東涌之友
我是東涌之友。 我是一名clerk。 我最喜愛到日本,韓國,泰國旅遊 , 最鍾意遊覽自然景觀,歷史建築/遺跡,城市風貌, 住宿通常會揀4星酒店,公寓,網誌:http://blog.yahoo.com/clara-lee。
留言  留言給此旅遊家
  遊記數目 38
  上載相片 351
  上載影片 0
最近分享過的旅程
澳門熱辣辣一天遊
國家/地點: 中國
旅程日期: 2013-06-19
深圳宿一宵
國家/地點: 中國
旅程日期: 2013-09-28 至 2013-09-29
濟州釜山自由行
國家/地點: 韓國
旅程日期: 2013-09-01 至 2013-09-06
釜山首爾追櫻記
國家/地點: 韓國
旅程日期: 2013-04-07 至 2013-04-12
首爾冬遊記2013
國家/地點: 韓國
旅程日期: 2013-01-19 至 2013-01-23
賞櫻見雪長野行
國家/地點: 日本
旅程日期: 2011-04-17 至 2011-04-20
共找到 38 篇遊記, 正顯示第 1 至 10 篇遊記
澳門熱辣辣一天遊 (中國)
(旅程日期: 2013-06-19 ,  旅程性質: 飲食購物)
 整個旅程  (共1篇遊記)
 分享至Facebook 
發表日期: 2014-12-16
6月19日,同朋友即日遊澳門,由於係閒日兼且係星期三賽馬日,遊人唔多,無論景點或者搵食的地方都唔覺擠迫,所以就算冒住酷熱天氣之下周圍遊走,都尚算可以接受啦!
兩年半無去澳門,今次覺得物價貴左好多。好似巴士車費咁,以前我記得在澳門半島坐巴士,只係 2 蚊左右,出乙水仔就 3 蚊左右;今次再搭巴士,發覺車費貴左好多,澳門半島內要俾 3.2 蚊,出乙水仔就要 6.4 蚊,兩個人閒閒地十幾蚊,真係唔便宜!

澳門一日遊行程:
十月初五街南屏雅敍(午餐)>坐巴士(26A)路環大熊貓館>坐巴士返澳門>九記冰室(下午苶)>盧家大屋>大三巴>買豬肉乾和杏仁餅做手信>保健牛奶(輕食晚餐)
 
雞扒一丁加紅豆冰
雞扒一丁加紅豆冰
我呢個南屏一丁,真係自己屋企整仲好味過佢! 菠蘿冰細細杯,只覺得糖水加罐頭菠蘿!
我呢個南屏一丁,真係自己屋企整仲好味過佢! 菠蘿冰細細杯,只覺得糖水加罐頭菠蘿!
叉燒雞蛋三文治,水準普通,雞蛋唔夠滑!
叉燒雞蛋三文治,水準普通,雞蛋唔夠滑!
格局極懷舊,侍應聲大大態度亦麻麻,似足香港老牌茶餐廳!
格局極懷舊,侍應聲大大態度亦麻麻,似足香港老牌茶餐廳!
我地的第一站係南屏雅敍。呢間位於十月初五街的老式茶餐廳,聽過同睇過好多網友介紹,今次都係第一次幫襯。格局的確好懷舊,咖啡色木卡位、牆上或天花板的吊扇、態度麻麻地的侍應,全部好似香港八十年代的茶餐廳,至於食物的水準就好一般啦!
 
我叫的係南屏一丁同蜜汁菠蘿冰,朋友就叫紅豆冰加雞扒一丁,兩人仲要左份叉燒雞蛋三文治齊齊分享。
 
*南屏一丁(23 蚊):無論中英文都唔知係乜東東,問過侍應之後,先知係叉燒火腿雞蛋出前一丁!送上來的賣相真係好一般,叉燒同火腿煎都無煎過,雞蛋又煎到爛爛地,加埋湯料又唔撈勻先送上來,感覺仲差過自己整!食落同樣好麻麻!
 
*雞扒一丁(18 蚊):雞扒居然係炸,不過係炸到老兼硬晒,皮又厚,四粒咁大把,飛走老硬的炸皮之後,真係無乜肉食。
 
*叉燒雞蛋三文治(15 蚊):上網見好多網友都叫呢款三文治,所以嗌來兩人分享。雞蛋夾住叉燒,蛋的分量幾多,不過整得唔夠滑,水準普通。
 
*蜜汁菠蘿冰(12 蚊):最初希望佢係用一隻大圓杯裝菠蘿冰,咁就夠懷舊。點知只係一隻小玻璃杯,飲落唔覺有蜜汁,只係糖水加罐頭菠蘿,徙料!
 
*紅豆冰(12 蚊):朋友唯一大讚的食物,因為佢杯紅豆冰的紅豆多到不得了,差不多有半杯咁多,而且豆好腍,以12蚊來講真係超值。
 
埋單呢餐兩人只係80 蚊,唔太貴,但水準真係唔得掂,差過香港好多茶餐廳,應該唔會再幫襯。

推介菜式: 叉燒雞蛋三文治
每人消費: 約40港元 (午餐)
評分: 味道2   服務2   環境2   衛生2   抵食3
公園內好多熊貓像,好得意!
公園內好多熊貓像,好得意!
呢個就係澳門大熊貓館!
呢個就係澳門大熊貓館!
唔知呢隻係「開開」定「心心」,表演食竹當食生菜,幾咁精靈!
唔知呢隻係「開開」定「心心」,表演食竹當食生菜,幾咁精靈!
成群結隊的火烈鳥!
成群結隊的火烈鳥!
原本諗住由澳門半島坐26A巴士去乙水仔的龍環葡韻睇荷花,點知唔識落車,一直坐到路環,不如將錯就錯,去路環石排灣睇熊貓。
 
澳門大熊貓館位於路環石排灣公園,佔地約 3,000 平方米,屬大熊貓「開開」與「心心」的安樂窩。巴士站行一分鐘即到,由公園入口即行到尾,就係熊貓館的售票處,門票只係 10 蚊,不過分有 6 個場次,我地兩點半去到,就買 2 至 3 點的場次。館內只有十幾個人,好寬敞,兩隻可愛的熊貓「開開」與「心心」各佔一個空間。平時去海洋公園睇熊貓,隻隻都係懶洋洋唔多願郁;尋日好好彩,兩隻熊貓經常走動,兼且近距離向我地表演食竹葉,趙到好似我地食蔗咁,好趣致,其中一隻背住我地屙便便,認真搞鬼!
 
嘆完冷氣睇熊貓之後,順便在公園內閒逛,見到有個池,原來養左好多水烈鳥( Flamingo )同埋黑天鵝,仲有兩隻迷你膠鴨仔嬉水暢泳。再向前行,又見到好多鐵籠,原來又食左好多唔同品種的猴子(包括長臂猴)。最後,仲入埋去土地暨自然博物館。呢個博物館分為五個展區,備有詳細的中葡文解說,介紹澳門的天然生態環境、岩石、動植物資源之外,仲展出歷史悠久的農業用具,其中最特別的係展出左一個足足有 22 磅的大番薯標本,都幾有趣!當然有冷氣嘆,亦值得大家入去過過冷河!
 
拖拖拉拉,我地居然在公園都流連左個幾鐘,都算難得!最正都係整個公園好寧靜,極少遊人,逛得好舒服!

入場價錢: 每人10港元
評分: 值得去4  
左:我的雪糕涼粉,真係好迷你,幾啖可以食完,而且唔自太冰凍; 右:朋友的紅豆淳粉新地。
左:我的雪糕涼粉,真係好迷你,幾啖可以食完,而且唔自太冰凍; 右:朋友的紅豆淳粉新地。
各種食物和飲品的價錢已經今時唔同往日啦!咸甜餐每款都要 34 蚊,唔便宜!
各種食物和飲品的價錢已經今時唔同往日啦!咸甜餐每款都要 34 蚊,唔便宜!
價錢加左咁多,九記的門面就無乜改變。
價錢加左咁多,九記的門面就無乜改變。
睇完熊貓,過對面坐番 26A 返回澳門半島。下午茶時段,走左去議事亭前地側邊斜路上的九記冰室食個甜品消消暑!都有差不多十年無幫襯。
 
今次再來,發覺物價又係貴左好多。以前食杯裝三球雪糕只係十零蚊,而家要 20 蚊,冰類亦閒閒地 20 蚊,店舖仲要標示每位最低消費 10 蚊,感覺其實唔係太好。
 
我食雪糕涼粉(19蚊),涼粉分量極為迷你,唔太冰凍,雪糕味道亦無得選擇,真係唔多值;朋友明明叫紅豆涼粉,結果來左紅豆涼粉新地,無端端要佢焗食多一球雪糕,涼粉的分量比我的大少少,當然價錢亦貴多D(26 蚊)。
 
埋單合共 46 蚊,價錢唔貴,但食物唔多值!下次應該又唔會再幫襯啦

推介菜式: 雪糕涼粉
每人消費: 約23港元 (下午茶)
評分: 味道3   服務2   環境2   衛生2   抵食2
進入大門後,就見呢個大堂,再進入屏風之後,就係另一個大廳。
進入大門後,就見呢個大堂,再進入屏風之後,就係另一個大廳。
抬頭一看,大屋有多個天井,光線可以直接照射下來。
抬頭一看,大屋有多個天井,光線可以直接照射下來。
正因為有天井的關係,所以好光猛。
正因為有天井的關係,所以好光猛。
偏室的一角古色古香。
偏室的一角古色古香。
食完下午茶,又搵地方逛逛。之前上網搵過資料,發現在大三巴附近的對面小巷內,居然有一個澳門世遺景點--盧家大屋(Casa de Lou Kau),兼且免費入場,便順道一遊。

盧家大屋又稱金玉堂,位於大堂巷七號(大屋四周充斥住不少小食店,兩者的感覺好格格不入!),清光緒十五年(1889年)落成,係澳門20世紀初商人盧華紹(盧九)住宅,現為「澳門歷史城區」(即澳門世遺景點之一)的一部分。

盧家大屋用厚青磚建造的中式兩層建築,包括廳、房、廚房、雜物房、天井等,係典型的中式大宅(部分設計同我以前參觀屏山文物徑內的古老大宅極相似!)。建築內有多個天井,所以好通風而且光猛,黃昏時分,閒逛其中,遊人亦不多,頗為舒服。

今次遊澳門,發現澳門再唔係搵食天堂,物價真係貴左好多!與其到澳門食食食,但其實價錢又唔係咁便宜,食物水準又唔係咁好的情況下,不如行下呢D近在咫尺的古老建築物,似乎有意義得多!
參觀時段: 下午
評分: 值得去5  
  0 個留言    |  加入你的留言
深圳宿一宵 (中國)
(旅程日期: 2013-09-28 至 2013-09-29 ,  旅程性質: 飲食購物)
 整個旅程  (共2篇遊記)
 分享至Facebook 
發表日期: 2014-12-16
第二日中午時份,離開酒店後,經過地鐵通道轉往中心城廣場搵食,今次目的地係去久違了的江南廚子。自從唔行萬象城後,都好耐無幫襯,估唔到中心城內有分店。
大閘蟹當造的季節,最適合品嘗蟹肉蒓菜羮。
大閘蟹當造的季節,最適合品嘗蟹肉蒓菜羮。
餛飩湯底極清。
餛飩湯底極清。
蟹粉小籠包皮薄湯多,又係必吃推介。
蟹粉小籠包皮薄湯多,又係必吃推介。
腐皮雞毛菜味道偏清淡。
腐皮雞毛菜味道偏清淡。
蘿蔔絲酥餅同樣值得推介。
蘿蔔絲酥餅同樣值得推介。
江南廚子以小菜為主,點心的選擇唔多,細食的我們真係好難取捨,結果只係揀左幾款輕食的小吃做午餐。
*餛飩:清湯內的餛飩有六粒,皮唔太厚,尚算美味。
*蟹粉小籠包:皮薄湯多,挾起唔爆,一啖可以連湯吞埋,湯唔太熱剛剛好,不錯。
*蘿蔔絲酥餅:蘿蔔絲切得極幼細,酥餅皮好鬆化,好值得推介的點心!
*腐皮雞毛菜:雞毛菜似小白菜,腐皮太少,炒得較清,味道偏淡口。
*蟹肉蒓菜羮:另一道必味的時令湯羮,濃稠的湯羮內啖啖蟹高和蟹肉,滑滑的蒓菜口感好特別,整個湯羮絕不欺場,正!
埋單合共150元人民幣,合理價錢。

推介菜式: 蟹粉小籠包,蟹肉蒓菜羮
每人消費: 約75人民幣元 (午餐)
評分: 味道5   服務4   環境4   衛生4   抵食4
  0 個留言    |  加入你的留言
深圳宿一宵 (中國)
(旅程日期: 2013-09-28 至 2013-09-29 ,  旅程性質: 飲食購物)
 整個旅程  (共2篇遊記)
 分享至Facebook 
發表日期: 2014-12-16
朋友放假,相約到深圳宿一宵。今次又係透過Agoda預訂酒店,睇中的係位於會展中心站上蓋的深圳金中環酒店公寓。
由於酒店位於會展中心站的上蓋,我地先在酒店樓下的金皇廷食午餐,然後就可以施施然去check in。

粟米墨魚餅
粟米墨魚餅
蜜汁叉燒腸
蜜汁叉燒腸
皇廷雪山包
皇廷雪山包
呢間日金皇廷酒家,以前去過一次,最深印象係室內設計活像羅浮宮一樣,無論牆上或天花都掛滿法國油畫,極盡氣派之能事(當然難免予人浮誇的感覺!),不過,點心的水準一點都唔差,精緻又好味。
*鮮蝦豆角餃:香港未食過加入豆角的蝦餃,估唔到十分好味,皮薄而晶瑩外,餡有蝦和豆角混和蒜蓉調製,好惹味。
*粟米墨魚餅:墨魚餅的肉質煙韌,而且粟米粒極多,減去油膩感覺,不錯。
*皇廷雪山包:朋友在利苑食過雪山包,於是想試試呢間酒家的出品。不過,我覺得呢個包味道普通,似墨西哥包,不熱,透明白色的包餡唔太甜,但無特色,不吃無損失。
*蜜汁叉燒腸:腸粉好薄,叉燒粒亦多,而且有五條咁多,好抵食。
*魚湯鮮竹卷:用魚湯浸住上的鮮竹卷,超熱辣,咬落卷內極多蘿蔔絲金菇絲等雜菜絲,比香港的有水準!
*酥皮杯燉奶:最值得推介的甜品,面頭用酥皮蓋住的小杯燉奶,戳穿酥皮後,燉奶極熱辣兼滑溜,相信女士必定超鍾意。
埋單計,由於酒家逢周六,周日及公眾假期有八折,今餐折實只係126元人民幣,實在好超值!

推介菜式: 酥皮杯燉奶,鮮蝦豆角餃,粟米墨魚餅
每人消費: 約60人民幣元 (午餐)
評分: 味道4   服務4   環境4   衛生4   抵食5
最初見到只有一張雙人床,以為酒店搞錯,點知牆後仲有一間小房,放左另一張床。
最初見到只有一張雙人床,以為酒店搞錯,點知牆後仲有一間小房,放左另一張床。
小房間的床亦都足四呎闊。
小房間的床亦都足四呎闊。
浴室用品齊備,不過只有企缸。
浴室用品齊備,不過只有企缸。
食完午餐,直達上六樓 的深圳金中環酒店公寓check in。酒店大堂樓底極高,都幾有氣派。至於房間,則位於上一層的6B樓層。
打開房門,只見一張雙人床,以為酒店搞錯左(因我地訂的是兩張單人床的Business Suite Twin!),後尾發現在房間後面再有一間小房,內有另一張床,而且向著對面的喜來登酒店,景觀都唔錯!呢個房中房的設計,都幾有趣!而且兩張床的尺碼都好大,我睡的大床直頭係Queen Size,而被鋪亦算乾淨整潔,不錯。
浴室基本設備齊全(沐浴露、洗頭水、梳子、牙膏、牙刷通通有齊,當然只係普通貨色!),不過只有企缸而無浴缸,對我地來說,都無乜所謂,反正就算有浴缸都唔會浸浴。電視有四五十個台選擇,唔驚會悶親。
唯一最大的缺點係房間的冷氣居然係恒溫無得控制,夜間時室溫達到25.5度,早上更上升至26.5度,搞到半夜訓得熱醒,就算點樣調校,溫度都係咁高,實在太奇怪!唔通呢間環保酒店,真係咁環保?!
不過,酒店宿一宵的價錢只係480港元(已連稅),而且會展中心站可以直達,好方便和安全,實在好抵住!

每晚價錢: 480人民幣元 (雙人房)
評分: 設備4   服務4   環境4   衛生4   抵住5
每次必叫的熏蛋。
每次必叫的熏蛋。
紅燒獅子頭送飯來吃會較佳。
紅燒獅子頭送飯來吃會較佳。
素鵝又係例牌會叫的前菜。
素鵝又係例牌會叫的前菜。
呢個特色石鍋飯最令我地失望。 飯上面的醬料再加埋類似松子黃魚的松子,好DRY~
呢個特色石鍋飯最令我地失望。 飯上面的醬料再加埋類似松子黃魚的松子,好DRY~
今次行程都之前的都差不多,在酒店休息過後,再到科學館站的圖書中心買書,晚飯又同以往一樣,都係去豫園食上海菜。由於口味差不多,叫的菜式又係來來去去個幾款,真係無咩驚喜啦!反而試叫一兩款新菜,點知最唔好味,真係可惜!
*熏蛋:每人一隻,水準依舊,只不過食得太多次,無左第一二次的驚喜!
*素鵝:又係以往例叫的菜式,外皮炸得極脆,內裡菜絲切得幼細,整得剛剛好!
*紅燒獅子頭:肉末內混和肥豬肉,唔鍾意食肥肉的可能覺得肥膩左少少。
*蒜蓉西蘭花:原本叫小菠菜,點知無貨,改叫西蘭花,當然只係比較平實的家常小菜!
*石鍋飯:雖然名為特色石鍋飯,但就最令我地失望。石鍋雖然超大鍋,而且熱辣辣奉上,再由侍應親手將生雞蛋拌勻,再加入甜醬油,有點似煲仔飯,可惜實在太無餸,結果剩番半鍋,好浪費。以66元人民幣的價錢,真係絕對唔值得呢~
埋單210元人民幣,價錢唔算貴,可惜已無驚喜可言。可能要隔耐多些時間,又或相約多幾個朋友,叫唔同菜式先再幫襯吧。

推介菜式: 熏蛋,石鍋飯,紅燒獅子頭
每人消費: 約105人民幣元 (晚餐)
評分: 味道4   服務4   環境4   衛生4   抵食3
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
短遊太宗臺之後,坐車返回樂天百貨光復店,先在地庫的food court醫肚。
樂天百貨地庫有food court,水準不錯!朋友吃的牛肉石鍋飯。
樂天百貨地庫有food court,水準不錯!朋友吃的牛肉石鍋飯。
我的辣八爪魚石鍋飯,同樣惹味。
我的辣八爪魚石鍋飯,同樣惹味。
food court的食肆好多,中西日韓以至快餐,通通有得揀。

我地各自都揀左韓式石鍋飯,朋友吃的牛肉石鍋飯,我就吃辣八爪魚石鍋飯,價錢都只係7,000至7,500韓元(折合約50港元左右),奉上來的石鍋飯熱辣辣香噴噴,即時撈勻來食,微辣但勁惹味!
每人消費: 約7000韓圓
評分: 味道4   服務3   環境3   衛生4   抵食5
樂天百貨光復店11樓的展望台可以遠眺釜山塔!
樂天百貨光復店11樓的展望台可以遠眺釜山塔!
展望台上有假的釜山塔。
展望台上有假的釜山塔。
聲光幻彩水舞Show(Aquatique Show)每日有四至五場,大家不妨留意時間。
聲光幻彩水舞Show(Aquatique Show)每日有四至五場,大家不妨留意時間。
食完石頭鍋飯後,就登上11樓的頂樓花園和展望台。展望台居高臨下,與位於龍頭山公園上的釜山塔遙遙相對,另一面則可以欣賞釜山大橋和釜山港口。難得係展望台完全免費,有時間絕對值得來看看。

遊完展望台,原本想去免稅店買護膚品,點知呢間樂天百貨不設免稅店,幸好 5 樓有本土化妝品店(Tony Molly、The Face Shop、Skin Food等),朋友可以掃下貨。

跟住等到差不多 3 點,我地轉到地庫搵靚座慢慢坐,因為要欣賞聲光幻彩舞Show(Aquatique Show)。呢個Show類似音樂噴泉咁,噴射而下的水柱伴隨音樂起舞,甚至噴灑出英文字來(包括LOTTE、BUSAN、SALE等),背景燈光的顏色亦變化萬千,15分鐘左右時間,睇得都幾開心。

推介項目: 欣賞聲光幻彩舞Show,參觀展望台
參觀時段: 下午
評分: 值得去4  
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
最後一天以觀光為主,近近地遊影島的太宗臺。由樂天百貨光復店門外坐巴士(83066、 88號)終站下車,車程約20分鐘,就到達太宗臺。
太宗臺
太宗臺
呢架可愛的觀光車,微雨就已經唔開, 好在我地都坐到一圈!否則一場來到就好掃興啦!
呢架可愛的觀光車,微雨就已經唔開, 好在我地都坐到一圈!否則一場來到就好掃興啦!
其中一站展望台,最多人落車。不過,佢地落左車之後, 就無可能再上車啦,因為觀光車行完一圈就停駛左!
其中一站展望台,最多人落車。不過,佢地落左車之後, 就無可能再上車啦,因為觀光車行完一圈就停駛左!
若原礫石灘旁可遠眺無敵大海景,亦可以睇埋岸邊的懸 崖奇岩風景,不過天色昏暗,有點可惜了!
若原礫石灘旁可遠眺無敵大海景,亦可以睇埋岸邊的懸 崖奇岩風景,不過天色昏暗,有點可惜了!
太宗臺位於影島,是釜山市的保護文物,名列釜山十大勝景之一,島上長有松樹等200多種茂密的樹木。遊太宗臺最方便就係五顏六色的卡通觀光車,車票全日有效,園內設有好幾個觀光車停車點,大家可以在途中自由地上下車,大約每隔20分鐘就會發一趟車。

我地最初打算先坐一圈看看環境,然後在第二次乘坐時才落車睇某一兩個景點。

點知,再想搭車時,觀光車居然因天雨關係而停駛,仲要係無限時停駛,兼且售票處即時關閉!當時只不過係微微細雨都唔開車,有無搞錯!搭左一次又唔可以退票,要我地徒步遊園又太吃力,結果我地只漫步第一個景點──若原礫石灘,遠觀海岸同埋懸崖奇石等景致便算,實在有D可惜!不過都總好過部分在展望台落左車,觀光完發現要自己徒步出返大門咁慘!畢竟太宗臺環境唔細,要走返出來,我諗至少一個鐘(仲要極快步個隻添!)無走雞!
推介項目: 觀光
參觀時段: 早上
其他消費: 太宗臺小火車(DANUBI觀光車):1,500韓元
評分: 值得去4  
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
第五日早上,原本想到溫泉場站虛心廳內的Trick Eye 3D Museum,再影3D立體畫,點知去到先發現博物館已閉門大吉。於是,轉往HomePlus超市購物,幸好呢間超市同樣在溫泉場站,而且在3號出口直達,好方便。
Home plus(東萊店)與地鐵溫泉場站相通
Home plus(東萊店)與地鐵溫泉場站相通
貨品好齊全。
貨品好齊全。
Home plus(東萊店)與地鐵溫泉場站相通,交通十分便利。

Home plus面積好大,樓高幾層,貨品好齊全。我地只行左超市和服裝部,超市好多特價食物,尤其多
1+1推介,即買一送一的優惠,不過我地稍後要去釜山大學購物街同樂天超市,無謂拎得太多東西,所以差不多空手而回。
推介項目: 購物
參觀時段: 早上
評分: 值得去3  
坐地鐵到釜山大學站,從3號出口步出,就係購物街。
坐地鐵到釜山大學站,從3號出口步出,就係購物街。
飾物小店包保女孩子喜歡。
飾物小店包保女孩子喜歡。
逛完溫泉站的Home Plus後,再坐多一個站,到釜山大學站的購物街。

呢條街同梨大購物街差不多,時裝和化妝品店充斥大街小巷,年輕人的流行服飾甚多,價錢
5,000韓元起就有交易,難怪街上見到好多年輕人士啦!
推介項目: 購物
參觀時段: 下午
評分: 值得去4  
店內設計溫馨雅致。
店內設計溫馨雅致。
我的吉列豬扒配炒飯,好好味!
我的吉列豬扒配炒飯,好好味!
套餐包餐湯和自助汽水。
套餐包餐湯和自助汽水。
朋友的忌廉磨菇意粉同樣有水準。
朋友的忌廉磨菇意粉同樣有水準。
到中午時分,我地揀左間位於右手面小橫街內的西式小餐廳--bistro L落腳。店舖小小,設計好溫馨雅致,不過,餐廳全韓語,幸好最後搵到一名略懂英語的服務員介紹,最後我點左吉列豬扒配海鮮炒飯,套餐奉送忌廉湯醃菜,仲有自助汽水。

吉列豬扒熱辣辣,炸得好鬆化,海鮮炒飯亦炒得不錯。朋友的忌廉磨菇意粉亦整得好味,絕對水準之上。呢餐合共100港元左右,每人50港元左右已經食到捧腹,抵!!

推介菜式: 吉列豬扒
每人消費: 約15000韓圓 (午餐)
評分: 味道4   服務3   環境4   衛生4   抵食4
明倫站一出,就係樂天超市和百貨公司。
明倫站一出,就係樂天超市和百貨公司。
午飯過後,我地再轉戰另一間位於明倫站的樂天超市。

呢間超市就在地鐵站旁,天橋直達,同樣好方便。今次只係買左少量零食同粟米茶,畢竟今年已是第三次遊韓國,實在無乜特別好想買的東西啦!

其實呢三個地方位於三個相連地鐵站(明倫站>溫泉場站(虛心廳旁有免費露天足浴場)>釜山大學站),半日之內可以一次過行晒。 
推介項目: 購物
評分: 值得去3  
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
4月遊釜山無食過札嗄其的海鮮,在濟州又無食過鮑魚,所以今次無論如何都要在札嗄其市場嘆番夠本。
鮑魚套餐除有主菜六粒鮑魚外,仲有好多小碟, 包括前面呢條煎魚,好味!
鮑魚套餐除有主菜六粒鮑魚外,仲有好多小碟, 包括前面呢條煎魚,好味!
套餐的小碟有薯仔、南瓜、冷豆腐、凍蟹仔、雜菜絲沙律等。
套餐的小碟有薯仔、南瓜、冷豆腐、凍蟹仔、雜菜絲沙律等。
套餐仲有煎葱餅。
套餐仲有煎葱餅。
海鮮鍋勁大鍋,食到我地捧著肚皮。
海鮮鍋勁大鍋,食到我地捧著肚皮。
由酒店過對面馬路,5分鐘即到札嗄其市場。二樓就係海鮮餐廳和海味乾貨店舖。我地揀了右面第二間的海鮮餐廳,一來因為有椅子可坐(最怕席地而坐,屈住雙腳好唔舒服),二來招客的妹妹仔較老實,佢提議我地食生魚片套餐的話,唔食生魚片的話,可改為鮑魚(一碟6隻),套餐包多達近十碟涼拌小菜、煎蛋葱餅和煎魚等。另外,提議我地再加一個海鮮鍋。

*鮑魚套餐(小:50,000 韓元):前後來左近十小碟,涼拌的有豆腐、泡菜、薯仔、南瓜、醃小蟹、雜菜絲沙律等,熱的有煎魚和煎蛋葱餅,好好味。鮑魚一碟六隻,清蒸,上碟時已逐隻切開俾我地慢慢嘆,唔使點醬汁已夠鮮味,而且唔韌,好味!

*海鮮鍋(小:40,000 韓元):好大鍋,妹妹仔先幫我地拆好所有海鮮的外殼,然後等多十零分鐘就食得。海鮮有蝦、蟹、各式貝殼類等,仲有蘿蔔同豆腐等,海鮮肉質煙韌新鮮,湯底微辣,愈滾愈濃,我食到一半已經覺飽,朋友就由頭帶到落尾,居然可以食清晒所有鍋內食物兼且仲飲晒D湯,勁!

呢餐合共 90,000 韓元,折合 630 港元,係我地全程最貴的一餐,但實在物有所值。
食飽之後,我仲帶朋友去番上次幫襯的乾貨舖(同樣係札嗄其市場二樓,不過較入面的店舖),買埋海味魷魚乾做手信。

推介菜式: 鮑魚套餐,海鮮鍋
每人消費: 約45000韓圓 (晚餐)
評分: 味道5   服務4   環境4   衛生4   抵食4
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
乘下午245分的航班,一小時已抵達釜山,在機場乘坐前往南浦洞方向的巴士,大約 1 小時車程,在南浦下車,正正是鳳凰酒店的入口。回程時,只需過對面馬路,便是機場巴士站,非常方便。除此之外,酒店後面就係 BIFF 廣場和光復路購物街,前面就係札嗄其市場,就算步行往樂天百貨光復店都只係15分鐘左右的腳程,開餐購物話咁易。
酒店外觀亦同樣老舊,唯一最大的優點係 在南浦洞的中心地帶,食住玩都好方便。
酒店外觀亦同樣老舊,唯一最大的優點係 在南浦洞的中心地帶,食住玩都好方便。
房間設施好舊式,仲係用大膽電視機。
房間設施好舊式,仲係用大膽電視機。
浴廁同樣老舊。
浴廁同樣老舊。
酒店就太舊啦,大堂黑黑沉沉的,似足60年代格局(朋友笑謂似入住《花樣年華》的酒店,可惜我地唔係張曼玉!)。房間唔算細,不過設施好舊,大膽雪花電視機、極微弱的冷氣(嵌在牆上的冷氣remote control生鏽兼唔work!)(好在有風扇!)、無Wifi、電插頭唔多、無浴室用品,基本上真係純粹用來睡覺就算!
 不過,酒店職員友善兼服務周到,我表示唔夠插頭,佢地轉頭即拎個萬用插頭俾我;check out時,我的行李喼手陃突然斷左,女職員即時遞來封箱膠紙,等我慢慢黐住,都好唔話得!
每晚價錢: 500港元 (雙人房)
評分: 設備2   服務4   環境2   衛生2   抵住5
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
韓國咖啡店出名多,濟州島都唔例外,在我們酒店前面大街就有幾間,包括星巴克;而新羅免稅店的對面,居然俾我搵到Mango Six咖啡店!
火腿雞蛋軟身麵包圈、 方形芝士麵包粒、熱朱古力和凍咖啡。
火腿雞蛋軟身麵包圈、 方形芝士麵包粒、熱朱古力和凍咖啡。
唔係太多顧客。
唔係太多顧客。
呢本《海陸濟州》在咖啡店內的一角擺放, 大家可以免費取閱,千祈咪錯過!
呢本《海陸濟州》在咖啡店內的一角擺放, 大家可以免費取閱,千祈咪錯過!
邊嘆咖啡之餘,大家不妨大家回味一下張東建和金荷娜 隔著咖啡店玻璃對望的經典一幕!
邊嘆咖啡之餘,大家不妨大家回味一下張東建和金荷娜 隔著咖啡店玻璃對望的經典一幕!
呢間咖啡店正是《紳士的品格》的拍攝場地之一(不過當然唔係濟州島呢間分店啦!),大家記唔記得張東建和金荷娜隔著咖啡店玻璃對望的經典一幕?又或幾位主角好鍾意飲的芒果飲品呢?取景地就係Mango Six咖啡店!估唔到在濟州都可以遇上!

我地叫左火腿雞蛋軟身麵包圈、方形芝士麵包粒、熱朱古力和凍咖啡我地叫左火腿雞蛋軟身麵包圈、方形芝士麵包粒、熱朱古力和凍咖啡,合共15,000 韓元(約110港元)。兩款食物都好好味,朋友的熱朱古力尤其賣相精緻,我試飲一啖都覺得唔錯,反而凍咖啡居然唔俾奶,飲得我好辛苦,我實在唔慣咁樣飲凍咖啡,下次都係叫熱朱古力穩陣D。

最值得一提的係店內的一角,放在免費取閱的海陸濟州旅遊書,呢本係濟州自助遊月刊,專為到訪濟州的中國遊客而設,裡面內容極清晰同詳盡,濟州島內熱門地區(七星路‧中央路地下商街、新濟州寶健路、中文旅遊區、西部旅遊區、東部旅遊區以及城市旅遊區六大區)統統有介紹,最正係附有區內的清晰地圖(中韓對照!),至於市外長途客運路線圖仲要係跨頁製作,我地簡直係如獲至寶!尤其搭的士出入時,打開呢本旅遊書顯示的地圖,司機大佬已經好清楚點樣去!憑著呢本旅遊書,我地去舊濟州市的東門市場、中央洞地下街同埋黑豬肉一條街,都非常方便,絕對值得推介俾大家!

推介菜式: 甜品,咖啡
每人消費: 約8000韓圓 (下午茶)
評分: 味道4   服務4   環境4   衛生5   抵食4
  0 個留言    |  加入你的留言
濟州釜山自由行 (韓國)
(旅程日期: 2013-09-01 至 2013-09-06 ,  旅程性質: 飲食購物)
 整個旅程  (共12篇遊記)
 分享至Facebook 
發表日期: 2014-12-16
第四日上午,食過早餐後,坐的士到兒童不宜的性愛主題公園 Love Land,睇少少鹹多多趣的性愛雕塑。
甫入門口,即見大大個裸女打橫訓係度!
甫入門口,即見大大個裸女打橫訓係度!
無處不在的男性器官,真係睇到人面都紅晒!
無處不在的男性器官,真係睇到人面都紅晒!
男人看過呢四個雕塑,可會會心微笑呢!?
男人看過呢四個雕塑,可會會心微笑呢!?
Love Land 係世界最大以「性愛」為主題的公園,由首爾弘益大學 20 多名美術雕刻專家,花了2 年時間完成 140 多件作品。每件作品緊貼主題,包括各種高難度性愛姿勢的雕塑,唔少雕像仲留俾遊人隨意擺 pose 拍照的空間,園內又用器男性的性器官做路牌和指示,認真搞鬼。就連展示館的門上都坐左三個裸女歡迎你,裡面展示的微縮展品亦都係與Sex有關的公仔,隨時搞到噴鼻血呢!嘻嘻!
我地就覺得好好玩,不斷在唔同雕塑旁拍照留念,加上天朗氣清,遊人唔多,影出來的相特別靚!
推介項目: 拍照
參觀時段: 早上
入場價錢: 每人9000韓圓
評分: 值得去5  
  0 個留言    |  加入你的留言