濟州嘅3D奧妙藝術博物館咪睇佢門面細細，內裡實質幾大，走馬看花走一轉1個鐘頭絕對夠晒，不過場館內超過50多幅展品，以及其他大型立體畫，幅幅都極之有趣，出嚟嘅立體效果疑幻疑真，睇吓、研究吓、又影吓，真喺兩粒鐘都未必行得晒，所以，如果你喺鍾意影依類有趣嘅「立體相」，就要記得預番多啲時間喇！

館內主要分為6個室內主題區域，包括：名畫模仿區、水族館區、埃及探險區、動物區、恐龍探險區、錯視區。各有特色，每個區域都能帶俾你好多驚喜，當然，有啲相要做到立體視覺效果，亦都唔容易。

參觀完所有展品，手信店喺離開博物館嘅必經之路，除有食得嘅手信外，更有唔少相關精品，此外，仲有糖果零食，小朋友實啱晒，不過大人都可以晌隔離嘅茶座飲杯咖啡嘆件餅！

離開博物館室內部份，原來戶外都有個Trick Art Safari，顧名思義就喺一啲動物嘅藝術展品，充滿創意，同樣有趣，值得影相留念！

我哋啱啱先叫做好番啲，所以晏晝依餐都仲要食住粥先，雖然濟州有馳名嘅鮑魚粥，暫且無「腹」消受，不過，據包車司機梁先生講，要搵碗白粥實在難過登天，因為濟州唔興開粥鋪，無一間鋪頭單買粥嘅，都只喺一般韓食店提供埋有味嘅粥品。

梁先生帶我哋周圍兜嚟兜去，始終無功而還，最後，只好晌便利店「求求其其」搵啲粥墊一墊肚就算。GS25同Faimly Mart喺韓國最主要嘅兩間便利店集團，幸好，晌GS25都搵到啲叮叮粥！

小弟揀咗碗蔬菜粥（야채죽），零售價2,800韓圜，折番港紙成廿蚊，內裡有啲甘筍粒、菇粒、南瓜粒，但味道認真麻麻！

城山日出峰位處濟州島東逝海岸一個突出嘅小島之上，據官方嘅單張介紹，約5千年前，晌淺海中嘅水成火山爆發而形成嘅典型凝灰丘，她不僅有著碗形噴火口，而且沿岸絕壁，顯示出各種內部結構，故被評為全世界研究水成火山嘅典型範例，由於其價值及景觀，晌2007年被列入聯合國教科文組織世界自然遺產，並於2010年獲認證為世界地質公園，真喺銜頭不少啊！ 

晌度可以欣賞到壯觀嘅海上日出，亦喺佢嘅賣點之一，不過，要大家天未光就老遠跑嚟睇日出，加上大家都喺病好無耐，睇日出就無謂喇。行上山頂睇睇噴火口就無妨，頂位離海拔高180米，上面設有大型觀景台，由於上山部份路段幾陡斜，都要大概花20-30分鐘抵頂。行到上頂望望，個噴火口就只不過似喺一個碗形大草場，當然無好似旅遊書或名信片所拍到城山日出峰嘅鳥瞰相咁獨特啦，只喺叫到此一遊過囉！相反，睇番山下嘅景色，以及周遭嘅景致，如對岸嘅牛島，都讓人有種豁然開朗嘅感覺。

補充多少少資料，噴火口底部離海拔高90米，傾斜角最大為45度，直徑約600米，周長1,704米，面積214,400平方米，晌2011年12月已被列為世界新七大自然奇觀。

此外，附近又有海女潛水表演，每日兩場：1:30pm及3:00pm，就啱時間不妨參觀吓，一班鐵娘子，天寒地凍照入水，仲可閉氣幾分鐘，真喺值得敬重，隔離檔口亦有新鮮即撈即食嘅海鮮供應。

萬丈窟又喺濟州另一個世界文化遺產，以13,422公里長度位居世界之冠嘅熔岩洞窟。我哋去濟州段時間已經幾夠凍，入到洞窟內就更寒。

雖然晌長度上號稱世界之冠，不過個人覺得內裡未算好壯觀，因為燈光嘅配合做得麻麻哋，我哋所行過嘅大部份路段，都喺漆黑一片，又或昏昏暗暗，唔好話要影相，就算現場肉眼睇都真喺覺得啲環境太過幽暗。

如果你睇過其他地方嘅大岩洞，真喺未必好有需要嚟睇萬丈窟；但作為順路嘅一個景點，又時間充裕（因為來回行一轉都要1個鐘多少少），都唔介意花2,000韓圜，咁都可以入去逛逛嘅！

大概6:00pm完成埋今日最後一個景點「萬丈窟」，都喺時候驅車打道回府，返到芒果屋民宿未夠7:00pm，小休一會就喺晚飯時間。

崔姐姐一早已為我哋預備好窩心晚飯，應該喺窩心夜粥，雖然只喺簡簡單單嘅肉碎菇粒粥，伴炒薯仔及炒芽菜，但已經食得我哋好窩心，無他嘅，既讓我哋飽肚，又合我哋患病中嘅腸胃，溫馨十足吖嘛！