山寺正式名稱叫寶珠山立石寺，由慈覺大師係公元860年創建，根據書本所說，由登山口行到最高既奧之院，共超過一千級石階。今天我就要挑戰1000樓梯。

到達山寺站，遊人眾多，很多都是上了年紀既遊客。由車站徒步往登山口大約10分鐘，沿途有商店，售賣一串串既蒟蒻丸，據說食左就會有氣力登山，我當然要試下啦。

旅遊車駱驛不絕到達山寺，看來此名勝吸引了很多遊人。

尚未到登山口，可先參觀根本中堂、芭蕉像等景點，俳聖松尾芭蕉係三百多年前已經到訪山寺，真係古代既東北旅遊達人。

最初的數百級樓梯都係樹蔭下行走，感覺比較輕鬆，沿途石窟處處，幾有日式風味。上落山遊人眾多，雖不致於水洩不通，但有時都要稍等一下，遊人中很多都是阿伯阿婆級數，不過大都健步如飛，有時比我地兩個”後生仔”行得更快。

上到王仁門，行了超過一半路程，景色開揚得多。不過已經有些疲倦，需要休息一下，順便欣賞一下風景。

行了超過一千級石級後，終於抵達最高點-奧之院。既然一場來到，當然要參拜一下，感覺完成了一場壯舉。

之後順道行往五大堂，係欣賞山寺景色既最佳地點。由山上望出去，山形縣風景怡人，雖然當日天氣有點白茫茫一片，不過山麓形態十分優美，美麗既風景果然令人忘卻疲倦。

由山下行上奧之院用了大約1小時，不過由五大堂返回登山口只用了十分鐘時間，因為要趕火車往山形市，轉車往下一個目的地-米沢市，來個昂貴午餐。

由山形市前往米沢市，只需乘坐往東京方向既山形新幹線列車，搭一個站便到。

來到米沢站，看見米沢既代表人物之一“直江兼續”，不過我既目的唔係追蹤戰國歷史，而係要一嘗米沢牛既滋味。

米沢市內有眾多餐廳有供應米沢牛，知名的有兩間，登起波和黃木，今次我們選擇去試下登起波。

因為登起波本店距離米沢站都有一段路程，搭的士前往就最方便，車費大約1000yen多些。

登起波本店地下係賣店，樓上先係餐廳。中午時間，客人並不太多，選了個近窗位置。檯上有兩個爐位，用作網燒爐及喜壽燒。

山長水遠來到米沢，總要食好d啦。點了個上級既特選喜壽燒及中級既網燒米沢牛，再來一客米沢牛刺生，十分期待。先上一客登起波肉腸，內裡應該混有米沢牛及豬肉，味道不錯。跟著來的是米沢牛刺生，牛肉脂肪分布均勻，入口無需咀嚼太多，魚刺生食得多，牛刺生倒是第一次食。

喜壽燒既牛肉係高級的，色澤及脂肪分布都有上等質素，店員先用一大舊牛脂肪起鍋，放落喜壽燒醬汁及配菜，滾起就可放入頂級既米沢牛，略為煮一下便可。另一方面，店員將木炭放入網燒爐中，點燃火種便可以自己動手網燒米沢牛了。

喜壽燒既醬汁帶點甜味，米沢牛煮到剛剛熟便可以食，上等米沢牛果然名不虛傳，真正入口即溶，牛味充滿在口腔內。網燒就要自己動手，米沢牛燒熟可以放在菜葉上，點上醬汁及放上配菜，包起就可放入口中。

飽餐一頓，盛惠16000yen，如此午餐食一次便足夠了。回程請店員幫忙call的士，返回米沢站。