其實昨日我哋已經嚟過，由於昨日太晏先至到埔里酒廠，酒廠樓上嘅故事館已經關門，我哋為有去樓下買手信，仲買咗支紹興酒、6盒蒟蒻、6包薑糖（好正嘅薑糖，後悔只買6包咁少）同黑糖。

今日再嚟，除咗路經外，亦想參觀故事館。睇酒的故事，先走入一個兩旁堆滿酒罎嘅時光隧道，由以前釀酒嘅舊年代一路介紹到現在，都比到我哋酒的歷史訊息。

睇完歷史，我哋見到 NT50/杯酒，我又飲唔到女兒紅同高粱酒，咪試下梅酒囉！仲有個古代酒杯送添。梅酒味清甜、我覺得好飲過日本梅酒，唔錯! 唔錯!

離開埔里，天開始下著大雨，雨越落越大，原本計劃去台南嘅七股鹽山及連緣香水蓮花園，就因為台南降雨超過300毫米而取消，真可惜; 由於降雨太大，駕車要特別小心，我從未曾見過咁大嘅雨，當時只是3:30左右，但已是天黑的模樣，前面所有嘅行車狀況完全睇唔到，感謝主，最後我哋都平安到了屏東縣。

去平東縣前, 我哋响公路休息站休息咗一陣; 呢個休息站叫東山站, 東山站設計完善, 唔單止有厠所, 便利店在此外, 仲有設計別緻可愛嘅公園同商場, 揸車揸得耐, 嚟呢D休息站歇一歇都唔錯。

台灣朋友話帶我哋食地道黑輪, 而黑輪就係台灣南部出名嘅小食, 佢帶我哋去一間叫原味家旗魚黑輪嘅小店

門口就係小食檔, 裡面有6張枱招呼客人, 食物就响小食檔自選, 價錢每串都係NT10, 花枝卷同蝦卷就NT20, 價錢平過香港街邊檔

味道當然掂啦! 旗魚黑輪有魚味但不鯹, 而魚湯係免費無限添飲, 自己喺小食檔倒湯, 自己招呼自己

朋友帶我哋去佢屋企附近嘅小食店食地道早餐, 小食店叫錦記肉圓。

朋友叫咗兩碗肉圓, 兩碗貢丸湯同一個肉粽, 最好食係肉粽, 好味, 但後尾比烏蠅幫襯咗, 而貢丸夠彈牙, 不過少咗D得3粒, 多1粒會較好; 主角肉圓, 真係"豬圓肉潤", 皮厚餡靚, 食完唔駛食飯喇, 適合勞動人士享用。

今日第一個景點，就係去旗津半島。旗津半島為高雄港西側的海外沙洲，長11公里、寛200公尺，呈南北狹長狀，同香港長洲背景幾相似，所以一直都以為旗津同長洲係同類，原來我攪錯了。

由屏東出發，好快就去到高雄，由於揸車去， 所以今次冇機會坐渡輪。先由過港隧道去到旗津, 一條小海底隧道不用三分鐘便到旗津半島，呢邊較重工業味，四圍有好多貨櫃同貨倉，完全冇長洲嗰重漁村味道。

但向前走半分鐘, 就見到旗津風車公園, 一排七座三葉風車, 矗立在公園中央, 加上造型獨特可愛嘅海洋生物拼貼創作, 造形生動有趣, 當然要影番幾張相啦!

除咗以上原素外, 呢到重係放風箏同睇浪嘅好地方, 風好大, 浪好高; 風箏吹落樹頂, 令樹上增添不少額外色彩; 風浪吹撲上岸, 巨浪亦有二三層樓高, 拍打上岸, 所有在公園內的路燈, 欄杆, 海洋裝飾, 綠草地, 都被海水沖刷著, 不期然有股強烈嘅對比, 震懾嘅感覺......

車再向前走3分鐘, 就到咗旗津海岸公園/旗津海浴場, 海浴場係黑沙灘, 呢處冇風車公園咁大風浪, 所以較多人在此嬉水, 而海岸公園對面有一海產手信商場, 主要賣海產手信。

海浴場對正整個旗津最旺嘅廟前街, 廟前街一直走, 就係天后宮同旗津渡輪站, 仲有三輪車出租比遊客在島上兜風呢！

旗津廟前路比較旺, 有好多食店同小食檔在此做生意, 當然又有美食在此啦! 因為想返高雄食午餐, 所以冇試呢處嘅海鮮, 但朋友話廟前路比較多遊客, 所以食海鮮會較貴, 佢話近風車公園哪邊價錢比較平D。

因為想留肚, 所以只食小食, 港童一見鳥蛋就話試,（鳥蛋即鵪鶉蛋）鵪鶉蛋放入煎蛋器皿上弄熟, 有煎炸效果, 再加醬汁, 好味道, 再encore多一包, 為食而忘記膽固醇添。

跟住隔離檔嘅烤魷魚亦好吸引, 又買兩隻細嘅試試, 又唔錯喎, 再一次忘記膽固醇呢!

由旗津出嚟已差不多3:00PM, 馬上去食我夢寐以求嘅炸豬排, 朋友推介我哋去呢間日式炸豬排專門店- 勝博殿; 佢亦喺香港有一間分店, 約HK$100-160/人, 但在台灣, 只須約HK$80-90左右, 較便宜。

勝博殿喺台灣有20間分店, 高雄夢時代7樓有一間; 我哋响3:30前要落Order, 佢哋員工要落場, 所以我哋亦要4:30前要埋單走。

我哋叫咗四份餐, 價錢約NT280-300, 主要係酥嫩腰內豬里肉(中 100G)同香潤豬里脊(中 100G), 香脆鬆化, 肉香味濃, 白飯同麵豉湯無限添食外, 高麗菜, 牛蒡同黑豆一樣冇限供應, 當客人坐底, 侍應會奉上每人一碗黑白芝麻同醬汁(芝麻醬要向侍應另取), 磨好黑白芝麻再加醬汁, 調好自家口味醬, 就可自行撈沙律食, 咿 ~ 正啊!

另亦在台北車站三越站前店12樓食多一次豬排飯, 一樣令人難忘。

去完旗津半島, 天色已唔係太好, 整個天都係黑雲, 狂風暴雨果然喺我哋到咗夢時代後就降臨, 一落就差唔多四個鐘, 令我哋未能去到高雄嘅城市光廊, 嗚~

就係咁我哋响夢時代消磨咗4個鐘, 好彩夢時代購物中心"地大物博", 用4個鐘都行唔晒, Yah~

係B1樓層有處手信街, 可在此買到台灣好多產物; 又有誠品, 又有台灣好多自家品牌, 真係可以喺呢度消磨一整天啊！

原本想去瑞豐夜市唔去六合夜市, 但朋友親戚話今日瑞豐夜市要進行一個月中第二次大清洗, 所以休市, 喚! 咁咪改去六合囉, 點知........

去到六合夜市, 雨落得頻密, 好不容易在夜市附近搵到位泊車, 一路行去夜市, 一路見一團一團強國人入夜市, 令整條街都擁擠到不得了, 所以完全唔想停留於此, 匆匆走完整條六合夜市, 就行去美麗島站影相。

美麗島捷運站真係整得幾靚, 七彩穹頂大堂, 就係公共藝術「光之穹頂」所在地, 好似置身在歐洲教堂內, 另外站內設有一立體專區, 由立體設計藝術家創作, 地下繪出立體效果, 與真實事物作連貫, 比遊客拍照, 讓遊客照出立體效果。

影完相, 朋友帶我哋走出捷運站, 再拍站外透明上蓋, 由喜餅街那處拍, 可拍晒一共4個透明上蓋, 如果係靚相機, 一定唔好放過此特別環境。

朋友想去舊振南老餅家買餅, 所以順道逛逛這出名嘅喜餅街, 整條街都係售賣同婚嫁有關嘅物品, 當然囍餅店亦是主要店舖之一, 各式各樣嘅餅店, 裝修堂煌華麗, 朋友獨愛舊振南餅店, 話佢係百年老店, 朋友即場買咗盒囍餅食, 佢哋D餅一D都唔平, 如鳳梨酥已比日出貴NT200, 但我相信佢哋嘅出品應有保證。

掃完一輪手信, 買咗大包小包, 好累了, 外面還下著滂沱大雨, 就係B1見到春水堂個招牌, 就入去坐吓, 飲杯嘢啦!

上次因為時間關係, 去唔到台中春水堂總店, 今次補數啦!

春水堂已打出名堂, 全台灣都有分店, 而價錢亦比一般珍珠奶茶店略貴, 不過此分店嘅裝修同有舒適嘅座位供應比客人, 又唔可以只外賣企响度飲咁簡單啦!

因為我哋完全冇响六合夜市掃街, 所以我哋個肚係空嘅, 由於完全提唔起勁喺度食嘢, 見到夜市對面有間coffee shop, 就過去睇吓有冇嘢啱食。

除咗咖啡奶茶外, 金礦咖啡主打係西餅蛋糕, 台灣朋友話呢間金礦都有好多分店, 出品都唔錯, 可以一試, 咁就係度買咗兩件西餅外賣喇。

港童揀咗個叫 "畢業盛典" , 上面一塊朱古力, 下面係一個半圓啫喱, 啫喱裡面係朱古力+忌簾, 外型似一頂畢業帽, 好精緻, 好特別, 但食就好甜, 連一向嗜甜嘅港童都頂唔順, 唔肯食埋佢; 而我同另一半都要咗芒果酥, 幾好, 芒果好新鮮, 而且唔太甜, 用生果中和咗蛋糕糖味, 一向用生果造嘅蛋糕都係較穩陣嘅選擇。

由於只在金礦咖啡買咗兩件cakes, 朋友又未食嘢, 決定返屏東市先至食嘢。

由高雄返屏東約30分鐘車程, 已經係10:00喇, 所以都係唔去屏東夜市, 去小食店買外賣返朋友家食算了。

喺原味家對面有間叫戰味鹹酥雞, 尋日見佢排長龍, 又做買一送一優惠, 就喺呢間買外賣, 叫咗魚蛋, 炸黑輪, 蘿蔔, 魚餅及貢丸, 兩件鹹酥雞大大件, NT200有找, 好平, 平過香港食魚蛋燒賣。

全部味道一般, 冇特別, 覺得都係一般炸食同焯魚蛋感覺, 鹹酥雞較油膩, 而且仲好熱氣添, 我哋都唔敢食太多, 驚口嚨痛呢!

西帕粄即河粉, 但比我哋食開嘅厚些少; 朋友媽媽好鍾意食, 話呢間路邊小店只開早上, 下午就關門休息, 一向都係屏東老街坊同熟客先至會嚟食, 由於唔係响屏東市, 而係响市郊, 所以我朋友都唔係好確實知道位置, 要朋友媽媽親自帶我哋去。

路邊小食店叫 "黃屋夥房", 家庭式經營, 廚子同侍應都是上了年紀的阿姐同阿叔, 店內冇冷氣, 但不太熱, 朋友媽媽點了好多鹵水, 碟碟都大大碟, 仲每人一碗湯西帕粄, 嘩! 好大碗, 所以我哋當日又冇食午飯, 直至晚上。

鹵水牛肚, 蛋, 豆腐, 豆干非常入味, 當然好食過夜市嗰D「是但貨式」， 可以講係用心的鹵水傑作, 另豬大腸聽朋友同另一半都讚不絕口 (我係唔食內臟), 佢哋話爽夾脆喎, 而每人一碗嘅西帕粄, 除咗大大碗外, 湯底淆得唔錯, 裡面嘅豬肉片亦爽兼入味, 是新鮮豬肉, 唔好以為西帕粄較厚, 就會有膩嘅感覺, 相反西帕粄口感爽滑, 與湯底配合得天衣無縫, 而朋友就叫了乾西帕粄, 一樣好味, 雖然飽, 但絕不忍心將之食剩。

車城鄉福安宮係全台灣最大的土地公廟, 我哋嚟唔係入廟拜神或參觀, 主要係朋友爸爸住喺呢邊, 嚟探吓佢同D鄉親父老, 因朋友係屏東恆春車城鄉人, 爸爸退休後想回鄉過清閒生活, 所以獨自在福安宮後面買了一片地建屋自住, 剩下的地方為停車場作生活費, 朋友嘅爸爸真寫意。

朋友話雖然我哋唔拜神, 但可以入去廟裡睇下個神奇燒衣紙爐, 只須將金銀衣紙放在爐外, 衣紙自然會一張一張自動飄入爐裡燃燒, 這爐應該有科學原理令紙張自動飄入爐裡。

係福安宮後面有一大市集, 主要賣小食甜湯, 亦有賣生果, 當然要走去睇吓有咩啱買啦! 小食就見到有好幾檔賣綠豆蒜, 朋友話係屏東特色糖水, 我見佢 "杰撻撻" , 檔主好大力咁攪呀攪, 已冇咩興趣試; 但見到皮蛋同鹹蛋嘅檔口, 檔主比我哋試食, 皮蛋嘅雪花晶瑩, 真係被佢吸引咗而幫襯。

墾丁重頭戲就係玩呢個超激超激嘅吉普車，一去到民宿check in，台灣朋友馬上叫民宿老闆揾吉普車公司，check in 後十分鐘，吉普車已到民宿接我哋。朋友一路保持神祕，佢同司機夾埋話要比我哋有個難忘嘅回憶，當去到玩區，司機就用極速嘅車速在山丘上大上大落，企在後座嘅我哋真係被拋到個心都快跌出嚟喇！

玩區名叫九龍關道, 分為18拐，內容如下: 橫渡逆流　登高一呼　擒豬陷阱　板橋模擬　直衝雲霄　膽顫心驚　自由落體　乘風破浪　飛簷走壁　急速迴轉斜壁行走 咖瑪窟　八寶炫風　狂風巨浪　麥當勞坡　超越巔峰　破甲炫風　驚心動破

去完山丘片車後，再去河邊片過，由於只得我哋一架車，司機話會減些少刺激分，佢話會落力響河邊片，令到我哋全身濕透為止。Oh！我哋今次仲唔比台灣朋友玩死!

玩後感想：真係想嚟多個round呢! 激！值得推薦！如本身唔受得刺激或身體抱恙者，就要量力而為喇！

在5月時透過悠遊墾丁預訂的, 用Paypal付錢, 過咗兩星期仲未收到confirmation, 托台灣朋友致電民宿主人問個究竟, 原來店主好少睇email, 多數用電話做confirm, 所以擺咗個烏龍, 我哋check in 時, 店主再提醒我一定要打電話比佢做confirm喎, 因為年紀大, 唔多識用電腦, 啊~ 知道喇!

當時找墾丁找住宿, 我比咗8間民宿比台灣朋友過目, 佢再選出3間比我作決定, 最後比呢間充滿歐洲式小屋吸引咗, 而且佢送埋早餐, 其餘都是早餐自理, 價錢又差唔多, 地點又靜中帶旺, 所以就訂咗布列塔尼。

我哋朝早食咗極度豐富, 一路都有食過正餐, 直至依加响墾丁大街掃街。

我哋走咗去呢間食鹵水嘅店舖試吓, 見佢人頭擁擁, 好多人圍住外面嘅攤檔, 又話得過咩獎, 又話比電視台訪X咁多次, 諗住應該好似今朝黃屋夥房, 有番咁上吓, 但.......

由於我哋唔想食得咁heavy, 所以叫多D蔬菜類, 只叫了鴨舌, 五花腩, 豬頸肉等, 一定要在外面攤檔點叫, 然後店員會再加熱, 再送到客人嘅枱上, 我見隔離枱嗰碟大到不得了, 10個人食都食唔晒; 終於我哋嗰碟到了, 嘩! 咁大! 台灣朋友只係平時叫嘅份量, 估唔到會咁勁; 其實最緊要係味道, 但冇驚喜囉, 同今朝食嘅差好遠, 嗰汁太普通喇, 味不濃, 食唔到鹵水味, 好似食阿媽煮嘅一般炆肉, 最後加咗菜在汁裡, 令菜"索"咗炆肉嘅汁, 唔可以話佢唔好味, 而佢嘅製作實在太平凡, 唔係佢哋所講獨有秘方魯水汁囉!

食完吳師傅魯水, 已經飽咗一半, 行出嚟賣咗杯木瓜牛奶同苦瓜鳳梨汁, 飲完已經七成飽喇。

最後賣咗包炸地瓜球, 天然地瓜甜味, 好食, 不過已經full 晒, 美食, 我投降喇!

港童同朋友在回民宿途中, 再買多杯大大(高高)嘅軟雪糕做總結, 佢哋話咁先至夠皮。

一早起床, 馬上走出天朗氣清嘅墾丁逛逛, 噢! 舒服! 寜靜!

早的墾丁, 寜靜, 舒服; 夜的墾丁, 喧囂, 熱鬧; 日與夜都適合任何活躍人士, I LOVE 墾丁

比起沙巴, 布吉, 墾丁有另一份舒暢嘅感覺;

唉! 今次因為時間傖促，未能在墾丁行下水禮，玩水上活動，所以我決定兩年後再來墾丁, 發掘墾丁, 玩盡墾丁, Yah ~

呢餐早餐係民宿包嘅, 冇期望, 但又不失望喎!

早餐只有兩三款包類或三文冶, 饀料以豬排, 雞蛋肉碎或火腿為主, 三文治附加生菜添。

飲品就有四款, 全部凍嘅, 豆漿, 汽水, 珍珠奶茶同咖啡。

估唔到呢間小店咁多人, 小店只供應早餐, 我唸好多民宿都係同佢合作, 提供包早。

Check out咗民宿, 馬上開始行程, 先到鵝鑾鼻公園, 要付入場費NT40, 作為保育, OK吖!

公園裡有好幾片大草地, 環境相當唔錯, 雖然太陽好猛, 但都忍唔住喺大草地跑來跑去, 好似卡通片呢!

當然要去地標鵝鑾鼻燈塔拍拍照, 看看海.......

龍磐公園係一個看海的好地方, 但朋友話可能有人在此放羊, 所以周圍有好多羊咩屎, 仲好大浸味呢!

由於昨日吉普車司機帶咗我哋去觀星草原睇太平洋, 所以龍磐公園對我哋嚟講唔算太吸引......

去完龍磐公園, 朋友再沿路兜圈子, 讓我哋再睇吓墾丁其他地方, 然後就直去食午飯, 誰知又比我哋見到有嘢玩喇!

經過PK賽車場, 港童話要玩, 咁就喺度消磨咗個半鐘喇!

小朋友與家長一齊坐一架車就NT300, 當然是大人揸, 細路坐旁邊, 但後尾見有D細路10歲左右都自己揸車, 見車速又唔係咁快, 所以就比港童自己玩吓!

車道都唔錯, 雖然冇浮羅交怡那個咁大, 但配套總好過大陸主題公園嗰D, 而且候車處同頭盔都算乾淨同有系統, 好重要係NT200/車/10分鐘唔算貴, 起碼平過返大陸玩啦!

玩完賽車, 肚餓喇! 係時候午餐喇!

我哋去咗熊家萬巒豬腳, 食神鞱鞱同其他電視都有介紹過, 出咗名自然多咗人幫襯。

其實朋友話最有名嗰間萬巒豬腳喺屏東, 但時間實在配合唔到, 而且熊家D出品都唔錯吖！

我哋叫咗如下菜式:

萬巒豬腳(小) NT250, 豬腳炆得入味同好"焾", 汁味香濃, 唔錯;

花生豆腐 NT80 : 花生入味又"淋", 豆腐雖然賣相唔好, 係灰黑色, 但豆味香濃, 其實餐廳只蒸熟豆腐, 加了醬油, 簡單帶出黑豆腐味道;

洋蔥炒蛋 (NT120), 係一個平凡嘅菜, 但朋友話想我哋試吓台灣嘅洋蔥, 同我哋食慣嘅美國洋蔥唔同, 美國洋蔥唔熟會較辣, 但台灣唔係, 而且比美國出品嘅更甜呢!

甘蔗苗 (NT180), 真係悟打悟撞, 叫咗甘蔗苗, 我哋都唔知甘蔗苗係咩嘢! 呢個菜好味到爆, 甘蔗苗好甜美啊!

蔥爆牛肉 NT220, 由於以上菜式較特別, 變咗呢個餸唔突出添, 但唔代表唔好食, OK架

全部埋單茶同飯係NT930。

我哋由墾丁去台東太麻里, 揸車用咗差唔多兩個鐘, 專程嚟呢度睇金針花。

台東太麻里地區，每年到了夏天八、九月份嘅時節， 就係金針花盛開之季。

一路蜿蜒曲徑，一路轉圈，一路上山，位在深山裡的太麻里金針花，更顯得神秘令人嚮往; 而且由於金針山海拔較高，所以能俯視整個太麻里地區，遠望一片綠油油嘅山巒，相當美麗。

這次的太麻里金針山之旅，我哋帶著一點點嘅遺憾離開，因為睇金針花未係時候，我哋只能睇到一小撮，一小撮，再過多一個月先至係盛開嘅季節，所以唔能夠睇到滿山金針花嘅震撼，冇計喇! 去旅行就係咁，睇你好唔好彩!

由太麻里去台東市, 已是6:30入夜時份了。

今晚又喺去夜市解決晚餐問題, 去前經過水果檔, 即刻去買番d水果,

今次買咗如下生果 :

黃色西瓜, 好甜好甜, 多汁爽脆, 不過價錢較貴, 因為早排台灣大雨水災, 令西瓜失收, 朋友話今年紅, 黃西瓜都好貴 (返到台北, 再買多一次黃西瓜, 台北價錢仲貴)

釋迦, 一種令人回味冇窮嘅生果, 買完要快食, 唔可以放太耐, 第二日就會爛;

木瓜, 雖然普通但係係台灣出名嘅生果, 果然係穩陣之算;

黑提子, 雖然冇日本巨峰咁正, 但都唔差, 幾甜喎;

長形黃芒果, 肉厚核薄, 超甜, 好食生果之選。

買完一大堆生果，由水果街直行，就係台東觀光夜市，我哋就喺呢度開始掃街。

今次食咗最多嘢嘅一次夜市之行，而且台東夜巿較地道，冇乜外國人，所以價錢比其他出名嘅夜巿較公道，今次食咗咩嘢，睇相啦!

呢間民宿係由台灣朋友負責預訂, 呢個就係佢比我嘅第二個驚喜，因為呢度係一間窩心又無奈嘅民宿。

窩心：民宿外型真係好似一間小城堡, 我哋所住嘅家庭房只有一間, 其餘都是雙人房; 家庭房都幾大, 裡面再分多一房, 入面係榻榻米, 另有電視添；外面就有另一張雙人5呎床, 旁邊一張碎花布梳化加埋大小Bear Bear熊作裝飾，令房間充滿warm味；整體係好嘅。



無奈：但個洗手間就令我哋較尶尬，厠所牆嘅高度只有半個人高，根本不能遮蓋整個厠所，而門就只能遮到body，膊頭以上及一雙美腿係可以盡顯人前，雖然旁邊有一道百葉簾，但根本遮唔到門口位置。就算唔怕比人見，完厠後嘅異味亦會充斥著整個房間麻。而浴室就係磨沙玻璃，設在埋邊，半邊牆亦可稍為遮蓋，沖涼可接受，問老闆點解咁造個厠所，佢話咁樣可令家人較close喎，唉呀！我哋4個都唔想比人睇到如廁情況囉！另外廁所旁的床係完全睇盡廁所嘅情況，真令人苦惱！

布拉托城堡是公路旁嘅一所獨立屋，周圍唔旺，可以話係「寧靜」，距離台東市車程約15-20分鐘，揸車住呢間民宿較方便。 

係初鹿逗留咗兩個鐘，要返民宿準備check out。

返到民宿啱啱過咗9：30，都冇唸住有早餐食喇，因早餐時間係7：30 - 9：30，逾時不候的；但老闆娘好好, 佢唔介意再整多四份早餐。

我哋上房執好行李後，老闆娘就做好早餐，擺好位，等著我哋享用。一杯大樹菠蘿汁，清甜可口，是老闆自家種嘅；蘋果一片片切好，浸過鹽水的蘋果仍然清甜爽脆；公司三文治充滿著清新菜香，唔係只得滿口肉味，兩份果醬方包，食落舒服美味；最後值得一讚係碗小米粥，係客人清理腸胃嘅好幫手。

唷！雖然喺初鹿食咗個多士早餐，但此餐真令我食慾大振，點都唔想浪費老闆娘嘅體貼心意呢！

台灣朋友極力推薦呢間老字號 - 楊記家傳地瓜專賣店。 

台灣朋友一路大讚此店地瓜蜜，未到老店門，已見好多人拎住一袋二袋，去到老店問，原來已一早沽清，要明天請早，只剩下幾包炸地瓜酥，朋友一共買咗6包，我哋只買咗兩包大嘅。

一係就唔好食，一開封嘅地瓜酥，就會令人唔停得口，脆卜卜加上蜜牙糖嘅地瓜酥，在口中"劈劈啪啪"，唔怪得一個上午，老字號嘅貨已被搶購一空啦！ 

離開水向上流公園, 雨已停了, 天開始光亮, 肚亦開始打鼓, 台灣朋友話去食個包喎!

好多人係度等包出爐, 一車車嘅強國人旅行團, 佢哋d導遊一買便4-50個, 所以包店忙個不停, 我哋都企响頭位成半個鐘, 等買包呢!

我哋買咗四個肉包一個黑糖饅頭, 非常平, 肉包只賣NT18, 饅頭就賣NT10; 最好味係酸菜肉包同竹筍包, 黑糖饅頭不太甜, 只輕輕帶有黑糖香, 又平又正, 又啱口味, 唔怪得咁多大陸團排隊幫襯啦!

飲完杯茶, 食完個包, 又去下一個靚點 - 三仙台。

三仙台是由突出的海岬與離岸小島所構成。三仙台地質屬都巒山火山集塊岩，原來是一處岬角，因海水侵蝕逐漸斷了岬角頸部，而成了離岸島。此處建有紅色跨海步橋，以及環島步道，方便遊客上島遊覽。

三仙台的沙石呈灰黑色, 石灘邊的碎石有D舉步維艱; 藍天+碧海+黑礫石, 迷人嘅景致竟配合得天衣無逢, 再加埋八拱跨海橋作點綴, 簡直係風景中的大美人啊!

好快離開八仙洞，終於踏入花蓮縣，花蓮第一個景點係去石梯砰遊憩區。

沿住花東海岸線，風景真係好靚，亦都讚嘆台灣靚景在東部，山海相連，在沿海公路可遠眺蘭嶼同綠島， 由於山路多， 交通不太發達， 所以台灣東部經濟較落後， 咁樣先至可以保留著較多嘅自然景觀。

石梯坪係位於豐濱鄉港口村以北附近，岸邊佈滿一層一層嘅風化石，形狀似梯級，因此名為石梯坪也。除了有自然風化石觀賞外，亦是一處潛水及釣魚嘅絕佳場所，當然我哋只係嚟睇風景啦!

喺遊憩區旁，有幾間唔錯嘅民宿同露營區，位置優美，如想遠離繁忙都市生活，不妨嚟住上一兩天，感受一下花東海岸風光。
 

喺花蓮嘅英雄館唔錯，平靚正，台灣朋友亦幫我哋訂埋宜蘭嘅英雄館，地點適中價又平，點知......

唔怪得英雄館嘅網站浄係睇唔到宜蘭嘅英雄舘相片啦！原來係咁........

我哋係住3人房, 一定要台灣朋友幫我哋check in; 房間好細, 有1張4呎半床+1張3呎床, 整間房最似樣係床單同枕被, 應該係新嘅，其餘都可以用一個字嚟形容 -「舊 」囉.........

雖然係好平，但港童已黑晒面，宜蘭英雄館真係要裝修喇，停留在60年代時期，而且更令港童最唔鍾意係冇得上網，大堂連都冇電腦，真係好似返咗40年前啊！

一早起身, 馬上決定唔玩宜蘭, 即回台北, 如果唔係, 連台北都唔駛指意玩呀!

我哋搭的士由英雄館去宜蘭轉運站, 其實路程唔太遠, 應行十五分鐘左右, 但因下著雨, 又拖住唿, 都係搭的士隠陣D。

台灣朋友叫我哋揀葛瑪蘭客運搭, 因車較新同快, 我仲選綠色線1916, 由宜蘭直去台北車站, 當中只有3個分站, 快好多。

我哋準時坐10:25分客運返台北, 好彩, 沿途冇塞車, 唔駛一個鐘就去到台北。

一路慢步淡水河, 一路睇住日落西山, 不經不覺行至紅毛城古蹟。

古蹟都有做Promote？ 現在唔駛錢可入場, 當然入去影番幾張相啦!

離開紅毛城, 天又開始下雨, 仲越落越大, 就喺路口搭巴士直去漁人碼頭。

落車時雨剛停, 天變成橙紅色, 要快D行去情人橋影相同睇餘暉，天黑就會景色有變，要把握時間捕足浪漫的每一刻呢！果然, 慢步於橋上真浪漫, 周圍景致迷人, 難怪是拍拖必選之地。

原本都想在此食晚餐, 諗住浪漫吓, 但港童們一致要出去捷運站才食, 啊！原來有目的 - 要去買波鞋也！！

我真係比呢個台北車站玩死, 昨日約旅行partner一家在Y3區等, 都搵到我死喇, 行咗成半個鐘先至同到朋友會合。

今日又比佢玩多一次, 賣票大堂原來都有好幾個, 令我再一次遲到, 好彩朋友明白, 因為佢自己都係咁, 搵咗好耐, 先至搵到佢要住嘅酒店出口處。

最後一日都要再比佢玩多次, 問捷運工作人員行邊到可以搭到客運去機場, 又被兩個工作人員點到行錯路, 最後亦要搭的士到機場, 好彩趕得切班機。

台灣朋友話佢哋本地人都成日攪錯台北車站方向，更何況我哋D遊客呢！ 

有曾到過九份嘅朋友話九份冇嘢睇, 亦睇過網上有人話九份遊覽價值一般, 究竟點架?? 自己親身去睇吓咪知道囉！

嚟到九份, 呢度修飾得好鄉土情懷, 好遊客區, 仲好緊貼潮流, 整個九份老街有免費wifi覆蓋, 對我哋遊客來講係非常方便上網、行街、食嘢、購物。

九份老街純粹係一個遊客區, 可以係度買台灣手信, 可以係度食台灣地道小吃, 又可以係度飲杯茶, 食個包, 愐懷鄉土事, 細看九份舊建築, 看看九份下的山村景色; 熱鬧, 恬靜, 集於一身.........

九份老街除活化成遊客區外, 連昇平戲院都冇將之荒廢, 雖然戲院已被現時的商場迷你戲院取代而停止放映電影, 但仍然冇浪費佢嘅價值, 成為老街中的小型博物館, 令遊客在此回味戲院舊時的光輝。