賭場兩旁，一邊係Café de Paris，另外一邊係Hôtel de Paris Monte-Carlo，咁啱兩者個名入面都有Paris依個字。Hôtel de Paris Monte-Carlo被稱為名牌酒店o既其中一個原因係因為酒店內有間米之蓮三星餐廳Louis XV。

如果唔係中肥哥哥叫我望多兩眼，真係完全冇為意到Hôtel de Paris Monte-Carlo門外有好多旅客喺度影緊相。小肥對車認識不多，不過都睇得出泊喺酒店門口嗰啲房車及跑車全部都係名牌，名貴過名貴，唔怪得知咁多人圍觀啦！

我地圍住酒店行左一陣，除左可以離遠望到Prince's Palace，仲見到好多應該係連住酒店o既名店。我地喺其中一間頂級水晶商店o既櫥窗外發現到一個以佛像做主題o既水晶品，中國文化滙入法國產品，覺得實在罕有，所以就影左幅相同大家分享。

我地每一晚睇完表演都會好期待Crystal個廚房會造出啲乜野美食比大家品嚐：

海鮮頭盤之Crab & Spinach Tart w/ Flying Fish Caviar Mayonnaise：蟹肉鮮甜，菠菜份量唔會過多，食落又冇平時嚡口嗰個口感，哥哥大讚refreshing！

湯之Cream of Asparagus "Argenteuil" w/ Lemon Croutons：忌廉湯香滑且唔溜，唔鍾意菜o既小肥當然比哂碗內所有蘆筍粒比中肥啦！

意粉之Mafaldine Pasta w/ Braised Beef Short Rib & Root Vegetable Ragout：意粉麵條彈牙，甜甜o既調味汁又夠香，牛肉鬆軟，XO仔好滿意！

主菜之Tempura Fried Ahi Tuna Roll on Summer Greens w/ Cocktail Tomatoes, Mango, Cucumber, Carrots, Pickled Ginger & Daikon, Drizzled w/ Sesame Aioli：吞拿魚肉半生熟，天婦羅皮好脆，魚肉口感好特別，配上芒果及半日式沙律令整體變得好清新！

晨早起牀，步出露台，發現郵輪正慢慢靠近岸邊，頗為詩情畫意。薄霧中除左睇到勁多遊艇之外，亦可以清楚望到當地著名賭場Monte Carlo Grand Casino及國家美術館Monte Carlo Art Gallery。

據每日一報所講，Monte Carlo的士唔多，喺碼頭更加係少之有少，價錢不但高，仲會因應不同時間而調整，所以Crystal為搭客提供免費Shuttle Service入區。

Crystal個Main Dining Room無論係早餐，午餐，定係晚餐，食物質素以及服務都同樣出色！

同船上其他餐廳一樣，Dining Room所有果汁都係新鮮榨製，小肥飲左杯蘋果汁，好夠涷又好夠甜。此外，熱辣辣o既Cinnamon French Toasts亦非常鬆軟，大肥食完一客仲要追加多客，好味程度真係唔講得笑！

導遊嬸嬸一上車就講起「一級方程式錦標賽」，每年都會有一站喺摩納哥蒙地卡羅摩納哥賽道舉行。XO仔對賽車認識唔深，不過都絕對聽過「一級方程式錦標賽」，只係從來冇諗過賽道會係由市中心o既道路改編而成。

因為2012年度喺摩納哥蒙地卡羅摩納哥賽道舉行之一級方程式錦標賽啱啱喺早一個星期結束，所以我地喺巴士上沿途仍然見到賽道o既不同標記，廣告牌，流動看台及椅櫈。

巴士入左法國區域後，第一站停喺Eze，一個外表平平無奇o既小鎮。Eze之所以係旅遊熱點因其處於高原o既地段，旅客從高向下望就可以欣賞到美麗o既景色。此外，小鎮頂建有一座教堂Eglise Notre Dame de l'Assomption（英語為："Our Lady of the Assumption Church"）及一個種有好多奇花異草o既花園Jardin Exotique de Monaco（"The Exotic Garden of Monaco"）。可惜，因當日巴士喺嗰度只係停左一陣，所以我地無緣入去朝聖或賞花。

巴士遊最大特色就係要遠觀及近看地中海沿岸之蔚藍海岸（法語：Côte d'Azur；"Azur"解作「藍色」）。喺網上睇過好多相，印象中Côte d'Azur個海岸真係好蔚藍，點知去到實地睇就有少少失望。唔知係咪同個天氣有關呢，望落去覺得Côte d'Azur同其他海岸無異；如果唔係見到個燈塔，真係以為未到目的地。

離開法國區域，回到Monaco最後一站，家母好不幸地發生左少少意外。正當大家搭電梯上觀光點時，媽咪前面一位六尺高o既公公突然失足去後墮，好在大肥爸爸身形有返咁上下，幫手頂住，而兩位老人家又有太極底子，媽咪最終只係因撞傷流鼻血及輕微扭傷，可以話係不幸中之大幸。因為依段小插曲，最後我地四人決定派哥哥做代表去繼續觀光拍照，之後再報告比我地聽。

唔知係咪因為最近荷里活由Nicole Kidman主演為已故o既Princess Grace Kelly拍製電影有關，去到Monaco見到同聽到都離不開Princess Grace。毫無意外地，上到地面，哥哥第一站先停Saint Nicholas Cathedral，即著名Princess Grace及其夫君Prince Rainier遺體之葬身處。

一個世紀前於海邊一座大石上建成o既Oceanographic Museum of Monaco係一個同海洋近乎零距離o既海洋博物館，真係好有意思。

當日巴士遊完畢後，我地從返郵輪第一件事就係陪媽咪去船上o既醫療室檢查，因為醫生未返，我地一等就等左成幾粒鐘。雖然為此我地未能參與其他活動，不過喺郵輪上，我地仍然可以欣賞到海中多隻水母及Monte Carlo之靚靚夜景。

同姨媽慶生，為隆重其事，團友們決定喺酒牌上揀選兩枝靚酒。雖然係要額外收費，不過大家都大讚Crystal好有良心，標價同我地喺街買差不多，所以非常合理。Crystal特備o既法國晚餐，一如過去咁多日，水準超卓，講起都已經令人回味無窮：

1)      Escargots Bourguignonnes - Burgundy Snails in Garlic Herb Butter – 媽咪最愛吃法國大餐，對法式田螺更加係愛不釋手！雖然佢形容田螺可以同鮑魚比美，不過小肥實在冇膽品嚐。

2)      French Onion Soup w/ Gruyere Cheese Crouton – 港式洋蔥湯就飲得多，Crystal 個洋蔥湯特別及勝在唔會料多過湯，而且一啲都唔會話好油膩或者好濁；不過最精彩都係塊芝士餅，半脆得黎吸哂洋蔥陣香味，超正！

3)      Fusilli Boscaiola w/ Proscuitto, Mushrooms, Onions, Tomatoes & Cream, Drizzled w/ White Truffle Oil – Crystal個廚房煮製o既pasta真係冇得彈，每日不同款式o既意粉，配上不同o既醬汁，烹調出黎o既麵條卻能同樣彈牙，佳餚出色美味，認真佩服！

4)      Pink-Roasted Rack of Lamb, in Garlic Herb Crust w/ Mint-Flavored Natural Jus, Ratatouille Nicoise, Sauteed Haricots Verts & Gratinated Potatoes – 如相所示，羊扒同餸名一樣咁粉紅，賣相滿分；羊肉質感幼嫩，完全唔蘇，所以味道分都爆埋燈！

5)      Pan-Fried Fillet of Dourade w/ Artichoke Puree, Baby Fennel, & Olive-Tomatoe-Basil-Noisette Butter Sauce – 話明係法國大餐，又點會冇魚食呢？魚身薄，煎得夠乾身，而且皮脆肉嫩，好香口。

第八日, 我地要向摩納哥進發. 搭巴士要去到一個泊滿豪華遊艇, 叫Le Port的碼頭邊, 搭100號線. 由於摩納哥實在太吸引了, 架架巴士爆曬棚, 等咗好耐先等到架無咁滿既塞到我地四個入去. 車程大約40分鐘, 車費每人只需1€, 同尼斯市內一樣. 全程無查證件無關卡咩都無, 唔講你唔會知自己已經去咗第個國家. 落車要0係Casino站, 因為摩納哥唔係總站, 架巴士要繼續去0架.

著名既賭場Casino Monte Carlo位於半山腰, 由我地落車的巴士站行上去好快就到. 賭場及其周邊建築典雅有格調, 給人的感覺十分有氣派.

0係摩納哥, 賭場唔係隨便入的, 先要貢獻每人10€入場費. 齋賺門票都賺到笑, 話之你入去後賭唔賭. 呢10€只供閣下於某幾個廳流連, 如果想入另一d賭廳又或想出露臺坐下, 磅多10€吖唔該. 賭場內唔准影相, 裝修係典型的賭場式華貴, 面積唔大. 講靚講豪講地方大都及唔上澳門d賭場. 所以如果唔係真係想玩番兩手既話, 0係門外影張相就得喇, 無謂浪費10€. 我地用咗40€來感受何謂the legend of casino, 感受完, 其實係覺得有少少搵笨的.

由賭場出來就嚟咗呢間Café de Paris食晏. 呢間餐廳名氣甚響, 因為佢位於賭場及著名酒店Hotel de Paris旁邊, 正正是摩納哥的心臟地帶, 地點一流. 由於我地旁邊台食客不停眼望望, 搞到我地唔多好意思影相, so無相睇.

呢度既menu走大包圍路線, 由法式到意式甚至印度咖哩雞都有得食. 我叫咗個beef stew, 係用茄汁燜的牛肉粒. 牛肉肉質好鞋下, 調味則不錯, 燜得幾香, 鹹淡適度. 比較特別係會跟一碟通心粉, 俾客人自己加入煲中. 索咗汁的通粉比牛肉更好吃.

當麵癡家母搵唔到中式或日式麵的時候, 意式麵一樣照殺可也. 佢叫咗份香草番茄意粉, 聽佢講意粉味道尚可, 佢鍾意個汁帶點點胡椒的香辣. 只係意粉煮得過腍無咩嚼頭. 而且可能呢味係餐牌上的廉價食物(大約10幾€), 配料少得可憐. 阿媽話除咗一粒番茄外, 深海尋寶咁由面摷到底都摷唔到d咩了. 

家父同細佬就點咗份香草燒雞. 雞肉腍得來無味又唔香口, 好似燒好攤凍再叮返熱咁. 埋單150€左右, 唔算平, 雖知我地無點前菜及海鮮類貴價食物. 最重要係貴得嚟無咩好食. 地點就夠曬正, 室內裝修也相當優雅. 如果純粹只係想飲杯咖啡, to see and to be seen, 都不妨一到的. 想品嚐美食既話搵過第間好過.

食完飯後我地行番落山搭巴士去王宮. 王宮坐落於山上, 外觀似座城堡, 佔地唔大, 但望落幾有氣勢的. 可惜當日有王室成員在內, 所以唔允許參觀, 令我地超級失望.

我地0係王宮外流連時聽見旁邊幾個內地同胞話有個水族館, 王宮無得入咪入水族館打發時間囉, 一於跟埋去. 門票盛惠每人14€, 肉赤. 家父最愛動物, 平時0係屋企成日睇動物紀錄片, 自然睇得興致勃勃, 不過我地覺得呢度似乎無咩珍貴品種. 唯一較特別既係第3張相中條鰻魚, 0係60年代已經被人發現--咁佢咪起碼過咗50大壽?

水族館下層睇生魚, 上層就睇死魚, 展示咗唔少海洋生物的化石及標本. 再上一層係餐廳及露臺, 由此可以影到整個摩納哥的全景.

大多數人來摩納哥都會抱住一種獵奇心態, 想來見識下呢個小國的富貴. 摩納哥的碼頭泊滿私家遊艇, 高尚住宅林立, 可以睇得出係個富裕的地方. 但僅此而已, 唔會好似杜拜咁有令人嘩然的炫富事物. 而遊客只會去遊客區, 撞口撞面都係見番遊客, 亦唔會睇得到摩納哥本國人的生活係點. 而我認為即使唔係打算來開眼界, 摩納哥都值得一遊的, 畢竟此處市容整潔, 綠化充足, 環境是十分舒適的. 前提是唔好期望可以睇到d咩超特別的景點囉.

第九日, 我地既目的地係康城, Cannes. 康城離尼斯其實唔遠, 但我地搭既200號線巴士係左兜右兜型, 結果兜咗2個鐘先到. 車費每人1€, 都幾抵的.

去康城, 人人第一時間梗係去睇康城影展的大本營喇. 該建築正式名稱為Palais des Festivals et des Congres. 老老實實, 呢棟大樓外表上睇嚟超普通, 只係一間規模較大的電影院. 遊人唔准入內(唓!), 外面樓梯有條應該一排無清潔的紅地毯, 以及幾個扮明星的街頭藝人, 專同遊客合照的. 戲院旁邊的展館有展覽, 但唔0岩睇, 所以我地無入去. 講完. 所有野唔使三分鐘睇曬.

電影院對面是名牌街, 街後是一條promenade, 聽講呢條promenade係抄尼斯我地日日行過的果條呢. 再後就係海灘. 康城既沙灘的確係"沙"灘, 真係沙來的, 雖然沙質麻麻地同香港差唔多. 海水望落似乎比尼斯更清澈. 想游水, 二揀一既話呢度睇落好過尼斯.

之後我地沿著海岸邊行, 漸漸行到去舊城區. 地理位置相近, 所以無論尼斯, 康城定摩納哥的建築風格與自然風光都差唔多. 0係一個小山坡上我地遇到個英國旅行團, 個導遊指住山下的房屋講邊座邊個名人住過, 我地0係旁邊又聽埋一份.

呢間亦係我於網上搵到的知名甜點店. 買咗兩件cakes, 左邊係檸檬mousse cake, 外面包裹著一層紅莓醬, 粉紅色嬌艷非常. 右邊係菠蘿mousse cake. 蛋糕鬆軟, 紅莓檸檬味加埋原來幾夾的, 連我呢d絕不愛任何類型berries的人都覺得好吃. 而菠蘿味則夠天然, 酸甜合度. 兩款蛋糕都很清新討好, 連上面裝飾的朱古力片都香濃美味. 將來如果我會重遊康城的話, Jean Luc Pelé就係唯一的理由.

食完後我地就搭巴士離開, 整個康城之旅只係用咗約3, 4個鐘左右. 因為我地又唔係咩影癡, 而且當見過尼斯同摩納哥後就會覺得康城與呢兩個城市十分雷同.

到咗第二朝, 亦即是旅程的第十日, 起身後大家就執野check out, 搭飛機去巴黎再轉機返香港. 雖然我地去既城市如巴黎尼斯等, 都係浪漫逍遙適合兩口子度假的, 但同屋企人嚟一樣可以玩得好開心. 雖然呢, 有d景點我真係覺得幾把鬼下. 好, 我會努力賺錢, 爭取出年繼續同家人去旅行!