在溫哥華搭灰狗係同火車及另一間巴士公司(Pacific Coast)分享同一個車站,幾有趣, 他們的車站都是一式一樣的無論這個所謂總站定還是waterfront站, 不過由於這個總站正在維修, 外牆搭滿鐵枝鋼架, 我們最初來買票時找不到入口,找了一轉才將它找出來, 雖說由溫哥華到卡加利好像只是過隔離個省咁,但搭巴士就係要15~16小時,搭火車重離譜叫妳搭至”愛民頓”再轉VAN仔形嘅巴士去啦咁話,價錢重貴多幾十添,
第一次在加國坐灰狗才知道這裡嘅灰狗重兼埋做速遞,真係識得資源増值喎,可能由於這緣故,中途分站很多,兩個鐘頭停一停嚟嘈醒妳, 係咁上落貨同簽簿全程起碼嘥一粒鍾啦, 中途(大概凌晨03:00 ~04:00)有個大站重會趕晒D客人落車,因為保安理由喎,在車站內呆等半個鍾才放番妳上車, 還有一樣留意到原來加國人民都幾”心急”下架, 當我們在總站等上巴士時,重有成45分鐘先開車他們已經攞定行李企定定排隊等上車, 又見過有次搭船過北溫時有乘客一上船唔坐低就企定喺另一邊門口等衝閘落船! 我重以為呢D嘢香港人先做添,原來加拿大人都如是,
而喺今次旅程我們試過不少這裡超市的外賣食物,因為有時要坐長途車啦,又或者想慳d使啦, 不過大部份味道都不錯, 尤其係壽司雖然全部都係”賓賓”整嘅, 口味重要係唔多正宗嗰隻, 大部份味道似加洲卷,內餡都係Mayo撈三文魚,烟三文魚,罐頭吞拿魚啦, 有時買貴少少會有隻蝦咁,亦有買過些沙律, 都唔錯嘅, 買健康嘅飽就會”貴”買唔健康嘅飽就會”平”幾諷刺下,

06/Oct. 幾經辛苦在卡加利的灰狗車站乘的士前往唐人街撞正落雨,溫度急轉直下條街只得兩,三度加埋刮風,打咗個電話即轉入一個小商場搵食,個商場雖則唔大但一入去就發覺街頭播粵曲,街中間播緊”秋官同阿姐個賣唱會”商場口有間日式料理店重做埋”all u can eat lunch”呢度有番咁上下大間的日式餐廳似乎都會有呢種營業模式,但我地無諗住食壽司,所以繼續行,行至成個商場最尾尾,見有家韓國料理店喎, 佢地個午餐嘅套餐-豬肉湯飯好扺只係做$6.90,不過我地無叫呢個午餐,
反而叫咗個二人套餐Cambo for two, 先上嘅係日式塩水烚枝豆, OK嘅味道, 再上的係韓式辣醬跟羅馬生菜當係沙律又幾特色喎,不過個辣醬吃多了的話會覺得幾辣下所以用水份充足嘅羅馬生菜去中和一下都係一個合情合理嘅設計, 又幾好味喎個海鮮豆腐鍋份量尤其大,重有少少辣味添,喺咁凍天氣食啱晒,鍋的豆腐質地很滑不過豆味就無啦, 海鮮也用了不少,有蝦同帶子粒粒,這豆腐鍋有滑滑豆腐配合有咬口嘅海鮮粒粒一軟一硬正正是我們亞洲世界裏講的陰陽之道?! 韓式鐵板牛肉肉味夠, 配炒嘅蘑菇片蘑菇味重,蔥亦炒到剛剛好熟沒有過頭好味道, 米飯亦唔太差, 有時真係店都不可以貌相喎, 估唔到在卡加利會巧遇韓國廚藝界高手,雖然再沒有甜品之類但我俩已經吃得飽飽的,有足夠能量同外面的冷風冷雨格鬥了,

當我們去完親戚處回到”城”裡見重有差不多兩個小時才是灰狗開車時間,於是乎便在附近隨便一家”CAFE”開我們的下午茶了,店座落於一間藝術中心內部,採開放式吧枱形式, 店名”De Ville Luxury Coffee & Pastries” 店內陳設光潔明亮之餘亦有鮮艷色彩嘅餐具帶起現代感覺, 坐位亦有吧枱高櫈, 普通木櫈同梳化適隨專便,
我們要了一份”Panini sandwich”這種三文治在B.C.隨處可見, 大部份一樣樣只是餡料稍為作一點改變, 今次我們要的是大路選擇-ham /cheese,這間cafe的做法是三文治之外還有一堆baby菠菜沙律伴碟除了美觀客人亦會覺得花這加紙8元多花得稍為值得, 不過講句公道話,好多時我們在香港即使花同樣價錢得到的只是個半滿的Panini, 由飽至內餡都是收貨收一半, 多的是, 鬼叫香港d租金咁貴,俾多條菜都要計住計住啦,講番這三文治,雖然是烘熱了但請注意不是被壓扁了的那種,底層鋪了一層碎嘅手切橄欖茸少少酸酸咸咸嘅味道,再放上一疊簿切火腿,唔係幾片嗰隻喎,上面還有莎樂美香腸片及芝士用熱烤爐輕輕一夾,芝士溶化後同腸/火腿變得水乳交融, 一啖咬下去麵飽麵飽散成粉點狀在口裏,芝士火腿跟住就來,這個Panini足足7~8”長,吃得我們超滿足耶,

另外還要了件Lemon Cake 這牛油蛋糕質地鬆軟,裏面嘅Poppy seed也挺多, 甜度當然是當地的甜度了, 以我們來說稍稍過了頭,以他們來說很正常不過

飲品:我要了杯意大利泡沫咖啡, 在這裡只要到新式嘅咖啡店叫這類型嘅咖啡,她們嘅拉花一般都是很專業的, 似乎在這裡要在咖啡店嘅咖啡機面前討飯吃,這拉花技術是少不了, 所以如果香港人想來這裡當個調咖啡師的話真的要好好修煉一下因為這裡的咖啡師個個似乎都技藝不凡,當然我在這裡也試過要一杯意大利泡沫咖啡但居然沒有拉花只有一團泡,因為她是一個年紀比較大嘅印度大嬸,太座要的是一壺茶, 那茶壺份量也不少呢就這樣悠閒地看着外面嘅景物, 渡過了個多小時, 跟着又要上路了