顧名思義，「西班牙小碟」每款都好細碟，所以當晚我地食左成二十幾道菜，影相都影到冇哂電，真係幾誇張。

“LN2 Caipirinha”，USD 20：Caipirinha 係巴西既國酒，材料包括喺巴西出產既cachaça（一款由甘蔗提煉出黎既酒），青檸同糖。Bazaar既調酒師張依款雞尾酒稍為改製，以桌邊服務加入 LN2，即“Liquid Nitrogen”（液氮），成功地製造好有氣氛既視覺效果。製成品可以形容為酒精濃郁，味道香醇既清涼Caipirinha Sorbet。炎炎夏日，一款小弟極力推介既消暑特飲，不過就建議駕駛人士唔好飲用（因為一定超標）！

Pa’amb tomaquet Catalan Style Toasted Bread，USD 8：傳統代表之一，脆口既多士面搽左層薄薄既新鮮蕃茄蓉，帶有蒜香味，簡單清新。

Tortilla de Patatas “New Way”，USD 5/person：“Tortilla de Patatas”其實係傳統「西班牙厚切薯仔奄列」，一款唔係好啱XO仔口味既西班牙餸；廚師真係好有諗頭同心機，居然可以令到小弟食完之後覺得係全晚最精彩既一味！據哥哥仔講解，師傅先把主材之一既薯仔打成泡狀，再以攝氏63度烹調另一主材既雞蛋，最後喺面頭加上以焦糖煮過既洋蔥粒同蔥花點綴。值得拍手叫絕既係，師傅成功地保留原材，並以嶄新配方煮製，更以全身面貌上枱，簡直可以話係分子料理既代表作呀！大家千奇唔好以為得個樣呀，薯蛋口感香滑細膩，配上甜脆既焦糖洋蔥，味道真係非筆墨能夠形容，只可以話係無可爭辯既必吃推介！

King Crab Raspberries，USD 20：哥哥仔話餐廳用料絕對新鮮，用罐上只係視覺效果，想提醒大家西班牙出名生產高質素既罐頭食物wor。罐頭內用Raspberry Vinegar調味既蟹肉，講真食落係甜，不過似乎唔係蟹肉既鮮甜味，而係喧賓奪主既Raspberry味，糟蹋左Ｄ蟹肉！

Not Your Everday Caprésé，USD 12：小弟唔係一個芝士或蕃茄客，所以好難客觀地對依道菜評審。唯一覺得特別既係相中白色既波波原來係Mozzarella芝士薄層包住液體Mozzarella芝士既芝士水蛋，入口就滑嘟嘟，不過好快就穿到成口都係水，所以要好小心，合埋個口食；味道好芝士囉。

American Caviar Cone，USD 9/pc：冇乜功夫，只係放Ｄ魚子醬入個迷你甜筒入面，客人一口可以食哂，清脆利落。

Gazpacho New Way，USD 9：Gazpacho係涷飲既西班牙雜菜湯，但經大廚分解後再重組，主材蕃茄湯竟然變成透明既蕃茄味啫喱，酸酸甜甜既彩色雜菜粒就用黎拌碟。味道雖然唔係每個人都可以接受倒，不過淨係聽哥哥仔講解都已經係一種享受！

Papas Canarias，USD 8：另一傳統tapas，源自西班牙加那利群島，話說當地人係用海水煲乾Ｄ薯仔，直到薯仔皮皺哂紋，皮上結左層鹽喺面，再點mojo汁食既。好可惜，因為實在係太咸啦，全枱人都好反感；表弟話齋，再動聽既故仔都比Ｄ鹽沖洗哂！

Tuna Ceviche & Avocado Roll，USD 16：加插左日式料理去造出份Ceviche，西菜和食，幾有意思。利用Avocado卷住吞拿魚同其他配料，好似食緊一件冇飯既薄餅壽司咁。好彩層椰汁忌廉唔會太濃，所以整體能夠保持香滑清甜。

Tomato Watermelon Skewers，USD 2/pc：每串涷涷既蕃茄西瓜塊係就係好爽口，不過酸酸甜甜，個組合有少少奇怪囉。

Jicama Wrapped Guacamolé，USD 2/pc：賣相好靚，食落香脆，感覺好似墨西哥taco，越南春卷，同餃子既混合體咁。

Norwegian Lobster，USD 15/person：細細塊，輕輕燒過既龍蝦肉，鮮甜爽嫩，配上一細杯味道濃郁既龍蝦精華液，食完一口，再飲一淡，正到唔係好夠口！

Sea Urchin Pipirrana，USD 14：海膽個樣好得，食落都好嫩滑，只係底下嗰Ｄ菜太過咸，咸味重滲入同搶走左海膽既鮮甜味，「口徒」料！

Japanese Grilled Eel Taco，USD 10 per 3 pc

Sauteéed Shrimp，USD 14：蒜味香濃，不過醃得過火，所以好咸，而且Ｄ蝦肉過熟，煮到又老又嚡又霉，咁簡單既一味搞到咁失敗，唔扣分唔得！

King Crab Sandwich，USD 6/pc：用中式既迷你饅頭，夾住蟹肉碎同Pickle，身為中國人既小弟唔多likE囉；Pickle太刺激，奪左蟹肉既味道，個包又乾，失敗！

Seared Redfish，USD 14：碟上用黑蒜畫成既畫筆痕好有藝術感。魚肉嫩滑，面層帶脆，蒜味唔算濃，反而有陣意想不到既炭燒煙味，非常香口，送酒一流。

Oxtail Sandwich，USD 4/pc：第一款蟹肉三文治已經唔係好掂，點知依件重衰，個牛尾又乾又嚡，重咸到我地儍左，食完要狂飲水解返，！

Seared Piquillo Peppers, Capriola Farm Goat Cheese，USD 11：對本身唔係好食芝士既XO仔，Goat Cheese個蘇味同咸味實在係太強烈啦，真係細嚐唔倒！

Seared Mary’s Farm Chicken，USD 11：話說，雞肉經真空煮熟，以確保肉質嫩滑多汁，但唔知點解，食落肉質竟然有少少嚡。拌碟既蜜棗本身好甜，蜜棗上既魚子醬芥辣雖然亦好特別，不過兩溝就奇奇怪怪咁，反而如果調配魚子醬芥辣放喺雞肉面呢，成個應該會唔同哂！

Grilled Beef Hanger Steak，USD 12：三成熟既牛扒，肉質軟腍，味道冇乜特別，加上完全冇分子料理既元素，所以頗為失望。

Croquetas de pollo，USD 10：招牌菜之一既炸雞絲薯仔卷，每客都係用隻Nike鞋上既。冇錯，上枱時係好震撼，成功地謀殺不少菲林，不過雖然個皮夠脆，但係層炸粉太厚，入面個醬味道又比較咸，而且太creamy，所以好溜。

Baby Japanese Peaches, Di Stefano Burrata，USD 18：BB桃好甜，不過同碟中一大pat既芝士好似唔係好夾囉。

Cotton Candy Duck Liver，USD 5/pc：姨姨極力推薦既一味。鴨肝就咁食味道會較濃同溜，所以西餐多數會跟甜生果一齊上去舒緩返；大廚諗倒用入口即溶既棉花糖，包住一細塊既鴨肝，去製造依個舒緩味覺既效果，可以話係創意無限！不但口感獨特，而係非常美觀，新潮得黎重好懷舊，食到大家都拍爛手掌！超級必吃推介！

Philly Cheesesteak，USD 8/pc：同小弟讀書時候食嗰Ｄ好唔同，因為完全唔油膩，又唔會滯住滯住。迷你欖球形既空心麵包皮層好脆薄，咬落以為自己食緊空氣咁，唔講真係唔知入面隱藏住淡薄既芝士溶！面層舖左四片輕輕燒過既和牛，唯獨唔係好夠味，不過大家不妨叫黎試下個質感。

咁多款既Tapas，食材同煮法都好廣泛，真係好難會樣樣都啱哂全部人既口味，不過依餐飯勝在夠潮，夠多花臣，又多故仔聽，包羅萬有。總括黎講，可以話係一個非常之好既體驗呀！

一入Shin-sen-gumi（漢字為「新撰組」，據說係日本以前一個武士組織個名）個門口就見倒兩位師傅企左喺左手邊既炭爐旁準備為客人燒野食。餐廳座位唔算多，大概坐倒三十人。顧客可以選擇坐近炭爐既位置既，不過個人覺得太煙同太熱啦。散枱就比較迫，坐到密麻麻，但亦因此氣氛變得非常熱鬧。

服務生大部份都係好夠中氣既後生仔女，雖然髮形同髮色都好前衛，不過態度絕對友善，而且超級落力。佢地成晚都喺度互相用日文大聲溝通，識少少扮代表既XO仔只聽得出有時佢地喺度歡迎客人，有時感謝顧客落單，其他就… 全晚最high既時刻就係當熟客既舅父請大家飲啤酒時，佢地會好有禮貌地行黎我地張枱前面一齊乾杯，大叫多謝，然後行個鞠躬禮。

一間食客多到要成日排隊既餐廳，食材自然用得快，所以差唔多日日有貨黎，擔保新鮮。Shin-sen-gumi既串燒全部都係用炭爐燒，可以話係Ichiban中既Ichiban！雖然餐廳室內既燒肉味道比較濃烈（一Ｄ都冇誇張架：喺依度食完飯，返到屋企一定要沖涼洗頭兼洗衫！），不過因為師傅不斷喺度睇火，撥扇，先之可以保證食物唔會出現「外熱內涷」或者「外熟內生」既情況。

個爐咁近，食物上枱時夠哂熱辣辣，爸爸勁讚。師傅喺大部份既串燒面都輕輕搽左層甜甜既燒汁，好啱我地屋企人口味。哥哥仔好有心機地教我地用餐廳秘製既Yuzu Kosho（柚子青椒醬）點Ｄ串燒食；雖則好有特色，不過在下覺得個醬有少少喧賓奪主，所以唔係每樣串燒都適合點。我地全部人對當晚既食物都非常滿意，而家就等小弟推介一下啦：

串燒雞腎（每串USD 1.95）：爽口得黎唔乾，而且比香港食倒既大粒。

串燒雞肝（每串USD 1.95）：都係好大隻，咬落好軟熟，同最重要係一Ｄ都唔乾同唔粉。

串燒雞丸（每串USD 2）：「賣飛佛」之一；肉質幼嫩，又夠肉汁，加上甜甜既燒汁，無得彈呀！

串燒雞翼（每串USD 2）：燒雞翼其實好考耐性既，因為好容易燒燶左層皮而內部既肉都未係全熟得哂。師傅既手勢真係一流，能夠做出皮脆，肉嫩，多汁，真係拍爛手掌呀。

串燒雞軟骨（每串USD 1.95）：埋到位重聽倒Ｄ吱吱聲既油聲，好high！雞軟骨非常香脆。師傅只係用左鹽黎調味，所以就點左哥仔介紹既柚子青椒醬，mmm… 味道更覺清香醒胃。

串燒豬五花（每串USD 1.95）：聽落好似好唔健康，不過食完包你讚；大家諗下呀 ~ 連怕肥同怕油既媽咪都要encore，可想而知好味程度好成點啦！因為用炭爐慢慢燒，其實好多肥膏已經溶解哂，所以入口唔會覺得成口油。再者，應該就係依Ｄ肥膏先可以令到串豬肉咁香嫩。

串燒牛脷（每串USD 2.35）：牛脷厚度適中，爽滑香口。

Soboro Don（細碗USD 3；大碗USD 6）：家中有幾位都係冇飯不歡既，所以我地就叫左碗招牌雞飯食。飯面既雞肉碎同串燒雞肉丸既味道差唔多，都係咁嫩同帶Ｄ甜味既，超級受小朋友歡迎。

後記：

1)      唔記得左邊個食家曾經講過，一間餐館既衛生分唔可以單靠餐桌同樓面既清潔程度，一定要睇埋個洗手間，因為負責處理食物既廚師都要用架嘛。其實日本人經營既餐廳都已經係一個信心既保證；小弟用既洗手間係男女共用既，真係好大好乾淨，而且抽氣好勁，唔讚唔得！

2)      睇睇卡片背面先知道Shin-sen-Gumi喺加州有成十間分店，當中有麵店，串燒店，同火鍋店，真係唔講得笑。

Il Chianti柔和既燈光同歐陸色既裝修其實好有情調，非常適合情侶拍拖。如果大家想享受加州咁好既天氣，更加可以選擇餐廳既露天位置。

我地幫襯嗰晚餐廳滿座，所以哥哥仔同姐姐仔忙到唔係好應付得黎，而且重有少少唔係好友善添；不過日本人幾唔友善都唔會太過份既。

Negitoro, Green Onions Sauce & Tuna（USD 8.60）：吞拿魚生甜甜地，好好味。碟上既麵包好軟，不過麵包皮就有Ｄ韌。

Sashimi of the Day – Red Snapper（USD 5.80）：叫得當日精選，應該唔會差得去邊掛；好可惜，魚肉又嚡又韌，而且個汁實在係太濃烈啦，搞到碟魚生一Ｄ都冇魚鮮味。失望！

Uni Pasta Fettuccine（USD 16.50）：寫喺牆上黑板上既Chianti Special Menu度。依款日意混血兒creamy得黎算light，所以完全唔溜。海膽份量唔多，只係有兩件喺面。整體味道帶甜，唯一問題係唔夠熱。

Garlic Soup “Rome Style”（USD 5.30）：非常有特色既一個湯，大家有機會一定要試下。相中既一舊舊好似椰菜花既其實係蛋白同蒜蓉既混合體；質感好似椰菜花咁爽脆，味道好夠蒜，但係因為溝左蛋白，所以絕對唔咸唔攻鼻，好精彩！

Long Sausage（USD 9.80）：雖然冇乜煙，不過小心熱；小弟都辣親條脷。修長既一條腸好爽口，胡椒味好勁，未必個個啱feel，不過I like！

Meat Sauce Spaghetti（Medium @ USD 10.30; Large @ USD 16.10）：甜甜酸酸，又少肉，唔掂！

Aglio Olio & Peperoncini Spaghetti（Medium @ USD 9.80; Large @ USD 15.50）：三款意粉中最好食。彈牙既麵條夠熱，唔油膩，少辣，又有蒜香，好清新既一味。

Garlic Clams（USD 8.40）：Ｄ蜆又肥又多汁，最緊要係冇沙；蒜味夠得黎重食倒蜆既甜味，讚！

Garlic Saute Free Range Chicken (USD 14): 唔夠熱，又唔夠咸，建議雞肉可以醃耐Ｄ，不吃也吧！