喺中山路行咗個幾鐘, 個肚開始打鼓, 又係時候坐底食杯嘢, 食個包。

在中山路中後段, 有一間樓上Cafe', 叫小豬找茶, 最得意係上樓處有隻高過大人嘅麥兜毛公仔作招牌, 一於入去食嘢。

小豬找茶唔係以主食為主, 零星有幾種飯食, 如咖哩雞飯同牛腩飯, 佢主要係飲嘢同包點小食, 我哋各叫了一杯美式凍咖啡及原味熱紅茶拿鐵, 分別係14元及12元, 唔係貴D就好D, 相反係原味紅茶拿鐵好飲好多, 唔加糖都好飲過凍咖啡, 另一半又揀錯嘢飲喇!

另外又叫咗個芝士焗地瓜10元, 一客兩件, 細細個, 焗地瓜香口又香甜, 好食; 乳酪烤吐司9元, 即係煉奶烤吐司, 都好好味, 冇揀錯地方嘆茶。

小豬找茶環境舒適, 一共有兩層, 仲有免費Wifi, 所以我哋都喺處坐咗個幾鐘上網, 好讓雙腳休息吓, 繼續周圍行。