酒店公寓設計不錯, 設備完善, 兩張床有3呎半闊, 由於加了HK$115小孩票, 包加多張床, 80分鍾按腳, 早餐及成功岭門票

酒店服務都不錯, 有shuttle car來往嘉輝會三間酒店, 只要在每間酒店的lobby講, 佢哋就會馬上安排車來載你去佢哋酒店範圍嘅地方, 如成功岭, 水療中心等

如果一家大小來玩, 最好都是住公寓那邊, 比較寬敞, 而所加的床會放在客廳, 班港童做廳長做得不知幾開心.......

嘉輝會有3間酒店, 街頭是酒店公寓, 街中間是較豪華的嘉輝會酒店, 街尾是嘉輝會婚嫁酒店 - 囍悅酒店, 如不是一家大小來嘉輝會渡假, 可挑選入住囍悅酒店那邊, 因為酒店方面會以$499房價計, 比番一張大床房間, 其他與公寓package 一樣.....

泳池是在嘉輝會酒店與囍悅酒店之間, 如住囍悅酒店會較方便, 不須兜路入泳池, 同時又較近成功岭

永東巴士都是停在街中間的嘉輝會酒店落客, 要預先同巴士司機講要在街頭的公寓下車, 如果唔係在街中間落咗車, 又要再等酒店shuttle bus載番去公寓, 咁就浪費時間啦! 仲有一點是乘回程永東巴士, 是不在街中間的嘉輝會酒店上車, 而是在囍悅酒店那邊上車的

在公寓樓下有一大商場, 可惜大部份店舖已結業, 只有地下數間時裝店, 兩間婚紗店及一間較大的超市, 很多附近的居民在內嘆冷氣......

水療中心算是嘉輝會較有規模的消閒地方, 內裡有好多玩意的, 但時間關係, 我哋只加錢RMB100做咗兩小時全身中式按摩 (原本的按腳是值58元, 按全身要加90元, 再另加10元貼士), 中心內裡都算衛生,  浴室同更衣室都算乾淨, 不過按身就一般, 不能與陽朔那邊比較, 其他人都有同感, 可能呢度唔啱"口味"啦....

成功岭原來已改名, 新名叫是龍鳳山莊影視渡假村, 是一個專門提供給婚嫁公司拍攝婚紗照的地方, 園內背景好歐洲式, 花圃好靚, 真係好適合拍婚紗照;

現在成功岭的入口位進行擴建工程, 起緊個堡壘, 相信嘉輝會發展婚嫁事業係好有潛力.......

另園內都有D零星玩意, 如大陸式機動遊戲, 騎馬, 滑草, 吊索等, 如買全票人仔60元, 可任玩, 散玩5-50元, 入場時見到個滑草場幾好, 就去玩吓, 人仔10元滑一次, 覺得非常不值, 滑兩次就比較合理......

當日天氣好熱, 如果唔係Package包咗入場, 我哋應該唔會比30元入場, 那天仲有好多人影婚紗相, 見到D新人滴曬汗咁影, 都覺得幾"攞命".....

酒店房間雖然不錯，可惜酒店周圍店鋪肅條，食店質素比較差， 我哋一共在5個地方食嘢; 第1間在水療中心斜對面， 專門吃白切雞的飯店，名字已忘記兼冇影相，因為冇驚喜；當日1:00 pm到達的第一餐午飯，order咗８味菜，由於其他的 "雞" 都沽清，只得白切雞，其他是鴨下巴，鐵板牛肉，炒米粉，鹽水菜心，回煱肉，等，除了鹽水菜心外，全部都好油膩，而味道側是白切雞最好味，其他都是普通貨式, 承惠300元;

第2間是在公寓對面的農家菜吃晚飯， 裝修一般，同午飯一樣，  餸菜大都油膩， 逾時用膳大部份餸菜都是沽清, 當晚320元埋單;

第3間是家鄉雞 ，就在公寓樓下 ，24小時營業， 方便宵夜，買了３杯軟雪糕 + ２個烤雞漢堡 + 北京烤鴨卷;

第4間是公寓4樓的綠茵餐廳吃自助早餐， 真是簡簡單單， 冇嘢食嘅， 大家都是吃了一隻烚蛋同隔夜方飽（冰凍的麪包）來烘的多士，飲了杯唔加糖同奶的熱紅茶，呢餐完全唔值酒店所標價RMB50/位.......

終於在第2日食午飯時, 遇到一間滿意的了......

第5間是港式茶餐廳, 是兩日裡吃東西最好味的地方.....

來茶餐廳食嘢, 當然係揀番D五香肉丁出前一丁, 凍奶茶咖啡等, 每人order所想食的, 最後再叫了"雞" + 油菜走油, 好有香港feel, 原來老板也是香港人

兩天消費如下 :

1) 嘉輝會package : HK$499

2) 加人費用 : HK$115

3) 來回車票 : HK$240 (3套)

4) 專門食雞的飯店午飯 : RMB75

5) 加錢全身按摩 : RMB310 (連小費)

6) 農家菜晚飯 : RMB80

7) 家鄉雞宵夜 : RMB55

8) 茶餐廳午飯 : RMB110

9) 滑草 : RMB10

10) 高爾夫球車 : RMB12

合共約HK$1,576.40, 即約每人HK$525.50

在嘉輝會逗留的日與夜，最不滿意的就是"吃"方面，這是一個非常重要的旅遊環節，出去旅遊最緊要是玩同食，所以只會去呢處地方一次咁多啦，唔會有下次了........