6月2日（多雲）：Crystal Serenity Day #10 之Monte Carlo

事關媽咪早一日出左事，我地喺Monte Carlo o既第二日，大肥爸爸負責陪愛妻逗留喺郵輪上做按摩，聽音樂，同進餐。孝順o既中小肥兩兄弟亦唔想離佢地太遠，所以當日就選擇左同姨媽姨丈上岸，喺街道同商場中稍作觀光，然後再返上船陪伴兩老食下午茶，Happy Hour，睇表演以及食晚餐。當郵輪重返公海，小肥就同媽咪去拉老虎機，助佢暫時忘記肉體上o既痛楚。

6月1日（多雲）：Crystal Serenity Day #9 之 Nice, Eze & Monaco

踏入六月，Crystal Serenity郵輪到達Monte Carlo（Monte Carlo為法文，英語譯作"Mount Charles"），照原定計劃停泊兩天。為免爸爸媽媽行得太多會攰，哥哥安排左我地一家四口第一日先參加個較輕鬆o既巴士遊「Nice, Eze & Monaco Bus Tour」。

當年讀書地埋肥佬o既XO仔聽就有聽過Monaco依個地方名，不過非常陌生；除左知道有間時裝店用左Monaco個名之外，隱約只係記得個國家同法國有啲關連，所以當地人係講法文。從我地位導遊嬸嬸口中得知，原來Monaco係全球最細o既國家，而且全國人民都唔需要交個人入息稅。佢話只要每年喺度住夠180日就可以豁免物業稅，所以吸引到好多有錢人黎定居，網球好手祖高域（Djokovic）就係一個例子。

5月31日（天晴）：Crystal Serenity Day #8 之 At Sea

五月最後一日就係我地郵輪河o既第三日“At Sea”。喺地中海上，小肥盡情享用Crystal Serenity郵輪上不同o既設備及參與各種活動。

雖然係“At Sea”，不過小肥八點未到就已經起左身，上頂層按摩；哈哈，其實即係再訓過！九十分鐘話咁快就過，小肥快速地沖完身就趕返落去六樓聽侍酒師講意大利酒。

十一點鐘，當姨丈去左搵日籍大廚Nobu先生影相簽名，媽咪同姨媽去拉老虎機時，小肥就靜掙雞走左去聽個減肥講座“Eat More to Weigh Less”。導師教大家點先可以食多多，但係又減到肥；答案：小吃多餐，多吃水果蔬菜，煮食時盡量少油少鹽少糖，最重要係每日要有適量運動！

一點半要上跳舞班學Cha-Cha，所以我地十二點半就先上舞池對面o既Lido Café食buffet。跳完舞，即做完當日o既適量運動後，我地就落左去Main Dining Room度參加試酒活動，主題為美國加州酒。三至四點真係太多選擇，除左試酒會，其實仲有個poker大賽，iPad班，網球班，等等。

第一次坐郵輪，可以食到咁多美食，得知可以參觀Crystal Serenity個廚房，我地四點三就落定Main Dining Room度霸定位，等大廚四點半出黎講野。嘩，真係估唔到每朝早五點鐘除左係早餐o既工作人員開工o既時間，亦係夜更負責清潔o既同事收工o既時間。當佢提及到每日為乘客（即未計工作人員）準備所需o既材料量時，大家嘩得仲犀利：咖啡約100加侖，魚約400磅，蛋約2300隻，菜約2000磅，牛約500磅。我地入去Crystal個廚房時，工作人員正在忙碌準備晚餐。Crystal個廚房真係好大，而且好有系統，分開左不同部門，不過最重要就係地方非常衛生潔亮，令肥肥家族食得放心！

最後一日“At Sea”，Crystal以雞尾酒會形式特別安排船長及其手下們同搭客見面道別。見到Gary先生喺船長旁邊，真係忍唔住讚嘆佢早一晚o既演出。發覺細佬忘記左主角時，大肥爸爸好醒目地同船長先生講話以後如果再有機會坐郵輪，我地一家都只係會選擇Crystal！Gary仲好風趣地講左句：「哈哈，You have been CRYSTALIZED!」

當晚衣著規定為“formal”，Crystal更安排左幾位專業攝影師喺Main Dining Room旁為賓客影相，所以酒會完畢，我地一團八人就走左落去影團體相及全家福。雖然都幾貴，不過見大家平時真係好難夾到時間上影樓影相，大家又著到咁靚仔咁靚女，而且影得唔靚可以唔要，所以大家都影左好多幅唔同款式留念。

影完相剛剛好係晚飯時間，formal night當然有好野食啦，當晚o既主題係French Dinner，即「法國大餐」。同行o既姨媽六月初生日，所以我地亦親機同佢暖壽，開左兩枝靚酒，叫Crystal幫忙做個生日蛋糕，搞左個surprise party。