黑豚肉係濟州島有名既菜色，據知濟洲島居民一直在島上養黑豬，黑豚肉係當地特產，唔需要經過空運、船運就可以食到非常新鮮而有特式既豚肉，而且價錢仲好抵添 (大概HK$240兩個人連啤酒兩支)，所以無可能唔試！

响 "Black Pork Street" 裡頭有幾間專門食肆，我地光顧呢一間就响入口左手邊，見人氣非常旺盛，裝修亦較為新派，而舖位側面貼有唔同傳媒推介 (當然係韓文唔識睇)！當地人幫襯佔大部份，晚上時段比中午熱閙得多，今次旅程第一晚同 last 個晚都有幫襯，簡直飽到上心口！

一份二人餐，包括有唔同部位既黑豬肉、薯片兩片、雞肶菇兩片、小青椒兩隻、生蒜供燒烤。另外再有一份熟既五花腩、一個細既辣豆腐煲、細蛋煲、一份生菜同紫蘇葉供包豬肉、可添加配菜5款、兩碗細凍湯、生葱兩小碟等，其中部份黑豬肉會保留小小既黑皮供客人析別。濟洲食肆大多數會供應一瓶冰水比客人，唔夠可以再要。不過食燒烤啤酒或者燒酌為最佳拍檔。

基本上每款菜既味道都好好，除黑豬肉肉質較普通豬肉有彈性外，今次發現濟洲薯仔係非常美味，本身有薯香同質感較綿，啱曬同我一樣鐘意食薯仔既人。

提示：如果食野速度唔快既朋友，可以請店員唔好一次性將全部燒材放到火山石做既燒板上，因為燒得太耐會流失肉汁，影響食味！可以先放一半，然後自己再按食速再放餘下既燒材。