check in完，食過蕎麥麵，我地便坐長野電鐵去須坂市的臥竜公園。

臥竜公園是全國100大賞櫻名所之一，我地都好期待，希望可以再一睹櫻花怒放的壯觀場面。

到達須坂站後，唔知坐咩車可以去到公園，只知旅遊書話可以步行約廿分鐘即達，於是我又利用僅識的三兩個單字日語加文字表述去問路。問左幾個路人，都係雞同鴨講，終於問到個靚女，居然肯推著單車，陪我地由車站一直行成三十分鐘，身水身汗到達臥竜公園，實在感激不盡！

到達公園外圍，已見湖畔櫻花處處，遊人絡繹不絕，有Ｄ人坐船仔遊湖，有Ｄ人就地野餐，櫻花樹下更有不少飲食和玩樂攤檔，好似園遊會咁熱鬧，不過非常有秩序，一Ｄ都唔擠擁，又唔嘈吵，日本人的民族性真係值得我地學習。

我同朋友當然不斷係咁影，朋友又再次長短鏡交換拍攝，再加傻瓜機同Standard鏡，三鏡一機輸流係咁影，影到不亦樂乎！

須坂市臥竜公園

交通：由長野電鐵坐車至須坂站（約廿分鐘），下車後在站的右方向上行，約步行三十分鐘