次次去玩都計過住邊間平靚正嘅酒店, 今次真係一反常態, 住咗間咁貴嘅酒店, 海景雙人房, 早餐連稅要$3397/晚, 今次係唔係好豪呢!

萬豪係國際品牌, 當然有質素, 服務好週到, 果然係5星級靚酒店!!

由於已過2:00pm, 又訂咗沙灘海鮮BBQ自助餐, 所以只order 三樣嘢食 + 一位無限添飲鮮榨果汁(RM88/位), 全部都好食, 不過份量就少咗D, 特別係個東南亞拼盤, 每樣多番一件就好好多喇, 所以覺得有D唔抵食嘅感覺, RM575連服務費+稅

所有酒店內嘅消費都要付15%服務費 + 稅

萬豪咖啡廳嘅早餐Buffet, 比沙灘海鮮BBQ自助餐好好多(下面會講海鮮BBQ), 值得推介

中式, 西式, 東南亞式, 日式齊全, 豐富到不得了, 唔怪得整個上午都座無虛設啦!

食咗3日早餐, 都係食唔到佢哋1/2嘅款式, 真係比佢攪到對眼同個肚亂晒.......



後記: 酒店嘅客人超過一半都係國內同胞, 其餘係俄羅斯, 歐洲, 香港同日本, 本人不是想踩自己同胞, 但佢哋食自助餐嘅舉動真係好失禮同肉酸, 住得喺呢間酒店相信都唔係太窮, 唔係有錢就大晒嘅, 失禮舉動如下:

1) 一家只不過三四口人, 幫家人攞煎蛋一份兩隻, 是否須一攞就十幾份呢? 疊到好似仲厚過本電話薄;

2) 想攞牙籤同紙巾, 可向服務員取或問聲其他枱嘅客人攞都可以掛, 不由分說 "敦"起個款走埋人哋張枱攞晒D牙籤同紙巾, 然後大搖大擺走咗, 只不過講聲啫, 人哋一定比你嘅, 真係非常冇禮貌;

3) 用手唔用工具攞食物, 大細都係咁, 用手揀完, 掉番落個兜/碟上面;

4) 食唔晒就唔好博命攞食物啦, 樣樣都攞十件八件, 真冇衣食;

5) 小朋友想去小便就帶佢哋去洗手間啦, 酒店周圍都有, 但佢哋鐘意隨意在植物旁解決;

真係唔知係咪要50年之後, 同胞先會有改善呢? 我依加好少去海港城同時代廣場喇!!

酒店嘅私人亞龍灣沙灘好正, 酒店範圍的海有圍鯊魚網, 但都幾大浪, d人都喺響岸邊沖浪, 唔係好敢游到好出, 都係欺山莫欺水好.......

呢度玩水上活動好貴, 不但貴過馬拉, 仲貴過泰國添, 玩深潛仲貴, over RMB1XXX/潛; 其實好想玩雙輪電動車, 但要走過喜來登酒店先有得租, 所以冇行過去, 就瞓響沙灘椅上飲杯嘢, 吹吹海風, 好爽呀!

暑期沙灘吧喺5:00 pm後有買一送一優惠, 鮮榨果汁同Milk Shake平均每杯RMB25, Cocktail約RMB30, 喺響酒店最抵消費喇, 幫襯咗兩日

酒店面向亞龍灣, 暑假期間, 酒店逢Fri & Sat 都攪咗個沙灘海鮮BBQ自助餐, 就響大草地對出中間路, 枱櫈就放在沙灘上, 氣氛同環境都好好, 不過食就強差人意喇!

擺放食物位置設計幾特式, 用一隻真船, 上面擺放咗好多海鮮, 有魚, 蝦, 蟹, 北寄貝, 扇貝等海產, 但我哋只食咗每人一隻龍蝦, 其他海鮮冇食, 因為有好多烏蠅喺D海鮮上面, 而我見龍蝦剛做好拿出來, 馬上第一時間拎, 不然又比烏蠅搶先一步; 如果佢哋加番幾盞熱燈照住D海鮮, 相信冇咁多烏蠅埋身同衛生好多.......

另外其他食物都唔多款揀, 比早餐Buffet差好遠, 沙律D汁唔得, 味道好奇怪; 紅肉只得串燒; 而甜品得一個攤檔+一個雪糕櫃, 質素一般, 較特別係有個廚師做即炒鮮果雪芭; 飲品只得汽水同清水, 冇咖啡或茶供應.....

雖然D食物唔得, 但個景好得, 咁啱當日是農曆7月14, 鬼節呀!, 個月色非常靚, 入黑後個月光倒影在海裡, 嘩! 不知幾有詩意呀! 加埋有Live Band 唱英文歌, 全冇鬼節氣氛呢! 覺得似中秋節多D啊!

事實上海鮮算多款揀, 但睇落唔係太新鮮同唔衛生, 是扣分的最大原因, 用RMB399++/位, 連"果汁先生"都冇得飲, 得汽水, 真係寒酸咗D.......

萬豪軒, 酒店中餐廳, 我哋喺度食咗3餐, 佢喺一間有水準中菜館, 夜晚唔訂位, 冇靚位坐架.....

呢度食飯, 算係合理貴喇, 而且質素有保證, 我哋所點嘅菜都係色, 香, 味俱全

兩餐午餐分別食咗RMB752同RMB1,058

15/08 離開三亞前的晚餐, 諗住再食好D, 每人order一盅佛跳牆, 再加六個小菜, 其中兩個係海鮮, 原本想叫條海魚, 不過實在比香港貴太多, 所以只叫宮保中蝦仁同薑蔥屈蟹, 雖然味遁非常好, 但個海鮮嘅質素唔掂, 我只比80分啫, 如果佢哋用沙巴D海蝦同蟹整, 我一定比100分;

其餘都好味, 個佛跳牆唔錯, 個高湯濃味但適中, 冇落味精, 只係個鱈魚用咗蛋黃炒, 較勁卡路里同膽固醇;

呢餐都平過海鮮BBQ自助餐, RMB1,716

嚟咗四日, 其中一樣想喺呢次度假享受嘅, 就係做SPA

萬豪Spa咁啱推出2人套餐, 包括推油1小時 + facial約45分鐘為1位; 1小時中式按摩+身體磨砂及修甲(女士不包油甲)為另一位, 一定要跟佢哋所set嘅項目進行, 不能自行分配,  另再加2人浸腳3分鐘, 套餐價連服務費+稅RMB2,173.50, 比逐項計平RMB1200/兩人

我哋兩日輪流交替做呢個Spa, 當然係推油+身體磨砂係最享受, 最唔好係中式按摩, 同一般喺大陸按摩差唔多, 冇驚喜, 浸腳係最浪費, 如果浸多10分鐘就好好多喇!

做完Spa, 去海豹吧飲嘢聽歌

海豹吧夜晚有Live Band 唱英文歌, 坐喺度好relax! 被D海風吹吹下, 就想瞓覺喇!

話咁快就到16/08 last day喇, 一早7:30落去泳池游早水, 點知一落水就滂沱大雨, 直至差唔多8:30先落完, 可能三亞唔捨得我哋今日返香港......

食完個豐富早餐, 就執拾細軟, 坐酒店包車出機場, 酒店包車RMB480/7人車

去到機場, 保安非常嚴密, 每個人的大小行李, 包括腰包手袋, 都要統統打開晒比海關check, 唔知係唔係當日副總李克強訪問香港嘅關係呢, 嗰日架機仲delay咗個半鐘添!

今次豪玩豪食豪住用錢如下:

1)  香港航空來回機票連稅等費用: HK$6,405/3人

2)  三晚酒店連早餐 : HK$3,397 x 3 = HK$10,191

3)  酒店包車兩程 : RMB720/3人

4)  兩天Spa費用 : RMB6,520.5/3人

5)  萬豪咖啡廳下午茶 : RMB431.3/3人

6)  沙灘海鮮BBQ自助餐 : RMB458.9 x 3 = RMB1,376.6

7)  日本菜 : RMB943.5/3人

8)  沙灘吧飲品 : RMB126

9)  中餐廳3餐 : RMB2,644.5/3人

10) 大堂海豹吧 : RMB524.3/3人

11) 桌球2小時 : RMB100 

總數 : HK$16,596 + RMB13,386.7 (約HK$16,331) = HK$32,927/3人

即每人：　HK$10,975.70, 用咗好多錢呀!!!