4月7日（晴）：洛杉磯的第八天

於美加輕鬆地渡過兩個星期後，假期終於結束，係時候要回港了。因復活節遇上多人旅遊，家人買唔到機票搭同一班機，XO仔就獨自一人搭國泰航空中午班機CX 885。估唔到單獨飛反而有幸坐頭等，個位成個獨立休息室咁豪華，除咗有靚酒飲之外，中西膳食意外地竟然可以令小肥用「好食」黎形容，直頭搞到細佬連覺都唔捨得瞓咁激動呀！

4月6日（晴）：洛杉磯的第七天

臨離開美國前一日，XO仔一早起身就執定哂行李，食完個雲吞餐就同哥哥去還車。因為細佬終於唔洗揸車車，下午茶時間姨媽就請肥肥家族上佢屋企飲歡樂香檳。舅父同姨媽們勁有靚靚媽咪心架，以餞行為名約哂區內所有親戚去相熟嘅「海天」晚聚，更悉心安排佳餚美饌，原來係順度為媽咪預祝壽辰，大家當然係盡興而返啦！

4月5日（晴）：洛杉磯的第六天

家中人口眾多，各人因立場不同，聚埋嘅時後其實都好少會談論政治，不過一講到飲飲食食就自然會好投契。話說第六日為「會所天」，中午先由姨姨好爭議性地揀咗喺現任美國總統名下嘅高爾夫球會「Trump National Golf Club Los Angeles」度請食午餐，有美酒佳餚相伴下，成餐飯非常和平；晚餐再由大表姐夫帶肥肥家族初訪市中心另一社交會所「Jonathan Club」，品嚐咗頓高質潮派西餐。

4月4日（晴）：洛杉磯的第五天

頭嗰幾日探完哂所有親戚後，第五日女士們終於忍唔住要出城行街街。為怕塞車，大家就抱住早去早回嘅心態，朝早十點半鐘出發，先喺住宅區內一間人氣越式餐廳「Pho Hana」度快速醫肚。之後喺比華利山兩個名商場血拼到攰攰先去附近嘅「Nespresso Boutique」飲咗個下午茶，晚飯再轉場，一訪神秘密室，食咗頓超正嘅全牛宴主家菜。

4月3日（晴）：洛杉磯的第四天

姨媽姨丈們真係勁有肥肥家族心架，四口子留喺洛杉磯成個禮拜，佢地不單每天陪伴，更一早安排好哂所有飲食節目，食盡中、西、日美食，極其豐富。第四日嘅中午先喺海膽專門店「Miyabi Uni」食潮派日式午餐，夜晚再揸去海邊，喺酒店餐廳「Mar'sel」邊睇日落邊食高級西餐。

4月2日（晴）：洛杉磯的第三天

原來喺美國，復活節後嘅星期一並非公眾假期，親友們都要返工，所以嗰日肥肥家族就同退哂休嘅姨媽姨丈去咗濕平，順便買手信。買到咁上吓，見到商場內竟然有間「鼎泰豐」喎，人龍明顯比台灣啲分店短好多，見狀當然係排隊食小籠包啦；個個食完都見牙唔見眼，美味程度不言而喻。因表弟收工後帶同可愛嘅BB拜會長輩們，不便外出用膳，結果太陽未落山，不用工作及揸車嘅一群就先喺家中享受歡樂時光，之後就一齊打邊爐。

4月1日（晴）：洛杉磯的第二天

喺洛杉磯嘅第二日剛巧為復活節，家中兩位虔誠嘅教友長輩朝早先帶XO仔去山上一間特色小教堂「St. John Fisher Church」度望咗一場十分有內涵嘅彌撒，中午再會合其他親戚去區內一間渡假酒店「Terranea Resort」食自助餐。旅遊勝地個景就超靚啦，無奈節慶日嘅復活大餐水準卻油麻地過油麻地，令人大失所望！幸好晚餐喺「Torihei」食咗頓有高質嘅日式串燒，肚肚總算開心返。