4月4日（晴）：洛杉磯的第五天

頭嗰幾日探完哂所有親戚後，第五日女士們終於忍唔住要出城行街街。為怕塞車，大家就抱住早去早回嘅心態，朝早十點半鐘出發，先喺住宅區內一間人氣越式餐廳「Pho Hana」度快速醫肚。之後喺比華利山兩個名商場血拼到攰攰先去附近嘅「Nespresso Boutique」飲咗個下午茶，晚飯再轉場，一訪神秘密室，食咗頓超正嘅全牛宴主家菜。

4月3日（晴）：洛杉磯的第四天

姨媽姨丈們真係勁有肥肥家族心架，四口子留喺洛杉磯成個禮拜，佢地不單每天陪伴，更一早安排好哂所有飲食節目，食盡中、西、日美食，極其豐富。第四日嘅中午先喺海膽專門店「Miyabi Uni」食潮派日式午餐，夜晚再揸去海邊，喺酒店餐廳「Mar'sel」邊睇日落邊食高級西餐。

4月2日（晴）：洛杉磯的第三天

原來喺美國，復活節後嘅星期一並非公眾假期，親友們都要返工，所以嗰日肥肥家族就同退哂休嘅姨媽姨丈去咗濕平，順便買手信。買到咁上吓，見到商場內竟然有間「鼎泰豐」喎，人龍明顯比台灣啲分店短好多，見狀當然係排隊食小籠包啦；個個食完都見牙唔見眼，美味程度不言而喻。因表弟收工後帶同可愛嘅BB拜會長輩們，不便外出用膳，結果太陽未落山，不用工作及揸車嘅一群就先喺家中享受歡樂時光，之後就一齊打邊爐。

4月1日（晴）：洛杉磯的第二天

喺洛杉磯嘅第二日剛巧為復活節，家中兩位虔誠嘅教友長輩朝早先帶XO仔去山上一間特色小教堂「St. John Fisher Church」度望咗一場十分有內涵嘅彌撒，中午再會合其他親戚去區內一間渡假酒店「Terranea Resort」食自助餐。旅遊勝地個景就超靚啦，無奈節慶日嘅復活大餐水準卻油麻地過油麻地，令人大失所望！幸好晚餐喺「Torihei」食咗頓有高質嘅日式串燒，肚肚總算開心返。

3月31日（晴）：洛杉磯的第一天

移居美國嘅親戚長輩大多都住洛杉磯，所以肥肥家族非常幸運地唔洗入住酒店，只需租車代步，每日出街以食探親，中間有空檔仲可以加插啲購物環節，輕鬆得很。第一日先揸咗入去最遠嘅San Gabriel探望最年長嘅長輩，同佢地喺區內一家中餐廳「彌敦閣」食咗個晏後，黃昏就同姨媽舅父幾家人喺「Manpuku Tokyo BBQ Dining」食咗餐好豐富嘅日式燒肉，早食早休息。

3月30日（晴）：多倫多的第四天

離開多倫多當日，朝早食完個早餐後即退埋酒店房。適逢耶穌受難日，XO仔同契婆都要守齋，家人去傳統扒房「The David Duncan House」食牛扒時，二人就簡單地只食海鮮同菜。飯後喺機場還完車車，就去辦理離境手續，點知好不幸地遇上不愉快事件，令細佬去到加拿大航空嘅「楓葉貴賓室」度唔覺意咁破咗酒戒。由多倫多飛往美國洛杉磯嘅加拿大航空AC 793黃昏班機嘅商務艙獨立座位寬闊舒適，私人空間足，只係小肥好黑仔地受到氣流影響，起機冇耐已被熱咖啡淋濕哂褲褲。。。

3月29日（晴）：多倫多的第三天

喺多倫多嘅第三日，由於要喺套房入面排隊用洗手間，四口子起床後就各自去食酒店嘅自助早餐，中午就同契婆去咗「明珠酒樓」飲茶，一邊食點心一邊欣賞湖色靚景。晚餐由食家契舅母帶肥肥家族一訪城中熱點「Blueblood Steakhouse」，喺新潮堡壘入面鋸扒可稱得上為是次旅遊嘅新體驗。

3月28日（晴）：多倫多的第二天

探親遊頭四日都係留喺加拿大嘅多倫多，每日主要活動都係飲飲食食，由於XO仔身負柴可夫之重任，結果當然係只食唔飲啦！喺多倫多嘅第二日，朝早先喺酒店食早餐，中午就由一眾年輕嘅長輩安排去市中心嘅高層餐廳「Canoe Restaurant」享用咗頓精美豐盛嘅潮派加拿大午餐。飯後行咗一陣街就返咗酒店食下午茶。晚上再轉由大肥爸爸喺「全聚德」設宴款待親友，食咗餐好「DUCK」嘅驚喜京菜。