酒店有機場接送，二十分鐘就到酒店喇﹗

我地都係睇網上的遊記，揀左呢間在舊城區的TASHKONAK HOTEL﹗

由於早兩個月訂既關係，價錢約$800左右，六月都是土耳其的旺季，即日訂要千幾蚊的呢﹗

酒店很不錯，裝修簡單得黎亦不失貴格，張床好好訓﹗

我地先在這酒店住一天，之後會到BURSA再到卡柏多奇亞﹗最後再回酒店多住兩天﹗

由於當日有房剩，酒店幫我地UPGRADE左去FAMILY ROOM，有個小露台可以看到海的呢﹗好正啊﹗

沖個涼刷個牙就出發喇﹗

呢個酒店有樣好，就係行五分鐘就可以去到藍廟亦即是市中心，十分方便﹗

先行一行酒店附迎的ARASTA BAZAAR先﹗

兩旁都係商店，應該是呃遊客的商店，無咩好睇，叫做了解下當地有咩好買﹗

之後我地唔睇地圖亂咁行，至在認識一下酒店附近的路﹗

舊城區其實盡大部份地方都係可以就係用腳行哂，根本無必要搭車，一路行一路睇仲可以見到好多新鮮事物添﹗

其實行來行去最想去兌錢，可惜就搵極都搵唔到，要來要行到地下宮殿出口對面一條街先可以有CHANGE OFFICE，梗係兌番0的洗費啦﹗當日1 EURO 兌  2.17 TL﹗

提提大家，地下宮殿的入口對面有坐西班牙特色的幾層高建築物，那兒是這裡的旅遊警局，入面0的POLICE好鬼NICE﹗

捉住你吹水不特止(佢話去邊到買野響佢個朵有特價﹗)，仲要送埋成堆地圖俾你，份地圖超精確有用，比起你可以買到既旅遊書好用十倍，因佢有土國文字，你在街上問人方便好多﹗記住去攞呀﹗

我不是建議大家去搭這地上鐵，而係叫大家只要留意佢地上既軌道，跟住佢行，自然可以去到遊客們都必到的EMINONU碼頭﹗

我地出名悠閒，最憎就係趕景點，要趕我寧願唔去，梗係食野為先啦﹗

我地去左呢間在街邊的BARBECUE HOUSE﹗

土耳其雖只得3%是歐洲，不過食家話走在街上很有歐國風情，當地的人也很好，不用太擔心會被騙，只要小心多點自己的貴重財物，便可謂萬無一失﹗

唔洗講咁多，飲番杯先﹗土國的EFES啤飲，清純好喝，比青島更妙﹗普通的比黑啤更好﹗

點了個MIXED KEBAB，人人都話土耳其野食唔好食，其實都不是吧﹗

燒雞燒羊燒牛也做得不錯，烤得多汁醃得也好，也許是吃的款式比較少，常吃肉，所以大家也未會愛上吧﹗

貓來了﹗土耳其滿街是貓，食店更是常有貓兒，好心的話餵餵牠們吧﹗

吃完我們的第一餐後，我倆沿著地上鐵路軌走到碼頭﹗

必要試的是開滿街的土其耳雪糕﹗

師傅知道你是遊客必然同你玩番幾十分鐘佢0的雪糕絕技，左飛右飛左拋右拋﹗

3TL 一杯，即$15左右吧﹗

很香很濃，雪糕是煙韌的有o趙口，不得不試，十分過癮，之後差不多每天我也吃一杯呢﹗

其實行二十分鐘左右已到EMINONU碼頭，唔洗搭車的﹗

EMINONU碼頭必試的是什麼？有睇旅遊書的便知是這鯖魚包了﹗

現烤的鯖魚，配上大量蔬菜及洋蔥，惹味鮮濃﹗加點檸檬汁去腥﹗

我不愛吃魚也覺得好好食喎﹗

星期日雖然埃及(香料)市場不開，來到碼頭也可以行行這五分鐘路程景點﹗

到處都有香料及賣乾果的商店喎﹗

就在香料市場前面的耶尼清真寺﹗

每個清真寺門外都有洗手的地方，不少市民在這兒洗面洗手洗腳，由頭洗到尾成身濕哂﹗

裡面也挺宏偉的啊﹗

來到碼頭不得不走走卡拉達橋﹗

橋上數千百人在釣魚，講真不明佢地為咩要全日咁由朝釣到晚，唔通魚穫是賣給食店做魚包的？

這就是從警察處拿到的詳細舊城區地圖﹗

這張是新城區的，如果大家想要高清版的作旅行前準備，不坊在我的網誌留下email，我send給你方便你行新舊城區﹗(其他地方留email絕不回覆)

卡拉達橋頂就作行車，中間一層全是餐廳，全部向住海所以風光十分好﹗

我們在這兒試了第一杯的土其耳茶﹗味道有如紅茶，老實說一點是.....無甚特別﹗

土國人興加糖飲用，講真甜的紅茶，味道很怪的，我就受不了﹗

土國六月日長夜短，這張相是攝於土國晚上八點半了﹗

走走當地最出名的藍廟﹗

是我走過最宏位的清真寺，不同凡響啊﹗

講真土其耳處處是清真寺，雖然每所都有少少不同之處，但其實大同小異，走多兩所，你會發現，沒有什麼分別﹗

由於昨晚睡得不好，所以還是早點回酒店休息，土耳其的啤酒不便宜啊﹗

一罐efes在士多買要3TL，即係香港$15，不過貴還貴，每天我也喝上半打以上，因實在太好喝，由朝飲到晚﹗正.......這就是我在土國的第一天行程了﹗

我的網址:  http://hk.myblog.yahoo.com/smallsmalllin

我的飲食微博: http://t.sina.com.cn/smallsmalllin

酒店包早餐，有新鮮整的omelette同炸腸腸食，好味!唔係處處都有蛋角食架﹗

呢度供應的Yogurt(正中心那PAT)很香很cream，唔知係咪羊奶做但一點也不羶!

至少我食到，應該唔係羊做呱？

[IMG http://a367.yahoofs.com/hkblog/5l1JRDCBHRbgVX91HyHwj7Q_YSfM_54/blog/ap_20110703073041751.jpg?ib_____DdXOy9mgk]

餐廳在酒店最高果層，好風光!

同我地個房既景一樣呢﹗

今天行程是托卡比皇宮，會經過聖蘇亞大教堂。

Istanbul勁多博物館同古蹟，我地不打算行哂...因為根本行唔哂﹗

之前我有講過警察地圖，跟住佢真係好易搵﹗見到呢個門牌就係喇﹗

10am已經好多遊客!全部都係外國人﹗

皇宮貓貓又肥又白!!

這個迪迪尼式的叫"祝福之門"!

親身睇係堅過樂園的好多，城門好厚架﹗好興奮呀，跑住入去...

兩個無票的人直衝入城門被人趕番出來!

原來售票處係城門右面的!記住買左飛先好入場呀﹗

20TL一個人，即係港幣$100入場費!

正宮外的歐亞式的建築，都幾有特色喎﹗

未入正宮前有金碧輝煌的皇陵

每個拱型天花都是藝術品，好老實，之前都睇過藍廟等，十個有九個其實都係差唔多﹗(也許我不懂欣賞藝術)

門外閃閃的外牆是真金架，記住帶刀仔刮佢落黎﹗

終於行到正宮!

展出的龍床同金光閃閃的地毯。

再行入去就是戲肉 (由於嚴禁拍照, 所以無相睇)。 排長龍入藏寶庫，入面有好多超巨型珠寶首飾，手工真係巧奪天工!  仲有多件幾千年歷史的蘇丹皇龍袍。

由於這皇宮無被人侵略過, 而且鄂圖曼帝國真係好有錢， 藏寶量多，保養又一流，真係睇到嘩嘩聲架﹗十分值得睇!(本來$100睇個博物館覺得好貴，睇完珍寶之後就覺得值喇﹗)

叫正宮後面的風景，好風光﹗下面0的屋仔是室外咖啡座來的呀﹗

有時間一定飲番杯﹗可惜要趕行程﹗

蘇丹的庭院，個天幾藍﹗

最後行左兩個幾鐘，收工，返酒店攞行理再出發﹗

之後我地要暫時離開伊斯坦堡喇，因出發去Bursa，由於行程第七日又返來伊斯坦堡，所以在酒店寄存左0的唔用既用品﹗

由酒店座落的Sultanahmet (舊城區)搭的士到Yenkopi 碼頭，只需6TL，HK$ 30!

渡輪目的地是Yalova，15TL，即係HK$75/人頭，1:30pm有船呀﹗

候船室有餐廳，梗係食0的野先啦﹗

見到待應將客人吃剩的麵包餵給海鷗，對比香港要打雀射雀，土耳其人其實幾有愛心的﹗

一邊看海鷗， 一邊開餐。

估唔到呢度既漢堡包好好味，中間的咸乳酪個味道就怪怪的，唔係人人接受!

一個餐兩個人分，再加兩杯土耳奇茶! 合共7TL，HK$ 35!

船程約1小時，吹住海風，恰一恰就到!

下船時不幸地傍沱大雨， 唯有一個人睇行李， 一個人去找巴士!

呢度係無巴士站的，只有兩架旅遊巴停o係到，就在碼頭右面。

如果唔肯定你對住個司機叫BURSA BURSA，佢就會叫你上車的了，不用擔心﹗

如果唔夠客，就會車你去另一個地方轉車﹗(有如香港小巴啦)上左車後，車長會收錢(9TL，HK$45/人)。

由於本地人會先購票mark位， 所以我地這種臨時上車的人有機會坐o左人地個位，到時自己再調位就可以的了。

車程大概75分鐘，都幾鬼遠，越過幾個高山﹗去到的會係BURSA公車總站﹗

搭巴士就應該好平既，不過我地懶得研究，去左搭的士。嘩﹗ 原來都幾遠! 搭左成半個鐘，24TL，HK$120的士。

我地一路以為Bursa是人口稀疏的小鄉鎮，點知原來是一個汽車重鎮! 睇書又話咩Ottoman建築......仲衰過深圳﹗

勁失望! 第一站是要check-in，係booking.com 訂了efehan 酒店 (65歐元一晚)。

張床細到嘔，又舊﹗間房有0的似台灣一樂園......(鬼屋是也...)

外貌更大鑊，牆係崩的，窗又好似裂開....

如果來Bursa建議大家住Kent Hotel， 只係貴二百港元，靚仔好多!

出去行下先，酒店隔離就是市中心的噴水池，認住佢! 因為對面有Tourist Information，可以拎MAP!(又係0個句，要就在Blog留言啦)

經過呢個local 市集 (UZUN CARSI)...

就會到英女皇都探訪過的有頂市集(Kapali Carsi)!

名物係絲巾同毛巾﹗睇過價錢都幾平，平有平買啦，唔係去左第二度會後悔﹗

個人心得係見到鍾意既野，唔洗點格價，其實度度都係一蚊兩蚊，鍾意就買，唔係過左搵唔番一定會後悔﹗

有頂市集的中心庭院，有一個Local茶檔!勁有風味一定要試試﹗

試第一杯Turkish Coffee，濃到爆﹗又多渣!我估香港人唔會鍾意飲﹗右手面的是 Simit 芝麻包 ，脆脆的，好香口，天天吃也不厭!

大家緊記o係土耳奇埋單，千其不要講 "Check Please."

因為茶的土耳奇文是Clay，個音有點似check!! 我地自己奶左兩次野!

叫埋單，點知叫多兩杯茶! 可以說Finish. PAY! 佢地反而會明! (高級地方例外!)

土耳奇人愛食煙，好多女人都是煙民! 就我所見Bursa呢個地方，八成人都吸煙﹗

土耳奇不少女性都是傳統回教徒，會包頭! 就算不包頭，她們都好少著短裙、短褲，背心露心口反而無問題，入鄉隨俗，會玩得開心D!

一眼睇哂呢個地方一個亞洲人都無﹗很有歷奇的感覺!

回再行市集，當地人對我們由頭到腳咁打量! 當我地係怪獸似的﹗我地一向愛成為焦點，當然樂此不疲﹗有小女孩要求同食家合照。

咁岩有當地電視台在拍旅遊特輯，仲捉住我地兩個做訪問添!!!!!!!!!!!!

為香港增光﹗

Efehan 個電梯，回到六十年代! 仆街要自己開門的，工廠區都搵唔到咁舊既建設﹗

不過我想講Efehan的職員個個都好有耐性，教左我地點樣搵車去Goreme﹗就算自己唔識，都上網搵地點地方，呢個真係好抵讚﹗

本來我地初初到埗好憎呢間酒店，慢慢同職員相處後，第二日反而愛上左佢呢﹗

跟職員指示去搵巴士公司，出發無耐已經開始迷路!仆街了﹗

Bursa令我地改觀的其中一個原因係，只要你拿著地圖在街左望右望，當地人便會上前協助﹗當地人相當之有心亦友善﹗

先後有兩個BURSA朋友幫助，我地終於都找到........

這個三角形商場Zafer Plaza地標! 巴士公司Metro agent 就係對面!

地圖都以此物為市中心，見到記住認佢既方向呀﹗

終於都買到巴士票了! 放心哂! 不過我想講，Bursa去Goreme搭巴士要50TL，HK$250一個人，勁貴﹗如非必要都唔好咁行喇﹗

跟手諗住問個職員點去食飯的海鮮街，好心的土耳奇人又來了! 排我地後面的一家人，不單沒有覺得我地問長問短煩，仲主動要帶我們去!

唔係指路，而係親身行十分鐘，帶我地去到飯店，真係唔知點多謝佢地好﹗

只有說句，因你們友善待客，我地「愛上Bursa」了﹗

呢條街成街都係餐廳! 全部坐街邊最好FEEL!

這店是網友好介紹: Arap Şükrü Sokağı  餐廳 (街名: Sakarya Cad. )，在Google會search到的﹗

土耳奇餐廳興成盤前菜，成盤隊哂俾你揀!

睇旅遊書已經好想試的當地特產美酒Raki，今日終於有緣試試﹗

45度的酒加冰水飲，會變成奶白色，味哽又白色，所以Raki又叫獅子奶!

味道濃烈，有陣陣薄荷香，小試無坊，多喝必醉﹗

呢個Salted Tuna 前菜中是最貴的了，15TL，HK$75，好好味!

另外叫左田園沙律﹗好田園﹗

土耳其的六月中，日長夜短，夜晚九點都未黑，街上去有樂師賣藝，奏出節奏明快的土耳其傳統音樂!

佢地勁落力都玩左起碼半個鐘，見到當地人打賞了20TL，HK$100給他們呢!

我地坐附近可以免費享受﹗正﹗我已經醉到跟住音樂在街上翩翩起舞﹗

燒魚都幾好食，有黃油火候又不錯!

食物都是次要，係RAKI、音樂同氣氛已令我地Natural High!

埋單送個靚靚果盤，埋單TL100 (HK$500)﹗

抵食又好玩，呢度氣氛真係好好，凡來Bursa，記住來呢條街試試﹗包你滿意﹗

其實呢晚醉了，要食家扶我返酒店，唔知發生咩事﹗

這就是我們土耳其的第二天....(待續)

(呢篇Day Two遊記係食家出手寫架，大家比0的支持啦﹗謝謝﹗)

食評集結: http://smallsmalllin.openrice.com/

facebook齊齊飲飲食食: facebook.com/smallsmalllin 

我的飲食微博: http://t.sina.com.cn/smallsmalllin

每天朝早都會食酒店的早餐。

呢間鬼酒店的餐廳又真係估佢唔到﹗環境很不錯，全白的布置舒服而清新。

餐廳望出去可以見到布爾薩是一個山城，風景都不錯架﹗

如果有時間既可以搭一個鐘頭巴士可以到郊外，冬天有得滑雪﹗我地梗係無咁多時間啦，都係在市區到處玩玩算了﹗

早餐沒有伊斯坦堡的多選擇，無熱食!  好在麵包十分新鮮﹗

要一提就係土耳其去邊到食飯都有，必有一大籃免費麵包供應，高級餐廳多是焗脆了的多士，沾上酸酸甜甜的乳酪幾好味架﹗ 所以唔洗叫咁多野食，重點一兩樣隊埋麵包已會飽了﹗

食飽飽，先去Information攞左張地圖﹗

再行下市中心的清真寺建築群! 唔駛特別搵，是旦入一間﹗

呢度0的清真寺絕大部份都開放的，可以望入去無咩人，不過只要跟番門口規矩，入去靜少少，無有怕﹗

呢間比較的骰，有種簡約的感覺﹗細細地反而幾過癮﹗

我地知Bursa是皮影戲發源地，見地圖有公仔指引，就膽粗粗問人睇下點去博物館喇﹗

講真完全唔識點樣去，好傍徨! 唯有向一位小妹妹求助。原來她自己都不太熟路，正路諗住再問其他人啦，點知佢好主動的幫我地問下其他途人，又打電話問朋友。

最後她問完之索性帶我地去巴士站，原來搭巴士要去小食亭買票，無人帶真係鬼知咩﹗

又出路遇貴人，再一次證明布爾薩人的好客之道﹗

小恩人幫我地買埋票﹗真係感激說話千百句﹗點知佢仲係放心唔落，陪埋我地等十分鐘巴士!

她仲專登叫多一個朋友來，我地一齊傾計又合照，原來她是剛畢業的大學生，呢個大學生好有前途，將來必飛黃騰達。

巴士到了，她仲交帶車長教我地落車，等我地可以安心上路

雖然天氣好熱，不過由於受到殷勤接待，心情總之充滿愉快﹗

過左幾個站，完全唔識英文既車長又示意我地坐前o的，方便照顧﹗

在市中心搭二十分鐘巴士左右就到了﹗

博物館就在巴士站對面﹗係咪好得意呢？

呢個博物館好多學校來參觀﹗幸好今日人影都唔多隻，我地可以周圍行周圍影﹗

展品充滿童真，岩哂我地兩個大細路﹗不過唔係講笑，真係整得好靚﹗

公仔既衫、配件、樣貌以至頭髮，都真係詡詡如生架﹗

有好多木偶睇﹗每個角色都有分明的性格架! 場館內有英文，唔識英文既我都好易睇得明，係咁易講講皮影戲的來由啦:  

原來相傳當年有兩個建築工人好叻搞GAG，搞到成班工友掛住笑，拖慢了建清真寺的工程，蘇丹王火滾就下令斬撚o左佢兩個個頭!

後來有個臣子睇得出蘇丹王心生後悔，無人搞gag悶q死，於是整將呢兩個死人既特點化為皮影公仔來氹番皇帝........可歌可泣了吧﹗

呢兩個就係主角 - 搞笑工友，仲有我的倒影，呵呵﹗

一個醒一個蠢﹗

皮影戲有時會加入妖精角色，呢個有波波男與女，送俾大家﹗

今次可以清楚一點見到兩個主角﹗館的底層也會有LIVE 皮影戲表演的，我地夾唔岩時間睇SHOW，不過都睇到佢地rehersal﹗幾過癮架﹗

參觀完博物館，我地見頭先在巴士經過一個十分大的公園，綠草如茵似的，就去悠閒下﹗順便搵野食﹗

搭的士到公園入口，原來叫Kultur Park，睇地圖一定見到，我十萬個建議大家來行下，唔食飯都飲杯野﹗

公園旁邊係布爾薩球會主場，出發去土耳其前我都有睇呢度超級聯賽完左未，如果未就入場睇下波，可惜...............

當地人在噴水池踏水上單車，好寫意呀﹗

地圖中心綠色部份就是Kultur Park了!

呢張就係information俾我地的布爾薩地圖﹗一定比所有坊間書藉清楚及詳盡﹗有興趣去Bursa的朋友就在Blog留言啦﹗

由於太舒服，天氣好又有涼風送，唔覺唔覺在樹蔭下飲了四支大啤，醉醉地個店長無端端隊左碟薯條俾我地!唔通醉到斷左片叫左都唔知？明明唔想食野架﹗

呢0的戶外餐廳飲支啤酒大約$35港紙左右啦﹗

呢個公園有好多型格餐廳，不過要飲酒就最好在門外先問問，不是間間都賣酒的﹗

九成露天，在樹蔭下進餐傾計真係人生一大樂事﹗

飲飽食醉都成兩點幾，打的返市中心再行下先﹗

係有頂市集的庭院食肆養了一竇兔仔。

見到小動物就令食家憶起大狗........

係呢度買野，舒服過係超多遊客的伊斯坦堡大市集很多!

至少人少0的，價錢亦都平0的﹗

有頂市集旁就是大清真寺。

成六百年歷史﹗唔係唔睇嘛？

入清真寺要除鞋，回教徒會洗乾淨對腳先入去﹗

不過太多觀光客不洗腳(包括我地自己) ! 搞到寺內充斥著腳臭味!!!!呢股濃郁的鹹魚味十分醒神!你唔會想留好耐，五分鐘內你必會想走﹗

女人就記得入寺前要包頭啊! 食家試過唔包，入場俾職員捉到鬧左一陣﹗

布爾薩民風淳樸，在這兒的清真寺可以見到回教徒的虔誠，這是在別的地方少有的﹗

寺中心有一個噴水池，是大清真寺的特色!

呢家人一齊唸經﹗

Bursa 除左多清真寺，仲係香港見慣旋轉肉柱式Kebab的發源地!

無理由唔試﹗試了這間Bursa Kebab，就在有頂大市集內﹗行行下會見到﹗

土耳奇人愛飲湯，這個是雞湯，味道酸酸的，醒胃﹗

原來Kebab係咁既樣，唔會好似香港咁包成一碌﹗

牛肉味濃郁﹗土耳奇人十分重口味! 醬汁是茄汁加辣味，幾惹味﹗不呢個餐唔平，成17TL，$75﹗

呢度有樣唔多好，就係去公廁要收錢﹗價錢由0.5TL至1TL不等，即係計起成$5一督尿﹗

我地兩個成日飲啤酒，屬於腎虧尿頻一族，一個鐘痾兩次成$10，痾到破產!

大宅(Balibey Inn)是當時第一棟三層建築，依家活化左做商場，

有書店、cafe和紋身攤檔。沿住大宅的背後行上山就會到下一個景點，古城牆。

波斯人、羅馬人都用過的護城牆，而家真係得番塊牆，影下相都幾得意既﹗

過左呢度兩千年歷史的城門，向右去...

四處都是這種黃屋仔!

o拿o拿o拿呢0的就係otoman建築喇﹗來Bursa好多人都係為左睇佢﹗

山頂上有一個鐘樓

呢D大炮係仲用得架﹗過時過節就會鳴炮!

我地0係澳門睇得多啦，對呢0的炮無咩興趣﹗

山頂上有個cafe景觀極佳，大家可以坐下﹗Bursa 的建築仲密過香港呢﹗ 

而家仲有不少地方起近高樓大厦!

遊客區先有cappuccino 飲!

Tea完行番落山，之前都提過，土耳奇成8點先開始日落，時間好似好好洗咁!

落山時，從另一角度來看三層的Balibey Inn，又係可以來飲野的好地方﹗

地點在尋日介紹過的三角形商場對面﹗

成身汗﹗唔想再行，當然是happy hour的好時候﹗

記得早餐時酒店的餐廳幾好坐，所以諗住返去坐。

原來餐廳上仲有露台，我地就係呢度寫遊記﹗

寫寫下遊記，食家瓜瓜嘈，原來有巨型彩虹出現呀﹗

天然而成既彩虹我地都係第一次見，呢個旅程真係好神奇!

本來我地對呢間酒店彈多過讚，不過由大堂熱心幫我地，到見到餐廳幾靚，再加上有呢個天台既酒廊及睇到彩虹，我地既怨氣慢慢由100減至0了﹗

行下行下，盪失路添﹗話之佢繼續行，最多唔識返酒店搭的士吧﹗

咁岩得咁橋就俾我地撞到呢間寵物店!

超級市場的又太大包，今次成功買到2 TL(HK$10) 一包仔!

土耳其既貓仔有福了!

盪盪下，來到一個街市! 見識到好多古怪的食材! 都不知是生果定係菜!

由於愛吃，我最鍾意行下街市，睇下有咩特別既食物，本來我地兩個打算參加土耳其既煮飯仔tour，不過格過價最平要成$500一個人玩半日，覺得太貴還是放棄了﹗

搵飯開，最後我地搵左間地踎既local場，坐櫈仔好過癮，就在我地酒店旁一分鐘路程﹗食物味道不比大餐廳差呢﹗

呢0的小店見有遊客出現都好奇怪，始終應是做當地人生意，對我地好禮貌，雖然完全唔識英文，不過用下身體語言都可以溝通到既﹗炭燒雞肉同羊肉!

香噴噴﹗即叫即燒架﹗

呢間地茂仲好食過LUNCH 那間Bursa Kebab!

雞肉串燒燒工一流! 皮脆肉嫩! 微辣的香料帶出雞的鮮味!

難得配菜都醃得好岩我地口味! 成碟一掃光!

由於店員不會英文，於是點菜時，食家唯有用美麗的肢體作溝通工具:

食家:       Kebab! [之後用手在頭上扮牛角，想叫牛肉卡巴]

店員:      Mooooooooooooooooo...moo...[點頭，好似明，發出一陣吼叫，唔知Moo咩撚野.....)

食家與店員:   Yeah, yeah, yeah, yeah!

以為成功叫到牛啦，點知...

仆街，原來Mooooooooooooooooo既聲係羊聲﹗有冇見過羊架？

明明羊係叫 :「咩咩咩咩咩咩咩咩咩」，唔通土耳其羊「momo」叫？

羊我完全唔食，呢次食家笑了，成件食哂......(我估土國都叫錯左三幾次由牛變羊，食家話以後都唔再食羊﹗) 

呢個貌似C朗的店員好搞野，就係話羊momo叫那位仁兄!條友服務就無乜，勝在笑容可掬﹗開可樂仲要搞到我一身都係!

埋單時佢請飲茶，又俾左一碟香口用的肉桂乾我地試下，放幾粒落茶到，又真係幾香!

臨走時佢又倒D野落我地隻手到，再示範拍下落塊面同頸到，

Woo... So Refreshing! 原來係花露水! 決定要買黎做紀念品!

呢餐埋單TL 15 (HK$85)，又好食又好玩，仲平到笑添﹗介紹俾來布爾薩的朋友

回酒店執行理，知道要離開這友善之城，未來仲要唔知有冇機會再來，我同食家都有少少唔捨得的

由酒店坐的士去Bursa Terminal，要TL26 (HK$130)，其實由酒店出發，大可叫酒店幫你叫的士，我試過好幾次，完全無兜路既問題出現。

的士大佬唔識英文，只識德文! 沿途嘰哩咕嚕，唔知佢講咩，佢又當我地明喎，又講又講，都話布爾薩人真係友善架啦﹗指住D車廠叫我地睇，應該是Bursa的重要工業掛...

佢問我地攞車票睇，落車幫手拎行李，帶埋我地去正確的候車處，重要唔想收TIPS﹗

再見了人情味滿瀉的布爾薩﹗如第時再有機會去土耳其，會再來多住幾天的﹗

巴士十點左右準時開出，有電視睇，有headset、野飲同小食派發。

我強烈建議，如非必要，真係唔好搭夜巴，一來唔平得好多，二來真係無咩可能訓得著﹗土耳其人唔q洗訓，成晚開大個電視仔，搞到照住我地隻眼﹗

有條仆街仲要0係度成晚播音樂，開大喇叭，九成九係聾既，嘈q住哂﹔再加上每兩小時左右巴士就會駛入車站俾你痾尿同俾車長休息，又停又開廣播，訓左等如無訓。

我全程Tee加短褲，本來都無咩野，不過當一接近卡柏多奇亞後，晚上的氣溫由22度跌到13度，凍到我發哂茅，六月中都咁凍，大家記住帶外套呀﹗

呢12個鐘慘喇......眼光光，訓三個字醒一醒，落車痾尿又要收錢，痾左廿幾三十蚊......

這就是我們的土耳其第三天旅程了........................

(見上篇反應好食家再出手，呢篇Day Three遊記係食家出手寫架，大家再比0的支持啦﹗謝謝﹗)

食評集結: http://smallsmalllin.openrice.com/

facebook齊齊飲飲食食: facebook.com/smallsmalllin 

我的飲食微博: http://t.sina.com.cn/smallsmalllin