早一日已經喺「Ishiya Café」食過人氣早餐超厚班戟，再一次黎目標亦定好為名甜品「白い恋人蛋卷」，由於對餐店環境都好熟識，所以一到步即上前落單並揀好個靚位坐。

「白い恋人蛋卷」單售594円，如果連飲品叫個「白いロールケーキドリンクセット」（譯：Shiroi Roll Cake Drink Set）套餐則為800円，因曾經聽講過咖啡有助消脂，小肥當然係揀有咖啡飲o既套餐啦！

由於抵達日本當日由新千歲機場乘搭JR列車到札幌時，無論係購買指定席車票或找尋月台都一樣咁簡易方便，所以離開札幌嗰日，小肥就大安旨意諗住朝早買飛都唔遲，點知原來大錯特錯！去到售票處排隊時，抬頭一望已發覺即日前往新千歲機場o既所有列車o既指定席都已爆滿，八人最終唯有坐自由席車廂去機場。

如相所示，其實JR列車o既自由席同港鐵車卡差不多，除咗有座位，亦有企位。企喺度o既搭客要企穩之餘，仲要確保行李唔好轆黎轆去，以免影響到其他人，真係可以幾狼狽架。

港人愛遊北海道其中一個原因就係為咗要怒食海鮮，除咗魚生之外，要數人氣王當然係唔少得蟹啦！同其他海產一樣，蟹都分季節食，十月期間就以食鱈場蟹同毛蟹為主。屋企人中真係冇乜邊個唔食蟹，所以出發前長輩們已打算以蟹做手信。嘻嘻，多得細佬有本旅遊天書在手，八人抵達機場後即鎖定書中所介紹o既海產專門店「北海道きたれん」（譯音：Hokkaido Kitaren）為目標，為求要買到靚蟹返港。

商店「北海道きたれん」位於機場國內線大樓二樓，因手持門面相片，問路都容易好多。行到埋去店舖，店長一眼就認得出小肥手上o既超閃旅遊書，眼睛發亮o既同時，臉上亦充滿笑容，並熱情地推介店內不同產品。得知我地有意購買蟹隻回港，佢仲好詳盡地講解魚缸內o既活蟹必需要到港後兩小時內烹煮，二十四小時內食先可確保新鮮；而藏於冰雪內o既原隻熟蟹其實係捕獲後立即烚熟，返港後只要保持雪藏，四十八小時內食其味道都會一樣咁鮮。店長唔係好識講英文，不過店內有位精通普通話o既姐姐仔即場翻譯，大家溝通上絕冇問題。主婦們經過一輪商討後，最終決定聽取建議，購買已預先烚熟o既毛蟹同鱈場蟹各兩隻，並交由店長先生代為揀選及包裝。

正當小肥陪伴幾位主婦去買蟹時，姨丈就獨自走咗去巡視其他店舖，當發現大樓內居然有條人龍買芝士撻，有少少肚餓o既佢就排埋一份。哈，咁啱企喺佢前面位嬸嬸原來又係準備返香港喎，二人同聲同氣，好自然地就傾起偈上黎。與嬸嬸閒聊間，姨丈知悉「Kinotoya」原來喺香港銅鑼灣Sogo都設有分店，嬸嬸都有排過隊去買，記得當時仲等咗成個鐘先有得食，故當見到新千歲機場條隊唔係太長時，諗都唔洗諗就要一試日本鮮焗o既版本。

辦妥好登機手續，將行李寄哂艙後，大隊都急不及待要搵野食。行返去國內線大樓三樓兜咗個圈，眼見大家都有不同喜好o既食品，團長就決定行入去舖位超大，陳列架上擺放出最多日菜模型o既「きたみなと」（譯音：Kitaminato）。

午餐時間，店舖已坐滿食客，和藹可親o既嬸嬸就安排八人入座一間大榻榻米房內，每邊有張四人枱，私隱度高，地方又闊落，仲冇最低消費添，雖然要除鞋，不過都冇人投訴。

餐牌圖文並茂，日英對照，簡單易明，同服務生講唔掂都可以用手指指出。可能成朝都忙於搬運行李，突然飯癮起，所以一口氣就叫咗幾個招牌海鮮丼黎分：

1)      生海膽丼（2,860円）：如相所示，飯面佈滿金黃色o既海膽，美艷吸睛，入口更覺鮮味溢滿口腔，香軟濃郁，超正！

2)      蟹丼（2,040円）：蟹丼亦為一絕，蟹肉份量同海膽丼一樣咁足，雪白幼嫩，高質清香，新鮮甜美，冇得頂呀！喺機場食二千円一碗，價錢真係算合理架啦。

3)      燒豬扒丼（1,210円）：熱食o既燒豬扒丼新鮮熱辣，香口脆薄，惹味可口，同樣咁掂當！

4)      炸雞翼（670円）：炸雞翼其實似燒雞翼多啲，皮層香脆，肉質嫩滑，送酒一流。

5)      炸蝦（640円）：反而炸蝦就唔係咁得啦，雖然蝦隻炸得好夠乾身，但其炸漿過厚，蝦隻又唔得爽脆，屬失色之作也。

酒店正常退房時間為中午時份，不過肥肥家族有位心急大少，去親旅行都會食完早餐就去機場，每次都必定有足夠時間加料買手信零食、慢用午餐、及四周探索。雖則今次有旅遊書在手，一早更預咗要暢遊新千歲機場內幾個觀光景點，但因未能掌握出境所需時間，故亦只能快速喺門外拍照留念，未能久留玩樂。

大家要先留意一點，喺日本北海道新千歲機場內，各大航空公司要根據航班出發時間輪流用大堂內少量o既櫃台為搭客辦理登機手續，亦即係話如果太早去到絕對有機會要等好耐；加上下午離境區人龍頗長，輪候時間冇一個鐘都起碼大半個鐘，故小弟建議大家盡量揀坐夜機，朝早同下午可以盡情喺機場食個夠同玩到顛先佗佗佻佻地走。

由於自己未有足夠時間喺各景點逗留，實難作出詳述評論，喺度只好簡單列出兩個主景點及其吸引之處作吧：

1)      Royce’ Chocolate World（www.royce.com/contents/world） - 此乃名朱古力品牌Royce所建立o既博物館、朱古力工場、及大型朱古力店，各區同為免費入場；有得睇、有得玩、仲有得食，店內更有多款限定紀念品及糖果款式，絕不能錯過，最少要喺度逗留一個鐘頭。

2)      哆啦A夢空中樂園SKY PARK（http://www.new-chitose-airport.jp/tw/doraemon/） - 相信哆啦A夢由「叮噹」時代開始已經陪伴住不少香港人長大，XO仔都係其中一個，所以當喺新千歲機場發現到處都有「圓圈加一點，圓圈加一點，下面畫枝波板糖再畫個呼拉圈。。。」o既影子時，感覺分外親切。機場內o既哆啦A夢主題公園除咗有小型遊樂場同精品店之外，園內亦設有益智o既圖書館、哆啦A夢紀念手藝品DIY工作坊、多部貼紙相機、夾公仔機等。如果大家唔夠時間入去主題咖啡室度坐，記緊行過門前都要一試粉藍色o既波子汽水味軟雪糕呀！

八人乘搭香港航空HX693返港，窗外雖然落住小雪，幸好航班都只係稍微有延誤，安排十分妥當。

航機下午四點多起飛，晚上九點左右抵港，飛行時間約六個鐘頭，包有晚餐服務。客機商務機艙同黎o既時候一模一樣，都係咁闊落舒適，空中小姐同樣客套有禮，唯一最大分別就係食物質素遠遠不及第一程咁好：

1)      餐包：鬆軟暖手o既餐包可以話係整餐之最。

2)      頭盤之「火腿片配粟米告士羅沙律」：軟薄o既火腿片尚算香濃，不過帶點酸味o既粟米沙律就唔係咁啱細佬口味啦！

3)      主菜之「扒雞配蕃茄汁配薯仔及西式時菜」：主菜雞扒不但偏嚡同乾，個蕃茄汁仲要又咸又酸；雖然隔幾日就到鬼節，不過都唔洗咁恐怖掛。。。

4)      甜品之「日式和菓子」：和菓子o既綠茶味外層頗為清香，不過入面o既紅豆蓉就好似過甜咗少少，唔係小肥杯茶囉。

黎到日本主要都係食、買、瞓，所以訂酒店都專登唔要早餐，一早已計劃好其中一朝要去同「白い恋人」有關o既「Ishiya Café」度食人氣早餐之超厚班戟。

「Ishiya Café」位於大通地鐵閘口旁，對上班一族尤其方便，難怪面積咁廣，店內更設有間可容納十二人o既吸煙房。至於非吸煙區就有拍窗一列獨立高櫈位、大廳內合併式o既方形散枱、及門外地下街旁o既圓枱散座，氣氛輕鬆自在。

咖啡室屬半自助式經營，食物可從雪櫃中提取或點選，如有需要可向服務生索取英語餐牌，食客落好單就會取得號碼牌，揀好位坐，等食物準備好就會有位靚女姐姐續一呈上。餐具及清水可於收銀處個雪櫃隔離攞，食後亦請各位客人自行退回器皿及棄掉垃圾。

北海道名朱古力夾心餅乾「白い恋人」真係食唔少，黎到原產地當然係要一遊其主題公園「白い恋人パーク」（譯音：Shiroi Koibito Park）啦！

公園離地鐵站只需步行八分鐘左右就到，街道上四周都可見指示牌，不過由於當日雨勢漸大，大肥手持o既GPS又帶錯路，結果八人就跳咗上兩架的士，三分鐘即到，就連最懶o既大肥爸爸都覺得有點兒過份。可能的士司機已接載過不少迷路o既遊客，故態度仍能保持客套有禮。

「白い恋人パーク」外型好似個城堡咁，外牆有靚花鐵欄及紅葉大樹圍繞，壯觀宏偉。鐵欄後面又有溫室又有花園，處處可以聞到花香，睇到嬌艷o既花卉。

如要參觀工廠及「白い恋人」生產過程就必需繳付成人六百円一位o既入場費。除咗有得睇，當然係有得食啦！園內有個朱古力吧「チョコレートラウンジ」（譯音：Chocolate Lounge），提供精美蛋糕、芭菲甜品、朱古力特飲等，食早餐同下午茶去就最啱。如果時間有限，又想一試園內製甜點飲品，其實仲可以去外賣店「テイクアウトコーナー」（譯音：Takeout Counter）及雪糕屋「ソフトクリームハウス」 （譯音：Soft Cream House）買軟雪糕或朱古力特飲，一邊行一邊食。

主題公園當然唔少得商店啦！除咗可以買到著名o既「白い恋人」餅乾之外，亦可選購多款糖果、蛋糕、朱古力等，二樓仲有一系列精緻o既文具及紀念品添，不容錯過。

應契妹友人推介，喺札幌特意訂座一試離酒店極近o既食蟹專門店「かに本家」（譯音：Kani Honke）。

「かに本家」獨佔整座大廈，離遠都可以望到大廈頂上o既招牌，不難找到。食店大堂為接待及候座處，腳下綠色o既地毯，配上兩旁o既活蟹水池、木造o既橫樑及傢俬，大自然氣息濃烈，悠閒寫意。店內不設散座，每層只有不同大小o既tatami廂房，故食客乘搭升降機上樓前必先除鞋。

每間房都有專人招待，我地房內位松本嬸嬸英語水評不高，只可跟小肥以簡單o既日語溝通。嬸嬸喺言語間跟細佬o既對答可以話係佢最客氣o既表現，口中不斷用上敬語，因為除咗跟大家打招呼o既第一刻叫做有啲笑容之外，其黑面o既表情及不耐煩之態度實在差劣，就連呈上食物時亦極為急速及嘈吵，砰砰彭彭，當真令全枱人都極度不滿。雖則如此，但因不知嬸嬸家中是否有不愉快事情發生，或之前是否受到其他食客惡意對待，八人最終決定不作出投訴，以免喺如此經濟不境o既狀況下打爛人地個飯碗。

店子乃蟹肉專門店，午市套餐當然全為蟹宴，全體人當日就主攻款色較多o既「大雪會席」（連稅每客5,050円）及「日高會席」（連稅每客4,000円）。由於兩款蟹宴中有四樣食品相同，靚靚媽咪胃口又細，XO仔結果試勻哂所有菜式。綜合各人意見，對男士黎講一個套餐絕對夠飽，不過女士們就覺得可以兩個人分一客。此外，蟹肉菜式雖屬優質，當中以刺身、蟹蓋、及蟹粥最為甜美，但前菜、沙律、同甜品就頗為失色；前菜大多唔夠調味，甜品則如相所示，唔好睇又唔好食。「日高會席」中有一味叫「奶汁烤蟹肉」，其味道香濃得黎過於溜滯，八個人分三客好勉強先食得哂，所以個人會見議大家可以三人分兩客套餐為標準去點選食物。

喺日本真係唔洗驚會餓親，有商店o既地方就好容易搵到有甜品食o既地方，就連地下街亦不例外，「Sapporo Sweets Café」就係其中一間。

咖啡屋以紅、白色裝潢，簡潔明亮，感覺甜得黎坐下一刻已想點食士多啤梨同忌廉。年輕o既店員面帶笑容，且溫文儒雅。

跳舞激的話絕對可算為劇烈運動o既一種，故跳前不適過量進食，小肥因晚上準備參加探戈舞會，所以就選擇咗兩小時前簡單咁喺車站入面一間外賣小食店「danish Barデニッシュバー」度買咗條熱狗做晚餐。

XO仔近年愛上阿根廷探戈，學藝快將有四年，自覺外遊都應該去見識吓唔同國家o既舞會，所以今次去北海道前，已一早打聽過札幌o既舞會詳情。得知市內跳舞人數不多，亦只有週五晚一場舞會，細佬就特意抽空出席。

由札幌搭JR火車去富良野中途必需轉車，中轉站可選旭川或滝川，XO仔都係應售票姐姐推薦先揀後者滝川。由於來回都要坐成兩個幾鐘頭車，晨早八點出發都可以喺車廂度眠一眠，總算唔係太辛苦。

富良野車站比起札幌站真係細好多，不過站內卻又擺出更多歡迎光臨o既字句及公仔，就連梯級都劃出富良野最具代表性o既薰衣草園，極為可愛！

餐廳「くまげら」（譯音：Kumagera）以富良野市鳥「黑啄木鳥」起名，除咗餐牌及咭片上可見其黑色啄木鳥o既標誌之外，店內亦有不少雀鳥公仔。食店雖離富良野JR車站不遠，但其躲於住宅區內o既門面於白天並不明顯，外牆底部以石仔砌成，頂部則被攀藤圍繞，行近啲睇先發覺藤上結有葡萄果實，即攀藤乃葡萄樹也。店子室內一樣極富大自然氣味，其中一間廂房以石仔建出圍牆，天花又用上樹枝裝飾，就連餐桌都用上木同磚造出，果真獨一無二。上網查看過資料，得知店主刻意用上市內最具代表性o既一點一滴去裝潢四周，菜式亦用上各種富良野特產烹調，務求食客可盡情享受富良野o既一切，有意思得很！

餐館睇落似屬家庭式經營，服務生英語能力有限，好彩餐牌有中又有英，講唔通點菜都可以用手指指出。原本大家主要都係想食鎮店生和牛丼，但當睇到有熊肉同鹿肉食時，就算叫一客八個人其實每人都只係有一小件，價錢一啲都唔貴，好奇心就驅使小肥每樣叫咗一客黎試：

1) 富良野生和牛丼（1,980円）：鮮紅色o既生和牛薄片香軟嫩滑，簡單淋上甜甜o既醬油加白飯黎食果真係極品，一人一碗都絕對可以再encore。

2) 燒熊肉定食（1,800円）：深色o既燒熊肉賣相唔係好得，食落又嚡又韌，不吃也吧。

3) 燒鹿肉定食（2,650円）：燒鹿肉同燒熊肉一樣唔好睇又唔好食。

4) 富良野粟米（500円/一條）：鮮黃色o既粟米又爽又甜又多汁，超正！

大多人去北海道都會以自駕代步，由於觀花好地點分隔得都幾開，自己揸車的而且確更為方便。因團友中未有人有國際車牌，一行八個人又最少要有兩個做柴可夫，適奉淡季估計去一個較近o既景點「Flower Land」（富良野花園）都已足夠，所以今次就棄選租車，喺火車站門口搭的士就算。

晚上返回「くまげら」，店子有燈光照明下明亮及起眼得多，六點左右已坐滿客人。話明晚餐係要黎食埋其他富良野和牛菜式，一坐底就立刻叫齊和牛火鍋、和牛牛排、和牛牛舌，另加兩款推介小食：

1) 富良野和牛涮涮鍋（3,900円）：用作打邊爐o既生和牛片明顯不及午餐丼物中o既生和牛鮮紅，但勝在白色o既油脂分佈均勻，煮熟咗一樣咁香軟幼嫩，生熟兩吃同樣出色！

2) 富良野和牛牛舌（2,900円）：和牛牛舌切得好夠薄，軟腍美味。

3) 富良野和牛牛排 （4,300円）：單睇相片可能會覺得和牛牛排賣相麻麻，但入口卻又並非過份油膩，肉質軟熟得黎極富肉香。

飯後距離乘坐列車仍有成個鐘，行經車站旁邊o既咖啡屋「我夢舎楽」時就決定走上去飲返杯咖啡消下滯。

不知從那天起便戀上士多啤梨特飲，每次去到草莓國日本都會被其紅色o既靚影包圍，甜品店同咖啡店總不乏草莓味產品，淨睇已教人興奮莫名！

其實第一日已察覺到札幌日航酒店旁邊o既Stellar Place商場地下有間「星巴克咖啡店」，收銀機旁仲有個火紅色o既廣告牌正在推廣緊鮮果特飲，所以一早已計劃好第二朝早坐火車前要孖大肥一齊嘆返杯雜果凍飲。

由札幌日航酒店行去JR站只需五至八分鐘，閘口兩邊都有電動售票機供搭客自行購票，如有任何查詢，機旁有位靚女姐姐可以提供協助，不過語言不通唔緊要，因JR公司於西邊出口設有「JR外籍旅客服務處」，入面長期有幾位懂得以外語溝通o既職員駐守。買飛時記緊要先查列車是否有指定席，幾百円絕對抵加錢坐，因繁忙時間有多條線路只設自由席，搵位甚艱難。

細閱超閃旅遊書得知小樽市觀光點範圍不大，溫馨提示中指出，要節省時間喺一日內去哂咁多地方可選搭「小樽散策巴士」循環巴士線。巴士站及詢問處就喺小樽駅前方，步行一分鐘即達。正如書中提到，不論遠近，巴士每程220円，如果諗住會起碼搭四次的話，當然係購買750円o既「一日乘車券」最為化算啦！編好必到地點及行程大綱，再上網查核過巴士o既時間表，覺得要年長o既團員快速移動只有乘搭循環巴士，所以未出發前已決定以循環觀光巴士代步一日盡遊小樽。

於巴士站詢問處內工作o既嬸嬸只可以話係略懂英語，幸好XO仔事前做足資料搜集，又能用上「下手」（即唔係咁叻）o既日文加手語搭救，先勉強明白對話，叫做抺咗一把汗。原來「一日乘車券」係一張刷刷卡，搭客要自行刷出當日日期，並於每次落車前顯示俾車長過目。

小樽散策觀光巴士外型好似個火車卡咁，上半截為墨綠色、下半截為鮮紅色。單層o既木造座位高身簡潔，撞啱淡季時份冇乜人坐，我地八個人大袋細袋更可以每人霸一行，舒服過坐的士。每個巴士站都有個橙色o既站牌，牌上列有時間表及巴士路線，資料明確，巴士亦超級準時，令旅客可更容易掌握時間及規劃行程。

以前一直都唔係好鍾意睇書，但係自從開始咗寫食評及遊記後，小肥就留意多咗報紙、雜誌、及網上有關飲食o既文章，就連旅遊書都唔再抗拒。多得自己新增o既閱讀習慣，知悉小樽市內有一間喫茶店「銀の鐘」不但可以一杯o既價錢任飲限定咖啡或茶，飲完仲可以拎埋隻好得意o既Hello Kitty造型杯返屋企作紀念品添。由於家中有不少Hello Kitty小粉絲，眼見八人可以喺度食完早餐，再包走八隻杯做手信，「銀の鐘」就好順理成章地成為小樽一日遊o既首站。

「銀の鐘」合共有三間分店，集中於同一個路口，乘坐小樽散策觀光巴士可於離小樽駅站最遠o既「メルヘン交差点」（Merchen Crossroads）站落車，行過馬路即達。請留意，如果有意要Hello Kitty造型杯必需選擇1号館或2号館同設於二樓o既喫茶店。

早上十點半左右，「銀の鐘1号館」o既二樓已擠滿遊客，搵位唔易。店子o既傢俬唔再新淨，又以快餐店自助形式經營，人多時服務生又未趕得及清理，感覺其實唔夠衛生乾淨，加上座位狹窄，對肥人黎講真係唔多舒適。可能收銀姐姐每日應對遊客人數實在太多，連面部肌肉都薑硬埋，難掩其極不耐煩o既表情，直令身為顧客o既小肥感到不受歡迎，今時今日咁o既態度個人覺得喺日本黎講可算係幾震驚。

正如書中記載，咖啡、紅茶、及清水屬任飲項目，價錢則由食客所選o既卡通杯型號所定。因媽咪及姨媽都覺得陳列櫃中紫色同粉紅色o既Hello Kitty杯最為吸引，結果就每款要咗四隻。店內更設有一個洗杯區，方便客人清洗靚杯。原來隨每杯咖啡及紅茶仲奉送杯盒及雜果蛋糕一塊，鬆軟香甜。

日本最多甜品食，買手信首選當然要揀朱古力啦！「LeTao」朱古力店喺小樽市內居然有成六間分店咁多，來頭認真唔野少。

店舖有分蛋糕店、咖啡室、零食店等，各間分店o既主題都有所不同，不過全部都有得免費試食。試啱最好快手買，因為有幾款產品機場分店都冇得賣。除咗朱古力出名，「LeTao」o既芝士蛋糕更加係一絕，其超級軟綿綿，而又夠哂輕巧o既質感同味道真教人一試難忘。由於蛋糕有嚐味限期，亦必需保持冷藏，小肥建議大家可以留待喺新千歲機場先買，店子會代為加以包裝。

一眾長輩最愛食蟹，黎到北海道當然係唔可以放過食鱈場蟹啦！喺小樽市內，除咗有多間糖果店之外，賣海產o既市場都一樣咁多，再一次多得書本介紹，女士們不加思索就鎖定「北の漁場」為目標，入門即搵活生生o既鱈場蟹。

可能早餐只食蛋糕同咖啡唔多夠飽啦，見到店子有即買即煮服務，太太們一口氣就買咗兩隻鱈場蟹，一隻生食、一隻燒煮。雖然魚缸上明明貼有「No Photo」，店主叔叔卻自動獻身，擺出拍照模樣，小肥得到特別批准，梗係立即行動，幫兩隻巨蟹影返幅靚相啦！

「北の漁場」一邊賣海產食物、另一邊則就做大排檔式食肆，方便不少遊客享用即買靚蟹，真係好有生意頭腦。綜合各人意見，鱈場蟹刺身雖然甜美，但質感遠遠不及燒煮咁幼嫩，而且其鮮味亦冇咁突出，所以建議大家如果有機會試，可以主攻燒鱈場蟹。

小樽除咗係音樂盒及玻璃之城，其壽司街「小樽寿司屋通り」更加係遊客必到勝地。喺日本o既壽司屋可以話係數之不盡，「小樽寿司屋通り」能夠成為日本全國居民選出為高級壽司十大之一真係一啲都唔簡單，我地當然係不可不試啦！壽司街上有多間店舖，為怕團友行得辛苦，小肥就揀咗一間旅遊書推介，網上又頗有名氣，而且離巴士站最近o既「旭壽司」。

「旭壽司」本店為四層高o既獨立小樓，派頭十足。室內木造o既間隔傳統潔亮，舒適大方，地下分為四至六人散座、小廂房及可坐十多人o既壽司吧；多得大肥爸爸四周搜索，一行八人原本被安排入座兩張四人散座，但最終卻得以入座壽司吧，感覺真係爽好多！XO仔以半帶英語o既日文跟兩位大師傅溝通，逗得大家嘻嘻笑，返到香港上網查看先知師傅乃店主碓井先生及其兒子，二人一啲架子都冇，真係估佢唔到！

得知大家同屬好飲愛食之人，師傅首先推介自家品牌o既清酒，魚生方面亦由當地盛產o既魚生續一推薦，並連同即場生磨芥辣呈上：

1)      當中最安全o既有北海道名產三文魚籽壽司及海膽壽司，兩者勻鮮甜濃郁。

2)      而最出眾則為兩件牡丹蝦壽司；第一件牡丹蝦身加綠色蝦子壽司鮮甜爽潤；第二件由小碓井先生即拆蝦頭製出，同樣鮮濃無比，就連平時唔食生蝦o既團友都大讚好味，實屬難得！細問下，得知壽司上o既蝦子呈綠色證明蝦子未經處理過，亦即是師傅常掛於口邊o既「生」（拼音：「name」）。

3)      大家要留意一味叫「Nishin」o既魚生，其刺身味道極為鮮甜，無奈個人舌頭不夠靈巧，喉嚨又不懂吞嚥入面幼少o既魚骨（有啲似鱔入面嗰啲），所以食得較為困難。

4)      三文魚相信大家都食得多，不過細佬都係第一次聽到三文魚都會有證書！原來此種「幻之鮭」只會喺十至十一月出現，每一萬條先會一、兩條o既基因突變三文魚，珍貴非常，其肉質肥美，兼且營養價值高，相傳每個日本人一生都想食一次架！

5)      團友們一致覺得鮑魚刺身雖然爽脆清甜，但質感還是覺得炆煮最好食。

6)      北寄貝其實喺香港都有食，不過真係估唔到喺「旭壽司」食北寄貝壽司，其鮮甜味可以有咁大升幅，直令人拍案叫絕！

「LeTao」喺小樽市內不但有多間商店，就連咖啡室同甜品店都唔少得。下午茶時間一到，為減少大家o既步行路程，細佬就揀咗間門口就有車站o既「LeTao」本店等大家歇一歇，因網上資料顯示其二樓o既咖啡廳有個超抵o既840円芝士蛋糕下午茶餐，相當吸引。如果夾啱時間，大家不妨一試店子每月一次o既蛋糕自助餐，不過要留意因座位有限，顧客必需預先訂座。

裝潢簡潔o既咖啡茶座的確有個下午茶餐，不過售價係864円，估計差額同稅收有關。套餐包有餐牌上o既精選蛋糕一件，及指定咖啡、茶、或橙汁一杯，飲品凍熱同價。因糕點即日限量製作，有意一嚐人氣甜點，建議大家早少少去。八人當中食得落甜品o既其實只有三位壯男，所以我地結果都只係叫咗三個餐。為食貓小肥三款試齊，個人始終情迷鬆軟、幼滑、輕盈o既招牌芝士蛋糕。由於跟餐只有三杯飲品，眼見還掂有人都要散叫，「LeTao」又以朱古力起家，細佬就同哥哥個契爺每人叫咗杯熱朱古力黎飲。嘩，二人真係估唔到熱朱古力每人有一壺，不但味道甘香醇厚，套茶具仲要咁美艷，好有驚喜呀！

從互聯網得悉北海道有多間名酒廠，XO仔其實都只係聽過幾間名啤酒同威士忌品牌，因為睇到小樽市內都有啲地道o既日本清酒廠，所以就好奇地帶隊一探地點最方便o既「田中酒造」。

由於大家都唔想太夜返酒店，所以就改早咗喺傍晚時份返札幌，肚仔仲食得落晚餐o既六位團友就行咗去隔離Stellar Place商場食肆層六樓覓食。行咗一個圈，發現成層都只係得「牛角」一間滿座，且企有人龍，大家就決定排埋一份。

「牛角」乃香港都有分店o既燒肉專門店，大家都預咗食完成身會一陣味，不過真係估唔到其間隔會咁狹窄，坐得咁唔舒服。年輕o既哥哥仔其實面口唔差，態度都好友善吓，不過可能真係實在太過忙碌，未有時間去解答細佬o既疑問，就算想佢呈上食物時重複餸名都好困難，幸好所叫o既全部都係牛肉，唔講都冇乜問題。

城崎溫泉"七外湯"是這竹金竹山最出名的景點之一

只要入住任何一間旅館，都可以免費浸泡

如果是一天遊的朋友，也可以付費浸泡 

不過要一日內浸晒太個湯，仲辛苦過返工 

今早晨運自目的是吃拉麵，選了之前提了很多次的金久右衛門，此店是日本搵食網站「食べログ」主辦的「大阪拉麵霸王決定戰」準優勝，2007年的拉麵四天王比賽中更獲得第一名。

湯頭是濃郁的醬油湯，分金醬油、紅醬油跟黑醬油拉麵三種。要了細碗的黑醬油拉麵，總體感覺口味偏鹹，蒜香十足，不過還是蠻好喝，不會像吃豚骨拉麵那麼油，也不會滿口蒜頭苦味。麵條可選粗幼，正合心意。

酒店沒有明確答應遲退房，只道11時後才會處理遲交匙卡的問題，即是不太過份就無所謂。最終，也很乖的沒有遲，在大堂寄存了行李就出發。

先是重回昨天白行一趟的「大阪生活今昔館」，休館3天後今天正好重開，亦是在天神橋筋吃過早餐才進場。

怎料，吃完早餐行去今昔館短短一段路，又重遇昨天的遊民，她發現團友後一直跟在背後，幸好有一點距離，今昔館又剛好有電梯抵達，才避開了。

個多小時後參觀完畢下樓，從電梯望出，驚覺遊民原來一直守在樓下望著電梯！立即按B1鍵在直結地鐵的樓層離開。但其他乘客早按了地下樓層，電梯開門時真有點擔心遊民會進來，或者今昔館位處的該是政府建築物，她不敢進來，有驚無險的到達地庫。

事後估計該遊民精神有問題，而團友「吸引」著她的理由…大概…是同樣身穿藍色波點外套，是想「呼召同伴」吧…

總之，逛這條最長的商店街再順道到百円迴轉壽司「くら寿司」的計劃又泡湯了。

這個是頗熱門的周遊卡免費景點之一，附近除了天六商店街外，還有周遊卡可免費利用的「浪速之湯」溫泉，不少持卡者都會一併利用。

博物館本身主要介紹古今大阪市況及市民生活情況，常設展覽館有兩個，分別為古代 (該是維新時期)的模擬街道，除房屋和展品外，天幕也會作日夜變化，讓遊人感受不同氣氛。

另最受歡迎的該是浴衣體驗，遊人可試穿浴衣在模擬街道走走，限時30分鐘，費用全免(好像要付200YEN買襪套)，在京都沒有玩和服體驗的話，可以在這裡試試。不過輪候人數很多，我們不想花時間等。

其餘一層的展館是當代的大阪，純展品擺設和片段播放，有街道、市民生活情境的模型、建築技術演進、家電時代的開始、舊的雜誌展覽等等。

料金：600YEN，持大阪周遊卡免費、地鐵PASS減至500YEN 

離開今昔館後，行程如前面一再提及的原因更改，帶團友到昨天到過的造幣局，不幸地一出地鐵上大堂就被倒流的人潮嚇怕，立即打退堂鼓，無奈逃回車廂到黒門市場，午飯過後補補貨再到OUTLET殺清時間。

首天到來時將近打佯時間，團友都不夠盡興，參考天書介紹的食店多已關門，現在補回。

中選的高木水產據介紹獨沽一味賣即烤饅魚飯，位處市場的一條橫街，位置不算起眼，但生意滔滔不絕，3款套餐最平800YEN已有交易，最貴的才2000YEN，豐儉由人。

店子小小只有一張吧檯和幾張檯，眼見只得老闆夫婦工作，一個烤饅魚一個負責樓面，簡單的擺設頗有平民飯堂風味。由於是即烤的關係，製作需時，請耐心等候。

點的是1600YEN的套餐，附有漬物前菜和有很多蜆仔的麵豉湯，主角饅魚肥美，帶著淡淡烤焦氣味，相信醬汁是秘密武器，這次行程至少吃了兩餐饅魚，以這個帶點果香的汁最特別。

店門口貼著會中國語和有中文餐牌為招倈，堂食以我們這些觀光客為主，本地人模樣的多是外賣。總括印象，這店的價性比極高，值得推薦。

這餐光顧的時間尚早，離去時門外已有人排隊。

午飯後解散，各自在附近補貨，約定3時出發至臨空城Outlet。

這Outlet內約80家品牌開業，離鐵路站約10分鐘步程，對拉著行李箱的旅客看似很遠，但沿路有天橋連結，途中會先穿越一個綜合商場，只要是這商場仍營業，通道都能用，不必走上走落。

要租行李箱的大可在路上見到就租用，因為OUTLET場內的可能已悉數租出。

說可不可以拉著逛…眼見部份店家門外有不准帶行李箱入內的標貼，為數不算多，但將心比己，在香港見到「拉喼黨」在商場遊走，自己是不是會火大？會的話不要省幾百YEN了。

回程不走回去坐JR/南海電鐵的話，可以坐接駁巴士，費用200YEN，但班次較疏，人多時也未必一班車就上到。

坐鐵路的有一點留意，入閘後上月台會是JR和南海電鐵各佔一邊，上錯車的或許會有點阻滯。

這家拉麵一直都在搵食名單中，每天出入的道頓堀更是大本營在所，礙於分店不少，同區還有想吃的店，故特地留在到機場才光顧。

店就在第一航廈3樓的一角，很易找，店的上座率頗高，但沒有在市區般多人，至少不用排隊。

神座較特別的是湯頭，有大量的蔬菜在其中，喝起來甜甜的，還有鰹魚乾的香味，不會十分油膩；叉燒切得比較薄，不過入口即化，可惜麵條是幼麵，這點本貓要扣分；其餘玉子和跟餐的煎餃子也屬中上。

傳統印象在機場吃飯會被劏，這裡看價錢應該和市區一樣，至於味道會否更佳，就下回才能驗證了。

3樓其實還有不少食店選擇，匆匆走一圈發覺價錢都不貴，大部份千YEN出頭已有交易，若花多眼亂毫無心水，神座很值得推薦。

到機場前忘記看看航班資訊，不知道航班延誤了2小時，否則會在OUTLET逛久一點。有幸有不幸，至少沒有因多留而為荷包增加風險，有時間好好的吃一頓晚餐，也有時間看看機場免稅店。

臨尾還有少少驚喜，在候機室無聊，突然有廣播本貓和團友們的名字，原來職員找我們換位，哈腰點頭的甚麼不好意思，想我們換後一點的座位，見是換成坐在同一排，自覺佔了便宜就應承了，上機看見原來是較闊的逃生門位，可能是一般座位超賣，這排要加錢的又賣不出，隨機就找了我們。

總括幾天的行程，除了交通上有點轉折讓團友摸不著頭腦(說是不明怎樣坐車)，自問已滿足到9成要求，這團團員的風格該要玩京都住京都，玩大阪住大阪，車程久一點就不耐煩；日常開支方面剛好是組團的預算，買東西買到用盡現金，就不是本貓能控制的範圍；跟了幾天，團友們對如何坐車仍是一頭霧水，真感到有點無奈。

5月還有一團，風格完全不同，又是另一篇遊記了。

XO仔跟隨大隊首次乘坐香港航空，以優惠價HKD 6,850坐商務位，機會難逢之餘，大家更一坐上癮。

當日香港航空HX690 航班用上新飛機型號，商務艙新淨潔亮，以一、二、一排列o既座位全為獨立式廂座，私人空間足，椅櫈舒適，除咗有個墊腳位，地下仲多咗個格擺放手提行李，長輩們都非常滿意！

坐商務位服務都唔同啲，起飛前除咗每人有一條熱毛巾抹手之外，仲有清甜解渴o既石榴汁同礦泉水飲。

HX690 航班早上九點十五分離開香港，下午三點左右到達日本北海道新千歲機場，飛行時間四個半鐘頭多少少，故機上有早餐供應。早餐每人都有盒裝乳酪、生果拼盤、自選主菜、果汁或汽水、及咖啡或茶，唔夠飽可以食多幾個麵包填肚。唔係好甜o既生果屬一般啦，盒裝乳酪味道都好正常。小肥所揀o既「法式烤多士配鮮忌廉及藍梅醬」意外地好夠新鮮熱辣，而且鬆軟香口，唔知西多係咪空中小姐喺小廚房度即場煎製呢，因為一啲都食唔出係翻叮貨色！另上o既鮮忌廉及藍梅醬獨立包裝，份量剛剛好，感覺極之衛生。

由於抵達北海道時午飯時間已過，喺機上面大家都只係食咗個簡單o既早餐，所以喺機場攞好哂行李，第一時間就要去搵野食。人生路不熟，最終唯有單靠店舖門面及廚窗內o既食物模型，決定去試全層最大型顯眼o既壽司店「北国の寿司 花ぶさ」（Kitaguni no sushi Hanabusa）。

壽司屋內外裝修都以木為主，傳統潔淨。正門有個大架方便食客連推車存放行李，左旁有個長長o既壽司吧，大堂中央為卡位散座，右手邊則有幾間廂房。日藉服務生友善有禮，英語水評雖然只屬有限公司，幸好餐牌有日有英，遊客可用身體語言搭救，不必擔心。

每次東瀛遊，多種理由下總會由大肥爸爸負責揀選及訂酒店，今次o既「JR Tower Hotel Nikko Sapporo」（札幌日航JR Tower酒店）亦不例外。札幌日航酒店位於札幌市地標JR Tower內，直通札幌地鐡站及札幌JR站，旅客由新千歲機場可以乘坐JR快速列車直達札幌JR站，車程約37分鐘，再步行約五至八分鐘就到酒店，成人車票為1,070円，不過如果唔想同人迫，可以加310円坐「頭等指定席U-Seat」，因數量有限，而且唔係架架車都有，所以建議要預早訂購。

酒店連接多座大型商場，包括Stellar Place、Paseo、大丸等，唔洗行出街已經可以買個夠，超級方便。海外遊客於大丸購物可憑即日發票及護照前往商場七樓退回稅款，日航酒店住客更可享有大丸免費送貨回房間之服務，購物輕鬆得多，荷包都輕得快過平時多多倍，團友們二十四小時未到都已花費不少。

酒店雙人雙床房38,000円一晚，洗手間有齊浴缸及花灑，當然少不了暖暖o既日式座廁啦，如廁十分舒適！房內包有免費Wi-Fi、即沖咖啡、茶包、及限量樽裝水。由於札幌天氣乾燥，房內更設有保濕機，個人唯一不滿冷氣溫度唔夠低，開極最凍o既二十度冷氣，室溫仍停留於二十五度不降，唔通酒店老板係前特首啲粉絲？！

姨媽曾經喺外國o既電視節目度睇到主持人介紹遊客食北海道蟹肉拉麵，所以出發前就叫XO仔探索一吓可以喺邊度食得到。小肥就喺超閃o既旅遊書度搵到間「札幌瑞（しるし）」，見到插圖都十分吸睛，原意當然係想預先訂座啦，點知電話打極都冇人接，網上留言又冇人覆，八人只好碰碰運氣，大膽前往一試。

搵啱咗食店門牌，點知入到去卻人影都冇隻！大家正在惶恐之際，突然有位肥仔哥哥行出黎，出黎了解情況。哥哥仔雖然面上長滿鬍鬚，人品卻極之溫馴客套，睇完彩圖後，佢耐心地為我地解釋店子最近已經轉咗手，經營手法及拉麵款式跟旅遊書上所記載o既都應該唔一樣。新店可以話係半快餐店形式運作，餐桌任坐，搭枱亦屬必然，餐具全為自助式，食客更必先喺自助購買食券機度點選食物及飲品，再交啲食券俾佢，等佢喺開放式廚房慢慢烹製拉麵。

黑色o既牆身配上木枱及摺櫈，感覺有啲似係後生仔o既飯堂，因年紀大o既店主好少室內裝修會揀黑色。只有肥哥哥一人打理，又要兼顧埋煮，地方尚算整潔企理。

原來由狸小路四丁目商店街，即拉麵店位置，可以喺地底一直行返去日航酒店，慢慢行半個鐘都到。沿途經過多間店舖，雖大多已關門，但小肥最愛o既甜品店及零食店就仲好歡迎客人光臨。由於團員中有多位咖啡愛好者，當日又未有飲用咖啡，故行經「上島珈琲店」時，幾位對眼當堂發光。

個個撻樣都好靚呀！！但食完之後，只覺得食一陣風咁，個雪糕又麻麻地⋯⋯還是我唔係好識欣賞呢？！不過試過就算吧！！