9月7日（雲）：鑽石公主郵輪東瀛遊第八日之Aomori 青森

離開北海道後，返回橫濱前，「鑽石公主」號先路經本州最北o既「青森」（Aomori），逗留咗大半日。有點好奇怪，XO仔出發前喺書局度買旅遊書時，真係搵唔到任何有關青森o既旅遊指南，結果唯有見步行步。

郵輪早於七點抵達「沖館埠頭」，青森市亦安排好免費穿梭巴士往返市中心及碼頭。團友十二人準九點出發，入城後先喺巴士站旁o既A字塔「青森縣觀光物產館ASPAM」索取旅遊資訊，並於頂樓o既瞭望台觀賞青森市o既景色。

由於區內o既食肆大多中午前都未開門，我地只好向著下一個景點蘋果酒廠「A Factory」慢慢進發，邊行邊搵食。行咗大概二十分鐘，終於見到間熟識o既連鎖店「大戶屋」，眼見親友四肢都開始乏力，團長就決定食個簡單o既午餐，補充返啲體力後先去品酒。

離餐廳只有八分鐘路程o既蘋果酒廠除咗有蘋果酒飲之外，其實廠內仲有個超級市場同小餐店，其中當然係唔少得有青森名產o既蘋果同蘋果汁啦！好唔好味就見仁見智。。。

青森市內雖則都有不少購物商場及商店，但居然連出名最愛行街o既大姨媽行咗五分鐘後都主動提出要返回船隻休息，明顯啲街唔係咁好行囉！當幾位年長o既親友提早回程時，留下o既愛蒲一族就決意停多站「南大門」，食多round韓式燒肉作頭輪晚餐後，再趕搭巴士返上郵輪會合團友食第二個晚餐。