我地喺東京第一晚，因為預咗要成八點，團友們先會到齊酒店集合，所以一早就已經諗定喺附近一家牛脷專門店Negishi度食晚餐。Negishi係牛脷快餐連鎖店，淨係喺新宿都有九間分店，凱悅酒店鄰近都有兩間，我地當然係去較近嗰間啦，慢速步行都只係約十分鐘左右。

話明係快餐店，喺Negishi食飯當然係要搭枱啦；雖然有長枱，不過我地一行十一人都要分開坐。服務方面，XO仔覺得以快餐店黎講可算為正常，不過以日本人水準黎講就只屬一般。

Negishi所提供o既牛脷，有厚有薄；雖則話係牛脷專門店，不過如果團友中有人唔食牛脷唔緊要，餐廳亦有咖哩、普通牛肉、豬肉等食品。我地十一個人每人叫咗一份套餐，每份都有飯、有湯、有菜，好完整。如相所示，套餐入面有一碗疑以醬汁o既橙黃色汁液，經哥哥位靚女朋友解釋過後，大家先知原來嗰碗係山藥（yam）攪拌而成o既「山藥醬」。個山藥醬濕濕滑滑，漿漿地，幾得意，雖則個醬已經調咗味，不過好多食客都會再加豉油；眼見靚女姐姐將山藥醬撈入白飯，連同牛脷一齊食，小肥當然係抄足黎食啦！小肥同姨丈每人叫咗嗰份「白たん厚切四枚（八切）しろ4セット」套餐，餐牌上註明每份熱量為780kcal，大家覺得都唔算過份，食得好放心。厚切牛脷每片都咁爽脆，而且又軟又多汁，配上野味o既咸菜，濕滑o既山藥醬，同熱辣辣o既白飯，真係好正；每客1,820日圓，美味、飽肚、又暖胃，個人覺得價錢絕對可以接受！

此外，Negishi亦有做外賣，門口有小冊子介紹訂購方法，包括以電話、傳真、手提電話及互聯網，送禮自用兩相宜。