出發前做資料搜集，個個都話如果要肯定入到Harry Potter 園區的話，就一定要買Express Pass，加上當時Minion園區又剛開幕，山長水遠去到玩唔到又確實很掃興，於是無奈地又要去課金。

我是從官網 https://www.usj.co.jp/hk/ 訂購Express Pass，環球Express門票4現在要5200yen，再加上門票7900yen，就是至少要13100yen一個人;而且入場費未必每日都一樣，我當日唔知點解就要14200yen一位，好貴呀。

USJ的Express門票有很多選擇，我訂的環球Express門票4(Standard)，包括了1. Harry Potter，2. Minion，3. Spider Man/Jurassic Park，以及4. Jaws/ Terminator/ Backdraft。上網用Credit Card付款後，就會收到confirmation email，內裡有指示何時可以入哈利波特園區，以及幾時要去坐'哈利波特禁忌之旅'和'迷你兵團調皮百厭乘車遊'，另外就要download個QR code入場時用。

去完USJ後，我覺得Express Pass唔係好抵買同埋幾麻煩，因為要限定某段時間前往某些遊戲設施，但其實成日Harry Potter園區都唔係好多人可以隨便進出，而且禁忌之旅同Minion乘車遊，最長排45min就可以玩，黃昏時更是不用排隊任入場即玩，另外其他的娛樂設施都是等5至10min就有得入內，根本完全不用出動張Express Pass，所以除非是旺季，或是只有短暫的遊玩時間，否則我不建議買Express Pass。

今日Day 3行程要前往Universal Studio，於是決定今早在酒店房間快食早餐，爭取時間早些出發。

昨天由奈良回大阪時路經黑門市場，買了兩包士多啤梨做早餐，兩包加埋都是1490yen超抵食呀！！！去日本旅行我必買士多啤梨大吃特吃，因為超方便洗一洗便可以即食，而且又甜又香，大部分時間不會令人失望。我們還試了貴一點但超可愛的粉紅色’淡雪’，不過味道還是紅色的較甜。

另外在Swissotel的車站入口旁，就有一間Krispy Kreme Doughnuts，買了一盒三個620yen，香甜可口又鬆軟，配上香濃的咖啡實在是絕佳的早餐。久違了的味道，只是香港Krispsy Kreme的分店都全結業了，所以每次去日本有機會都要重温一下。

鐵板燒專門店「ステーキ　オクソン」（Steak Ox On）為貌似小屋嘅地舖。正門有塊紅地毯，配上磚牆及玻璃門，感覺極之洋化。步入店子，迅即由年長嘅嬸嬸招待，先為各人掛上外套大衣，再帶領入座鐵板前嘅吧位。四口子埋位先從皮套酒牌各自點選酒品。然後全體一致都要咗客8,640円嘅特選午餐「Special Lunch」，並要齊兩款極上黑毛和牛。

午餐由是日前菜「オードブル」之法式鹹批作序。鹹批清涼輕巧，個人自係略嫌質感偏硬同乾。接著嘅時令沙律「季節の野菜サラダ」夠就夠爽口，不過細佬就唔係太鍾意其淡而無味嘅沙律醬囉。

師傅以猛火燒煮極上黑毛和牛牛柳及西冷「へレステーキ、サーロイン」前，非常友善地提點小肥要準備相機捕捉熊熊火光。主菜和牛四人每款都分到有兩件，較為細食嘅靚靚媽咪就分多咗兩件出黎俾乖仔們食。燒至四成熟嘅和牛牛柳軟腍潤澤，而和牛西冷則更有口感，兩者均肉汁豐盛，配上碟上脆卜卜嘅蒜片最為惹味可口。其實和牛一啲都唔油膩，不過同一時間食咁多件都會覺得溜，中途夾入酸爽消滯嘅蕃茄「漬物」即令胃口大增。再黎多碗熱辣辣、香噴噴嘅「鐵板燒燒飯」都好似唔係好夠飽咁。熱食環節以一碗暖胃嘅麵豉湯「味噌汁」作結。

之後嬸嬸就叫我地移玉步往下層嘅客廳度食甜品。好不幸地，大肥爸爸就喺落樓梯時誤傷咗媽咪。。。

西式客廳大方雅致，闊落且有氣派。坐下不久，點完咖啡及餐茶後，每人先有一客爽甜嘅節令柚子味雪葩「旬のシャーベット」。甜品為芝麻蛋糕「ケーキ」伴鮮果。灰黑嘅芝麻蛋糕鬆軟微甜，配上爽甜多汁嘅特別柚倍添清香，簡單味佳。午餐正式由熱茶或咖啡劃上句號。

法日混血嘅「ステーキ　オクソン」（Steak Ox On）環境優雅，年長嘅嬸嬸態度有點高傲，肥師傅就友善客氣得多。肥肥家族同點嘅特選午餐質高美味，唯一份量唔多夠飽，每人成萬幾円依個價位感覺就唔係咁抵食囉！

為方便父母可以飯後早啲返酒店執行李，XO仔就揀咗喺離酒店只需步行八分鐘就到嘅「焼肉の牛太本陣梅田店」食多次燒肉做晚飯。

商場餐店好爆場，好在細佬早喺出發前於網上訂座，唔係肯定有排等。由於店內實在太迫人，座位冇得埃又唔係特別舒適，要影環境相絕對會影響到其他食客，還望大家體諒未有拍下。明白到全場滿座，服務生全都忙得團團轉，所以都好感激佢地仍可保持笑容及友善嘅態度，四口子對餐牌及餐飲有咩問題都好有耐性咁回答我地，絕對值得一讚。

肥肥家族於日本食飯全由小肥一人作主叫食物，一家人最易話為，所以細佬就點咗份燒和牛套餐「本陣セット」黎分，唔夠食先再追加飯麵。

1)      本陣セット（9800円）：本陣套餐包有火炙壽司三種、上生黑牛脷、五款特選牛肉、三式泡菜、燒野菜、及本陣沙律。本陣沙律清爽、三式泡菜惹味，燒野菜都好新鮮爽脆。五款特選牛肉均鮮紅美艷，雲石紋理紅白分明，食落有香軟、滑潤、嫩滑、爽薄，各有特色，可謂色香味俱全。三種火炙壽司如相般有六片生牛肉，另跟六粒細小嘅壽司白飯球。食客只需燒煮牛肉至理想嘅熟度，再連同白飯即可自製出火炙和牛壽司。火炙和牛壽司熱辣軟熟，白飯剛好中和牛肉嘅油份，組合確真無敵。

2)      和牛大判ハネシタ焼きすき（590/枚）：由於本陣套餐中嘅火炙和牛壽司太過出色，四口子都決定每人都要追加多一件配上蛋黃汁嘅壽喜燒火炙和牛壽司。同為壽司飯另上嘅壽喜燒火炙和牛壽司都係由客人自己燒煮和牛薄片。嘩，點上蛋黃汁嘅壽喜燒火炙和牛壽司不單柔軟腍潤，入口仲要多咗份香滑，美妙極！

3)      黑毛和牛みすじ（1850円/90g）：講真肥肥家族對牛隻不同部位嘅認識唔深，何況餐牌上全為日文，大家都只能單靠漢字挑選。厚身嘅黑毛和牛みすじ五成熟仍好夠軟腍，食落又唔會成口油，非常好味。

4)      石鍋牛肉飯（650円/小）：細碗飯份量真係唔多，一個男人絕對唔夠飽，個人略嫌牛肉唔夠，質量亦不及自己燒嗰啲咁靚，建議大家如果真係有飯癮就叫碗白飯黎送啲靚牛肉。

大阪梅田區其中一個地標就係離遠都可以望得到嘅摩天輪。摩天輪位於「HEP FIVE」購物商場內，入口處喺七樓，開放時間每天由朝早十一點到晚上十一點，五歲以下嘅小童可免費乘坐，其他人則一率收費500円。

鮮紅色嘅卡箱相當奪目，每卡可最多坐四個人，環繞一圈約十五分鐘。講真大阪嘅夜景實難與東方之珠媲美，此摩天輪唯一獨特之處就係卡箱內有個可以接駁手提電話嘅喇叭，搭客可一邊欣賞大阪景色嘅同時播放出自選歌曲

喺「HEP FIVE」一訪梅田火紅色嘅景點後，喺商場竟然有緣地遇上星巴克咖啡屋「スターバックスコーヒー」（Starbucks Coffee），店子仲要推緊紅粉緋緋嘅櫻花特飲喎，XO仔即抵擋唔住誘惑。。。

咖啡店內四周嘅裝潢都用上櫻花圖案，就連印章及手機遊戲都用上櫻花作主題，真係夠哂粉紅。

Sakura Blossom Cream Frappuccino（570円/Tall）：小肥所選嘅「櫻花盛放忌廉星冰樂」外表雪白，粉紅元素源自頂面嘅白朱古力脆脆及櫻花粒粒，成功營造出片片櫻花花瓣漂落之情景，當真極有思意！櫻花忌廉星冰樂清香柔滑，微甜中有櫻花粒粒帶黎少少醒神清新嘅酸甜，粉紅色嘅白朱古力花瓣又增添多份脆甜，這杯粉紅色櫻花誘惑實在美妙動人啊！

昨晚食過蟹道樂，今日晚餐就決定試名符其實的日式燒肉，揀選了在大阪都頗出名，亦有很多分店的燒肉店'力丸'，實行今晚任食肉肉肉肉肉吃到飽。

餐廳提供兩種任食方案，82品項2980yen和110品項3480yen，見價錢相差不多於是點了貴一點的套餐，另加飲品放題，我選無酒精的500yen，老公要啤酒送燒肉，故選了1000yen的。

雖說有110品項，其實有少少巧立名目，例如我點'名物四種組合'和'鹽醬汁名物四種組合'，內裡有牛肩肉，牛腹肉，隔膜肉，骨間肉四種，有汁無汁又當作不同的品項，於是加起上已經等於十品項，所以肉類選擇實際上沒想像中多。

試了幾款無酒精飲品，最喜歡的是'哈蜜瓜汽水'，味道和忌廉汽水非常相似。

'力丸'用的是炭火燒肉，感覺上和平常的鐵板燒肉沒太大分別;牛肉的質素沒我期待中好，不算太靱，但也不是入口即溶的級數。在香港我超喜歡吃牛舌的，最愛那爽脆的口感，原本今次打算大吃特吃的，那知道這兒的牛舌超靱！實在令人太失望了！試了一碟已沒有再添。

另外也試了香港少見的燒牛肝，但那種內臟的羶味，實在濃到我接受不了。

反而燒五花腩有驚喜，因為油脂十足，即使燒許久也不怕過熟，入口甘香焦脆，十分美味。

此外也點了個蔬菜組合中和一下，其中的椰菜片實在不知道該怎樣燒，即使放在最邊緣的位置慢燒，不是完全唔熟，就是眨下眼燒成焦炭，令人非常迷惘。

熟食方面都不錯，點了雞軟骨和牛肉餅兩款下酒美食，我也非常喜歡紫菜蛋湯飯，與燒肉同吃暖胃又可口。

埋單要加税再用了張九折券，兩個人總數要9100yen，不算太貴，對食肉獸來說其實都算抵食，只是我期望過高，以為用這價錢可以食到頂級的日本牛肉，我實在是太太太天真了。

奈良公園內，除最出名的春日大社和東大寺之外，還有N咁多座寺廟，而早上我們已花了大量時間散步餵鹿，雙腿已有快斷了的感覺，食過午飯後更是覺得腳步沈重舉步維艱，故下午我們也唯有快速瀏覽其他寺廟。

首先經過的是二月堂，為日本早期'舞台造'風格寺堂，外觀有些似京都的清水寺，居高臨下，感覺十分宏偉。但旁邊連綿不絕的樓梯實在令人卻步，我們鼓起勇氣一步步走上去，在寺內俯視下去，可觀賞到奈良公園及奈良市的街景，很有特色令人心矌神怡，也不枉我喘哂氣地爬上來。

另一個必經的寺廟當然是東大寺，由二月堂出發，會先經過東大寺的大佛殿和鏡池，只見內裡人頭湧湧，實在懶得再與人潮擠迫，於是只是和寺外的1:1佛手影左張'到此一遊'照。

東大寺的南大門也值得留意一下，為日本最大山門，內置一對巨型的木造仁王立像，栩栩如生十分宏偉壯觀，大家經過時都忍不住躇足觀賞拍照，結果門內也是擠得水洩不通。

離開公園時，街道上兩旁有許多小食店，我們試了炸雞塊，又乾又硬又涷又無味，金翅中伏鳥。

浦富海岸是島取其中一個有名的景點，像日本仙台的松島，有很多奇岩怪石。
原本可以喂海鷗的，可惜今日天氣唔多好，所以沒有海鷗