Kan Lee
我是Kan Lee。
留言  留言給此旅遊家
  遊記數目 6
  上載相片 476
  上載影片 0
最近分享過的旅程
十月韓國超喪遊
國家/地點: 韓國
旅程日期: 2012-10-24 至 2012-11-04
我的 N 次回味 - 曼谷
國家/地點: 泰國
旅程日期: 2012-02-24 至 2012-02-26
走馬看花倫敦遊
國家/地點: 英格蘭
旅程日期: 2010-08-09 至 2010-08-18
美好的接觸
國家/地點: 毛里裘斯
旅程日期: 2010-07-01 至 2010-07-07
首爾兩天美食
國家/地點: 韓國
旅程日期: 2010-05-30 至 2010-05-31
濟洲5日遊
國家/地點: 韓國
旅程日期: 2010-05-26 至 2010-05-30
走馬看花倫敦遊 (英格蘭)
(旅程日期: 2010-08-09 至 2010-08-18 ,  旅程性質: 探訪親友, 消閒度假)
發表日期: 2010-11-01
素來都會以陽光海灘為旅遊地點既首選,今趟倫敦遊則較為異常。事關倫敦友人一別已7年,曾作出探望既承諾,但只有一個拖字。某日無所事事突然醒覺,應該好好把握倫敦仲有1個月就快要完結既夏天,兼兌現一張無了期既支票,所以就响無咩準備既情況下傖拙起行。

是次遊覽真有 d 走馬看花既感覺,事關倫敦地方唔細,要玩既地方亦多,短短不足10日,除左倫敦市旅遊熱點外,都遊走過市郊既温沙堡、牛津同 Bath ,不過行程極之精簡。連平時愛好食得滋味既我,今次都非常隨意,去到邊就食到邊,為是次旅程增添了一份冒險同探索經歷!
 
畢竟倫敦係一個值得旅遊既地方,單單從其國家風貌既保存、歷史遺產既保育,都足以令旅客留下深刻既印象,更感受到從前大英帝國既輝煌。曾經係英國既殖民地既香港,有好多方面需要學習同借鏡。

在此亦感謝倫敦友人不但提供住宿,旅程安排,更辛苦充當柴可夫,犠牲所有休息時間與假期陪伴,感激萬分!
好香港 Feel 笑臉2010-11-01
餐牌
餐牌
燒肉义燒飯
燒肉义燒飯
鼓椒牛河
鼓椒牛河
可樂 + 凍檸蜜
可樂 + 凍檸蜜
8月9日,天晴。

落機己係傍晚6點多,朋友接機後再開車番倫敦市,加上小小塞車8點幾才抵倫敦市唐人街。

第一餐醫肚既竟然係好香港 Feel 既茶餐廳,食肆員工全都可用廣東話溝通,氣氛、餐牌、食物、營業時間都十足旺角或銅鑼灣區既新式茶餐廳,相隔10幾小時又返番黎香港??荷李活可能响唐人街外圍啦,中國食肆既集中地,大部份食客都係中國人、小部份係白人。

- 义燒燒肉飯:
响外國都食到呢個質素,算相當唔錯,可以以香港中檔餐廳相比!若然要以香港高質素燒味黎比較當然仲有距離,例如燒肉皮有 d 硬、唔夠脆、無用五花腩肉欠質感同層次、义燒蜜味不足等。

- 豉椒牛河:
呢個可用達到八八九九既水平黎形容,炒得比香港更有鑊氣,唔太油,食味亦調得恰好,認真要推介!

- 飲品:
凍奶茶 + 凍檸蜜:飲得出連凍檸蜜都係用香港茶餐廳慣用既瓶裝即沖產品,唔係鮮蜜糖。

除左碟頭飯、廣東湯麵、仲有炒小菜可以選擇。老闆都曾係香港人,難怪經營出原汁原味既香港茶餐廳。當晚見到兩位中國人食梅菜扣肉飯,津津有味,如果食得多西餐又掛住廣東美食,响倫敦可以好方便揾到味道唔錯既茶餐廳,半夜都無有怕!
推介菜式: 豉椒牛河
每人消費: 約10.00英鎊 (晚餐)
評分: 味道4   服務4   環境4   衛生4   抵食3
大青葱
大青葱
蕃茄
蕃茄
深綠色既翠肉瓜
深綠色既翠肉瓜
櫻桃蘿蔔???
櫻桃蘿蔔???
橙黃色既椰菜花
橙黃色既椰菜花
8月10日,天黑黑,有點寒冷!

為左一向鐘意既蔬果晨早4點幾就要起 身,毛毛雨令漆黑既大清早上倍添寒意。

車開到幾排白色小平房,平房內原來係只得攝氏幾度既蔬菜貨倉,每間倉庫都掛有自已既公司名。摌車不斷進出貨倉搬運蔬菜。嘩.......好快d蔬菜就搬左出黎,第一眼見到青葱,非常粗壯翠綠,我頓時興奮得跳落車,好想接觸佢地。跟住有深綠色既翠肉瓜、長長既蘿蔔、蕃茄、芽菜、豆腐等。每種蔬菜都好似掛上甜美笑容一樣,好吸引!

而離蔬菜倉不遠就係生果倉,比蔬菜倉佔更大面積,有著各式各樣水果,更混雜蔬菜,在場工作員工非常友善,主動提議拍照,雖無市場或市雜般既熱鬧叫賣,但貨種之多亦叫人忘懷!

未食早餐,眼晴已吃過飽飽既蔬果,心靈滿足了!
參觀時段: 早上
入場價錢: 每人0英鎊
評分: 值得去4  
主要出入小區既馬路
主要出入小區既馬路
市集
市集
麵包檔
麵包檔
教堂
教堂
小花園
小花園
跟住車離開倫敦市往劍橋方向出發,大約30分鐘後於分义處轉入 Saffron Walden,與劍橋方向話別。

天色仍然灰暗,有 d 寒意,但進入 Saffron Walden 小社區就有一種舒服既感覺。Saffron Walden 面積唔算大,但市容非常整潔,簡單寧靜之餘,基本生活各樣所需一應俱全。剛巧遇上逢星期二開放既小市集,順道一遊,不失為一件樂事。

小市集位於稍高既位置,响商店、咖啡室最旺既街道再往上走,有水果、衣服、飾物、花圃園藝產品等售賣,水果攤檔係最有氣氛既,販夫不斷高叫 "睇下好靚既櫻桃只賣2鎊"、"士多啤梨1鎊" 等等,不斷有客人幫襯。而最吸引莫過於一檔麵包,款式唔小、有甜有鹹、大小形狀不一任君選擇,我買左1個芝士味,果然唔錯。再慢慢走到咖啡店購買熱咖啡,暖暖身體,感覺非常閒逸。一邊走又發現斜波上有一座教堂,兩旁有草地,相信該教堂年紀亦過百,充滿祥和氣氛。前面有一個簡單設計既小花園,跟教堂氣氛連成一遍!
推介項目: 逢星期二既小市集
參觀時段: 早上
入場價錢: 每人0英鎊
評分: 值得去3  
令人讚嘆! 笑臉2010-11-01
正門
正門
獨特天花設計
獨特天花設計
真正既金鐘
真正既金鐘
希臘神殿正面外牆
希臘神殿正面外牆
木乃伊
木乃伊
乾屍
乾屍
精緻既木製匙羙
精緻既木製匙羙

8月11日,天晴。

傳統博物館對我黎講只有沉悶既感覺,出發前朋友都不約而同認為大英博物館係英國必到既參觀地點。朝早獨個兒帶住悠疑既心態踏入博物館內,按照旅遊天書既提議先到諮詢處攞到博物館地圖,再因應自己心頭好選擇要到既展館。

為左親眼睇到真實既木乃伊,第一站就到神秘既埃及館。一邊行一邊欣賞有關埃及既展品,展品羅列非常齊全,細至一件小飾物,大至一幅建築物外牆,加上圖解說明兼備,開始不知不覺投入展館裡。直至睇到第一個木乃伊,接著第2個、第3個....甚至乾屍,心裡感恩著我無錯過大英博物館,其珍貴展品真令我讚嘆不已、大開眼界,好認同大英博物館係人生唔能夠錯過既項目!

跟住參觀左希臘館,最令我驚訝係見到整塊完整既神殿正面外牆,記得响希臘都只能睇到破碎不堪既景象,但大英博物館竟珍藏其他國家如斯完美既遺跡,可聯想到當年大英帝國既強勢。

羅馬,墨西哥、愛斯基摩既展館都係我有興趣到訪既展館,尤其愛斯基摩人生活細節,如建冰屋、捕鯨、用海豹皮製造簿如腸衣既禦寒衣物等都相當吸引。

光走幾個展館己不經不覺消磨左4、5小時,今次真令我對傳統博物館改觀,下次有機會都會嘗試多參觀其他國家既博物館,不過現今能真正能夠跟大英博物館世界級規模比美既,又多唔多呢?

多謝英國既慷慨讓參觀者可免費參觀,更可以在不用閃光下拍照,因此切記要帶相機。

推介項目: 爭取時間按自己喜好參觀展館
參觀時段: 全日
入場價錢: 每人0英鎊
評分: 值得去5  
小龍蝦火箭菜三文治 + 鮮橙汁
小龍蝦火箭菜三文治 + 鮮橙汁
雖然大英博物館係免費入場,但如果遊人想爭取時間盡量參觀心儀既展館,相信留响博物館用膳或小休歇腳係最為方便,起碼唔使走出走入!

博物館內有 Gallery Cafe, Court Restaurant 同 Court Cafe 可供選擇。獨個兒既我當然選最簡單坐落於 G/F 既 Court Cafe。Court Cafe 係自助形式,流水式擺放食物同飲料,一路排隊睇啱邊樣食物就放落托盤上,最後到到最前既 Cashier 比錢,自行揾位坐低就可以。

話得說回來,簡單總有簡單既弊處!食物既選擇真係唔多,記憶中只有麵包、三文治、蘋果、香蕉、朱古力、薯片及各式冷熱飲品,要食得較為講究既話,恕未能滿足!

我要左小龍蝦火箭菜三文治同鮮橙汁。三文治用料非常新鮮、火箭菜味香濃,唔錯既選擇。

Court Cafe 由 Do & Do Museum Catering Ltd. 主理,該集團响各大城市都有餐廳、酒店,所以質素有保證,價錢亦同倫敦一般 Cafe、Coffee Shop 相約。食完野休息一會,腳仔無咁軟就繼續下一個展館。




推介菜式: 三文治
每人消費: 約5.10英鎊 (下午茶)
評分: 味道4   服務4   環境3   衛生4   抵食3
餐牌
餐牌
以公雞為 Logo
以公雞為 Logo
特製墨西哥辣醬
特製墨西哥辣醬
Full Plater: 1隻雞 + 甜薯蓉 + 菜絲沙律
Full Plater: 1隻雞 + 甜薯蓉 + 菜絲沙律

第一次接觸 Nando's,响門口恃應除問幾位之外,仲會問係咪第一次黎,我隨即諗佢地咁問係為左介紹特式菜比未黎過既客人,幾體貼喎。點知不到兩秒,侍應聽到我朋友話黎過,佢一邊帶位一邊跟我朋友講,咁您教您朋友啦!我仍然一頭冒水,坐低忍唔住即刻問朋友究竟有咩特別。其實簡單講,呢問餐廰係半自助式,menu 上寫著每一個步驟比客人 follow,否則無野食。當諗好食咩後,朋友就到 cashier 落 order、比錢,然後到汽水機去 "針" 汽水,攞辣醬等,全部自己黎,唯獨食物就由恃應送到枱上。嘻....原來如此,懶嚴重咁!

食物以雞為主,仲有一 d 黑西哥特式食品,好似 Nachos 咁。另有唔同既組合既主菜同配菜任君選擇。朋友發版要左一個 Full Plater, 有1隻雞、配上 coleslaw 同甜薯蓉兩種配菜。

雞肉肉質都 ok,而食味主要黎自醬汁,但雞胸就真係好嚡,都係交比朋友消滅佢好 d!而兩個配菜真係好正,尤其甜薯蓉滑溜中帶小甜,食落又好似南瓜,分唔清,總之好味就得啦!再要介紹一下,就係兩枝墨西哥辣醬,"好" 辣既我當然唔會放過嘗試既機會,個人覺得勁辣既辣度較為適合自己既口味,對比中環 Izote 用 Habanero 做既辣醬就仲未較辛辣。

Nando's 响倫敦四處可見,可能收費比較平民化,食物質素又 ok,生意都唔錯。而每間店既裝修都各自有其特式,座位編排都係比較密集,繁忙時段難免會覺得嘈雜,好難十全十美!


推介菜式: 特式配菜
每人消費: 約23.00英鎊 (晚餐)
評分: 味道3   服務3   環境3   衛生4   抵食4
寂莫的城堡 ok喇2010-11-01
圍牆
圍牆
維多利亞女皇銅像
維多利亞女皇銅像
全英國最短街道 - Queen Charlotte Street
全英國最短街道 - Queen Charlotte Street
充萬歐式風美既露天食肆
充萬歐式風美既露天食肆
舊火車
舊火車
遊船碼頭
遊船碼頭
Eton Bridge
Eton Bridge
雨後彩虹
雨後彩虹
8月12日天氣仍然唔係太好,天上既厚雲,好似快要跌落黎,幸好無落滂沱大雨,朋友按計劃開車出發!

温莎古堡有900年歷史,係世界上仍然有人居住既最大古堡,受伊莉沙白女王喜愛,每逢復活節、聖誕節、甚至週末都經常係呢度渡過。

一落車温莎堡既灰白外牆襯著有點枯黃既草地一直孤獨地伸延著。而右手方富有色彩既小商店同餐廳,加上街上充斥著歡欣既遊人,跟温莎堡形成強烈既對比。加上圍牆、高高既鐵欗柵、窗戶緊閉,好容易令人聯想到裡面有一種失去自由既寂寞感覺。而馬路中央則樹立一座維多利亞女皇既銅像,滲透著英國帝皇統治既氣息!由於參觀時間已過,未能入內參觀,聽說 Queen Mary's Dolls' House 內擺滿超小型既豪華洋娃娃,值得一看。

Windsor Royal Shopping 有小商店亦係舊火車,裡頭仲有一架舊蒸氣火車展覽,月台、火車軌、火車路線圖仍然保留。

温莎堡一帶不經意地流露歷史痕跡,只要細心觀察,唔難發現。例如 Church Street 有一座大廈標上 1425年建做,計下數距今500多接近600年,真唔係講笑。

另外,亦有一條全英國最短既街道,名為 Queen Charlotte Street, 只有51尺10吋長。

最後返回露天停車場,停車場對住一條河,河對面係一排排既矮屋,有一條叫 Eton Bridge 既橋,如果無攪錯亦係 Thames River 既一部份。河邊有一個簡單既遊船碼頭,一對情侶在雨傘下互擁著欣賞河上既天鵝,此時雨過天晴,天空仲出現完整既彩虹,呢一刻係全日最浪漫兼美麗既時刻。

參觀時段: 下午
入場價錢: 每人0英鎊
評分: 值得去4  
泰式炒麵
泰式炒麵
泰式魚餅
泰式魚餅
牛排
牛排
多種不同醬料
多種不同醬料
倚窗座位
倚窗座位
座位
座位
小桌子
小桌子

Garden & Grill 無論餐廳名定其外貌都十足一間西餐廳,但偏偏餐牌上又提供泰國菜,都好喎,食得多西餐都想換下新口味。

原本坐 outdoor 位享受歐洲風味,點知天愈黎愈黑,仲刮起一陣大風,惟有轉移到室內。室內環境都唔錯,坐係窗邊望住街外情景同行人。

泰式炸蝦餅:味道 ok,泰式魚露加上鮮紅辣椒確最像真。

泰式炒麵:味道 ok,備有花生碎,份量細細似足泰國,兩啖食完,但就無泰國炒得咁有火氣喇。

牛排:味道 ok,不過不失。

餐廳裡有幾位泰國人既服務員,服務唔差,大可能也有泰國厨師,要不然味道不會有 70% 像真度!

每人消費: 約11.00英鎊 (午餐)
評分: 味道3   服務3   環境4   衛生4   抵食3
必看項目! 笑臉2010-11-01
皇宮背後大草地
皇宮背後大草地
只能看到換兵儀式的騎警
只能看到換兵儀式的騎警
廣場上維多利亞女皇紀念碑
廣場上維多利亞女皇紀念碑
面向皇宮雕像
面向皇宮雕像
紀念碑與雕像
紀念碑與雕像
水池
水池
8月13日,天色依然陰沉,有點冷!計劃爭取時間先參觀皇宮,後再到皇宮前門睇11:30am 開始既換兵儀式,然後再因應時間跑跑別處。

白金渶宫係由一位叫白金漢既公爵於1703年建做既住宅,其後由皇室買下,於1837年維多利亞女王登基時更成為宮殿。白金漢宮前係一個廣場,維多利亞女皇紀念碑豎立於中央。

到逹鐵閘前準備入內購票,點知一位站於入口既女職員已續一向入內參觀者提示 "現時參觀皇宫需時兩個鐘,將趕唔上觀看 11:30 am 在皇筥門前舉行既換班儀式。" 。心諗尚有兩個鐘我一個人應可以應付自如,於是馬上內進。一群群小綿羊似既旅客被分批等候,然後續批放行到購票處,整個購票輪候時間已超過30分鐘。有票在手,馬上飛奔到入口處,入口處職員話仲未到我入場既時間,先叫我等一等,惟有離遠昅實個情況。等左10分鐘左右,見新一批遊客排隊,再向職員查詢,終於輪到我喇!跟住先要做 security check,寫住檢查係以撘飛機既規格,但見職員會對背包較為嚴緊,某些超標行李一定要寄存,唔能夠隨身,但飲用水則無問題。安檢完畢後就可以到櫃台借用講解耳筒,有唔同語言可供選擇。到此為止已用左1個多鐘頭,心裡有點著急。

通過重重關卡,終於可以目睹華麗皇宫既內部,面積之大、佈置用料之講究、金壁輝煌、珍品處處,真令小妹大開眼界,加上耳筒形造不同現場背景,例如女皇大婚、登基等,彷彿親歷其景,心裡嘩然,可惜整過程唔能夠影相同錄影,只有將腦海浮現既景象一一重温。

參觀完畢,出口處一片大草地,沿著出路方向經過皇宫既花園,對我黎講,佢十足似一個小形郊野公園,種滿各式各樣樹木花卉,仲有湖泊,女皇真有如斯閒情逸致嗎?此時,雨落得頗大,只好到購買手信地方避一避。見雨勢稍為收細,馬上走回皇宮大門,此刻已11:45am,唯有博一博!

趕到大門各處聚集唔少人群,馬上穿插人群中,兩位類似騎警人員不斷驅趕某一邊人群,似乎要開闢通道,依稀聽到騎警講由於剛才落雨,所以換兵儀式壓後,聽罷沾沾自喜!不久,換班儀式開始,雖已站於前排既第二排,仍然只得從人隙中隱若偷窥視到紅衣頭載黑聳高帽既身影,基本咩都睇唔到,唔夠3分鐘,整個過程就完結,噢....有 d 失望!

能夠順利參觀皇宫,已經令我喜悅不已兼萬分滿意,未能清楚觀看換兵儀式只係打左小小折扣,無損靚靚心情,況且可以擇日到 Horse Guards 觀看另一個換兵儀式。 

到倫敦雖短短幾日,但每次經過皇宫總係人頭湧湧。皇宮每年對外開放時間有限,加上正直夏天旅遊旺季各地遊客眾多,因此要參觀既朋友,最好騰出較多時間參觀,相信更加優哉悠哉!

對名畫有興趣既朋友更可另行購票參觀 Queen's Gallery。
推介項目: 皇宮
參觀時段: 早上
入場價錢: 每人17.00英鎊
評分: 值得去5  
入口以星體為題
入口以星體為題
熔岩裝飾
熔岩裝飾
模擬神戶地震
模擬神戶地震
Dodo 鳥標本
Dodo 鳥標本
面積達一幅大牆既史前生物
面積達一幅大牆既史前生物
恐龍骨標本
恐龍骨標本

顧名思義 Natural History Museum 主題就係大自然,出發前查閱旅遊資料,馬上對此館產生興趣!

Natural History Museum 大部份既展品原來係一位漢斯爵士既收藏品,於1880年由大英博物館獨立出黎。因此建築物外型不但宏偉,論博物館既規模、設計、資料同收藏甚豐富,絕不遜色,置身其中彷如融入另一個主題世界,非常吸引。

博物館以星體、火山爆發揭開地球形既話題,更模擬1995年神戶地震,讓參觀者感受一番。我個人覺得震動與當年真實情況應尚有很大距離,純粹係一個賣點。地質、土壤、海洋、氣候變化同環保問題等亦係其相關主題,更有動物、生物標本,最意外係見到 Dodo 鳥既標本,早前到過毛里裘斯得悉 Dodo 係絶種體形較大既鳥類,响當地一保育島上有機會見到 Dodo 鳥既近親。但今次可以將腦海中既 Dodo 鳥完全活現眼前。

Natural Hisory Meseum 當然無大英博物館咁明星,但對呢方面有興趣既朋友,我會極力推介 Natural History Museum。

參觀時段: 下午
入場價錢: 每人0英鎊
評分: 值得去4  
泰晤士河上的 London Eye 及國會大樓
泰晤士河上的 London Eye 及國會大樓
售賣熱狗小販
售賣熱狗小販
熱狗與 London Eye
熱狗與 London Eye
Big Ben
Big Ben
國會議事廳
國會議事廳

London Eye, Big Ben, 國會議事廳呢3個地標性建築位置非常接近,同時亦位於泰晤士河上,對遊客黎講真係好方便。

從地鐵站一上黎就係泰晤士河既橋上,河對岸係 London Eye 同國會大樓,而右手邊與橋相隔既就係 Big Ben,突然間好似一盤豐富既晚餐放响眼前,令您目不暇給。我選擇沿橋慢走先到 London Eye 同國會大廈。一路行旁邊有販賣小食既車仔,我被熱狗香味吸引著,反正午餐未有著落,不如試下街邊熱狗既風味。一隻大約7-8吋長既熱狗,炒香既洋葱作配料,有芥末、茄汁可供選擇。售價3英磅,响英國黎講唔算貴,況且係遊客區。一邊欣賞橋上美景、海驅飛翔、聽著鐘聲,一樂事也!

國會議事廳亦係古舊式建築物,充滿悠長歷史背景,遇過無數風霜。1090年由威廉一世完工,1834年經歷一場大火將部份建築消毁,重建後又遭二次大戰破壞,只有 Westminster Hall 原貌可以保留下黎。但可能由於遊客稀來攘往,加上各式餐廳、手信店舖、影院、售票處等既座落,驅走國會議事廳固有既嚴肅感!

反而 Big Ben 筆直地站立著由1859年開始緊守崗位,嚴謹又有規律地報時,重重鐘聲風雨不改地提醒泰晤士河一帶既人群,責任崇高!

遠睇 BA London Eye 好似一個小玩具,實質好大,每一個透明車廂可容納30人,中間設有長櫈,通道足以讓輪椅出入,每轉一圈最小要30分鐘。London Eye 係一個幸福摩天輪,車廂內可高高在上地環顧倫敦市內美景,亦可與旁邊車廂旅客打招呼!想要官方照片,記得臨尾時對準鏡頭開懷大笑呀!

聽講日與夜擁有截然不同既美態,有時間可以夜晚再去多一趟!

推介項目: 搭乘 BA London Eye
參觀時段: 下午
入場價錢: 每人17.95英鎊
評分: 值得去4  
餐牌
餐牌
酒吧
酒吧
座位
座位
Samosa
Samosa
最辣既Lamb Jalfrezi
最辣既Lamb Jalfrezi
Chicken Jalfrezi + Bengal Tiger Fish
Chicken Jalfrezi + Bengal Tiger Fish
Bengal 炒飯
Bengal 炒飯
飯後送上朱古力
飯後送上朱古力

响 South Quay 有好多一眼就知係豪宅既 Apartment,外形新穎,恰如星加坡既型格豪宅區,與傳統英式既 House 各走極端 。除此之外, 呢區仲有好多世界級既金融機構,辦公大樓向高發展,全係玻璃外牆,朋友形容為中環,我個人覺得比中環還要新。

Bengal Quay 外觀與內部亦係中檔次既餐廰,當晚客人唔多,僅得3、4 枱客人,十分寧靜。

- Samosa (肉同菜饀):
皮係用上普通春卷皮,較薄同脆口。跟响香港食到 Samosa 較為厚身既皮,食味同口感都有差異。 肉饀較為美味,而菜饀則太乾。

- Bengal Tiger Fish:
魚肉夠滑,食味有微酸,辛辣度排第2。
 
- Lamb Jalfrezi:
羊肉肉質鬆軟,入口帶點酸味,但隨即辛辣味佔據舌尖,唔能夠輕視,辛辣度居首位。

- Lamb Madras:
羊肉味較輕,亦有小許韌,辛辣度排第3。

- Aloo Gobi:
椰菜花本身味香濃烈,伴有洋葱碎,只帶微辣。

- Chicken Tikka Massala:
以甜酸味為主打,辛辣味為次選,辛辣度排第4。

- Chicken Jalfrezi:
係唔辣既菜式,椰汁味濃。

- Plain Naan:
味道逹到一般水平。

- Bengal Rice:炒得幾香,味道 ok。

總括黎講,食味、服務、環境等都算唔差,但論印度菜既精髓就未能完全發輝。從菜式食味温和同採用既香料較輕黎判斷,則欠缺印度色彩,好理解食肆多多小小都會為當地人口味而 Tailor Made。食厭左西餐,試試印度菜亦未嘗不可!

推介菜式: Bengal Tiger Fish
每人消費: 約15.00英鎊 (晚餐)
評分: 味道3   服務4   環境4   衛生4   抵食3
Eat In 外觀
Eat In 外觀
Lamb Shrank
Lamb Shrank
Fish & Chip
Fish & Chip
蕃茄湯
蕃茄湯
Innocent Smoothies
Innocent Smoothies
Innocent Smoothies 背面
Innocent Smoothies 背面
8月14日天陰有雨,近幾日天氣都麻麻,一落雨氣温就下降,帶黎既衣物都不盛負荷。可能自己黑仔啦,不過無論點黑都要向計劃好既行程進發,Yeah.......

我係一個怕冷既人,通常會選擇熱湯類既早餐,但响英國邊處有早餐A既煎雙蛋,火腿通粉,齋熱咖啡,朝朝飲真唔習慣!Eat In 係公路上一個 Break Point,經過長途車程,司機同乘客可以落車休息同食下野。今日睇到呢度既食物,興奮得要叫起黎,除有麥記、有雞記之外,仲有英國菜、德國菜等,全部都係熱喇喇,當然唔少得熱湯啦!肚仔即時發出肚餓既響號,要快d快d買野食先得。

- 炸鳕魚伴薯條:味道 OK!只係炸粉微厚,薯條有點淋。

- 德國羊架伴薯蓉:羊架炆得淋、連同美味既汁一同咀嚼,再加上香滑薯蓉,好正呀!

- 蕃茄湯:温度夠熱,蕃茄味又濃又酸,裡面仲有好香蒜味既麵包粒,又香又醒胃呀,啱曬我!

- Innocent Smoothies:第一次接觸呢個牌子,包裝設計得好 Funny,有3種唔同既味道,我選左芒果混熱情果。味道好清新又唔假,細睇原來用上 100% 新鮮果汁、無人做色素、無添加,呢款原來設計比小朋友,紙盒後面仲有教小朋友環保既小玩意,凈係 Concept 我己經好 Buy,何況仲咁好味添!
 
- 紅牛:無計朋友要渣長途車,所以要提提醒!

估唔到好似 Food Court 既地方有如斯美味既食物提供,而且價錢又唔太貴,真係意想唔到。

食飽飽上過洗手間,寧捨醒神,繼續向目的地進發!
推介菜式: 羊架伴薯蓉、蕃茄湯
每人消費: 約22.56英鎊 (早餐)
評分: 味道4   服務3   環境3   衛生4   抵食4
養眼兼有氣派既草地
養眼兼有氣派既草地
樹木展
樹木展
博物館
博物館
恐龍骨標本
恐龍骨標本
Museum of Oxford 內學者雕像
Museum of Oxford 內學者雕像
Bridge
Bridge
教堂
教堂
繼續開車,從 Eat In 不到半小時就到達 Oxford。

Oxford 係世界著名學府,歷史悠久,雖然係落雨天,遊人亦非常鼎盛。Oxford 學府樓群被餐廳、商店、咖啡廳等包圍,走到裡頭才可以感受到學府既氣息。裡頭多達900多幢古舊建築物,有的佈滿雕塑人像,有的刻有圖案既厚重大木門,光要往較著名既建築物走一走,相信起碼也要一整天既時間。仲有小石砌成既馬路,充滿中世紀氣氛,漫步其中,令我即時想像當時既情境。

圖書館、博物館係開放予遊人參觀,圖書館比人較沉悶既感覺,所以選擇到博物館,剛剛碰上門口在展覽獨特木材,經研究一番,果然又吸收左一 d 新知識。博物館樓底頗高,頂部透光,兩旁有歷代學者既雕塑,亦有各式物理展品,中間更放有恐龍骨橂型,令我頓時諗起哈利波特電影,總之展品亦相當豐富、具可觀性。

逗留不久又要趕著到另一景點,無計今次行程傖拙,。
評分: 值得去4  
River Avon 既 U 形流水
River Avon 既 U 形流水
庭園設計展覽
庭園設計展覽
隨處可見既海鷗
隨處可見既海鷗
Bath Abbey
Bath Abbey
Museum 裡美麗既天花
Museum 裡美麗既天花
熱騰騰既温泉水
熱騰騰既温泉水
Roman Bath
Roman Bath
Podium 既美景
Podium 既美景
離開 Oxford,趕緊又將車開到 Bath。該區沿路都係一些民居,全屬古舊既 House,估計也有相當歲月,心裡想這就是末代港督彭定康既家鄉。抵逹中心點,一幢舊式建築物地面一層建有現代大玻璃既超市,裡面人來人往、川流不息,相對古填面貌既 Bath,有點格格不入!

讀旅遊書上 Bath 既淵源,原來好耐之前有位叫 Bladud 既王子身患麻瘋病而被放逐到 Bath。為左謀生養起豬黎,一日發現豬群在吃沼澤上醬果,為救豬群反而自己跌落沼澤,及後發現身上麻瘋痊癒,於是決意將 Bath 打做為温泉。就此名為 Bath。 

踏上由方型大石砌成既行人道,古舊建築物與 Pulteney Bridge,還有海鷗、鴿子縱橫交錯地飛翔,有時在橋博上表演平衡功架,形成一幅歐陸式畫冊。好快又被橋下一條名為 River Avon 既河流吸引著,河上泛現 U 形既流水,過一會遊覽船經過,好想多留一會靜心欣賞這幅美麗既動畫。

可惜時間有限,還是要趕著走到另一個景點。遠處聽見一陣樂器既聲音,原來有兩位表演者响 Bath Abbey 前賣藝,面上顯現投入之情確實令人動容,响英國到處可見各式各樣既街頭表演者,而表演者亦受市民尊重,這種融洽既互動,難怪當地文化藝術發展蓬勃,實在難能可貴!

遊人可購票參觀 Bath Abbey 內部,但可惜開放時間已過 (無記錯開放時間只到下午4時),惟有到下一個景點。

剛巧遇上庭園設計展覽,得奬設計於公園內展示,遊人只需付1英磅便可入內參觀,順便一遊,鮮艷美麗既花朶十分養眼!

The Roman Baths Museum 係必看項目。博物館基本上係浴場既原址,利用原有結構加上建設同解說,令這經過400年建造既宏大羅馬浴場活現眼前。雖然當年既金璧輝煌已不復再,但館內設計非常仔細,各主要既陳設,基建、裝飾等均能令參觀者目不暇給,感嘆當年建築設計之偉大。

好彩有朋友作導遊,最後亦無錯過 Podium 呢個景點。相比 Pulteney Bridge,Podium 係一幅靜止既畫,視野雖不及 Pulteney Bridge,但整個細小既畫面足以令您目定口呆!

Bath 景色真像詩般既美麗,空氣更揚溢著詩人既浪漫,好值得親自感受一番!
 

推介項目: The Roman Baths Museum
參觀時段: 下午
入場價錢: 每人12.25英鎊
評分: 值得去5  
Funghetti Idiavolati
Funghetti Idiavolati
Fettu Traviate
Fettu Traviate
Crispy Polenta
Crispy Polenta
Ling Faraglioni
Ling Faraglioni
座位
座位
遊完 Bath 大概7點多, 不過大部份商店都關門了,真沒想到遊客區營業時間都咁短。

到處睇下有咩食肆可以選擇,一睇原來每間食肆都人頭湧湧,最後選擇左 Martini。食肆近門口處係酒吧,酒吧工作人員已馬上跟我們打招呼,熱情又有禮。不到15分鐘,我地就被領到較後既位置,原來食肆間隔頗深,好似天外有天一樣。

座枱排列較密,客人們都熱哄哄地談天說地,氣氛温暖而不覺嘈雜,這反而係我喜歡既食肆格局。

由於室內燈光有點昏暗,花了一點時間細看菜譜,終於點菜喇!

- Funghetti Idiavolati:
磨菇真無令人失望,一送上枱已香氣四溢,不但新鮮,蕃茄、蒜頭等味配合得好好,yummy!

- Ling Faraglioni:
最喜觀小蕃茄,但汁既水份則較多,唔夠黏身,所以食落味道稍嚴不足,青口就有點過熟。

- Fettu Traviate:
白汁比蕃茄汁做到好,雖然較膩,但起碼味道對勁。

- Crispy Polenta:
質感令有有點怕,綿綿粉粉,加上毫無味道,食落令人有點反胃,放棄吧!


該晚所選擇既食物雖然一般,但餐廳氣氛輕鬆温暖,服務侍應亦唔錯,所以感覺特別舒服。

推介菜式: 磨菇
每人消費: 約16.80英鎊
評分: 味道3   服務4   環境4   衛生4   抵食3
餐牌
餐牌
靠窗座位
靠窗座位
J2O 飲品
J2O 飲品
Buffalo Wings
Buffalo Wings
Steak & Kidney Pie
Steak & Kidney Pie
恰似心太軟
恰似心太軟
Plaice & Chips
Plaice & Chips
8月15日,臨近旅程尾聲,天氣開始正常起黎,也許是要歡送我吧!

到倫敦咁耐無好好既試過英國食品,今日朋友終想起 Liberty。Liberty 就响 Tower Bridge 附近,係一間半自助形式既餐廳酒吧,樓上更有投射直播球賽。提供英式早餐同美食,每到放工時間或週末晚,連門口走廊都站滿拿著酒杯或啤酒既客人,熱鬧景況與今午窗口滲著淡淡陽光既閒息,又有好大分別。

餐牌提供多種選擇,不過最驚喜係英國有唔少低酒精加果汁或純果汁既瓶裝飲品,為不太 "好" 酒既女士提供多元既選擇,連我 "好" 酒之人對十分感興趣!

- Steak & Kidney Pie:
外表有 d 似心太軟,不過係鹹版。皮唔糊口,切開裡面既汁慢慢流出,軟軟既牛肉加上爽口既腎形成強烈既口感,汁唔太濃亦唔淡,味道剛好,組合成美味既 Pie。

- Plaice & Chips:
炸魚薯條係英國有名菜式,Liberty 雖然唔係炸魚專門店,但餐牌都有好幾款魚提供,我選左 Plaice 魚。沒有令人未食先飽既厚厚炸漿,反之簿脆,感覺良好。魚肉鮮嫩滑溜,英國食到既青豆不知何故特別鮮甜,所以都係美味之選。

- Buffalo Wings:
賣相討好,不過唔夠入味,浪費了!

- J2O 蘋果+芒果汁 及 橙+熱情果汁:
兩款味道都我黎講都非常有新鮮感,味道唔會太甜同太假,如果香港都有咁多選擇就好 lu!

收費合理,味道唔錯,頗滿意既一餐,食飽飽得繼續行程。
推介菜式: 英式 Pie、炸魚薯條、特色瓶裝飲品
每人消費: 約8.5英鎊 (午餐)
評分: 味道4   服務3   環境3   衛生4   抵食4
Tower Hill 騎警
Tower Hill 騎警
處決犯人既 Tower of London
處決犯人既 Tower of London
Tower Bridge
Tower Bridge
對岸既 South Quay
對岸既 South Quay
Trinity Tower 外貌
Trinity Tower 外貌
外牆既巨大雕像
外牆既巨大雕像
手工精細
手工精細
今日朋友放假領著我响倫敦閒逛。

Tower of London 亦係旅遊書推介景點之一,跟其他城堡、建築物一樣背後有著一段歷史。於1066年,William the Conqueror 建設 Tower of London 目的係為防守要塞,亦曾經成為皇室居所,其後成為監獄,更作為處決犯人既刑牆。

於1894年完工,耗資1,184,000英鎊,為應付船舶愈黎愈大既需求。 Tower Bridge 位於泰晤士河上,更是見證著倫敦航運貿易既興衰。當年 Tower Bridge 橋樑一天要升起50次讓大貨輪通過。而現在大橋一週最多3次,正所謂時移世易,今非昔比!

Tower Bridge 前面有一個名為 Tower Millennium Pier 有船可到 South Quay。

Trinity Square 係 Tower Hill 對面既一幢建築物,建築物前有一個 Trinity Garden,具體性質不太清楚,但每次經過都會被佢吸引住。建築不算宏偉,但其外牆及頂部既雕像手工細緻,尤其牆身大雕像既神情同裝束均帶著一點權威及威嚴,感覺有點 cool。經過時不坊花10分鐘睇睇,唔知您有無同我一樣既感覺。
參觀時段: 下午
入場價錢: 每人0英鎊
評分: 值得去4  
閒逛景點! ok喇2010-11-01
10 Downing Street
10 Downing Street
The Cenotaph
The Cenotaph
The Horse Guards
The Horse Guards
紀念二次大戰女性
紀念二次大戰女性
Whitehall 係 Westminster 一條路,由北面國會大樓伸延至南面 Trafalgar Square。我地只選擇北面一帶既景點走一走,沿路有國會大樓、一些政府大樓、10 Downing Street, Horse Guards, The Cenotaph, 同皇宮等。

10 Downing Street 首相府通常都只會响新聞報告中見記者响門前站立報導,今日親身抵達門前,其實並無特別之處,不過首相府終歸係首想府,魅力非凡,門前聚集唔少既遊人久久不散,唔通諗住可以親眼目睹首府出現?

Horse Guards 門前既騎兵同駐守士兵吸引遊人爭相拍照,先莫講每朝既換兵儀式。好...一於聽朝睇過後再同大家匯報。

The Cenotaph 都响電視見得多,當日亦日花圈致祭死難者。The Cenotaph 是以紀念第一次世界大戰既死難者,其後同以紀念戰爭及服役既犠牲者。 The Cenotaph 前方另有樹立一塊紀念第二次世界大戰女性既碑,以純黑色並掛有立體女性手袋、衣物既設計,相當特別!
參觀時段: 下午
入場價錢: 每人0英鎊
評分: 值得去3  
餐牌 + 蝦片
餐牌 + 蝦片
泰式裝飾
泰式裝飾
泰式沙律
泰式沙律
雞翼
雞翼
冬陰功湯
冬陰功湯
魚餅
魚餅
青咖喱
青咖喱
朋友知我鐘意食辣,所以提議晚餐食泰菜,我話得唔得架?佢話厨師都係泰國人,應該可以掛。好就試一試吧!

泰式裝修,木枱木椅,有點巴堤雅 Feel。老闆知我係香港人,先問問我鐘意食咩泰國菜,摸底之後,我諗佢心裡有數。

- 泰式沙律:
味道對辦,酸酸辣辣,帶泰式香草味,對我朋友黎講一半英國人,當然唔習慣呢種味道啦!

- 雞翼:
完全係港式生抄骨既翻版,揾唔到任何泰式既影子,啱曬鬼佬同我朋友口味!

- 冬陰功湯:
湯底顯然唔夠濃,只有酸辣味,香料味亦不足。

- 魚餅:
味道一般,ok 啦!

- 青咖喱:
只有甜味,食唔到咖喱香味,真無計!

食到一半,老闆都有問我味道如何?我回應一句好啱英國人呀!大家心照啦!

雖然食物未達到要求,但有時去到外地,抱著試玩既開心心態去面對係必需既。




推介菜式: 泰式沙律
每人消費: 約17.3英鎊 (晚餐)
評分: 味道2   服務3   環境3   衛生4   抵食3
整裝待發
整裝待發
騎兵列隧
騎兵列隧
部份騎兵由拱門進入
部份騎兵由拱門進入
部份騎兵撤離
部份騎兵撤離
8月16日,天晴!

第一站係 Horse Guards 早上11點既換兵儀式。抵達時門口人潮已消散,相信大部份遊人已內進準備觀看換班儀式。穿過石拱門,果然人群已被分開左右兩旁等待,心想我也要佔一個前排位置,否則視線又被其他人阻擋,好彩有部份遊人等不耐煩,可以站到第一排去,當然都係隊尾,非中央部置。

左右兩排各12名既騎兵精神抖擻騎在馬背上,排得整整齊齊,似在等待下一部儀式進行。當中有馬兒精神不集中,垂下頭來,騎兵馬上勒緊疆繩,不讓馬兒有半點鬆懈。

隨後看見遠處,新一批騎兵從 Hyde Park 方向 "啲撘" 地步行過來,亦有小部份從拱門進入。經過一輪發施號令,正式換上新一批騎兵當值,舊騎兵則沿 Hyde Park 方向離開,換兵儀式大約在半小時完成。
參觀時段: 早上
入場價錢: 每人0英鎊
評分: 值得去3  
我最喜愛既軟 Nougat 糖
我最喜愛既軟 Nougat 糖
昂貴既法國 Cherry
昂貴既法國 Cherry
牛仔肉等熟食
牛仔肉等熟食
海鮮
海鮮
豪華既生日蛋糕
豪華既生日蛋糕
非常吸引既蛋糕
非常吸引既蛋糕
Harrods 既古舊外形
Harrods 既古舊外形
一如旅遊書介紹,到 Harrods 一定要先拿 Store Guide,先鎖定目標,以免浪費時間及迷路。

Harrods 有著116年歷史,從其建築物外觀應略知一二。樓層分別有 LG, G, 及1至5樓。我計劃先看看1樓女裝,然後再到地下既 Gifts & Stationery,最後到 Food Halls。

女裝有很多漂亮及型格衣服,特別係一 d 香港沒有既品牌,不過礙於價錢唔算平,所以粗略逛逛就離開。然後轉到 Gifts & Stationery,當中不乏好多價錢適中既有趣手送。

不過講到最吸引我既當然係 Food Halls,貨品範疇由乾貨既餅乾、菜葉、糖果至濕貨既水果、海鮮都有,更有如小型 Food Court 攤位既壽司、點心、海鮮等供客人用膳,真係未走到內部已聞到陣陣食物香氣,加埋佢地極度精緻吸引既賣相,當堂感覺個肚發出 "咕咕" 聲響。

Harrods 也象徵著奢華貨品,大部份貨物絕不是一般平民百性可負擔得起。就當日眼見標上法國既車厘子,竟然賣40英鎊一公斤,照當時匯率折算即每磅為$225港元,認真厲害。

到 Harrods 唔買野,見識下都唔錯!
推介項目: Food Halls
參觀時段: 早上
入場價錢: 每人0英鎊
評分: 值得去4  
獨特既 Sushii!
獨特既 Sushii!

逛到有點倦及餓,走到 Wasabi 門口見唔少人幫襯,食日本壽司又可以換換口味,自助形式又較隨意,儘管一試。

選好壽司及飲品,便到 Cashier 付錢。由於人數唔少,要等一陣先有位。

打開加洲手卷,竟然發現裡頭有蠺豆,記得加洲手卷唔係青瓜絲、牛油果、蟹柳、沙律醬嗎?基本無一配料係啱既。飯還是可以,但有點鬆散。再試埋其餘兩舊小壽司,味道不過不失,唔可以話難食,不過完全唔係平日食開既日本壽司既風味。

好彩無多要幾個,否則真要揼心口!

每人消費: 約3.87英鎊 (下午茶)
評分: 味道2   服務3   環境3   衛生4   抵食2
片斷.... 笑臉2010-11-01
St. Paul's Cathedral
St. Paul's Cathedral
St. Paul's Cathedral
St. Paul's Cathedral
Marble Arch
Marble Arch
Marble Arch
Marble Arch
楕圓大郵筒
楕圓大郵筒
Convert Garden 街頭表演者
Convert Garden 街頭表演者
Convert Garden 既大猩猩
Convert Garden 既大猩猩
London Eye 既街頭表演者
London Eye 既街頭表演者
臨走前一晚將心情收拾好,回想起10天既行程,總有點不捨!尤記得第一日見到倫敦市既紅色雙層巴士、過路設施、紅色大郵筒等,全都充滿香港舊日的影像,十分親切。心裡感慨著好可能要過一段長時間先再會重臨倫敦呢個內涵豐富既城市!

呢次旅程遇到既英國人都係好 Gentleman,加上歷史文化悠久,香港人本身又有著殖民地既情懷,令我對倫敦增加了好感!

在此將零零碎碎既片斷收集起來,作為一個總結吧!
入場價錢: 每人0港元
評分: 值得去3  
告別晚餐! 笑臉2010-11-01
Mushroom Bruschetta
Mushroom Bruschetta
咖啡 + 可樂
咖啡 + 可樂
Open Kitchen
Open Kitchen
座位
座位
Rib Eye Steak
Rib Eye Steak
Chicken Kiev
Chicken Kiev
餐廳外既座位
餐廳外既座位
要告別了,朋友選擇帶我到 O2。 O2係一個綜合表演場地,電影播放、Talk Show、話刻等。抵達時見場內有幾個特別効果既試驗供遊人體驗,但唔知係咪晚上暫停使用,所以無法試玩。

haha 客人亦唔多,可能係位置問題,或者當晚沒有表演,所以遊人疏落。

- Mushroom Bruschetta:
一見到 Mushroom 馬上列入點菜名單,除左青豆,英國食到既 Mushroom 比香港食到既磨菇味香濃。果然做得唔錯,入口香濃牛油味,配上黑椒味既磨菇特別出味,正!

- 10oz Rib Eye Steak:
本想食 Sea Brass,但當日無貨,又唔鐘意食三文魚,所以還是食牛吧!牛排肉質唔係頂級貨色,肉味不濃,肉質亦味夠彈,不過勝在夠滑,加上野味既黑椒汁,可保救不善之處!

- Chicken Kiev:
朋友又要雞胸,我怕嚡嚡既肉質,點知佢話呢部份會唔嚡。朋友果然熟悉食材,真係唔嚡,中間夾上已溶化既芝士,增強了雞胸食味,唔錯喎!

- 飲品:可樂及 Latte 咖啡

環境清靜,女侍應好友善,算係一頓唔錯既告別晚餐。
推介菜式: Mushroom Bruschetta, Chicken Kiev
每人消費: 約20.4英鎊 (晚餐)
評分: 味道4   服務4   環境4   衛生4   抵食3
  2 個留言    |  加入你的留言