期待已久既一年一度大旅行又出發了，上年去完台北，今次要找個特別的地方我地選擇o左去越南七日六夜﹗

同朋友講去越南佢地都話有咩可能玩到七日咁多，地方又落後又無聊，不過其實如果細心0的去留意下睇下資料，越南有好多值得去的地方，時間許可的話就算玩一個月也不嫌多﹗

15/6/09 - 21/6/09 我同食家就0係越南度過左難忘而驚喜既七天喇﹗

今次係五人出發，可惜我地兩個可以出發的日子就咁岩只係得番兩張機票位，搞到另外三個同行友人要早一天出發﹗

15/6一早起身，搭八點十機出發到越南胡志明市﹗

為了旅行特登買了新的Canon G10相機，性能相當好，色彩又出眾﹗

越南旅行在香港可以找到的書不多，叫做最勁最local就係得呢本長空出版的越南天書，在越南幾天我都見到有香港人拿住佢周圍玩呢﹗

不過可惜同上年去台北一樣，呢本長空出版既天書真係麻麻地﹗地圖不詳盡又唔依scale畫，真係跟住佢就死得咁濟﹗

上網找越南資料，成日都有0的人俾的士兜路，搞到我地出發前都好緊張﹗

好在我地都做好準備，搵哂所有的士公司既資料，最後七天既行程一次都無俾的士兜過，因為我地只係座呢隻Mailinh的士，司機老實又有禮貌，仲成日幫我地搬行理添，去越南記住要搵佢地﹗

胡志明住的酒店是Palace Hotel，都幾企理又乾淨，不過最衰係房入面無Wifi﹗

到左酒店放低行理之後我地先去豪食一間法國餐﹗越南曾被法國統治，所以法國餐做得相當好，有些更達米芝蓮級數呢﹗

地點係Au Manoir De Khai﹗可能是星期一的關係，全場無人得我地一枱客，變相包場，之前仲怕會無位添﹗

環境很好很grand，柔和的燈光映襯著淡淡的燭火，增添好幾分的浪漫感覺﹗

不過呢度以越南物價來說價錢絕不便宜，本來上網睇佢有set lunch的，點知來到之後佢竟然話無，頓時大失預算﹗

點都好啦，一場來到都係要食，最多食少0的﹗不過酒就當然不可以不飲啦﹗先來支紅酒先﹗

我要了肉眼牛扒，肉質嫩滑燒得岩岩好，肉汁又夠多夠香濃，洋蔥汁是大量洋蔥碎切成，相當惹味。

食家的羊仔架，燒烤時間恰到好處，不過佢話羊味麻麻地，唔夠羶吃落不太似羊﹗

找數要俾美金的，一人大約要USD 45左右，吃法國餐當然不算很貴，不過佢無左午餐網上又唔update，搞到只係叫得個main course，有點失望﹗

吃完午飯今天的行程是市內遊覽﹗

胡志明市天氣又焗又熱，咁岩我又著住長褲真係十分難受，真係條紙底褲都溶咁濟，第一個景點是統一宮﹗

統一宮是以前的總督府，入面都係0的辦公室、會客室及睡房等，未算十分美輪美奐，卻最重要的是沒有冷氣，如六月你可以行佢一次而不流汗的話，我請食飯﹗

入面熱得我差點暈倒..........

聖母大教堂就在統一宮的附近，徒步也可行過去﹗

越南的建築就是如此風味，唔好話教堂，成街的屋間間也是不一樣的建築，只是觀察下也覺過癮﹗

教堂有特色的彩繪玻璃，裝修華麗而莊嚴，如到統一宮必遊﹗

最後是有超過一百年歷史的中央郵局﹗就咁睇已被佢充滿法國味道的外觀吸引﹗相機快門聲不絕於耳﹗

入面可以買0的明信片寫完之後寄番香港，我由於太熱關係只係識得飲水降溫，一個個郵信磅郵包的counter都迫滿當地人與遊客，老實說寄信呢樣野對我來說都相當之陌生，我估都有幾十年無寄過了﹗

行完三個景點已經熱到發慌，全身無一處係唔出汗，所以即時飛的返酒店飲杯啤酒再沖涼休息。

越南食市的啤酒不會太貴，計起港幣都係幾蚊一罐或一支，水又係五蚊啤酒又五蚊，當然係飲啤酒啦﹗所以我地都係飲啤酒多過飲水的﹗

夜晚再出發，今次地點係酒店附近檳城市場旁的夜市﹗

本來想去一間網友推介的燒海鮮店，點知突然下起雨來，找來找去也找不到下只有揀間最多人食既飯﹗

要說越南天天都落雨，不過天天都騎騎呢呢就一落就落半個鐘就算，睇你好唔好彩撞正出街時份，但就我呢七天觀察通常都是黃昏下雨最多﹗

最特色既就係呢個椰青火焰蝦，上枱先0係你面前用火燒熟0的蝦，之後再由美麗既女待應幫手剝殼將0的蝦肉放番入個椰青度再燒熱佢食，食落有陣陣椰子清甜，幾得意的。

越南的扇貝去到那兒吃都是十分細隻的，同香港的大大粒相差很遠﹗

呢條勁喇，叫做象魚，Elephant Fish，在越南好多地方都有得食亦相當出名，總之就係成兩個人頭咁大一條，成條炸脆佢上碟，最後大家差0的連個頭都想食埋佢﹗

幾樣海鮮又點會滿足到我，食完好似無食過野咁，我地再去呢間食牛河﹗Pho 2000，當年克林頓都來食架﹗(不過睇書話我知克林頓其實係食雞河的........ )

越南最出名應該是牛河了吧，這是我在這兒的第一碗牛河呢﹗

湯底清而味濃，牛肉不韌而香，我最鍾意佢那種河粉的質地，o鞋o鞋地的有嚼感同香港吃的完全不同，上面加上蔥花、芽菜、辣椒及檸汁等，超好味，比香港吃到的好十倍以上。

普普通通一間連鎖店已有咁既水準，我相信之後再吃的一定更加好呢﹗

食完牛河當然唔會咁早返屋企啦﹗我地去左范五老既Seventeen酒吧飲野，呢間擺到明是做遊客生意的了，生啤成$40杯，以當地價錢來說相當貴﹗

場內有Live Band演出，相當嘈吵唔係太岩我地，想傾下計都難﹗

飲完杯野睇埋巴西岩岩好贏埃及4:3後，便回家呼呼大睡，這是我們越南之旅的第一天﹗

第二天一早起身我地就搭的士去胡志明第五郡的Pho Bo Bun Mang食個牛河早餐﹗

呢間野係睇新假期見到的﹗在地踎街市內，湯底係老婆婆用牛骨牛腩煲成十二個鐘而成﹗

吃落已知是誠意之作，湯底極之濃甜，陣陣骨鮮香，牛肉半生熟帶點韌卻牛味濃郁，河粉同Pho 2000是接近，不過湯底決勝始終阿婆呢度技高幾籌，抵我地咁遠水路來吃﹗

吃完是不口渴的，可知一二﹗

門口見到有法包賣，我地當然唔放過啦﹗

一萬盾一個，即大約五蚊港幣，估不到在街邊也可吃到香脆軟熟的麵包，入面用料豐富有肉片、扎肉、似芫茜的香菜、青瓜、酸肉，再加0的又辣又甜既獨特醬汁，食落相當惹味，一試難忘呢﹗

之後幾日我地都周圍搵法包來吃，不過仍是覺得呢個街市門口的最好味﹗

食完包我地出發去番酒店附近搭船去頭頓﹗船程個半小時﹗

是日天色明媚，想說很好彩地我地連續七天行程都沒有被雨水打擾﹗天公做美呢﹗

是次旅行來越南好大原因係因為頭頓的這個耶穌山，早於兩年前我已被網友及旅遊書上這頭頓標誌所吸引﹗

大家見不見到？山上的那個細細粒就是我們的終點﹗

上耶穌山要上成千級樓梯，平日無耐性又怕熱的我就一定嘈嘈閉，不過去到旅行，熱是預了的，汗也是沒有白流的，所以一口氣衝衝衝，登山而去﹗

沿途有很多聖誕人物出現﹗

我終於都到了，食家這張相拍得相當好，我與耶穌像天人合一﹗我俾一百分﹗

眼前的耶穌像十分宏偉，真的不枉此行﹗

我仲行左上耶穌像入面走上佢既像既肩膀，可惜的是食家著了短褲被門口的看更阿叔話佢不莊重唔得去﹗唔係就可以一齊觀看頭頓的美麗景色﹗

男人著短褲就得，女的就唔得，咁熱點會著長褲呀大佬﹗﹗不公平呢﹗

大家睇下﹗美景盡入眼簾，估不到頭頓這小小的地方從高處向下望如此醒神﹗

行到身水身汗，當然醫肚餓，我地行番落山向碼頭行十分鐘去左一間叫Lan Rung Resort既餐廳食lunch﹗

食物就一般喇，不過環境一百分，0的位全部對住個海，仲要有，當然要番杯啤酒品一品嚐，黑啤最能帶出那巨浪捲起千埋雪的滄桑﹗

最好食是係呢個蝦春卷，炸得恰到好處又香又脆﹗

食完野搭番船番市區，個個一上船就瞓到落船，行左成日真係累得要命﹗

回酒店裝一裝身，夜晚又再出發，呢晚我地去左網友介紹既一間燒肉店，叫做陳美，Quan Chan May﹗

地點在機場0個面，從第一郡搭去都幾鬼遠，不過點都值得，因為呢餐是我地一行五人吃得最開心的一餐﹗

來越南一定要試﹗

呢間野以炭火燒烤為賣點，在胡志明第一郡有好多年歷史，近一兩年先搬左來呢頭﹗

店長叫做阿Tan，見到我地一行五人相當之開心，由於全場只係得佢一個識英文，所以招呼我地呢班遊客既重責就交左俾佢﹗

佢好耐心咁同我地講有咩好野食，仲介紹我地試唔同既菜色﹗

呢度既肉類燒烤做得相當出色，全部都醃得入味又多汁，超好食﹗

最重要一樣野係店長叫0的待應幫我地0係面前燒埋，全日都係食殘廢餐，火喉又掌握得好，十分之嘆﹗

牛同羊唔在講，食家佢地仲試埋羊乳房，佢地話是估不到的爽口同羶香，好好味﹗

我都唔理得咁多試食袋鼠肉同埋鱷魚肉﹗實行一場來到人一世物一世試左先算﹗

不過講到最括出去，都係食蠍子﹗

平日見到蛇虫鼠蟻都咿嘩鬼叫的我，可能飲大兩杯醉醉地，大大聲同阿Tan講來一隻蠍子﹗

呢條係蠍子尾，可怕乎？

就睇同行友人既表情，再加上服待我地既待應哥哥個樣，就知食蠍子是幾可怕的事﹗

最後全團五人分享一隻蠍子，味道有如脆卜卜的瀨尿蝦仲幾香甜，如大家有機會，不坊一試，無介紹錯的﹗

飲飽食醉我地番去市區，唔講你地唔知，原來越南都有賭場的﹗

呢張係偷拍照，賭場全部電子野，有0的似澳門的摩卡，友人用了十五分鐘就贏了二百蚊美金﹗

當時老屈佢請飲野啦﹗

在此謝過﹗

呢個心當然唔係俾佢啦﹗

這就是滿足而充實的越南第二天﹗