東涌之友
我是東涌之友。 我是一名clerk。 我最喜愛到日本,韓國,泰國旅遊 , 最鍾意遊覽自然景觀,歷史建築/遺跡,城市風貌, 住宿通常會揀4星酒店,公寓,網誌:http://blog.yahoo.com/clara-lee。
留言  留言給此旅遊家
  遊記數目 38
  上載相片 351
  上載影片 0
最近分享過的旅程
澳門熱辣辣一天遊
國家/地點: 中國
旅程日期: 2013-06-19
深圳宿一宵
國家/地點: 中國
旅程日期: 2013-09-28 至 2013-09-29
濟州釜山自由行
國家/地點: 韓國
旅程日期: 2013-09-01 至 2013-09-06
釜山首爾追櫻記
國家/地點: 韓國
旅程日期: 2013-04-07 至 2013-04-12
首爾冬遊記2013
國家/地點: 韓國
旅程日期: 2013-01-19 至 2013-01-23
賞櫻見雪長野行
國家/地點: 日本
旅程日期: 2011-04-17 至 2011-04-20
首爾冬遊記2013 (韓國)
(旅程日期: 2013-01-19 至 2013-01-23 ,  旅程性質: 消閒度假)
發表日期: 2013-01-27

雖然曾經去過兩次首爾,但都係跟團,而且係十幾廿年前的事!因此,今次舊地重遊,做足前所未有的資料搜集!除睇左十本八本旅遊書之外,仲不斷上網睇唔同的Bloggers的推介,亦有到韓國觀光公社取資料(旅遊書、地圖、八達通套、優惠券同埋韓國購物節單張等),當然唔少得各方老友的建議。

今次五天行程大致順利,除集中市內遊玩外,仲去到《冬季戀歌》拍攝地的南怡島,又食到唔少美食,實在好滿足,大家可以參考我的行程看看:

第一天:仁川機場抵埗>東大門汗蒸幕Sparex>Western Coop Residence 酒店Check in>仁寺洞逛遊(兼預訂南怡島直巴套票>返東大門晚飯

第二天:梨大及梨大購物街逛遊>德壽宮>市政廳>夜遊明洞>那度香烤肉做晚飯


第三天:由仁寺洞乘直通巴士(約1小時20分)直達加平碼頭,再乘渡輪至南怡島(遇上落雪,漫天飄雪的南怡島真係超靚!)>回程到廣藏市場


第四天:昌德宮>北村韓國村>南山纜車上N首爾塔>全州中央會館吃石鍋飯及大醬湯>晚上到樂天超市購物

第五天:光化門>清溪川廣場>東大門遊走>提早出機場退稅兼玩韓國體驗館的木板繪畫>回港已是深夜十二時!

好!第一天的行程就由東大門汗蒸幕SPAREX開始啦!

東大門汗蒸幕Sparex位於Good Morning City的地庫B3。
東大門汗蒸幕Sparex位於Good Morning City的地庫B3。
在櫃枱俾錢後(我地早上來到,只7,000韓元搞掂),店員會俾兩條毛巾、一套衫褲和鎖匙。
在櫃枱俾錢後(我地早上來到,只7,000韓元搞掂),店員會俾兩條毛巾、一套衫褲和鎖匙。
先搵番自己鎖匙的號碼,再將鞋放在鞋櫃內,然後便進入更衣室同埋澡堂,大家肉帛相見啦。
先搵番自己鎖匙的號碼,再將鞋放在鞋櫃內,然後便進入更衣室同埋澡堂,大家肉帛相見啦。
必飲推介:甜米汁(2,500韓元),好大杯,正好用來補充水分。
必飲推介:甜米汁(2,500韓元),好大杯,正好用來補充水分。
炸醬麵當早餐,好大碟呀!
炸醬麵當早餐,好大碟呀!
食完早餐,出來見到男男女女攤晒在地上,照訓可也!
食完早餐,出來見到男男女女攤晒在地上,照訓可也!
呢個中溫的窰室,溫度高到無命,我只可以坐十幾秒,坐耐D肯定變烤雞!
呢個中溫的窰室,溫度高到無命,我只可以坐十幾秒,坐耐D肯定變烤雞!
最凍的一間,坐多陣變冰條!
最凍的一間,坐多陣變冰條!

由仁川機場坐機場巴士到達Western Coop Residence,只係朝早八點幾,未到Check In時間(下午二時),所以決定放低行李,到韓劇主角們好鍾意去的汗蒸幕體驗一下!睇過網友推介,覺得東大門Sparex既近酒店兼且又夠新,價錢仲好抵(非繁忙時間只係7,000韓元)!Sparex位於Good Morning City商場地庫B3,由酒店步行約十零分鐘就到,好方便。

在櫃枱交了7,000韓元入場費後,店員就會俾一套衫褲、兩條毛巾和一條鎖匙(鞋櫃和儲物櫃共用呢條鎖匙)。先到鞋櫃放鞋,再到裡面的女更衣室放下行裝和除衫,就可以進入澡堂。澡堂內,大家記得先沖身和洗頭,然後先至跳入唔同溫度的浴池慢慢浸呀。呢度一共有六個池,有熱(30幾至42度左右)有凍(18度左右),仲有桑拿室和蒸氣室,單單在此已可以消磨一個小時。

浸完浴後,穿上店員俾的衣服,就可以落下一層吃東西和玩汗蒸幕~我地當然先醫肚,小食部只收現金,記得落去前帶定錢傍身!我地揀左呢度必飲的甜米汁(2,500韓元)再加炸醬麵(5,000韓元),兩者都係韓劇主角經常食用的東西,幾大要試試!甜米汁味道似薏米水,清清甜甜,幾好飲。炸醬麵甜甜的,完全唔辣,不過好大碗,實在食唔晒,而且味道不外如是。

 飲飽食醉之後,就出去搵地方眠一眠。大堂布置好有中國Feel,古色古香,見到唔少人就咁攤在地上,又或捐入窿窿內休息,其實呢度仲有睡眠室(男女分開,不過係碌架床,無乜Feel!),亦有唔同的小房可以攤屍,我地揀左間女士專用小房,便直接搵個枕頭在地上大覺訓啦~

睡足覺後,可以到另一邊的窰室試下烤箱的滋味,其中最熱(標示:中溫!)的高達82度!我入去感受一下,已經立時要出番來,坐得耐的話隨時變烤雞!仲有60、50、40幾度三個熱的窰室,60幾度個間其實都好熱,但我居然見到有人訓著左,仲要拉鼻鼾,勁!我都係坐到幾分鐘,已經要起身!除左熱窰室之外,亦有一個冰窰室,三溫暖的滋味原來就係咁架啦!

結果,我地由八點幾玩到下午一點,玩足四個幾鐘,只係幾十蚊,真係好超值!

推介項目: 汗蒸幕
參觀時段: 早上
入場價錢: 每人7000韓圓
其他消費: 炸醬麵5,000韓元,甜米汁2,500韓元
評分: 值得去5  
  0 個留言    |  加入你的留言
發表日期: 2013-01-27
玩完汗蒸幕後,便返酒店Check in。我地住的Western Coop Residence(西方高爺公寓酒店),位置方便,環境亦頗舒適,絕對值得推介。
酒店位於乙支路5街,機場巴士直達到門口,真係好方便。
酒店位於乙支路5街,機場巴士直達到門口,真係好方便。
客廳的牆上有層架和檯,方便放戰利品。我和朋友就晚晚將戰利品放上去,到最後一日已擠滿整個層架啦~
客廳的牆上有層架和檯,方便放戰利品。我和朋友就晚晚將戰利品放上去,到最後一日已擠滿整個層架啦~
床較細,每張只有兩呎半。
床較細,每張只有兩呎半。
只有企缸,不過有沐浴用品(洗頭水和沐浴露)供應,牙刷和牙膏則要自備!
只有企缸,不過有沐浴用品(洗頭水和沐浴露)供應,牙刷和牙膏則要自備!

Western Coop Residence屬於公寓式酒店(service apartment),位置好方便,由機場坐6001號機場巴士直達,免卻坐地鐵(地鐵站的石級真係行到怕,日日上上落落都好吃力!)將行李搬上搬落的麻煩,步行往東大門幾個大型商場(Doota、Good Morning city、Hello aPM等)都只係十零分鐘腳程,而且有體育用品地下街可以直通東大門歷史文化公園站(地鐵路線包括2、4和5號線)12號出口,去邊度都咁就腳。酒店旁邊有CU 同埋GS 25便利店,要買T Money和增值都好方便。

房間方面,乾淨整潔,空間比想像中大,甫進入房門,先有一個方形廳,左面牆上有層架和檯椅,方便拽放和點算戰利品,廳的右邊則有廚櫃和鋅盤,並有少量家電(雪櫃、微波爐、電水煲等),想買東西返酒店下廚話咁易。

廳後放左兩張單人床,床鋪的確比較窄,只有兩呎半闊,肥人可能感覺迫狹不太舒適,不過,我覺得尚可接受啦。

浴室只有企缸,最初以為房間唔提供沐浴用品,結果發現居然有洗頭水和沐浴露,不過牙刷牙膏就要自備啦!

唯一不太方便的係鎖匙只有一條,若兩個人要分頭行動時,就有少少麻煩啦~

每晚價錢: 1000港元 (雙人房)
評分: 設備4   服務4   環境5   衛生5   抵住5
  3 個留言    |  加入你的留言
發表日期: 2013-01-27
由於要預訂《冬季戀歌》拍攝場地--南怡島的直通巴士,所以下午去仁寺洞逛遊,希望可以在兩天後(即周一)出發,追蹤《冬季戀歌》的俊相和有珍的足跡啦。
抬頭一望,終於搵到仁寺洞旅遊中心啦!(中心下午六點關門,要買票就要留意啦!)
抬頭一望,終於搵到仁寺洞旅遊中心啦!(中心下午六點關門,要買票就要留意啦!)
仁寺洞好多工藝品和民族服店舖,但價錢唔便宜。
仁寺洞好多工藝品和民族服店舖,但價錢唔便宜。
精品擺設攤檔,女孩子應該會好鍾意!
精品擺設攤檔,女孩子應該會好鍾意!
街頭賣藝!
街頭賣藝!
見呢個雪糕檔好得意,於是幫襯下啦!
見呢個雪糕檔好得意,於是幫襯下啦!
哥哥仔將雪糕啤入扭扭條內,令到整條扭扭條充滿雪糕。食落真係凍入心!
哥哥仔將雪糕啤入扭扭條內,令到整條扭扭條充滿雪糕。食落真係凍入心!
由酒店坐地鐵在鍾路3街站下車,步行十分鐘左右便到達仁寺洞街頭。我地先尋找南怡島旅遊中心,以便盡早購買來往南怡島的直通巴士車票。幸好,旅遊中心唔難搵,大約在仁寺洞十字路口旁,在National Souvenir Center的二樓,中心可以預售直通巴士的來回車票和南怡島入場票,合共23,000韓元,方便快捷。

買票後,便開始閒逛仁寺洞。仁寺洞以中央大街為中心,四周有多條小巷,大家可以買到美術品、、韓服、陶瓷器、工藝品和旅遊紀念品等,當然唔少得無處不在的化妝品牌店。周末時分的仁寺洞非常熱鬧,皆因道路四周擺滿好多路邊攤擋,賣衫、賣擺設、賣小吃等一應俱全。

不過,我對工藝美術品沒有多大興趣,反而食左一條扭扭雪糕條(3,000韓元),凍到入心肺!

推介項目: 購買美術品,精品,紀念品,品嚐街頭小吃
參觀時段: 下午
入場價錢: 每人3000韓圓
評分: 值得去3  
  0 個留言    |  加入你的留言
發表日期: 2013-01-27
逛完仁寺洞,原打算返回東大門食部隊鍋,點知在商場旁的挪夫家部隊鍋(即奸詐宰相頭的那間)原來唔賣部隊鍋,只買泡菜包豬肉,結果退而求其次,在旁邊搵間地道韓式料理店吃晚飯。
我地想食的係烚下烚下部隊鍋,點知來的是一個熱辣辣的石鍋!
我地想食的係烚下烚下部隊鍋,點知來的是一個熱辣辣的石鍋!
迷你版部隊鍋同樣熱辣辣,湯底好濃郁,辣辣地好惹味!
迷你版部隊鍋同樣熱辣辣,湯底好濃郁,辣辣地好惹味!
海鮮綠豆煎餅好大塊,味道不錯,不過最尾要監生先食得晒!
海鮮綠豆煎餅好大塊,味道不錯,不過最尾要監生先食得晒!
店內以本地人為主,而且都係點烤肉。
店內以本地人為主,而且都係點烤肉。
店舖位於我地酒店通過各大商場必經之路,而且店外牆有齊各式各樣式食品,所以吸引我地幫襯。
店舖位於我地酒店通過各大商場必經之路,而且店外牆有齊各式各樣式食品,所以吸引我地幫襯。

呢間小店外放滿左唔少韓式食品的相片,其中見有部隊鍋,又有綠豆餅,正合心意!我地先叫部隊鍋,以為一個鍋就搞掂晒,點知店員話個鍋份量好少,兩人只吃一個唔夠飽!原來呢度賣的唔係網上見到的超大號部隊鍋,亦唔係開住爐烚下烚下的水鍋;奉上的其實係一個迷你石鍋,幸好鍋內都有齊部隊鍋的食品(午餐肉、香腸、拉麵等),而且同樣熱辣辣,湯底好濃郁惹味。食完迷你部隊鍋後,果然唔多夠喉,於是追加多一個海鮮綠豆煎餅。

海鮮綠豆煎餅超大塊,海鮮其實主要係八爪魚,勝在又係熱辣辣,煎得好香口。結果,兩人要監生先食得晒成塊煎餅,真係當堂飽晒!

埋單,合共28,000韓元,唔貴,亦好味!難怪咁多本地人幫襯啦!

推介菜式: 海鮮綠豆餅,部隊鍋,烤肉
每人消費: 約28000韓圓 (晚餐)
評分: 味道4   服務3   環境4   衛生4   抵食4
  0 個留言    |  加入你的留言
發表日期: 2013-01-27
梨大午飯後,坐車到市政廳站,一來順便行下德壽宮,若時間趕得及,仲可以睇埋守門將換班儀式添;二來想都想看看首爾廣場冬日限定的溜冰場,
大漢門外擠滿爭住同古裝守門將影相的遊人(包括我在內)。
大漢門外擠滿爭住同古裝守門將影相的遊人(包括我在內)。
宮殿四周有積雪,更添古意。
宮殿四周有積雪,更添古意。
中和殿前的小石柱,刻有不同級別的官階,古裝韓劇經常朝臣覲見皇帝時的場面。
中和殿前的小石柱,刻有不同級別的官階,古裝韓劇經常朝臣覲見皇帝時的場面。
宮內係古色古香的建築物,宮外則是現代化的高樓大廈,相映成趣!
宮內係古色古香的建築物,宮外則是現代化的高樓大廈,相映成趣!
由市政廳地鐵站1號出口,兩分鐘腳程即達德壽宮,對面便是首爾廣場。

到達時,大約下午3點半,雖然睇唔到王宮守門將交接儀式(只離遠見到遊行的門將在對面馬路的背影!),幸好在德壽宮的大漢門門外,有幾位高大威猛的守門將俾我地任影,而且仲會幫我地影合照!

跟古裝人影完相之後,順便俾1,000韓元參觀一下德壽宮,畢竟睇古裝韓劇睇得多,都想睇下拍攝的宮廷實景。

宮內四周有積雪,加上古色古香的宮廷環境,影相幾好!我尤其鍾意通往中和殿前的兩旁印有不同官階(由正九品至正一品)的小石柱,皆因睇古裝韓劇經常出現大臣在此覲見皇帝的場面,來到實地體驗一番,別有趣味!
推介項目: 觀看守門將換班儀式
參觀時段: 下午
入場價錢: 每人1000韓圓
評分: 值得去3  
呢座就係首爾廣場啦,對出就係冬日限定的溜冰場。
呢座就係首爾廣場啦,對出就係冬日限定的溜冰場。
溜冰場上擠滿左唔少人,以年青人居多。
溜冰場上擠滿左唔少人,以年青人居多。

遊完德壽宮,便過對面馬路睇睇變身做溜冰場的首爾廣場。

首爾廣場在首爾市政廳的對出位置。每逢冬季都會變身為溜冰場,供溜冰愛好者以超低廉的價錢享受冰上時光。今年的開放時間由舊年12月15日起至今年2月3日營運,入場費為每小時1000元韓元,有興趣的朋友要留意啦!

周日的午後,溜冰場充斥著大大小小的溜冰愛好者,畢竟用幾蚊港幣的入場費即可玩足一小時,過下癮都抵!可惜我地係門外漢,無謂顯醜,影影相看看便算了!

提提大家,進入滑冰場必須戴手套。另外,還有滑冰教室提供學習,使大家更容易上手。

推介項目: 溜冰
參觀時段: 下午
入場價錢: 每人1000韓圓
評分: 值得去5  
  1 個留言    |  加入你的留言
發表日期: 2013-01-27

梨花女子大學因《我的野蠻女友》(車太賢就係梨大被全智賢迫著高跟鞋周圍走!)而出名,景致幽美,聽講甚多龍友出沒;加上附近的購物街貨品平靚正,所以第二日一早乘地鐵到梨大站一遊,既去掃貨,亦順便觀光。

周日早上的梨大購物街。
周日早上的梨大購物街。
高跟鞋店叫Kosney,有好多精緻精品,亦有衣服鞋襪發售。
高跟鞋店叫Kosney,有好多精緻精品,亦有衣服鞋襪發售。
呢間其實係化妝品店,全店半價,超抵。
呢間其實係化妝品店,全店半價,超抵。
要尋寶的話,記得走入橫街去呀!
要尋寶的話,記得走入橫街去呀!
橫街內衫褲鞋襪樣樣齊,而且好便宜!
橫街內衫褲鞋襪樣樣齊,而且好便宜!

由於周日的關係,上午購物街行人唔多,部分店舖尚未開門。

我們在附近的漢堡包店吃過早餐後,街上店舖陸續開門,遊人亦漸多,除左本地少女外,仲有不少香港人都到此一遊!購物街的主街道以化妝品店為主,化妝品店比明洞的折扣更多,好似一間名叫Shara shara的化妝品店,便全部產品半價,送Samples之外,再送唇膏和眼影添!真係唔買就走寶!

不過,想尋寶的話,記得到橫街小巷內穿梭,畢竟橫街小巷的時裝店更多,兼且多小攤檔,價錢很便宜,衫褲鞋袋襪樣樣齊,要買的話真係會買到癲!幸好購物街的街尾(近梨大校園)有找換店,想換韓圜的朋友唔使煩!

推介項目: 購物
參觀時段: 早上
評分: 值得去5  
梨大這個建築物外牆係龍友熱門拍攝地--梨大多功能館。
梨大這個建築物外牆係龍友熱門拍攝地--梨大多功能館。
梨大校園的另一景亦很不錯。
梨大校園的另一景亦很不錯。
校園部分地方有積雪,更加漂亮。
校園部分地方有積雪,更加漂亮。
逛完街又掃完貨,「平復」左心情之後,就去著購物街街尾前行,直接進入梨大校園本部!

梨花女子大學因為電影《我的野蠻女友》(全智賢迫車太賢著高跟鞋在校園內疾走的情景實在經典!)而聞名,龍友尤其愛在呢度獵影!呢度雖然叫女子大學,男士們都可以入去參觀的。

梨大的校園環境真的很優雅,充滿高尚學府的氛圍,建築物的設計亦別具特色,其中的多功能館外牆更是龍友熱門拍攝地,據講呢座建築物由法國建築師Dominique Perrault建造,兩棟埋在地底的建築間夾著一條長長的走道,恍似一座峽谷。

由於遊覽當日,部分地方有輕微積雪,更添美態,難怪龍友遊人甚多,大家齊齊去唔同位置取景拍影,左影右影,大家都影得不亦樂乎。
推介項目: 拍攝
參觀時段: 早上
評分: 值得去5  
小店位於梨大購物街的橫街,店外的易拉架顯示芝士石鍋飯好吸引,而且標明4,000韓元,試試無妨。
小店位於梨大購物街的橫街,店外的易拉架顯示芝士石鍋飯好吸引,而且標明4,000韓元,試試無妨。
石鍋飯未攪拌前的樣子比較平實,唔多吸引。
石鍋飯未攪拌前的樣子比較平實,唔多吸引。
努力攪攪攪!
努力攪攪攪!
完成啦!芝士溶入飯粒之中,加上有泡菜甜醬,超級惹味,只係微微辣,好好味呀!
完成啦!芝士溶入飯粒之中,加上有泡菜甜醬,超級惹味,只係微微辣,好好味呀!
平實的快餐店格局,單賣芝士石鍋拌飯,但食物水準好高!
平實的快餐店格局,單賣芝士石鍋拌飯,但食物水準好高!

遊玩梨大校園,返回購物街搵食午飯的地方。在購物街街頭的左面第二條橫街,發現一間好吸引的石鍋飯小店,而且標明只係4,000韓元,於是膽粗粗入去試試。

店內全部都係年青的本地人,以女士為多,一直覺得若多本地人幫襯的小店,味道一定唔錯,而且比做遊客生意的店舖更便宜!今次又再證實。

我食芝士泡菜石鍋飯,熱飯用熱辣辣的石鍋奉上,表面睇好似好平實咁,只有芝士碎、粟米同紫菜碎,好似好Dry咁,點知攪拌後,發現飯裡加有甜中帶微辣的泡菜醬,芝士碎攪拌後溶入飯粒之中,香氣撲鼻而來,食落真的好惹味!呢度奉送酸蘿蔔和泡菜,我連食幾碟,再加免費冷熱水,呢餐真係超值之至!

推介菜式: 芝士泡菜石鍋拌飯
評分: 味道5   服務4   環境4   衛生4   抵食5
  2 個留言    |  加入你的留言
發表日期: 2013-01-27

去完市政廳後,晚上打算夜遊明洞,因為要食著名的韓式烤肉!

幾本旅遊書都介紹那度香的烤肉店,話平靚正,每人平均消費約20,000韓元(150港幣),而且位於明洞,反正我地要去樂天免稅店掃貨,順便去應該唔難搵,所以一早列印定優惠券,以便慳多d!

那度香由明洞地鐵站15號出口靠右的一條橫街內,唔算難搵。 
那度香由明洞地鐵站15號出口靠右的一條橫街內,唔算難搵。 
大堆頭的冷菜,最鍾意食泡菜同豆腐。
大堆頭的冷菜,最鍾意食泡菜同豆腐。
未烤前的肉塊又大件又肥又多血!
未烤前的肉塊又大件又肥又多血!
店員將肉塊剪成細細件,等我地自己慢慢嘆!包著生菜和甜醬來吃,減去油膩,好香口惹味。
店員將肉塊剪成細細件,等我地自己慢慢嘆!包著生菜和甜醬來吃,減去油膩,好香口惹味。
免費送的蒸蛋,蒸得太熟,唔夠日本的蒸蛋香滑。
免費送的蒸蛋,蒸得太熟,唔夠日本的蒸蛋香滑。
石鍋飯較傳統,反而無梨大小店的芝士石鍋拌飯咁好味。
石鍋飯較傳統,反而無梨大小店的芝士石鍋拌飯咁好味。
朋友指明要裴勇俊和張根碩!
朋友指明要裴勇俊和張根碩!

我地行完明洞的樂天免稅店,在地面向著Lotte Young百貨公司方向直走,過對面即見明洞的入口,原來那度香正正就在對面的一條橫街(應該在明洞站的15號出口直達行一分鐘!),估唔到咁易就搵到!

那度香烤肉店設有席地而坐或普通檯椅,我地當然揀後者,起碼有椅背又唔使盤膝而坐,舒服好多!

我地揀的係優惠券內的牛肉+豬肉烤肉套餐,有九折優惠,兼送蒸蛋一缽。齋食烤肉驚唔夠飽,再加一個石鍋飯打底。我食豬唔食牛,朋友就好牛唔好豬,各有所愛唔使爭!

店員先將大大件的肉塊放在烤爐上燒,燒得差不多後,便逐塊肉剪得細細條。最初覺得豬腩肉好肥,但燒好的烤肉用生菜加甜醬包著吃,似足吃北京填鴨咁,好香口惹味又唔覺熱氣!

至於石鍋飯,又係自己撈勻後慢慢嘆,不過可能之前食過梨大的芝士泡菜石鍋拌飯,呢度的石鍋飯普普通通啦!

食完烤肉,店員送上兩支免費迷你益力多。埋單計,兩人折實合共44,000韓元(呢餐已經係我地整個行程中最貴的一餐,折合港幣只係330元,好抵食!)。臨走時,收銀阿珠媽仲任我地揀兩張明星相,朋友鍾意裴勇俊和張根碩,所以兩張送晒俾佢,滿足而歸!

推介菜式: 烤肉
每人消費: 約22000韓圓 (晚餐)
評分: 味道4   服務4   環境4   衛生4   抵食5
  0 個留言    |  加入你的留言
發表日期: 2013-01-27
行程唯一的一個郊外景點,就係《冬季戀歌》的拍攝地南怡島!南怡島是位於江原道春川市與京畿道加平郡間因為修建青平水庫時河水淹沒而形成的半月形小島,面積約14萬坪,周長5公里,因為《冬季戀歌》而聞名本地及海外。
在仁寺洞的南怡島旅遊中心預訂直通巴士車票連入場門票,合共23,000韓元。
在仁寺洞的南怡島旅遊中心預訂直通巴士車票連入場門票,合共23,000韓元。
在加平碼頭坐船往南怡島,幾分鐘便到達。
在加平碼頭坐船往南怡島,幾分鐘便到達。
島上有好多雪人公仔,好可愛!
島上有好多雪人公仔,好可愛!
剛巧遇上落雪,俊相和有珍經過的水杉林蔭道更加淒美!
剛巧遇上落雪,俊相和有珍經過的水杉林蔭道更加淒美!
*《冬季戀歌》的俊相和有珍劇照,當然要影個夠啦!
*《冬季戀歌》的俊相和有珍劇照,當然要影個夠啦!
兩位主角初吻地方旁,當然唔少得佢地一齊堆砌的小雪人公仔。
兩位主角初吻地方旁,當然唔少得佢地一齊堆砌的小雪人公仔。
島上氣溫較低,四周都設有火爐以供取暖之用,好貼心呀!
島上氣溫較低,四周都設有火爐以供取暖之用,好貼心呀!

出發時,首爾落大雨,天色黑沉沉,但由於兩日前已買好直通巴士車票連入場費(每人要23,000韓元),惟有硬著頭皮照去(後來先知錯有錯著,南怡島氣溫較低,下雨變下雪,驚喜萬分!)!

直通巴士在朝早九點左右已經停在仁寺洞塔谷公園側,一到九點半便開車,所以一定要早到呀!

大約一小時廿分的車程即到達加平渡頭(唔使好似坐火車咁,要再轉的士,好方便!),落車見漫天飄雪,真係驚喜不已,當然唔上船住,慢慢在渡頭影到夠為止!

上船前,要經過Immigration(有「關員」會檢查門票!),然後先可以上船。經過幾分鐘的船程,便到達心儀的南怡島,開始尋找《冬季戀歌》中有珍和俊相的足跡!

周一兼落雪,遊人唔算太多(雖然有齊中國、日本、香港、泰國、南亞等唔同人種,但至少唔覺人滿之患!),部分離開渡頭較遠位置更加杳無人煙,合晒我地心意!

飄雪之下的南怡島淒美又浪漫,就算傻瓜機隨手一拍都美得令人讚嘆;加上各處皆見《冬季戀歌》的印記,滿足晒迷哥迷姐朝聖的心態!其中最鍾意的景點,當然係俊相和有珍經過的水杉林蔭道同埋佢地初吻的位置!

追蹤完佢地的足跡後,原來想搵埋佢地食過的懷舊便當,點知搵極搵唔到,結果去左一間叫古木的韓國料理店,食左拌飯同綠豆餅,拌飯唔係用石鍋上,唔夠熱,味道麻麻,反而綠豆餅又厚又大件,熱辣辣,好飽肚,埋單係15,000韓元!

由於落雪的關係,鞋襪同褲腳盡濕,臨尾只好去碼頭附近的便利店買對毛巾襪替換!下次都係要做足防落雪的裝備(雪鞋加雨傘唔少得!)啦!

直通巴士的回程時間係四點鐘,所以我地搭三點半的渡輪返回加平碼頭,順利完成今次尋找《冬季戀歌》俊相和有珍的足跡之旅。經過個半小時的車程,大約五點半前便到達仁寺洞。

推介項目: 觀光,攝影
參觀時段: 全日
入場價錢: 每人8000韓圓
其他消費: 直通巴士來回車費15,000韓元
評分: 值得去5  
  2 個留言    |  加入你的留言
發表日期: 2013-01-27
黃昏五點半返回仁寺洞,在地鐵鍾路三街站坐一個站,到鍾路五街站的廣藏市場,參觀一下當地的傳統市場。
市場成立於1904年,係最具代表性的傳統市場之一。
市場成立於1904年,係最具代表性的傳統市場之一。
廣藏市場有人參店、紫菜店等,可以買來做手信,價錢普通,唔貴唔平啦!
廣藏市場有人參店、紫菜店等,可以買來做手信,價錢普通,唔貴唔平啦!
朋友在韓服店買左件小韓服俾姨生孫,聽講價錢比大公司平很多,但記得講價。
朋友在韓服店買左件小韓服俾姨生孫,聽講價錢比大公司平很多,但記得講價。
市場最多的小食攤檔係煎綠豆餅。
市場最多的小食攤檔係煎綠豆餅。
我地食的是泡菜餃子同埋刀削麵,水準普普通通。
我地食的是泡菜餃子同埋刀削麵,水準普普通通。
蔬菜攤檔亦有唔少。
蔬菜攤檔亦有唔少。

廣藏市場由鍾路五街站8號出口向前行一分鐘即到。市場成立於1904年,係最具代表性的傳統市場之一,除左有好多韓服布料店、韓服店、手信店如紫菜、人參外,仲有新鮮蔬菜、海鮮同醃菜攤檔

另外,市場巷子裡密密麻麻的傳統小吃攤就最能滿足要開餐的人士,呢度最多的係煎綠豆餅、豬血腸、炒大腸、餃子等傳統風味小吃。

由於已食左兩次綠豆餅,所以今次試刀削麵同泡菜餃子。刀削麵腍腍的,加上清湯底,味道普通,無咩特別;泡菜餃子的餡料係肉末碎,唔覺泡菜味,實在難以跟香港的水準媲美。埋單只係10,000韓元。

 

推介項目: 購物,進餐
參觀時段: 晚間
其他消費: 刀削麵,泡菜餃子
評分: 值得去3  
  0 個留言    |  加入你的留言
發表日期: 2013-01-27
第四天早上,計劃第一個站去北村韓國村,欣賞已有幾百年歷史的傳統韓屋,尋找北村八景之餘,順便追蹤《個人取向》(香港譯為《扮基追女仔》)中的孫藝珍同李民浩的足跡。

下午則轉到首爾現代化著名地標--N首爾塔,登高俯瞰首爾全貌。一新一舊的景點,形成強烈的對比,感覺幾有趣!
北村韓國村的入口旁就係DooRoo Cafe 。
北村韓國村的入口旁就係DooRoo Cafe 。
咖啡室書架放滿書籍,樓底又高,放著音樂,感覺超寫意。
咖啡室書架放滿書籍,樓底又高,放著音樂,感覺超寫意。
呢個套餐有厚多士加美式咖啡,足夠兩人份量,只係8,000韓元。
呢個套餐有厚多士加美式咖啡,足夠兩人份量,只係8,000韓元。

由安國站及2號出口向前行,沿裁判所直走,到達小學時過馬路左轉,見小藥店便知已到達北村韓國村的入口。

入口的另一邊有間書香味極重的咖啡室--Dooroo Cafe,正係吃早餐的好地方。全店的書櫃放滿書籍,燈光柔和,樓底好高,感覺好舒服,最正係只有我地兩個客人,包晒全場,影乜都得!

我地揀左一個套餐(Double Toast + Amercano,,8,000韓元)兩個人吃。厚多士即叫即烘,雖然等得耐少少,但送上時超熱辣辣,咬落好鬆軟,配埋士多啤梨果醬和忌廉同吃,好好味,在香港未食過咁好味的鬆軟熱辣的厚多士呢!分量極大,好在係兩人同吃,否則真係食唔晒。

至於美式咖啡亦不錯,不過唔知點解唔一併送上糖同奶,要我開聲先有,難道呢度興飲齋啡?!

推介菜式: toast, coffee
每人消費: 約4000韓圓 (早餐)
評分: 味道5   服務4   環境5   衛生5   抵食4
呢度就係韓國村的入口。
呢度就係韓國村的入口。
韓國屋的屋瓦均保留傳統特色。
韓國屋的屋瓦均保留傳統特色。
沿途見到北村最高展望台的指示牌,於是跟住行,登上位於三樓的展望台。
沿途見到北村最高展望台的指示牌,於是跟住行,登上位於三樓的展望台。
位於三樓的民居可以睇盡北村全貌和特色屋瓦。
位於三樓的民居可以睇盡北村全貌和特色屋瓦。
遠眺昌德宮。
遠眺昌德宮。
南山上的N首爾塔。
南山上的N首爾塔。
離開展望台,見呢度好多人影相,仲有日本電視台拍攝,應該係八景之一!
離開展望台,見呢度好多人影相,仲有日本電視台拍攝,應該係八景之一!

北村韓屋村係指位於景福宮、昌德宮和宗廟之間的區域,村內民居保留住首爾600年歷史的傳統韓屋,穿梭其中,彷彿時光倒流,饒有趣味。

韓國村有著名的北村八景,不過要搵齊八景一D都唔容易。到達村口時,雖然遇到好心的日本少女俾左張北村八景的地圖我地,但間間韓屋都差唔多,真係認唔到,唯有見到人多聚集的地方,跟住齊齊影相就無錯,到最後都唔知自己影左第幾景添!

沿途見到北村最高展望台的指示牌,於是跟住行,登上位於三樓的展望台。呢個展望台其實係一間民居,不過屋主利用居高臨下的優越位置開放俾遊客眺望北村全景。每人收費3,000韓元,送一杯飲品(橙汁或啡茶)。

的確,呢間位於三樓的民居可以睇盡北村全貌和特色屋瓦之外,仲可以遠眺昌德宮和N首爾塔,民居老闆仲指示邊度係第六和第七景,不過落到樓,又係記唔到。

繼續在北村遊走,見靚屋就留影,見人多又去湊熱鬧,總之乜景都影!唯一可惜的是搵唔到《個人取向》中孫藝珍的屋企(回港後,朋友話原來係43號,我地一直以為係40號,曾經路過都認唔出,真係大懵!),真係唔抵。

推介項目: 觀光,拍攝
參觀時段: 早上
其他消費: 最高展望台收費3,000韓元
評分: 值得去4  
在街頭離遠就見到升降機的所在!
在街頭離遠就見到升降機的所在!
幾分鐘時間便可以到達南山纜車,超方便。
幾分鐘時間便可以到達南山纜車,超方便。
遊人唔多,一架纜車載唔滿,即時登山去。
遊人唔多,一架纜車載唔滿,即時登山去。
沒有櫻花也沒有樹葉的枯枝映襯下,N首爾塔另有一番景致。
沒有櫻花也沒有樹葉的枯枝映襯下,N首爾塔另有一番景致。
戀人們的一把二把愛情鎖,好多都生晒鏽,始終都係經唔起時間的考驗!何必徙埋D無謂錢呢?
戀人們的一把二把愛情鎖,好多都生晒鏽,始終都係經唔起時間的考驗!何必徙埋D無謂錢呢?
到達展望台,360度的透明玻璃設計令到每個角落都可以清楚欣賞到首爾全貌。
到達展望台,360度的透明玻璃設計令到每個角落都可以清楚欣賞到首爾全貌。
首爾全景清晰可見。
首爾全景清晰可見。

逛完傳統特色韓屋,轉往睇首爾現代化的地標--N首爾塔。

由地鐵明洞站4號出口,往前直走到新世界百貨旁的十字路口,然後進入新世界百貨斜對面的大路,不遠處就係南山玻璃傾斜升降機,唔使三兩分鐘就上到纜車站,快捷方便!

再乘坐南山纜車,參觀當日係周二兼且係中午時分,遊人唔多,等幾分鐘即可登上纜車。大約12分鐘的車程,便到達山頂。山頂平台除有八角亭之外,四周仲有好多堆滿愛情鎖的地方,好多愛情鎖仲生晒鏽,可見年月久遠!亦印證愛情都係經唔起時間的考驗!(哈哈!)

N首爾塔的N為南山(Namsan)的第一個字母,也有全新(New)的涵義。塔高236.7公尺,建於海拔243公尺山上,加上塔身更高達至480公尺,正是觀賞首爾全景的最佳地方。

購買N首爾塔的門票時,因為出示購物節的優惠券,所以有9折,兩個人慳番1,800韓元。甫進入口,即被工作人員拉埋牆邊強行拍照,原來係將我地個樣退地Key入首爾塔日、夜背景之中,兩張相合共要15,000韓元,太昂貴啦!所以我地決定唔買。

到達展望台,360度的透明玻璃設計令到每個角落都可以清楚欣賞到首爾全貌。日間景致雖然唔及夜景璀璨,但午間參觀勝在遊人唔多,而且可以清晰見到漢江,以及江南、江北的分界和特色,都算唔錯啦。展望台仲有一個角落係俾人寄Love Letter,只見唔少人埋頭密密寫,真係佩服佢地咁溫馨同埋咁有閒情逸致!

參觀時段: 下午
入場價錢: 每人8100韓圓
其他消費: 南山纜車來回8,000韓元
評分: 值得去3  
我地就由呢個二樓側門進入店內。最初仲以為門前的活動公仔係真人,嚇得我地丫!
我地就由呢個二樓側門進入店內。最初仲以為門前的活動公仔係真人,嚇得我地丫!
餐牌中英韓日文均有,而且有圖片可以睇清楚,唔驚唔識叫。
餐牌中英韓日文均有,而且有圖片可以睇清楚,唔驚唔識叫。
美味的豬肉石鍋飯,一個人食晒,旁邊的冷菜則掁清,仲要添加泡菜兩次!
美味的豬肉石鍋飯,一個人食晒,旁邊的冷菜則掁清,仲要添加泡菜兩次!
濃郁的大醬湯唔適合腸胃不適的朋友飲用,結果我捨命飲晒落肚,兼且食左幾啖白飯送湯添!
濃郁的大醬湯唔適合腸胃不適的朋友飲用,結果我捨命飲晒落肚,兼且食左幾啖白飯送湯添!
由正門出番去明洞,就見到呢個會館的宣傳大叔!
由正門出番去明洞,就見到呢個會館的宣傳大叔!

由升降機原路下山返回明洞,居然俾我發現旅遊書推介的全州中央會館,當然要幫襯食番碗石鍋飯啦!

朋友因為腸胃唔舒服,無乜胃口,原本打算我食豬肉石鍋飯,佢飲個大醬湯。

豬肉石鍋飯(10,000韓元)新鮮熱辣送上,經我快速攪拌後,飯餸撈埋一堆後,香味勁濃帶微辣,密密食到停唔到口,真係無得頂!

輪到更為濃郁的大醬湯(7,000韓元)上場,可惜朋友完全無胃口,寧願只飲石鍋飯送的大豆芽清湯,而我只好捨命飲埋成碗大醬湯,湯料好多,用鮮蝦、蜆等海鮮熬製,一飲之下,哇,真係不得了,超級濃郁!不過有少少鹹,所以我再用附送的白飯撈湯,中和鹹味!

食完石鍋飯又飲完大醬湯,我仲食晒所有五六碟冷菜,居然剛剛好,無飽到上心口的感覺!一個人食左17,000韓元,完全值得回味!

推介菜式: 石鍋拌飯,大醬湯
每人消費: 約17000韓圓 (午餐)
評分: 味道5   服務4   環境4   衛生4   抵食4
  0 個留言    |  加入你的留言
發表日期: 2013-01-27
最後一天,朋友仍然腸胃不適,亦無精神陪我四處遊玩,所以我決定一個人冒雨去光化門和和清溪川遊走,中午再回酒店check out。

由於我地搭的是黃昏的航班,所以在酒店寄存行李後,再到東大門最後一擊,去埋平和市場,再食埋鐵板炒飯做午飯,才心滿意足坐機場巴士前往仁川機場,完成呢五日充實而滿足的首爾冬遊記。
Tom n Toms Coffee空間感極佳,座位又多,客人又少,好舒服。
Tom n Toms Coffee空間感極佳,座位又多,客人又少,好舒服。
電子牌仔居然有廣告短片睇,真係佩服!
電子牌仔居然有廣告短片睇,真係佩服!
我的美味早餐:碎上的麵包圈沾滿芝士粉,吃時再點埋右下角的芝士醬,好味到不得了!
我的美味早餐:碎上的麵包圈沾滿芝士粉,吃時再點埋右下角的芝士醬,好味到不得了!
Tom n Toms Coffee連鎖咖啡店在螺形周塑旁,好易搵!
Tom n Toms Coffee連鎖咖啡店在螺形周塑旁,好易搵!

由東大門歷史文化公園站搭地鐵坐三個站,便到達光化門站,由5號出口步出,即見和清溪川廣場著名的海螺形雕塑Spring。不過,遊覽前先醫肚,雕塑旁的Tom n Toms Coffee就最理想。

咖啡室的面積很大,布置好似星巴克咖啡咁好舒適,客人唔多,座位任你坐。我揀左個套餐(Special Pretzel + Americano),盛惠6,800韓元。付錢後,收銀員將收據和電子牌仔交俾我。

在等餐的百無聊賴之際,發現收據上有wifi登入密碼,於是立時用手機上網打發時間。等左十幾分鐘,我的早餐終於有啦!原來係沾滿芝士粉的麵包圈,附送芝士醬,沾著來吃,超好味,略嫌分量唔多夠!美式咖啡同樣係要問佢先會俾奶,糖和清水則自取可也。

估唔到一個人盲中中都食到美味的早餐,好滿足呀!

推介菜式: pretzel,coffee
每人消費: 約6800韓圓 (早餐)
評分: 味道5   服務3   環境5   衛生5   抵食3
清溪廣場地標--海螺形雕塑。
清溪廣場地標--海螺形雕塑。
清溪川的小瀑布。
清溪川的小瀑布。
下雨天,好少遊人,只聞淙淙的溪水聲,好寧靜。
下雨天,好少遊人,只聞淙淙的溪水聲,好寧靜。
溪水清澈見底,名副其實係城市中的清泉。
溪水清澈見底,名副其實係城市中的清泉。

嘆完一個人的早餐後,在海螺形雕塑側落去清溪川!清溪川沿著首爾中心街道流動,流經多個地區,起點正是光化門站5號出口東亞日報前,海螺形雕塑就係清溪廣場的地標,從呢度開始的清溪川一直涓流到漢江。好多朋友都話光化門呢一段最美麗,據講廣場上有縮小版清溪川模型,每逢夜晚,光打在每座特色不一的橋上,標示出位置。可惜,我在上午到來,而且遇上下雨天,睇唔到咁靚的夜色!

由海螺形雕塑側行落清溪川,即見小型瀑布,溪水清澈見底,遊人唔多,寧靜得只聞淙淙的溪水聲,感覺亦不錯;可惜天公不造美,細雨紛飛加天色昏暗,影出來的相片黑沉沉的,略嫌美中不足!

參觀時段: 早上
評分: 值得去4  
向光化門廣場進發,打頭陣的是李舜臣將軍銅像。可惜,天公不造美,細雨紛飛加天色昏暗,影出來的相片唔多靚。
向光化門廣場進發,打頭陣的是李舜臣將軍銅像。可惜,天公不造美,細雨紛飛加天色昏暗,影出來的相片唔多靚。
點解會有一大班警察?!
點解會有一大班警察?!
原來廣場有一個名為Special Olympics FINAL LEG的慶祝活動,一大班韓國人同外國人手舞足蹈,齊齊跳緊江南Style!
原來廣場有一個名為Special Olympics FINAL LEG的慶祝活動,一大班韓國人同外國人手舞足蹈,齊齊跳緊江南Style!
難為坐在後面的世宗大王,被呢班嘩鬼嘈鬼死!
難為坐在後面的世宗大王,被呢班嘩鬼嘈鬼死!
最後就係光化門廣場啦!好多遊人在門外爭住同守門將影相!
最後就係光化門廣場啦!好多遊人在門外爭住同守門將影相!

遊左一小段清溪川後,原路折返,轉到光化門廣場去。光化門廣場佔地面積19,000平方公尺,位於連接首爾市鍾路區光化門至世宗路十字路口與清溪廣場的世宗路中央。

廣場上,打頭陣的是李舜臣將軍(朝鮮時代的日本侵略戰爭爆發時,打敗日本立了大功的名將。)的銅像。跟住見到一大班警察,嚴陣以待,發生咩事呢?原來廣場有一個名為Special Olympics FINAL LEG的慶祝活動,一大班韓國人同外國人手舞足蹈,齊齊跳緊江南Style,強勁的音樂令暮氣沉沉的廣場充滿歡樂,氣氛好熱鬧,我都忍唔住停低湊熱鬧。不過,難為坐在背後的世宗大王(朝鮮王朝第四代王)被強勁的音樂同熱舞嘈到無眼睇!

經過世宗大王的銅像後,最後到達光化門(朝鮮時代的宮殿)了。門外擠滿左唔少遊人,都係為左同守門將影相,我就興趣不大,睇左陣便坐地鐵返酒店,預備check out啦!

參觀時段: 早上
評分: 值得去3  
就係呢張易拉架,搞到我每次經過都想食!不過,價錢已漲至5,500韓元,但仍然好抵食!
就係呢張易拉架,搞到我每次經過都想食!不過,價錢已漲至5,500韓元,但仍然好抵食!
上到二樓仲有呢張海報,係咪睇見都流口水泥?!
上到二樓仲有呢張海報,係咪睇見都流口水泥?!
左面的雞肉,右面的是白飯,店員會先炒雞肉後炒飯,我就繞埋手等食即叫即整的炒飯啦!
左面的雞肉,右面的是白飯,店員會先炒雞肉後炒飯,我就繞埋手等食即叫即整的炒飯啦!
店員將雞肉和白飯炒埋一堆!
店員將雞肉和白飯炒埋一堆!
炒好啦,熱辣辣的炒飯好好味,只係少少辣,完全接受得到!到!
炒好啦,熱辣辣的炒飯好好味,只係少少辣,完全接受得到!到!
隔籬檯的炒辣雞仲惹味,後尾見佢地加埋拉麵落去,真係想黐番幾啖!
隔籬檯的炒辣雞仲惹味,後尾見佢地加埋拉麵落去,真係想黐番幾啖!

酒店Check out兼寄存行李後,仲有大把時間,於是又在東大門周邊遊走,行埋東大門一段的清溪川,又去埋平和市場,居然在平和市場又出血,買左五對毛巾襪,朋友就買左三件衫俾個女同姨生孫,真係廿四孝媽媽,就算腸胃病發作,仍忙住為家人張羅手信!

午飯時分,朋友仍然無胃口,由得我想食乜就食乜!我好想食位於Migliore商場與Hello aPM之間的一條橫街二樓小店(在東華飯店側,旁邊有好多化妝品店如THE FACE SHOP、ETUDE HOUSE、 Nature Republic等,大家大可掃貨然後上二樓慢慢嘆),因為店舖的雞排鐵板炒飯宣傳易拉架好吸引,一於又再次獨食午飯!

原本店員要求我地要點二人份的炒飯,但我話朋友有病無胃口,只要一人份,佢可能唔識聽又奈我唔何,就照俾我叫一人份的雞排鐵板炒飯(5,500韓元),仲叫我自己去旁邊任取酸蘿蔔和凍湯。

店員先將雞肉放在鐵板上炒熟,然後放埋加左紫菜同泡菜醬的白飯同炒,炒埋一堆後,美味的炒飯就完成啦!炒飯帶微辣好香口同惹味,朋友齋睇無得食,真係可惜。我見隔籬檯的炒辣雞仲滋味,再加埋拉麵落去同炒,搞到我口水直流,不過,真係好飽,希望下次再遊時,可以試試呢種鐵板辣雞啦!

推介菜式: 鐵板炒飯,鐵板炒辣雞
每人消費: 約5500韓圓 (午餐)
評分: 味道5   服務4   環境4   衛生4   抵食5
  0 個留言    |  加入你的留言
發表日期: 2013-01-28
吃過美味的炒飯後,由於細雨紛紛,不想勉強再遊東大門,於是坐機場巴士提早四小時到達仁川機場,打算退稅兼逛逛機場。
職員會在退稅單上蓋印。蓋印後,連隨將行李俾隔籬的大型行李counter托運即可。
職員會在退稅單上蓋印。蓋印後,連隨將行李俾隔籬的大型行李counter托運即可。
禁區號閘口見Tax Refund counter,櫃位職員檢視已蓋印的退稅單後,即時退番現金。
禁區號閘口見Tax Refund counter,櫃位職員檢視已蓋印的退稅單後,即時退番現金。
經過韓國傳統文化體驗館,看到有免費手工藝做,最啱用來打發時間。
經過韓國傳統文化體驗館,看到有免費手工藝做,最啱用來打發時間。
美麗的韓國女職員簡介如何繪畫木板畫。
美麗的韓國女職員簡介如何繪畫木板畫。
我照著呢幅鳳凰來勾畫線條。
我照著呢幅鳳凰來勾畫線條。
填好顏色後,變左一隻雞,不過都幾色彩繽紛!
填好顏色後,變左一隻雞,不過都幾色彩繽紛!

到達機場後,先到check in counter辦理好登機手續,然後跟地勤職員講要Tax refund,職員就將登機證同行李俾番我地。我地跟住去D/J Counter,讓關員在退稅單上蓋印作實。蓋好印後,連隨將行李拖過隔籬counter托運上機,好方便!

過左海關後,再去到28號閘口的Tax Refund Counter辦理其餘手續。職員檢查完已蓋印的退稅單後,便即時退番現金,整個過程只係幾分鐘,我合共退番5,500韓元(40港元左右,夠吃一個雞排炒飯架!朋友就退左成100,000韓元,真係唔簡單!)。提提大家,記得來機場前先將整個行程的退稅單填好晒個人資料,以免來到呢個櫃位時臨急臨忙先逐張單係咁填,搞到手忙腳亂。

退完稅,仲有成三個鐘頭先登機!百無聊賴之際,經過韓國傳統文化體驗館,看到有免費手工藝做,最啱用來打發時間。今次的手工藝係雀仔木板繪畫,大家可以自由發揮,又或跟住佢地提供的鳳凰,慢慢在木板上用鉛筆勾出線條,然後再著色。結果,用左半小時的時間,我的製成品居然係一隻雞,但總算七彩繽紛啦!職員之後仲幫我的小鳥加上小繩,然後送番俾我做紀念。

五日四之首爾冬遊記終於畫上一個句號,好期待下次再遊首爾啊!

推介項目: 退稅,免費韓國小手工
參觀時段: 下午
評分: 值得去4  
  2 個留言    |  加入你的留言