵，啱晒啦，第一日食咗兩餐韓國菜，辣得要命，今餐食餐日本嘢，可以好好緩和一吓。由於牆上嘅菜牌全韓文，只有日文翻譯，一粒字都唔識，完全睇唔掂，姨仔學緊韓文，都識少少，不過小弟都喺手指指就算，睇睇隔離枱有啲咩，篤篤手指搞掂。

場內有一般枱椅，亦有傳統韓式矮枱，第一次坐，感受吓韓式氣氛，不過真喺好唔慣，搞到小弟成日郁嚟郁去！另外，因為喺食日本嘢，無晒大堆頭嘅韓式前菜，只有啲漬蘿蔔同泡菜蘿蔔，我同舅仔食蕎麥麵，兩位女士就要湯烏冬，最難得喺有熱茶奉客，仲要喺玄米茶，香呀。

냄비우동湯烏冬KRW4,500
唔好睇佢細細份，都有幾多烏冬晌裡面，配料有鳴門卷、油豆腐，湯底清甜，晌寒冷嘅冬天，一鍋熱騰騰嘅烏冬食得令人窩心。

특오뎅우동特級烏冬鍋KRW5,000
比起上面個湯烏冬，依個烏冬鍋就抵食好多，只喺多KRW500，烏冬份量及餸料都多啲。

모밀국수蕎麥麵（兩份）KRW6,000
以每兩盆計，伴有醬油，口感超正，因為麥白質感整之滑溜！真喺好快一盆就放晒入口。

김초밤紫菜壽司卷KRW3,000
유부초밤炸豆腐壽司KRW3,000
因為單食蕎麥麵驚唔夠，所以點多兩客壽司。紫菜壽司卷一客有5件，而炸豆腐壽司則一客4件，兩者味道唔錯，飯料鬆軟。

其他仲有蝦天婦羅烏冬（새우튀김우동KRW5,000）、天婦羅烏冬面（튀김우동KRW4,000）、蕎麥鍋（모밀냄비KRW6,500）……等等。價錢實惠又無加一，抵食！

位處影島區嘅南端最終處，又喺另一景點名勝「太宗臺」，被稱為睇「絕景最美日落」嘅理想地點。由於昨日晌冬柏島睇日落嘅經驗，釜山日落都幾早，所以我哋預早少少出發。除日落，沿入去觀景台路途中亦見到有啲懸崖峭壁和奇岩怪石，都有一定可觀性。

影島喺由絕影島縮減而嚟嘅名稱，從前依度就以牧馬場聞名，生產跑速極快連影子都睇不到嘅名馬，故被冠為絕影島。而太宗臺喺新羅時期第29代太宗武烈王晌完成統一三國嘅偉業後，巡視全國時沉醉此處嘅美景中，並晌依度射箭遊玩，因而得名。太宗臺與五六島都喺釜山代表性嘅岩岸，都因波浪侵蝕海岸所形成，太宗臺海拔250M高，內有茂密嘅海松、熱帶性闊葉樹日本桂、楠木、冬柏樹、柃木等200多種樹木。

遊客主要會去太宗臺嘅觀景台，以及再往前沿燈塔木造步道樓梯落至底嘅神仙岩 (신선바위)。而太宗臺以外，影島區仲有2012年7月新開嘅國立海洋博物館（국립해양박물관, http://www.nmm.go.kr/china/）及東山洞貝塚等景點。

不過今次又預得時間多得滯，晌中央洞坐巴士入去太宗臺都喺半小時多啲，車程頗順。個人建議，去太宗臺觀光可以當行山咁嚟玩，條路唔難行，少少斜，但唔會大上大落，而且環境真喺好舒服，期間又設有一啲觀景台，望望壯闊海洋。由太宗臺入口行去最南端主觀景台，大概1個多小時，而由主觀景台順方向晌另一邊返回入口處都喺45分鐘。當然，有小朋友或行路不太方便者，就最好坐太宗臺小火車啦，來回計成人KRW1,500，青少年KRW1,000，兒童KRW600。

今日有啲可惜，天晴但多雲，又厚，等咗咁耐，太陽伯伯都落晒，但就瞇埋咗晌啲厚雲後面。據講，如果夠晒天氣晴朗時，仲可以清楚望到對面遙遠嘅日本對馬島添。

札嘎其市場喺韓國最有代表性嘅水產市場，充滿活力，她自19世紀末至今，韓國嘅海產、海鮮、乾魚貨等約有30~50%皆經由此地流通全韓國，可見其舉足輕重嘅地位。釜山港前嘅南海與附近沿海所捕獲嘅漁貨，一年四季都有著各種海鮮，貨源應有盡有。每年10月左右，更舉辦「札嘎其慶典」，除能盡情享受各種豐富嘅新鮮海產外，仲有許多精彩活動。

近南浦洞地鐵嗰邊有個乾漁貨市場，如果鍾意漁產乾貨，大可走過去睇睇，買啲當手信都好。不過我哋無去，主要都喺嚟搵食，所以一出地鐵都喺直踩去札嘎其市場。札嘎其市場樓高7層，地下喺經營海鮮水產嘅商店，2樓就喺魚生餐廳，亦即喺我哋嘅目標，而5、6樓仲有OASE自助餐廳，美食多到不得了，都喺折港紙三百幾，勁抵。不過，既然想地道啲，又有啲當地氣氛，去2樓搵食就啱心意啲。

札嘎其市場周邊仲有唔少魚類街頭小食，尤其炭火燒烤，最吸引到啲遊客。所以，食唔食海鮮，都值得一嚟！

期待已久嘅札嘎其市場海鮮大餐即將登場，不過未講食，先講環境。上到二樓，感覺就有啲似我哋康民署啲熟食市場咁，不過氣氛真喺一流，靠海一邊窗全部都喺客枱，不過要將就吓，全部都喺韓式矮枱，唔慣都要坐成晚。坐滿客人，好熱鬧，但其實當你一入內，各個檔位已不斷跟實你，游說你幫襯，因為一枱人隨時都食幾十萬韓圜，好似我哋一共6個人都食咗成KRW255,000，但其實好抵喎，因為折返港紙其實每人都喺三百鬆啲，全部都喺海產嘢，更要飽住走添。

先說明少少嘢，雖然拎咗佢卡片，都喺得韓日文，餐廳名字就無錯架喇，叫「거제키다리힛집」，不過「巨濟島刺身室」就我幫佢譯，上到二樓真喺有好多海鮮食店，每個檔口唔算劃分得好清晰，但上面都總有個鋪頭名！

檔口前有好多水缸，以新鮮海產「晒冷」自然少不了。另外餐牌亦分門別類，韓日英中文，雖然啲中文譯名跟我哋所認識略有不同，但大致睇得明，點菜難度唔大！而廚房就晌隔離，即點即煮，做好即上。

前菜
食韓國菜前菜多喺人都知，不過，今餐嘅前菜陣容之鼎盛，有啲無法想像。由於陸續咁嚟，我哋又不斷咁食，所以難有一張前菜「合照」，但前前後後，加埋都成10多樣，包括烚南瓜、灼蝦、天婦羅、豆腐、泡菜、椰菜絲、醃蘿蔔……等等，有啲就唔喺好知咩名，但竟然螄蚶同生蠔都喺前菜嚟，生蠔仲一人一隻，唔使爭，基本上前菜喺唔收錢嘅。好多款前菜都好食，不過烚南瓜同個豆腐最得我心，因為原味突出，南瓜清甜香軟，豆腐味濃質滑，正。

什錦海鮮KRW100,000（大）
分特大、大、中、細（KRW150,000 / KRW100,000 / KRW80,000 / KRW 50,000）
6個人，老闆娘就建議要份大嘅，每份什錦海鮮都包4樣海產，有鮑魚（每人一隻）、海鞘、法螺、八爪魚。新鮮鮑魚刺身都喺第一次食，鮑魚已鎅開一件件，口感爽，但有啲韌；海鞘唔多好食，好似食柴皮咁，又無乜味；法螺OK，點啲醬油食落幾鮮；八爪魚真喺可以用「鮮活」形容，篤一篤佢會仲郁，放入口亦會啜住啜住，挺有趣。

黃魚烤KRW50,000（大）
分大、中、細（KRW50,000 / KRW40,000 / KRW30,000）
黃魚烤都喺要份大，真喺頗大條，單睇賣相，燒得好香甘，肉嫩油香，又喺值得一讚嘅菜式。

盲長魚（盲鰻）KRW60,000（大）
分大、中、細（KRW60,000 / KRW50,000 / KRW40,000）
睇書介紹，已一心想試，所以喺是晚嘅指定菜式。不過，唔習慣嘅話有啲人會覺得好核突，因為啲盲鰻喺活劏，再由老闆娘粉墨登場晌你面前即煮，啲盲鰻邊煮邊郁，海國人可能嚇鬼暈。煮盲鰻其實都好簡單，配菜只有洋蔥同青椒，，撒啲胡椒粉，兜兜炒炒煮熟就喺，味道方面，盲鰻都幾鮮味，啖啖肉，帶點辣（辟腥）。

海味蔥餅KRW30,000（中）
分大、中、細（KRW40,000 / KRW30,000 / KRW20,000）
以鮮蝦為主，蛋餅加入大量香蔥，煎得非常脆香。不過賣到成KRW30,000一客，感覺有啲貴。

生魚片拌飯KRW15,000（中）
分中、細（KRW15,000 / KRW10,000）
反而個魚生飯就抵食喎，因為一客有好多魚生。老闆娘仲教咗個食法，將碗飯倒入魚生內，唧啲韓國甜辣醬，撈勻嚟食，滋味到極。

收費方面，所以前菜送嘅，你晌餐牌點咗幾多嘢，就按價照加，有單有據（不過完全喺韓文，俾番張單我都睇唔明），無加一，無小費，認真實際同實惠！認住「巨濟島」（거제）個名，或認住老闆娘個樣，就算唔喺搵依間「巨濟島」，都絕對要嚟札嘎其市場食番次海鮮大餐！

我們的酒店地店地點十分方便，距離地鐵站不到五分鐘的路程，服務也不錯，房間有wifi，不過不包早餐，唯一的缺點是房間很小，基本上放下睡床便沒有地方走動，還有，酒店沒有牙刷提供，幸好樓下有兩間便利店。值得一提的是，每一層樓的電梯大堂有一張梳妝台，起初我不以為意，以為供人化妝用，行近一看，原來上面放滿不同顏色的指甲油，可供住客使用，真的很週到呀！

這一間連銷咖啡店有一間剛開在我的酒店附近，第三天一早醒來，先到咖啡店來個悠閒早餐，再到酒店執拾行裝。咖啡店分兩層，地下是餅店，賣的蛋糕非常漂亮，價錢也很合理。我們挑了麵包，再到二樓坐下等咖啡。店員給我們一個電子牌，咖啡弄好，電子牌就會閃燈通知我們。看著窗外的街道景色，我們捧著咖啡，享受早餐，感覺無比悠閒。

食完早餐，打點好行李，就向明洞出發，不過，基本上這幾條街都是以售賣化妝品為主，店員都用普通話跟我們問好，在一輪狂風掃落葉的情況下，我們買了大量的護膚品，在超級市場買了一些食品做手信。在首爾的最後一餐，我們吃了韓式烤肉，其實我們整個旅程都沒有放太多心思在選擇食店上，由於時間有限，我們都沒有跟隨旅遊書上的推介去找食店，只是隨便去到哪吃到哪。剛巧街上有個阿豬媽拿著紙牌向我們推銷，說著就帶我們到二樓一間烤肉店。店裡一半是塌塌米，另一半是普通的食店擺設，店員很殷勤的招待和介紹，最後我們點了一客牛肉和排骨，還有一客人蔘雞湯。店員端來生的牛肉和排骨，在我們面前烤熟，再夾到我們的碟中，還教我們用生菜包著吃，果然很美味。人蔘雞湯裡面竟然有飯，很特別，雞湯用料足，很有鮮味。

吃過午餐，再到明洞附近的樂天百貨逛逛，不過裡面的貨品沒甚驚喜，也不是我杯茶，因此不久我們便離開了。

總結這個韓國之旅，雖然很短暫，但卻包含了我想要的。韓國的人都很友善，即使語言不通但他們都會盡力幫忙。韓國的國力這十年間有翻天覆地的變化，不論軟實力以及硬件的配套都有長足的發展，跟十年前相比完全是兩個不同的面貌。韓國，I will be back!!!

住明洞的好處，就是方便。離開酒店，雖然是週日的早上，但已有不少食店營業。抬頭發現一家上樓的韓式粥品店，決定一試。走過一條潔淨的樓階，推開玻璃門，是老闆娘親切的問好。甫坐下，才知道原來小店早已坐滿人，而當中以女性居多，她們更已化好妝，打扮漂亮才出門。打開餐牌，原來剛才熱情招待我們的老闆娘曾上過電視呢！證明這小店是薄有名氣的。我們點了兩個粥，分別是冬菇牛肉粥和人蔘雞粥，稍等一會，店員端來熱騰騰的兩盤食物，除了主食外，還有各樣配菜，泡菜當然不可少，辣味octopus非常可口，辣味恰到好處，而且非常爽口。主食當然沒有令我們失望，牛肉粥很鮮味，味道濃，相對人蔘雞粥較清淡，但人蔘味足，非常滿足的一餐！

這一次旅遊書終於說真話，我順利搭地鐵並找到200號巴士，不過這個藝術村位處郊區，所以路途非常遙遠，經過五十多個車站，終於到達。藝術村裡都是一些有特色的店子和CAFÉ，不過我並沒有逐一參觀，因為我目標只有一個，就是草莓！皇天不負有心人，草莓樂園還在呢！購好入場票，可以參觀兩個園區，兩個都是要脫鞋才能進入的室內場地。第一個有三層的樂園，裡面有波波池，不同的草莓場景，(有點似台灣的多啦A夢樂園)草莓滑梯、草莓卡通片等等，單單拍照已叫我不亦樂乎！連每一層的電梯都有不同的草莓圖案，開心得難以形容呀！本想一試草莓主題餐廳，但發覺沒甚麼特別，結果吃了地道的年糕、韓式魚蛋，最有趣是小店雖然沒有飲用水提供，但會供應紙杯給食客，用來盛載泡著韓式魚蛋的湯，很可口呢，又不是太多味精！醫好肚，繼續向第二個樂園進發，這邊有兩層，地下不太特別，有草莓繩網和擂台，一上二樓，嘩嘩嘩！不得了，簡直是天堂呀！有彩虹主調的草莓滑梯和波波池，還有不同場景的裝置，例如草莓書房、生日會，連洗手間都有草莓！我真的樂透了！最後不少得草莓精品店，雖然談不上很大，但我已到了失控的程度，瘋狂購物去！

本來去完草莓樂園，下一個目的地是汝矣島的六三大廈。不過由於去草莓樂園途中有人見到Premium Outlet就在不遠處，因此加插了這個行程。本來我是沒所謂的，因為根據那本旅遊書記載，六三大廈凌晨十二時才關門，我們應該有足夠的時間加插行程，而且其實這三天兩夜的韓國之旅是徹頭徹尾的為我而設，身邊的他無辜地陪伴我到對他來說毫不討好的景點，我著實有點內疚。結果是，我的內疚在尋找Premium Outlet及以後發生的事上沖淡了，因為Premium Outlet跟草莓樂園看似不遠，實際上走起路來，花了我們大半個小時，又一次走在無人的街道上，不是太好的體驗。到達Premium Outlet已是日落時份，說不上人頭湧湧，但遊人也不少，很有美國的味道，但佔地不是太大。熟悉的品牌如Nike, Addidas, Coach等都有設店，但價錢算不上十分優惠。幸好最後，他在Nike都買到心頭好，這個旅程總算對他有點意義。

其實我看過的韓劇不算多，最喜歡的是浪漫滿屋和大話妹，在大話妹裡，六三大廈是一個非常重要的場景，周瑜琳曾說過，如果在失意的時候，不能夠逃到遠的地方，不妨向高的地方走。六三大廈，曾是首爾最高的大廈，我很想可以從曾經是首爾的最高點，看一看首爾的夜景，也很想一睹地下大堂和電梯的風光，重溫大話妹的浪漫時光。

由於加插了Premium Outlet的行程，我們連晚餐都未吃便趕過去六三大廈。從汝矣地鐵站，沿河邊走大約十五分鐘的路就會到達。又是一條平靜的路，沒甚麼人走在路上，首爾的建築通常都比較矮小，因此抬頭看應該不難認出六三大廈，但眼前最高的大廈，跟香港中環的商業大廈無異，毫無特色，我不知道究竟是不是我期望的一楝。根據旅遊書所說，六三大廈除了觀景台，還有水族館、畫廊等設施，到達六三大廈，第一時間跑到觀景台的售票處，可惜剛好關門，它是九時半關閉而並非書中所說的十二時，我又再一次被書所騙了。不過，其實如果我堅持要上去看一趟，明天再來還是可以的，不過單看地下大堂的裝潢，已經跟大話妹裡面不一樣，因此，我最後還是決定不去了。

失望地離開六三大廈，我們就回到明洞找個好地方醫肚。晚上十時多的明洞，遊人已漸見稀疏。在我們酒店附近的一家韓式食店好像很有韓國風味，於是決定一試。甫進店，先要脫鞋子，因為全店都是塌塌米。我們獲安排坐在一張靠牆的枱，侍應用普通話問我們想點甚麼，我們就跟她的介紹點了個招牌的豬骨鍋和石頭鍋飯。之後待應端來了泡菜和青瓜，在香港吃到的韓國泡菜，味道都很澀，但韓國的泡菜，每一家店略有不同，但都很好吃，我通常都吃光光。馳名的豬骨鍋上場了，配以高麗菜、薯仔等配料，熱騰騰的很美味，豬骨很入味，難怪這店越夜越多人光顧。石頭鍋飯相對普通，盤腿坐上一個多小時品嚐食物，原來真的很累！

釜山地鐵一共有4條鐵路，分別叫1,2,3,4號線，每個站除咗有站名外，亦以3位數字號碼為代號，1號線址為1字頭，如之前轉車嘅2號線沙上站，代號喺#227。跟輕電鐵大同小異，收費分兩區間，KRW1,200（1區間：距始發站不超過10公里的地方） / 1,400（2區間：距始發站超過10公里的地方），而自助售票機一樣有中文介面，買票程序清楚易明。如果好好利用地鐵，其實可以慳唔少，因為有一日票選擇，都喺KRW4,000，以小弟當時匯率，折返港紙都唔使HKD30，全日無區間無限次任搭，好抵，真喺搭3程都回本。仲有隻7日票KRW19,000，7日間不受區間限制可使用20次，但喺相信遊客會使用嘅唔多。

記得去佢個網頁睇睇，了解路線圖及收費模式固然需要，但最正喺晌「地鐵乘車觀光」一欄，有晒4條線沿線主要景點，以及點樣前往及所需轉駁嘅巴士，好有參考價值，而大部份景點主要集中晌1,2號線。

此外，釜山嘅地鐵站都幾長，內有好多出入口，全以數字劃分，指示充足。記低要去嘅地鐵站代號，以及出口數字，搵景點就輕鬆得多。題外話講講，部份地鐵站與站之間，都有地下街，都幾長幾多嘢買，天熱可過吓「冷河」，落雨又可以避避雨。

睇韓劇久唔久見啲男女主角去嘆汗蒸幕，好似幾得意，想試好耐架喇。既然搭通宵機，酒店要4:00pm先可入住，姨仔一早提議去嘆汗蒸幕，舉腳贊成啦。

釜山有唔少汗蒸幕場所，要數最齊最新應該喺海雲台新世界百貨Centum City內嘅SPA Land，場內配套極現代化及齊全。據介紹，從地下千米深引入2種天然溫泉水（碳酸氫納溫泉、氯化納溫泉），打造出22個溫泉池、13個主題汗蒸慕、桑拿、戶外足浴池等。

1/F - 三溫暖及熱療區
天然溫泉浴池、三溫暖及熱療室盡在此層。溫泉浴池一天36次全面殺菌，大可安心享用。而汗蒸慕、桑拿花款多，有芬蘭桑拿浴、黃土泥浴、羅馬室、金字塔室、木炭室、土耳其浴室、峇里室、SEV室、冰房、Body Sound房……等等。另外又有個小食亭，口渴買吓水飲都方便。

2/F - 娛樂區
此樓層有休閒室、護膚室、頭皮及足部護理、商務室、餐廳、咖啡廳。

汗蒸幕跟焗桑拿有啲似，將體汗排出嚟舒緩神經緊張，所以見當地人焗到衣衫盡濕。我就無咁犀利，個個蒸浴室都試吓，志在體驗。多種設計不同、溫度不同嘅蒸浴室，又真喺幾有趣，記得最高一個蒸浴室叫「火釜」，真喺頂唔到30秒，因為成67.6℃，見裡面幾位「阿豬媽」排排坐有講有笑，佩服！佩服！焗完一輪汗蒸幕，上二樓有個大型休息區，幾大排梳化床，有獨立電視機，較點輕音樂，瞓番陣補足少少精神，臨尾再去浸浸溫泉，真喺疲勞盡消。

收費又點計？入場費成人收KRW12,000（平日）/ KRW14,000（週末/例假日），如果想再慳啲，早場（朝早8點以前入場）或夜場（晚上8點以後入場）都非常抵，成人收收KRW7,000（平日）/ KRW9,000（週末/例假日）。提提你，入場費唔喺任玩全日，每次入場費最多可享用4小時，超時每個鐘加收KRW3,000，記緊唔想俾「罰款」就要準時還匙。講真，為番起港紙HKD90都唔使，嘆足4個鐘，又焗又浸又瞓，真喺好抵嘆囉！

嘆完汗蒸幕都成2:00pm，所以費事周圍再搵食，索性晌番新世界9/F餐廳樓層搞掂，當中有日式，有西餐，有café。作為釜山嘅第一餐，食韓國菜好似有啲理所當然咁。

因為已過咗午飯高峰時段，食客唔算太多，而室內裝潢簡約，但氣氛柔和，感覺幾舒服。餐牌內容一眼睇晒，兩頁半紙，多款石頭窩飯及熱窩。點好菜之後，韓式餐廳喺唔喺都送上一大堆前菜，有泡菜、八爪魚、蝦乾、黑豆、海帶蘿蔔絲，款款小巧精緻，味道又各有特色，小弟就最鍾意啲黑豆，煙煙韌，又甜甜哋。除前菜多之外，韓式餐廳另一特色就喺佢哋唔興供應熱茶、熱水，通常一大樽白開水放晌枱上自斟。

翻開餐牌，韓英日對照，加上圖文並茂，大概會知道所有菜式喺乜。我哋點咗2個石頭窩飯、1個豆腐窩加1個全州式牛肉飯，無加一，埋單按價加埋KRW33,500，平衡折返港紙每人HKD60+，雖然晌大百貨公司裡面，又唔算貴喎！

돌솥비빔밥 牛肉石頭窩飯 KRW8,500
韓國菜賣相一向都幾別緻，好似兩個石頭窩飯，飯面伴以5色蔬菜，甚有養生意味，又寧捨好睇。飯粒分明又熱辣辣，不過飯焦唔多，5色蔬菜有洋蔥絲、蘿蔔絲、冬菇絲、菠菜及金針菜，加埋隻生雞蛋，伴飯幾好。雖然叫牛肉石頭窩飯，但牛肉唔多，且碎濕濕，變咗大配角咁！

나지돌솥비빔밥 八爪魚石頭窩飯 KRW9,000
相比起個牛肉石頭窩飯，依個八爪魚下得多好多，味道都幾辛辣，質感柔軟有咬口。而5色蔬菜又用咗另外幾款：大豆芽、紫椰菜絲、甘筍絲、椰菜絲及生菜。味道同樣不俗！

순두부찌개 石頭豆腐窩 KRW7,000
周時都見到有依個石頭豆腐窩，印象上，基本喺韓式餐廳都見佢蹤影。豆腐嫩滑，惹味刺激，但真喺幾辣，嗜辣嘅人一定鍾意，小弟唔好辣，所以要成日灌水。

저주저통비빔밥 全州式牛肉飯（Jeonju style rice topped with wild vegetables and meat）KRW9,000
小弟見識少，食完個全州式牛肉飯，都真喺唔知特別在晌邊。跟上面個牛肉石頭窩飯晌用料9乘似，唯一明顯咪就喺無用石窩。不過，依個牛肉飯都OK嘅！

海雲臺海水浴場稱得上釜山代表性嘅沙灘，因為擁有美麗嘅海岸線，灘長足足1,800米、寬50米。每年夏天遊客絡繹不絕，韓國人都會嚟釜山避暑，到時真喺擠得水洩不通。雖然依家冬天不宜下水，但在灘上漫步，看看藍天碧海，聽聽海風輕拂，感受一下冬日暖陽，美景伴以海鷗傲翔，加上遊人稀少，很有一份讓人寧靜，令人安心嘅感覺。

除沙灘，海雲臺海岸線週邊有唔少配套，如高級飯店、娛樂設施、釜山水族館（부산아쿠아리움），鄰近又有冬柏島、五六島……等景點，真喺足以消磨大半天。

過到嚟海雲臺海水浴場，如果唔行埋去冬柏島真喺好嘥。沿沙灘行到尾，就會見到釜山威斯汀朝鮮酒店，依部份喺酒店嘅後面，有條小路可以入到冬柏島公園，當中有950m散步道直去觀景台，而途經木梯級、人魚銅像、小吊橋等等，煞是有趣。

冬柏島出名在於2005年11月召開嘅第13屆世界首腦峰會就晌島上嘅世峰樓Nurimaru APEC House（누리마루 APEC하우스）舉行，喺釜山引以為傲嘅建築，Nurimaru即喺韓文嘅Nuri（世界）、Maru（頂峰），不過小弟就對此興趣不大，反而睇日落喺我杯茶。

冬柏島本身擁有茂密嘅冬柏樹和松樹，風景本己不錯，座落晌世峰樓側嘅觀景台，位置絕佳，環回270度海景，一眼望盡五六島、廣安大橋等壯觀美景。剛好今日天氣唔錯，算得天朗氣清，夕陽西下，餘暉裊裊，睇得令人陶醉。

晌冬柏島睇完日落，外間本已經幾凍，一入黑就仲凍。加上行得攰攰哋，姨仔提議坐吓休息兼飲杯嘢，就晌出咗冬柏島，過咗釜山威斯汀朝鮮酒店，再過埋橋晌十字路口對面，見到間麵包咖啡室，一於小休取暖嘆杯啡。

小店名字叫Arbor，其中一個意思喺由藤蔓攀爬或樹枝交織而成嘅涼亭或棚架，不過依家就變咗我哋個暖窩。其實隔幾個鋪位仲見到有間星巴克，不過，倒想支持吓啲本土小店。想像當地鋪租唔喺好貴，因為鋪內不單擺麵包嘅包櫃，抑或咖啡室嗰邊嘅枱櫈，都比較鬆動唔緊迫，好有空間感；再者，內裡裝修簡約，燈光柔和，確喺叫人輕鬆自在嘅好地方。

我哋各自點咗咖啡或熱茶，再揀啲小圓包墊墊肚。熱咖啡價錢由最平嘅美式咖啡KRW3,800到摩卡、焦糖咖啡KRW4,700，而熱茶均賣KRW4,000，有伯爵茶、茉莉香片、綠茶。此外，仲有啲果汁、沙律，甚至乎brunch都有。

Cappuccino KRW4,200
意大利泡沫咖啡沖得幾香濃，泡沫幾豐厚，口感唔錯。

Cafe Mocha KRW4,700
摩卡嘅賣相就靚啲，奶泡之上唧咗啲朱古力糠漿打個旋風造型。咖啡及朱古力味都幾夠平衡，不過，天寒地凍，只要一杯燙口熱飲，已足夠暖暖心窩。

小圓包
忘了價錢，唔喺咩好特別嘅包，有點西餐廳餐包嘅影子，難得店員主動幫我哋翻熱，雖然出嚟嘅效果唔喺好熱，但感受到佢哋一番心意。

南浦洞喺釜山市中心出名嘅購物點，加埋光復洞、新昌洞，購物飲食共聚一處。每年10月嘅釜山國際電影節，就為南浦洞帶嚟多好熱鬧，因為其中為紀念電影節而建成嘅PIFF(Pusan International Film Festival)廣場，每年刻有獲獎人手掌、腳印、得獎作品名稱嘅銅盤皆會被鑲晌廣場地面上。

大街小巷兩旁大大小小商鋪，有成過百家，由低價到名牌嘅時裝店，以至珠寶、相機、音響、電子產品、民俗工藝品……等等，加上到處皆有休憩區、雕刻作品，我哋去嘅時候正正臨近聖誕，滿街掛上相關燈飾佈置、璀璨照明，好值得一逛。

再者，附近周邊仲有龍頭山公園、札嘎其市場、釜山近代歷史館、國際市場（南浦洞雜貨街）、光復洞美食街……等等，夠你行半日喇。

閒逛完南浦洞，走過嚟光復洞搵食就最好，因為光復洞美食街，街道細細，兩旁卻開咗好多食店，但似乎都喺以韓式餐廳為多。我哋無跟書搵邊間「指定」，反而兜咗一轉，發覺依間멋있는門面醒目，裡面坐得座無虛席，人氣旺場，望落去似喺本地人居多，所以投佢信心一票！

睇門口個餐牌，就知佢專賣soft tofu stew & steamed kimchi，其實佢招牌都有寫明，不過喺韓文唔識睇啫，而門外易拉架又有多款豆腐鍋（순두부）推介。店內裝修頗為時尚，一室橙色為主系，好搶眼醒目，其實啲橙色咪就喺啲豆腐鍋嘅顏色。餐牌韓英日文對照，亦只喺少部份有圖片，行咗成日，晚餐當然要食得好，最後揀咗3款豆腐鍋及一份炒豬肉。

未嚟主食，先嚟前菜已經喺指定動作，前菜主要都喺啲醃菜，晌度唔多講，絕對喺韓式風味。

게살순두부 蟹肉豆腐鍋KRW6,000
幾款豆腐鍋外觀都差唔多，都喺橙紅色，辣度有番咁上下，對唔食辣嘅我真喺一項挑戰，小弟只好慢慢食啦。蟹肉豆腐鍋顧名思義，就喺蟹肉同豆腐，蟹肉唔算好多，而豆腐已經搗碎咗，味道不俗。

햄치즈순두부 火腿芝士豆腐鍋KRW6,000
第二個豆腐鍋喺配以火腿芝士，幾得意嘅組合，火腿芝士好平常，但夾落豆腐度，韓式煮法，效果OK喎，但稍嫌味道單一，就喺辣辣辣。

굴순두부 蠔豆腐鍋KRW6,000
蠔肉大大粒，味道頗鮮，釜山果然近海食海，海鮮產品靚又平。

두루치기 炒豬肉KRW15,000
要份細嘅炒豬肉，嘩！嚟到原來喺滿滿成一大盆，真喺錯估形勢。睇落材料十分之豐富，仲要明火滾住滾住食，真喺未食見到都要除咗件面褸，食咗就邊食邊滴汗呀！味道猶如泡菜鍋，酸酸辣辣，豬肉份量唔少，好似食極都有。

공기밥白飯KRW1,000
初頭見其他人猛添白飯，仲以為唔使錢任添，原來成千銀一碗，當然講韓圜啦。雖然喺白飯一碗，但唔喺普通白米，喺有味多穀米，口感黏糯有咬口。

費用已包咗銷售稅，但無加一，食到飽飽，非常抵食。

東橫Inn晌釜山車站有兩間酒店，一間正正晌釜山站側，另一間就晌釜山站同中央洞站之間，而小弟今次就喺住晌後者「Toyoko Inn Busan Station 2 (東橫Inn釜山車站2號店)」。其實離地鐵1號線中央洞站幾近，大概只有5-10分鐘腳程，而附近內街又有很多韓式、日式食肆及Cafe，附近仲有一個40階梯文化觀光主題街，距南浦洞、龍頭山公園、札嘎其市場等景點亦不遠。

睇名你都知，佢喺由日本人管理，屬集團式經營，晌日本好多地方都有其酒店設立。客房雖然有點逼狹，但整潔，又有wifi，免費早餐，Toyoko Inn 2確喺個經濟實惠不二之選！但有啲地方要留意，根據當地【資源節約和促進循環再利用有關的法律實施令】，法律上禁止免費提供牙具、剃鬚刀等消耗用品，所以一喺晌櫃台購買，一喺就自己帶去，而房內則有沐浴乳、洗髮水、潤髮露免費供應。其他酒店或房內設施，上佢網頁就一目了然。

最正喺洗手間內有自動坐廁，全電子控制，天冷都唔怕坐「冷板櫈」。相反，最唔好喺4:00pm先可以登記入住，10:00am就要退房，確實，退房時間10:00am就未免訂得有點早，如要延遲退房需額外付費KRW11,000 / 小時，好唔划算喎！

對上一次遊首爾已經是十年前的事了，當年首爾還是叫漢城。我們的早機真的是名符其實的早機，因為這是凌晨十二時三十分的航班。第一次在機場倒數生日，他在Premium Lounge找來了一件平凡至極的蛋糕準備和我倒數，沒有燭光，卻有他的生日歌。等我把生日願望許下了，睜開眼，他竟然還為我準備了禮物，「這個旅程不是生日禮物嗎？」「沒有禮物你會很失望啊！」他真的很明白，女人，就是口不對心。

由於首爾比香港快一個小時，到達首爾是早上五時多。第一時間找個地方來個生日早餐，不過由於時間太早而機場的選擇本身不多，所以最後我們在一家烏冬店吃早點。不過這家烏冬店的價錢不太相宜，味道尚可，沒甚驚喜。用過早點，我們在地下出境大堂的銀行兌換了少量韓寰，怎料在三樓出境大堂的銀行，匯率竟然較好，幸好我們只是換了少量。第一站就要到浪漫滿屋，因此我們先到三樓寄存行李。寄存費用很合理，9000w可寄存一天。

根據手上的旅遊天書，我們先到出境大堂門口搭免費接駁巴士到貨櫃碼頭，之後再轉112號巴士到三木碼頭。一走出離境大堂，我被那一片旭日染紅的天空迷住了，不過同時我亦感受到嚴寒的氣溫。巴士很快就送我會到達貨櫃碼頭，但傳說中的112號巴士並沒有出現，我走到鐵路的出口向一名男士問路，由於語言不通，我只能指著旅遊書上三木碼頭的韓文問路，那個男人看來並不知道答案，但他卻非常熱心地帶我到鐵路的詢問處，還替我問詢問處的職員，但連職員也不太清楚，擾攘了一段時間，職員竟然用普通話跟我說那兒並沒有巴士到三木碼頭，要在機場才有。我們唯有再一次登上接駁巴士到機場，但生日的我已經第一次受到挫敗，咒罵那本該死的旅遊書。再一次重回機場，我走到客戶服務處問路，那裡的職員用流利的英語回答我，並用紙筆把要轉車的車站名稱寫下。拿著客戶服務處的字條，尋找浪漫滿屋之路正式展開！

受了教訓，我決定不再輕信旅遊書上的資料，上車前我再次問司機。下車的地方是一條無人的街道，大概是太早的緣故，我們要在這個車站轉乘另一架巴士才能到達三木碼頭。這個車站有一個很好的設備，就是一個預計巴士到站的時間，不論它的準誠度有多高，起碼我們不用在冰冷的街道上等上二十分鐘！我們到附近的便利店取取暧，時間差不多時才出來。到達三木碼頭時是九時三十一分，去信島的船剛好開走了，要再等一個小時。侯船室只有寥寥數人，都是一些上年紀的叔叔。大約十時十五分左右，有人叫我們在一些表格上填上我們的姓名後，就去登船。接載我們的船很大，而且還可以接載車輛。從地圖看距兩個島很近，大約二十分鐘的船程。由於我以為這船只會來往兩個島，一時沒有留心甚麼時候下船，怎料到我們發覺船靠岸要下船時，船隻已經駛開，向另一個目的地進發，我們萬萬想不到船隻靠岸的時間這麼短。結果船夫告訴我們等船到達下一個目的地後，就會折返到信島，不過這是一個小時後的事了。天啊！又一個小時！！！十分十分的氣餒，其實我曾經想過不把浪漫滿屋安排在行程的第一天，因為我知道尋找浪漫滿屋的路途一點也不浪漫，不希望自己的生日有挫敗的感覺，不過由於信島近仁川機場，而且一大清早出到市區地沒有好地方可去，因此最後還是由浪漫滿屋放到首個行程。

到達酒店已經是下午五時多，跟我早前的預算差不多。由於心情興奮即使一夜未眠都沒有太多的疲累，於是直往第二站Coex Mall。Coex Mall有甚麼特別？為什麼要去呢？原因是裡面有一間我十分喜愛的草莓專門店。我愛上那草莓妹已有十多年了，從前香港有幾間專門店，不過之後已經陸續結業了。由於上一次我遊韓國之時已經試過在Coex Mall的草莓專門店瘋狂購物，因此這個景點也成為我今次韓國之旅的其中一個重要目標。

Coex Mall明顯經過裝修，更富有時代感。一問之下，原來草莓店已經結業了，唉！我唯一的希望也沒有了。隨便逛了一圈，就到Coex Mall外的Bennigan’s吃生日大餐。可能你們會奇怪為什麼我會選擇吃西餐，因為今天已經吃了兩餐韓式的料理，而Bennigan’s是我在美國生活時常光顧的餐廳，我樂於懷緬當年的時光。餐廳的裝潢西化之餘又帶著韓國的味道，甫坐下，侍應端來一杯冰水一客麵包，正當我想叫住他之際，我發現原來這杯水裡插著兩枝飲管，這真是一個浪漫的設計啊！由於我們不是太餓，也預期西餐份量比較多，於是只是點了兩款食品，兩款都有非常豐厚的芝士，其中一款芝士焗蕃薯，鹹中帶甜，好味！