MLKM
我是MLKM。
留言  留言給此旅遊家
  遊記數目 29
  上載相片 536
  上載影片 1
最近分享過的旅程
2012法國摩納哥之旅
國家/地點: 法國, 摩納哥
旅程日期: 2012-08-19 至 2012-08-27
2011維也納三日遊
國家/地點: 奧地利
旅程日期: 2011-10-30 至 2011-11-01
2011德國漫步
國家/地點: 德國
廣州五日食多過玩之旅
國家/地點: 中國
旅程日期: 2011-07-28 至 2011-08-01
蘇杭上海八日遊
國家/地點: 中國
旅程日期: 2010-09-04 至 2010-09-11
德國紐倫堡聖誕市場
國家/地點: 德國
旅程日期: 2010-12-20 至 2010-12-21
廣州為食兩日遊
國家/地點: 中國
旅程日期: 2009-07-16 至 2009-07-17
廣州蓮花山半日遊
國家/地點: 中國
旅程日期: 2009-06-24
2012法國摩納哥之旅 (法國, 摩納哥)
(旅程日期: 2012-08-19 至 2012-08-27 ,  旅程性質: 消閒度假)
 整個旅程  (共6篇遊記)
 分享至Facebook 
發表日期: 2012-09-27
無沙的沙灘 ok喇2012-09-27
呢張及第二張係尋日傍晚影的, 天色較暗.
呢張及第二張係尋日傍晚影的, 天色較暗.

第六日, 朝早起身後去酒店餐廳食早餐. 內容都係最基本的麵包, 果醬, 生果, cereal之類. 選擇唔多, 味道普普通通無驚喜無驚嚇咁囉. Service你就靠自己喇, 侍應手腳非常慢的.

食飽飽後去海灘散步, 老土d叫踏浪. 藍天白雲, 尼斯有; 椰林樹影, 尼斯有(棕櫚樹都算椰樹啩?); 水清沙幼, sorry無噃. 呢度海水水質一般, 唔算清澈, 講到沙幼? 有鬼沙咩, 全部係石仔, 有d直情拳頭咁大, 行上去"銀"腳既. 好彩我地亦唔志在游水, 所以都無所謂的.

參觀時段: 早上
評分: 值得去2  
呢條小巷都算幾靚的
呢條小巷都算幾靚的
唔記得咗係咩建築物
唔記得咗係咩建築物
Cours Saleya
Cours Saleya

沿住岸邊的promenade直行就行到去舊城區. 尼斯舊城區其實唔係幾靚. 街道尚算乾淨, 但唔少房屋墻上都有污漬就有d令人反胃. 況且整體既建築亦無咩特色.

跟住我地行到一個叫Cours Saleya既市集. 呢度賣鮮花為主, 另外亦有蔬果, 香料等. 阿媽買咗樽rose jam帶返香港. 呢個市集十分熱鬧, 而且滿有歐洲風情, 可以一來. 

參觀時段: 早上
評分: 值得去3  
中上水準 笑臉2012-09-27
正

中午我地去咗Chez Freddy食野. 呢間餐廳網上好多人推薦, 名氣不小的. 地點就0係Cours Saleya市集旁.

生蠔: 有6隻, 我地大家分食. 海水味非常濃, 但可能當時未係季節, 所以蠔身偏瘦, 而且無咩鮮味.

海鮮鍋: 有青口, 蜆, 魚, 蝦, 薯仔, 一鑊熟. 個容器好得意, 下面係用來放空殼的. 食材新鮮, 味道自然唔差得去邊, 入面既薯仔索咗海鮮汁十分美味. 可惜貝類唔夠之前食過的咁肥美. 份量唔少, 再加埋薯條, 女仔來講一個人真係食唔曬.

阿爸唔跟我地點海鮮鍋, 要咗個燒鱸魚. 試咗少少, 皮脆魚香但肉唔夠嫩, 鞋咗d.

Overall來講呢間店都吃得過的, 雖然無前一日唔記得名果間咁好.

評分: 味道4   服務3   環境4   衛生3   抵食3
睇夜景 笑臉2012-09-27
山上有瀑布及觀景台
山上有瀑布及觀景台
呢個角度望出去是幾漂亮的
呢個角度望出去是幾漂亮的
海邊靚過舊城區
海邊靚過舊城區
舊城區
舊城區
日落的一瞬
日落的一瞬
夜景
夜景

食完飯後我地返酒店休息, 跟住就出來上山頂. 尼斯面積唔大, 所有地方行都行到去. 山上有個人工瀑布, 風涼水冷係個欣賞夜景既好去處. 講燈火璀燦就梗及唔上我地山頂喇. 始終呢度唔係咩國際大都會, 無得比較既. 一家人0係上面吹風兼吹水, 都好耐無試過咁溫馨了.

參觀時段: 晚間
評分: 值得去4  
甜咗d 笑臉2012-09-27

上山前買咗Lac Chocolatier既蛋糕0係山頂食. 兩件分別係咖啡千層蛋糕及檸檬慕絲蛋糕. 前者咖啡味香濃, 蛋糕本身就實淨咗少少, 唔夠鬆軟; 後者既mousse就好滑. 兩件餅味道比較甜, 論味道係今次旅程中最遜色的, 不過仍算好味的.

4條友由日落睇到華燈初上, 餵完蚊後終於落山, 去Café de Turin食晚飯. 呢間餐廳我地之後會重臨, 食評請留意後面.

評分: 味道4   服務3   環境4   衛生3   抵食4
呢類熱帶植物, 香港成日見, 無咩特別
呢類熱帶植物, 香港成日見, 無咩特別
錦鯉池
錦鯉池
難道法國都有放生烏龜既習慣?
難道法國都有放生烏龜既習慣?
唔係塑像, 係一隻活生生的Flamingo
唔係塑像, 係一隻活生生的Flamingo
覺唔覺佢瞪住你既時候個心有d寒?
覺唔覺佢瞪住你既時候個心有d寒?
遊人可以行入去餵呢班鴨仔
遊人可以行入去餵呢班鴨仔

第七日我地去Phoenix Park. 呢個係一個有植物有動物既大公園, 兼有個好小兒科既音樂噴泉. 入場費係以旅遊區來講平到你唔信既2€! 嚟呢度你唔好期望有咩睇, 入來relax下, 訓下草地餵下鴨仔就得. 其實好多人來尼斯都係想咁樣放鬆下0者, 公園環境係十分清靜舒服的. 如果係第d月份嚟, 天氣無咁熱既話會更好. 我地當時係日日陽光普照的35度或以上.

印象最難忘的係果隻白色貓頭鷹, 你行去邊佢就擰個頭啤你啤到邊, 你都咪話, 個心真係有少少怯0架. 班鴨仔就好可愛, 完全唔怕人, 一入去就圍住你等你餵, 畢竟0係香港都好少同呢d非寵物類動物接觸, 幾好玩的.

0係巴黎我地行街食野為主, 嚟到尼斯就想放鬆下. 所以每日都係周圍行下坐下, 去海灘曬下太陽吹下海風, 話咁易又過一日.

參觀時段: 早上
入場價錢: 每人2歐元
評分: 值得去4  
咁既顏色, 你估d蝦蟹仙遊咗幾耐?
咁既顏色, 你估d蝦蟹仙遊咗幾耐?

中午我地又去返尋日去過的Café de Turin食飯.  呢間餐廳都是幾十年老字號了, 我地尋日來吃晚餐時覺得佢既海鮮盤除咗鹹咗少少外, 味道都唔錯. 所以今日打算來個翻兜. 兩位老人家一排無食中菜, 周身唔聚財, 走咗去搵中餐廳打救. 呢餐變咗得我同細佬兩個人食.

我又叫番上次食過的海鮮盤, 但今次一擺上嚟令我超失望. 首先隻蟹, 大家睇相都見到隻蟹係瘀黑色的, 唔係前一晚的紅潤鮮艷. Lunch價錢較平所以差D? No, 我兩次都係點同一味, 俾既價錢一樣, 約30€左右. 所有lunch的食物質素都咁差? 又唔係, 隔籬枱個海鮮盤的海鮮色澤光潤, 比我的新鮮得多. 味道方面亦較第一餐失色, 蟹肉超鹹, 雖然上次都偏鹹, 但至少入得到口, 今次則簡直鹹到吞唔落. 蝦既顏色亦比上次更暗啞, 又鹹, 同隻蟹一樣都好似用鹽水烚過咁. 海螺雖然唔鹹, 不過咬落好腥, 完全唔係新鮮貨.

細佬就點咗生蠔. 生蠔分normal or special, 兩款都有3個size可供選擇. 細佬揀咗special中最大的一款, 20,90€6隻. 我地一家少食生蠔, 所以都唔知係咩品種. 生蠔看上去都足夠新鮮的, 味道據細佬講蠔身肥美, 但同樣地極鹹.

而細佬食過生蠔後返到酒店開始覺得唔舒服, 嘔咗一陣. 好在嘔完後無事. 係咪同Café de Turin的食物有關我唔知, 但為免掃興, 我都係唔建議各位來呢度食.

每人消費: 約30歐元 (午餐)
評分: 味道2   服務3   環境3   衛生3   抵食1
  0 個留言    |  加入你的留言
此遊記的留言
加入留言
如要加入留言, 請先登入