台灣朋友帶咗我哋去黎記永和食咗個非常豐富嘅早餐, 飽到連午餐都食唔到, 直至下午4:30至食晚餐補數。

我哋叫咗兩碗鹹豆漿, 兩杯凍豆漿, 兩個燒餅, 10件鍋貼同一份蔬菜三文冶, 共NT226。

鹹豆漿, 豆漿好滑, 蝦米, 魚仔, 油條同香蔥齊備, 足料, 滿足;

鍋貼, 韮菜豬肉, 皮薄饀靚, 又滿足;

燒餅, 香脆可口, 抵食夾大件, 好滿足;

起司蔬菜, 清新飽肚益腸胃, 真滿足。

台灣朋友一向對食好講究, 特別係甜點, 佢非常推薦我哋嚟呢間"日出"買鳳梨酥; 佢話台灣人只買兩間店嘅鳳梨酥: 台北嘅微熱山丘和台中嘅日出。

日出响台中市有四間分店, 其他地方係冇專買店, 只可在台中方可買到其出品。

台灣朋友話好多鳳梨酥加咗冬瓜落去造, 而鳳梨相對份量會少咗, 甚至乎係冇鳳梨在內, 另外好多都加埋防腐劑, 又賣得貴, 所以識貨嘅台灣人就只買以上兩店嘅鳳梨酥。

入到專門店, 店員馬上奉上一杯清茶, 然後整件鳳梨酥給客人試食, 其他餅食一樣; 試食後感想如下:

土鳳梨酥 : 入面鳳梨一疏疏, 絕冇欺場, 酥皮甜而不膩, 甜度洽到好處;

17號鳳梨酥 : 一樣充滿鳳梨果香, 而且味較濃, 酥皮奶味亦較香, 同時亦不太甜;

綠豆酥 : 與香港奇華相比, 日出的綠豆酥較細膩, 豆蓉好滑, 不太甜; 奇華嘅黃綾荳蓉酥則粗及"鞋", 而且較甜;

乳酪蛋糕(日出原味) : 好一件cheese cake, 真係好想買返香港做手信, 可惜唔買得, 店員話最好兩日內食晒佢;

花餅 : 一樣係味濃嘅蛋糕, 有d似cheese cake, 但一d都唔太甜;

日出原味牛軋糖 : 港童對牛軋糖愛不釋手, 食完又食, 為有買咗一盒比佢。

我哋因為仲有十二日玩, 所以唔敢買咁多, 只買了2盒土鳳梨, 綠豆酥2盒同一盒原味牛軋糖, 而台灣朋友就一口氣買咗8盒, 佢話難得喎!

由於一早食咗個勁飽嘅早餐, 加埋d試食, 實在太飽, 太飽喇, 跟本試唔晒日出嘅餅食; 日出除咗餅食外, 仲有茶葉同蜂蜜出售。

離開台中市, 約揸車1小時左右, 就到達日月潭風景區。

我哋先到今晚住宿嘅旅店放下行李, 順便向旅店先攞九族文化村入場劵（住宿係包九族門票), 入場劵包埋日月潭纜車來回, 午飯不吃, 馬上出發去坐纜車及九族文化村玩。

我哋住嘅旅店好近纜車站, 走路都係十五分鐘左右就到。

當日原本落雨, 好擔心冇得搭纜車, 好彩, 去到日月潭就停雨, 纜車冇取消!

如想觀賞日月潭全景, 又唔想行咁多路, 搭纜車係最佳選擇; 如只買來回纜車劵, 費用稍高, 成人每位NT300, 如買九族文化村門票, 係包埋來回纜車, 成人為NT580; 當然買九族門票相對較化算啦!

在日月潭纜車站入閘搭纜車前, 會喺隻手上蓋個印, 喺九族站亦然。

二十年前都嚟過九族文化村, 當時都只係一個純粹展示同介紹台灣小數民族嘅地方, 唔算係一個樂園, 如今除咗以上嘅元素外, 更增設機動遊戲, 仲逐步擴展咗好多機動遊戲, 規模都幾大。

我同台灣朋友首先去玩極激嘅馬雅探險, 即過山車, 港童與另一半一向怕高, 所以冇玩, 呢個過山車真係超激, 超快, 但超臭, 壓在頭至心口嗰個安全欄, 臭到不得了, 日積月累嘅眾人臭汗水滲入軟膠安全欄裡, 在等待過山車開動時, 安全欄壓在頭兩側, 真係非常難頂啊! 希望樂園勤加清潔消毒吧!

另一好玩項目係加勒比海探險, 我哋總共玩咗兩次, 其他激玩有跳樓機, 3D電影等, 而且九族仲建咗一個室內遊樂園 - 阿拉丁廣場, 方便常常天氣唔好嘅台灣, 可以不受惡劣天氣影響，繼續可以玩機動遊戲；其實基本嘅機動遊戲喺呢處都可以搵到, 如果想玩吓樂園設施, 九族係唔錯嘅選擇。

講完動嘅一面, 係靜方面, 九族主題係介紹台灣省內的小數民族文化, 當然有一系列民族嘅介紹啦!  另外亦有民族歌舞表演嘅環節, 可根據指定時間去指定地方欣賞。

我唔明白點解網上好多人話呢個景點冇咩好玩, 冇特別, 其實唔係喎, 大人細路都啱去, 嗰樂園都幾全面吖!

去完九族文化村, 即刻返到旅店攞餐劵食晚餐, 事關我哋都冇食午餐

旅店費用係包食小火鍋作晚餐, 原來就响旅店隔離食, 店名係「三媽臭臭鍋」, 朋友話喺台灣各地方都有分店, 價錢大眾化, 唔貴嫁, 我哋今餐仲係包餐添, 會唔會係"是但"貨式呢? 答案係 : 唔係呀!

我哋一家三口都選咗海鮮小火鍋各一, 朋友就揀咗泡菜小火鍋, 同樣都係NT100, 另有醬油任選同白飯一小碗, 都係包嘅, 其實我哋亦可以叫最貴個嗰小火鍋 - 南瓜元寶鍋, 價值NT130; 另外配料都係NT10 - NT50, 真抵食。

講番個鍋, 海鮮鍋入面有多種材料各一, 如蝦, 貢丸. 花枝丸, 豆腐, 鹵鴨血, 高麗菜, 粉絲, 小紅腸, 鳴門卷, 蟹柳, 雞蛋, 金菇, 腐竹, 豆腐, 豬紅同粟米; 泡菜鍋只係冇花枝丸同蟹柳, 多咗泡菜, 雖然唔係咩嘢貴價材料, 但嗰湯底一d都唔馬虎, 應該用大白菜餚嘅, 好清甜, 但NT100, 約HK$27, 仲想點呀, 收貨啦!

食完個小火鍋, 都已經8成飽喇! 當時都係5:45 pm, 時間尚早, 咪慢慢行落伊達邵商業街行吓, 消化吓, 由食店行去商業街, 都只係5分鐘左右, 好近。

商業街唔係好長, 只係一個 "井" 字形, 行兩三個圈就行完, 街上一樣有小攤檔, 同一般嘅夜市檔差唔多, 但就冇double嘅檔, 樣樣嘢食得一檔, 唔駛睇到眼花, 唔知揀邊檔食。

可能當晚有大雨, 所以商業街在8:30 pm開始收檔

首先見到有蕉賣, d蕉唔係黃色或綠色, 係棗紅色, 叫蘋果蕉, 比一般蕉大一倍, 見佢幾靚, 買兩隻分四份試試, 佢比一般蕉清甜d, 真係好食d, 但我食唔到有蘋果味, 兩隻蕉都幾貴, NT85。

轉個彎, 見到商業街店舖同排檔, 又開始掃街喇! 由於仲飽, 我哋主要揀小食, 見到一小攤檔排晒隊, 原來係食雞翼，見雞翼肥大肉厚，相當好樣，就買隻嚟食，真喺比佢嗰靚樣呃咗，雞肉同糯米冇味嘅，主要係D味粉嘅味，所以覺得麻麻地。

台中出名嘅茶係阿薩姆茶，見到仲有阿薩姆紅茶豆花，好特別啊！就決定試呢個甜品！豆花好滑，仲有D似布甸添，入面仲有紅綠豆，佢唔係加糖粉，係加糖水，唔太甜，唔錯。

商業街仲有好多餅食手信、精品、個人設計手作仔賣，價錢都算公道唔太貴。

早於今年五月初已在網上睇到呢間旅店，見佢做promote，包1間4人山景房、早睌餐，睌餐係小火鍋、九族文化村4張、來回䌫車票4張、歌舞表演門票及拉窰杯，4人價NT5,890，適合暑假平日，所以覺得價錢好吸引，最後決定訂呢間旅店。  

其實在編行程時，會遷就星期五、六，因以上時間喺呢D度假區，特別係大節日、暑假，房價係非常貴，所以編排日月潭、清境同墾丁，會在平日入住，避免比double價。

講番呢間旅店，除咗包含以上項目外，最好係有lift搭，台灣好多民宿係民房，兩三層高，冇lift搭係好攞命架。而間房布置優雅，床係5呎相當闊，房間浴室整潔，我哋非常滿意。  

另一滿意係佢哋嘅家庭式自助早餐，有白粥及配料、炒麪及米粉、炒菜、多士、火腿、水果及咖啡奶茶，雖然款式唔多，但勝在有home feel, 最正個白粥+配料，我揀咗腐乳、豆干同旅店主人自家醃嘅脆瓜，食完嗰胃都零捨舒服。

註： 網上係訂唔到呢個package，要打電話預訂同店主傾入數事宜。