呢間CAFE係從雜誌＜飲食男女＞得知, 好彩地址同我地住間B&B好近, 係住宅區Earlwood, 落機後好眼瞓, 休息左一陣就揸車出發。

去到CAFE大概下朝2:30, 無咩人, 剛見到一個亞洲人著得好casual正想走, 澳洲真係好多華人而且好似唔洗做咁，真幸褔～

我地兩個人叫左兩個 lunch, 大蝦意粉＋鴨胸沙律配黑醋汁, 飲品叫左iced coffee & Chai latte～

澳洲的iced coffee係好多cream同ice-cream, 唔太飲到咖啡味， 搞笑既係我地以為其他食緊野既人係顧客, 原來佢地都係侍應, 聽到我地order後就即刻幫我地沖咖啡～我以為Chai latte係有茶味既咖啡, 點知只係一壺茶～

野食等左大概15分鐘就到, 鴨胸沙律仲係微暖, 份量好充足, 有好多塊鴨胸, AD$14 (HK$116) 既價錢係香港一定食唔到，火剪菜好新鮮而且比香港食到既粗壯, 有兩大片軟軟既無花果, 又甜又大舊, 黑醋汁既甜酸好平均, 伴有炸過既蒜片, 好好食～

大蝦意粉(king prawn linguine), 未食只睇賣相已經叫我嘩嘩聲, parmesan cheese用小碗另上, 蕃茄超級新鮮, 仲有好多basil, 好香～ 大蝦都唔錯, 爽口得好真賽, 有別於我地經常食既急涷貨!

Waitress 問我地好唔好食, 我話 "It's better than good, it's great!" 

整體感覺好新鮮、足料、又有誠意～ 好感動, 係香港高昂既租金及各種成本同環境／文化既關係下, 應該唔會用大概一百蚊既價錢食到呢種質素～

Woods Cafe俾左一個好好既印象我, 我認為呢個trip, 應該有啖好食喇！！！！





 

之前係呢度見過其他人分享Max Brenner 既甜品, 好似好好味, 未出發已經好期待。我地係 Woods café 食完「遲黎既午餐」之後就揸車出 CBD四處行下, 去過 QVB, Strand Arcade, Martin Place 等等….泊好車後發覺附近正有一間 Max Brenner既分店位於一楝商業大廈既平台, 咁好既機會又豈能錯過呢！

一入到門口就見到有兩大桶朱古力被攪動, 一桶係 milk chocolate, 另一桶係white chocolate,有兩大條喉管連接到cashier身後既廚房, 喉管身上仲印有 willy wonka 的字樣, 真係有諗頭, 用<朱古力獎門人>做餐廳既主題。

坐低後我走去counter 落 order, 檯面上有好多有蓋既高腳玻璃座擺放左不同款式既朱古力及飽點, 花多眼亂, 一時間唔知點算好, 侍應又好似等左我好耐, 快快手叫左兩份waffle 再另加士多啤梨, 一個chocolate soufflé, 飲品原先想叫 Frappa (我之後先知個名咋, 一時間消化唔到個 menu), 不過最後叫左個 dark chocolate suckao!

等左一陣, 個dark chocolate suckao先上, 有一杯小牛奶, 一堆黑朱古力粒, 有一個好似香薰既陶器下面放有蠟燭, 上面另有一小杯牛奶。玩法就係將朱古力粒放入牛奶裡面, 用蠟燭既熱力將兩者融合, 再用附上既飲管吮飲。幾好玩, 可按自己既喜好加入多少朱古力粒, 要幾黑有幾黑, 唯一既缺點係牛奶太少, 朱古力粒太多, 有d浪費。

Waffle 雖然唔係即製, 不過質素都唔錯, 加上少少溶既牛奶朱古力係面, 好邪惡呀, 士多啤梨出奇既新鮮, 有濃郁既士多啤梨味, 我估係本地出產, 無經過長途既運輸, 確實係好味d。

係已經有d飽滯既情況下, 我地食埋個chocolate soufflé, 一cut開有少少流心, 微暖,整體質感鬆軟, 好食, 流心正中仲放有一小粒白朱古力, 有驚喜。(之後我發現佢有本 cook book, 裡面個食譜都有提到呢個 trick)

我知道 Max Brenner 係澳洲有好多分店, 我仲有野想試食呀, 希望打後既行程有機會再路經啦!!

第二日去Bondi區, 首先去住完宅區搵早餐食。呢度真係好靚, 好舒服, 好開揚, 真係無咩見過咁長既海岸線, 可以係度住, 我估人都開心D正面D～

M Deli 係我係類似"悉尼open rice" 既website搵到, 係一個小斜坡上, cafe 出面有好多小檯小櫈, 有人帶小狗黎一齊食早餐, 好多人, 好熱鬧~

好彩係cafe入面仲有位, 係cashier位置order食物, 拎走啤仔隨後侍應會幫手奉上～ Cashier個counter 櫃內有好多款色既三文治同麵包, 最適合我呢D麵包精！！

我叫左一個breakfast egg roll及一個tomato & sausage panini (正確名字無記低), 尋日無飲到澳洲既靚咖啡, 早晨時份又點會錯過機會, 黎一個mocha + latte先～

Order後, 侍應立即放底一支tap water加兩隻杯, 真體貼～ 香港都係咁, 就好喇～

Breakfast egg roll 最吸引我既一定係佢個hollandaise sauce, 好味呀, 不過係heavy左少少, 所以配一杯mocha就最正喇～ 澳洲既咖啡我覺得最impressed既係沖調既溫度 (60 - 70度), 暖暖地, 唔似香港一般出品咁熱, 好舒服～

個tomato & sausage panini都唔錯, 少少hot & spicy, 澳洲cafe內售賣既麵包通常都會有跟沙律, 呢個做法令到成個 presentation好好, 而且對食客黎講好體貼～

好食又滿意既早餐 set my good mood for the day~

晚飯時間終於黎到聞名以久既 Pancakes on the Rocks, 因為之前既景點都好快行完而且我地想避開唔排隊, 唯有早d食, 5點半就食晚飯, 唉, 無計啦~

侍應9成係亞洲人, 可見係餐廳做兼職係唔少留學生既選擇, 我估貼士多少少, 收入比較可觀。Menu選擇都幾多, 除左我地一般應為pancake 店要有既甜 pancake, 仲有crepe, 而且又可以用 pancake 配早餐常有既蛋, 煙肉, 腸仔等等。我見有個beef ribs 無食過, 係香港又唔多見有得食, 就叫黎試下，配菜跟薯條我地另外再order左cream cheese 同sweet & sour sauce用黎點。

個 beef ribs 幾好味, 少少軟身, 好易離骨, 可惜bbq醬唔係好夠, 因為太早食飯, 所以甜品都唔可以叫得太大份量但又想試多d花款, 唯有叫個一碟有齊原味(配雲尼嗱雪糕)及朱古力味(配朱古力味雪糕)既pancakes。Pancakes既 size十分適中, 外觀亦好完美, 厚度又剛好, 食落好有質感, 質地鬆軟, 確實名不虛傳, 唯獨原味有缺乏蛋香, 反而朱古力味pancake好有朱古力味, 唔錯唔錯。

係澳洲我一日裡面最期待既一餐就係早餐,  最期待既節目就係去café食早餐, 本地人去café食早餐我覺得就好似香港人去食茶餐廳一樣。不過人地既心思就多好多, 一般黎講地方大d (香港本身太細, 租金又貴, 無計), 裝修有品味d (香港舊式既冰室仲叫做有d集體回憶, 唔舊唔新既就好污衊, 太新既又無人情味, 唉) , 人家出品有心思又健康。我地既早餐幾時先可以好似人地咁呢？

話說回來, 呢間bakery café 又係從雜誌<飲食男女>得知, 出名造酸種飽包, 我年紀輕d既時候唔係好識欣賞又或者個時仲未遇到啱自己口味既sour dough,  唔記得幾時開始我慢慢會食酸種飽包, 造得好的話確實別有一番風味。

聽講呢間bakery café所造既酸種飽包係店主從美國三藩市學藝再帶返黎悉尼, 口啤慢慢建立直到以家個工場大到可以為市中心其他既café提供飽包。

我地靠GPS系統帶路揸車黎到另外一個住宅區 Alexandria, Sonoma 既位置確實有d難搵, 沿路都有唔少路牌指引。café隔離有一間好大既工場, 可惜我地應該太遲去到, 見唔到工人造麵包既情況。Café面積都幾大, 樓底高, 用上黑色做主調, 加上冷氣充足, 係一個避開澳洲夏天猛烈陽光既好地方。

今次我叫左一份dried fruit sour dough 多士另加牛油及果醬, 兩片乾果酸麵包上佈滿不同乾果, 烘得好脆, 其實都有少少硬, 不過仍可接受, 自家製的藍莓果醬好食, 可惜甜左少少。另外一份早餐係黎至café 既summer men, 名字無記低, 大概係羊奶芝士奄列配蕃茄及酸麵包。奄列既質感有別一般既出品, 羊奶芝士跟雞蛋充分混合, 切開後可見到一個個細窿仔, 好有趣, 真係唔知點煮, 小蕃茄依舊咁新鮮。

咖啡的水準又係不用懷疑地好飲，好一個旱餐呢。

食過早餐後我地到Rozelle 區閒逛, 可惜個 flea market 無咩特別, 只係一個小地方俾區內人市將自己唔再鐘意既舊物拎黎擺賣, 我見無咩尋寶機會, 不於都係食下野好過, 哈哈~

糕餅師Adriano Zumbo 係澳洲甚至全球有播MasterChef既地方都爆紅, 佢意想不到既配搭, 大膽既用色都係佢signature, 黎佢既café 絕對係此旅程既其中一個亮點。

Adriano 係附近有兩間分店, 一間係Rozelle 另一間係Balmain, 兩區其實好近, Rozelle 區係一間有位坐既小café, Balmain店就只做take-away。我當然想好好坐底, 慢慢品嚐啦, 所以就先去café 。Café 既位置唔算好搵, 無左 GPS都唔知點算, 牆外有一大幅graffiti, 色彩好繽紛, 十分配合佢既風格,  入內發現店舖超細, 只有6至8個bar 檯式既坐位, 原來入面有個大工場, 用作樓面既地方變得好少。去counter 一睇, 好失望呀, 因為mini-cake 已經賣完, 只有macron, muffin同其他pastries, 唯有只攻 macrons啦~

Order左6件, 有情人節限定既雲尼嗱味, 外層包有朱古力既emo-macron, 美綠味, 青檸配薄荷味, 以及店員推介既海鹽焦糖味。

雲尼嗱味好真, 外型係心情 , 睇到都心甜, emo-macron可以揀公仔樣, 味道要咬開朱古力先知, 可惜我地食唔出係咩味, 美綠味好有創意而且造得好真, 材質既比例十分精準, 青檸配薄荷味好有驚喜, 好夾, 好清新, 至於係香港都成日食到既海鹽焦糖味反而變得無特別。整體既口感中規中矩, 無chewy既感覺又無一咬即散既弊病, 好在唔係好甜。

係心有不甘既心情下, 我叫老公車我去Adriano係Balmain既店, 澳洲既café同takeaway (或者賣食物既店舖) 一般都收下午4點, 好險我地4點前去到, 好彩仲有mini-cake賣。

食得太多, 太密, 我驚會食壞肚皮, 所以只揀左兩款買走。”Grandma’s soap” 名字得意, 外層一抹淡紫色, 好靘, 原來係薰衣草味既忌廉, 裡面係藍莓批而且仲有少少杏仁cream。藍莓批有好多藍莓粒粒, 酸酸地, 中和面層忌廉既甜味, 其他方面無大印象。

另外一個外型好似雪人既叫 "Ssnowmanorr”; 外層係 coconut crunch, 外面係荔枝加茶味既custard, 荔枝加茶味原來好夾而且唔係好甜, 幾清新。試完澳洲餅神既出品, 我發覺原來香港既甜魔好有福氣, 有好多比Adriano更好既選擇, 而且澳洲既糕餅一般size 較大, 我地兩個人都食唔哂, 有少少浪費, 可能晚餐食得太飽喇。

晚飯前特登到Darling Harbour行下，因為出發前做過功課，聽聞Darling Harbour附近呢間Blackbird既食物質素唔錯，一如試下。

星期日既Sydney較香港平靜得多，睇黎消費主意係澳洲並唔受歡迎，一般鋪頭唔會特別晏關門，食肆都無咩人幫襯。Blackbird位於二樓，雖然見樓下有好多食海鮮既餐廳，見到人地既seafood platter好似好好味，不過我都決定忠於我既選擇。

被安排坐好後，我地先叫杯野飲，酒係澳洲可能好平（甚至係必需品），兩杯drink都好大杯！！由於口不停，全程成日食野，我地只order一個appetizer及一個main course。個炸魷魚好好味，尤其係個汁，辣辣地，真係開胃，魷魚本身都新鮮。Reef & beef，包括一塊牛扒同一雙大蝦，兩者質素OK，可能食材本身唔差，無咩失手，但亦無驚喜。

係Blackbird望出去見到Darling Harbour呢個內灣，我地係度諗究竟香港有無類似既地方，最後既結論係無，硬要講的話，可能係尖東既海滂，不過望既都係維港但欣賞維港仲有好多更好既選擇，而且我估以家尖東海滂既食肆都搵到強國人士既足跡，我地仲可以安安靜靜咁一邊食飯一邊欣賞維港嗎？

 

今日揸車黎hunter valley, 經過差唔多3個幾小時既車程我地第一站去左McGuigan Winery, 參加左個winery tour, 諗住可以係佢隔離個間<Cheese Room>參觀之餘又買下芝士當午餐, 好可惜Cheese Room個日不設參觀只可以買芝士, 我見芝士既種類唔算多又唔太特別, 最後我地決定去餐廳食晏。 

係Hunter Valley個本guidebook見到有介紹呢間Goldfish, 距離唔遠又可以對住個vineyard 食飯, 感覺應該唔錯。 去到門口, 幾乎一個人客都無, 但隔離個間日本sushi 同 pizza 餐廳就比較多人, 入到去bar裡面終於見到個waitress 姐姐。

餐廳有個lunch promotion, AUD45可以係前菜及主菜內任揀三款+兩杯酒精飲品, 似乎啱哂我地個胃納兼荷包。前菜叫左兩款, 包括Kingfish Carpaccio with a scattered citrus同Dried hot beer beef with sriacha dipping sauce。

魚既Carpaccio我未試過, 估唔到又幾好食, 配埋帶少少酸既汁, 好開胃。個dried beef 真係炸到好乾又真係好辣, 但係味道好好味, 呢兩個頭盤原全做到叫人開胃, 正！係澳洲又點可以唔食炸魚/海鮮呢, 呢個Seafood hot plate有數款海鮮, 有炸帶子, 食得出帶子味, 係個炸皮有少少唔係好上身, 炸墨魚亦唔錯, 炸蝦同炸魚就用吉列既方法 (即係有麵包糠係面), 都幾好食而且份量都幾大, 食完好滿足！

唯一既唔好處, 就係有蒼蠅, 一路食有三兩隻一齊join, 而且張檯好多屍骸呀！可能位近vineyard, 少不免會有呢個情況, 不過都可以接受既~

去完Hunter Valley已經好攰, 好彩之前check定呢間pizza舖唔算好早收工, 出返黎仲有野好食。Lucio Pizzeria係我係澳洲既大報SMH度搵到既, 話說係「最好食既pizza」, 一場黎到又點可以錯過呢？位置都幾好搵, 係CBD內既Palmer Street, 有一個少少既露天廣場, 有3間不同既餐廳, 以Lucio就係最開邊, 而且另外兩間餐廳毫無人氣, 所以幾易搵。

由於我地唔算太肚餓, 只叫左一個前菜加一款pizza, 前菜係一個用Parma ham 包住無花果既warm salad再加少少parsley, 無記錯的話個汁係用Gorgonzola芝士做既, 帶少少咸香。

呢款Pizza叫做Filetto, 包含左好幾個我鐘意既材料, 有cherry tomato, prosciutto, rocket同mozzarella & parmesan 芝士, 一次過可以滿足哂我。批底係那不勒斯既style, 比較chewy, 厚薄其實幾適中, 不過如果你唔肚餓的話,  都幾飽~ 所有材料都好新鮮, 即叫即整, 確實係間誠意小店！

終於黎到 fish market 啦, 聽過好多人話呢度有好多海鮮, 又平又新鮮, 香港既雜誌<新假期>仲點名話Doyles係人生中必食, 哈哈, 又試下係咪真先。

Doyles位於主入口既第一間舖, 係右邊, 有個細counter仔做take-away, 裡面就係堂食, 一場黎到, 當然想試多幾間唔同舖頭, 所以只係買走左半隻芝士龍蝦。

賣相非常吸引, 用叉切開見d肉都算厚身, 一啖食落, 好重忌廉, 滑滑地, 芝士份量無想像中咁多, 蝦既味道已經唔係好食得出, 不過質地爽口, 唔錯唔錯, 係唔夠熱囉！

另一樣我好想係fish market食既海鮮就係蠔, 行均成個場都好似得Nicholas Seafood 有得賣, 有個亞裔女子係門口擺檔兼幫手執 order。當日有兩款蠔可供選擇, 有本地既Sydney rock同Tasmania 。

兩款蠔既size都好細, 有少少失望呀, 唔知係咪非養殖所以細隻d呢？我地每款要左半打, 坐低試試。識員只俾左好多檸檬我地,  無其他sauce, 我地絕無問題, 不過一向食蠔要點sauce 既人士就要留意喇！

Sydney rock 比Tasmania大隻少少, 味道較咸, Tasmania我就覺得好食好多, 比較甜身, 可惜兩者既新鮮度麻麻, 另我有個印象, 係Fish market 食海鮮都唔係d人講得咁好。

淨係食半隻龍蝦加一打生蠔, 我地又點會夠呢！行黎行去, 睇黎睇去, 都唔知叫咩好。最後買左1kg已烚熟既大蝦。有好多隻, 而且仲有跟sauce 。

蝦既size都好大, 好似好唔真實, 食左兩隻我已經有頂胃既感覺。攪笑既係size 咁大, 連條蝦腸都粗d, 我頂唔順, 一定要拎走佢, 哈哈。 新鮮程度都可以接受, 只不過擹檔擺放既方式有d奇怪, 將已烚熟同生既蝦左右並排, 雖然中間有塊膠板相隔, 始終有d唔知點咁。

總括以言, fish market既野都係新鮮既, 而且好多魚, 蝦, 蟹等等都好大隻, food counter內所有野我覺得都好貴, 本身澳洲既生活指數已經比香港高, 加上「食海鮮」呢個活動本身都唔平, 而且間間餐廳提供既食物煮法相似, 無太大驚喜, 除非你唔買已煮好個d, 買新鮮既, 叫餐廳幫你即刻煮, 任何中/西式煮法佢地都識。如果你極度瘋狂愛「食海鮮」, 又唔介意俾錢, fish market 會係你既選擇。

如我所願去完動物園之後, 仲有少少時間可以去Paddington 行下, 之前去Bondi 既時候已經路過, 眼見有好多小店, 可惜今日下午黎到, 大部份又就黎關門, 唉~

呢個時候, 肚有d痛, 唔知係咪朝早食得太多海鮮(?), 見到有 Max Brenner 既分店, 呢個緊急既時候, 朱古力獎門人確係我既救星！

今次order左我上次見到好吸引既麵包卷, 叫Chocolate cinnamon babka , 仲淋上朱古力sauce,  質感鬆軟, 暖暖地, 而且帶少少肉桂味, 唔錯唔錯。

另外叫多杯drink, 就係見人成日飲既frappe, 老公揀左Cappuccino 味, 可惜呢個可能係 ice shake, 對我黎講太多冰, 好凍, 麻麻地好飲。

係Paddington呢間分店就比CBD人少, 間隔又四正D, 比較好坐, 食完野仲可以去舖內既零售小角落睇下, 有好多款唔同既朱古力產品, 仲有特別既杯售賣, 例如 frappe 杯, 上次飲 suckao隻杯等等都可以買走, 我見仲有一本cook book, 包含仲好多朱古力做甜品既食譜, 好有趣呀~

食完下午茶又閒逛左一陣, 晚餐又食唔落, 記得係Woollahra區有一間高級精肉店, 係雜誌同旅遊書得知兩年前舖頭特意花左成好多錢裝修, 刻意擺脫傳統肉店既形象, 而且仲攞左個best in retail既室內設計獎項。

揸車前立即打開旅遊書, 嘩, 不得了, 7點關門, 我地只有15分鐘既時間, 真係分秒必爭, 拿拿聲去, 快快手泊車 (好彩附近有車位), 去到既時候係6:55pm!!! 係澳洲旅遊, 真係要適應下佢地個時間表。

Anyway, 入到舖頭, 燈光帶少少紅色, 右邊有一個有鎖大凍櫃, 裡面擺賣左好多唔同既菜色, 方便人買走, 除左肉類之外, 仲有前菜同甜品, 大部份需要返屋企加熱或加工。所以我地就只選擇左唔洗加熱既take-away, 店員話有好靚既牛扒同燒雞 (其實可能只賣淨呢d, 唉), 一如試試啦。牛扒要左幾百克,  燒雞要左半隻 (我見佢地好似唔賣半隻架, 我問佢, 好彩佢又賣俾我, 我估可能賣唔晒都係唔要, 不如賣半隻俾我, 哈哈), 最後仲要左4粒用鴨油煮既薯仔。

返到B&B, 雖然已經凍左, 不過都好好食, 個牛扒有肉味, 唔似和牛肉味較薄,  肉質帶少少咬口, 我最鐘意佢外層既黑胡椒, 調味剛好。

燒雞都唔錯, 肉質唔算太淋,  調味亦到位, 薯仔有驚喜, 鴨油有香味, 薯仔皮脆脆地, 呢一餐好唔錯呀!

今日又一早起身, 要揸車去藍山, 過左大概兩個鐘黎到一個叫做Leura既小鎮。可能地勢比CBD高加上仲未中午, 天陰有少少雨不過空氣好好, 好舒服。

Leura係一個揸車去藍山近乎必經之路, 小鎮都幾細, 只有一條大街, 不過兩旁所開既各樣店舖都非常精緻及有品味, 趁仲有少少時間我地就去位於大街一間比較大既Deli食個早餐。

一打開門, 左邊係擺賣乾貨既地方, 有不同既意粉, 果醬, 零食等等, 右邊就係賣各式沙律, 麵包, 小食既take-away, 再入少少就係堂食既地方, 一室用上綠色為主調, 正中擺放一大張木檯, 有少少綠蘋果做裝飾, 感覺唔錯。

再望出去, 嘩, 不得了, 景觀超好。原來堂食地方既盡頭係一個有玻璃窗既大露台伸延出去, 好似建築係個森林上面, 好開揚。

早餐我地要各左個煙三文魚牛角包及芝士菠菜蘑菇奄列配法式麵包。牛角包先到, 正想食既時候發覺原來三文魚同個包都有烘熱, 暖暖地之餘有少少脆邊, 而且仲有side salad, 坦白講真係有d感動, 大家係香港叫個三文魚牛角包你只會期望分別食到一兩片啱啱係雪櫃另出黎既煙三文魚, 再放係早已整好既凍牛角包上, 我地對普通餐廳既食物「唔敢」有太多既要求, 因為我地更怕失望。所以當我見到餐廳對呢d較易整既食物卻肯花心思去加工既,除左暖之外, 又配有side salad, 真係好窩心。

芝士菠菜蘑菇奄列配法式麵包都好好食, 夠哂份量, 係呢個環境食有誠意既早餐再加一杯正咖啡, 感覺真好。

今日係最後一日喇, 一定要把握機會食好野, 哈哈~ 所有今日黎到 Le Monde呢間被當地人認為係 Best food café 既咖啡店食個正早餐~

大概十點前到達, 門口處竟然仲有一班office人係度嘆咖啡？！十點都唔洗返office？真係太令人羨慕喇~

Café 既裝修偏向樸素, 非常有木感, 門口有一幅大黑板寫有不同menu, 呢間café既落單方式有別於一般coffee café, 可以先坐底, 侍應會幫你order。今日我點左個鮮果沙律配乳酪, 見到佢既麵包就係之前食過既Sonoma所提供, 當然不能錯過encore既機會, 老公就叫左個 egg Benedict。

Egg Benedict 外表無咩驚喜, 跟香港可以食到既差唔多, 不過食落就知係高手, 一d醋味都無, 個荷蘭汁唔油, 好完美。我個鮮果沙律係用時令生果所做, 非常新鮮, 可惜無我想食既無花果, 乳酪質地好厚, 絕對唔係牛奶公司既質素, 最後食埋兩片Sonoma既酸種麵包多士, 好滿足呀!

雖然Le Monde被冠名為best food café, 食完個早餐我又唔覺得配得上呢個title, 澳洲既café 質素一般都好好, 但無可否認係好食既~ 我地一次過食咁多野, 隔離d澳洲男士都只不過食個多士或三文治就算, 攪到我地好似好怪, 好大食咁, 無辦法啦, 以家唔食, 唔知幾時再有得食喇~

呢間專業咖啡館我又係從雜誌上得知 (旅遊書亦有提及), 知道佢地有一個咖啡師傅係個好有個性既日本人, 當日去到見到舖頭除左原址間之外, 可能生意太好, 佢地係隔離多開左一間舖專負責外賣, 個位日本名星師傅就係度同佢d同鄉傾計。外表睇上去好cool呀!

不過一場黎到, 我當然選擇係元祖店坐低啦….由於早餐太豐富行程又好輕鬆, 我地都唔太肚餓, 雖然見到佢個muffin好似好好味, 我都只係叫左個Affogato試下。

係元祖店先發現仲有兩個「疑似」日本人, 睇黎日本人沖咖啡既專業係澳洲都似乎站得住腳, 店裡面亦會發現其他日本特色既擺設, 例如一幅寫有日文既細小啤酒旗。

舖頭每個禮拜用既咖啡豆都唔同, 旨在俾客人多d認識同接觸唔同地方咖啡豆既特質, 是日我地飲既咖啡好似係來至薩爾瓦多。

Affogato 裡面既咖啡係比較酸, 唔係我本人所好, 不過同個雪糕一齊食就ok, 如果單飲一杯espresso, 我諗我會唔鐘意。

從雜誌得知店內亦會提供就咖啡豆既特性配搭合適既沖調方法, 非常專業, 如果你係咖啡狂熱份子又有時間, 記得黎呢度同佢地交流下。

好多年前我無意係電視節目睇到 <The naked chef> 呢個節目, 仲記得個時既播放時間係星期日朝早而且無字幕。覺得呢個後生廚師講野好有活力, 煮食既時候態度輕鬆, 睇得人好開心, 個時開始就愛上睇佢既節目, 有時見到有興趣既菜式就會自己抄地照做。估唔到多年之後佢愈來愈出名, 又受歡迎而且仲好有社會責任, 推動fifteen幫助邊青, 又提倡校內飯堂改革及社區食譜交流等等……咁多年黎我對Jamie Oliver既認識都係留於佢既cook book 及電視節目, 今次黎澳洲前知道佢係悉尼開左間意大利餐廳, 可以品嚐到佢親自設計及監督既菜色, 個種興奮真係難以形容。

又係從各大傳媒得知道Jamie’s Italy既定價中下, 但製作認真, 加上Jamie本身既人氣, 造就左呢間餐廳成為悉尼奇葩, 唯一一間人龍店。

我地大概6點半去到已經見到一大條長龍, 心諗排完隊就有得食, 點知, 只係排隊留名同電話, 有位就call back你。一場黎到, 點都要食喇, 如果好似我地呢d遊客唔想人地打漫遊 , 餐廳會俾你一個好似call 機既物體你, 一有位就會震, 到時返去餐廳入座就可以, call機可接收既範圍都唔細, 可以四處行下打發時間, 呢個咁貼心既安排好多年前係美國見過, 真係好好用。

行左大概半個鐘左右，終於有位喇。餐廳有兩層，地下個層對正大街有個造新鮮pasta既角落，不過當時無人整緊。返到去被侍應帶領到樓上坐，望落黎可以見到一大個open kitchen。餐廳內好多人，好熱鬧，serve我地既侍應親自介紹自己，係個意大利人。餐巾印有Jamie’s Italy字樣而且有得買走，碟仔既設計係有少少破舊既瑭瓷碟，貫徹佢輕鬆隨意既風格。

打開menu由我發板，喜見有好多菜式係以前既cook book見過，好有親切感呀。我叫左個Mussel pasta in white wine sauce (細 size), prosciutto pear salad及fish baked in a bag。點菜後餐廳送上麵包，驚喜係麵包上淋有pesto sauce，呢一個做法同香港好唔一樣，一般香港既西餐廳只會提供牛油／橄欖油／黑醋。麵包既質素都唔錯，但我竟然食見到有一條斷開既橡筋圈！最初我以為係蔥頭之類既物體，好奇下試食，真係橡筋，可能店內太忙又黑，偶有失手。

意粉先上，細細碟，手造既意粉果真不同，好有咬口，青口非常新鮮，個白酒汁好甜，好好味，我都試過係屋企整白酒煮青口但係無咁甜，用超新鮮既本地材料煮食真係無得比。

Prosciutto pear salad 好大碟，我地將細檯仔差少少放唔落，prosciutto好味，唔係太咸，火箭菜唔洗講又係好新鮮。

Fish baked in a bag, 又係好大碟，是日之魚配上蕃茄底既汁， 旁邊仲有青口同蜆仔，調味用上dill 同檸檬，想唔鮮味都幾難，魚下面仲有 couscous,  份量充足又好豐富，可惜個汁對我地黎講辣左少少，但都好好味。

最後又點少得甜品，我叫左個tiramisu (Jamie’s way), 呢個菜係佢本cook book都有，個twist就係加入橙汁。Tiramisu上面有一球雲尼拿雪糕，雪糕上灑有少少橙皮碎，加強橙味，賣相又靚。真材實料既tiramisu又點會唔好食，但個人喜歡mascarpone再軟身ｄ。

 成餐飯都好好食，食材新鮮，烹調同調味配合，定價合理，氣氛熱鬧，服務可以，又點會唔成為人龍店呢？加油Jamie~