松山有兩個公園，山腳就係二龍喉公園，山上就係依個松山市政公園。整個區域話大唔大，話細唔細，晌度有出名嘅東望洋燈塔（中國南岸最古老嘅燈塔）、聖母雪地殿小教堂，仲有一座古舊炮台、松山防空洞展示廊，又有大型露天劇場、小型足球場、回力球場（不過睇唔明點玩 =.=!）、多款康樂器械（又幾好玩架喎），真係估唔到山上有咁多嘢喎。此外，唔少得係依度景觀廣闊，另一鳥瞰澳門全市靚位之一。

不過，有樣可惜，就係求先晌360 café嘆得耐，再嚟到東望洋燈塔就閂咗門，無得入去睇燈塔同參觀聖母雪地殿小教堂。行完松山市政公園，可以沿石級落山，松山算係城市綠洲，係輕鬆散步、呼吸一下新鮮空氣之選，再順路逛埋二龍喉公園。