每次黎西門町，都一定會黎飲楊桃冰或湯。
兩者都試過。但本人就覺得楊桃湯較好飲。
第一，就係唔洗咁凍，又唔洗食咁多冰落肚。
第二，味道會比較濃，原汁原味。
第三，又平又抵飲，唔洗HKD$10就己經大大杯。
楊桃湯味道濃，酸酸甜甜同咸咸，飲完喉嚨好舒服~

到西門町，定必幫襯香香雞。

新鮮即炸，一次唔會炸好多，所以好多時都要等。

熱氣非常，但難以抗拒。

最愛他們用連骨嘅雞，d雞仲好嫩滑，唔會乾爭爭。

可揀辣或唔辣，辣就香d，刺激d。

而且個外帶袋都好好，個紙袋吸油，仲加多個透氣膠袋喺外面，唔怕搞到肥淋淋。

喺西門町行咗一陣，又係時候抖抖。
睇guide book 介紹蜂大，之前又未去過，於是今次就去試吓。
地點唔易揾，因為唔起眼。問途人，佢就指咗我地過對面，行行吓又發現原來係對面，又要過番去。
門外嘅冰滴咖啡機已經好吸引視線。除咗個冰滴咖啡機之外，仲有小食賣。
咖啡店充滿懷舊風味。menu 係幾殘舊嘅~枱係鐵面枱，好搞笑。
由於我唔好咖啡，所以超白癡地揀咗蜜桃紅茶。爸媽就要了冰滴咖啡。
我杯蜜桃紅茶真係令人O 咀，一d特別都無，其實係川寧茶包囉，仲要貴過咖啡，超唔抵。
我都有試冰滴咖啡。賣相良好，有一pat cream 喺上面。
咖啡本身非常濃郁，好苦添。不過就唔會有酸味。阿爸大讚。
坐得幾舒適，阿爸坐到唔願走，但去台灣又點能夠嘥時間喺度坐呀。
一飲完，坐咗一陣，我地又起程行街了~

行程第1日嘅夜晚去咗師大夜市。
可能咁啱係friday nite, 所以超多人，好迫。
買許記生煎包排咗15 mins ，不過條街又迫又多人，唔方便邊行邊食。
都係要揾間餐廳食晚飯先。經過龍涎居，幾骨子，於是就去試吓。
其實入到去先知只係食雞，有好多款喎，好有特色。
等位時已經可以落單，坐到埋位等一陣就有得食。
店子幾特別，用上木枱木櫈，光猛。
一行3人，點咗3個藥膳雞，包括人參雞、何首烏雞同麻油雞，再加多個貢菜、麻油金菇、麻油雞絲飯同麻油麵。

貢菜較老，有根；麻油金菇真係超多麻油，不過食落又唔會好膩喎，金菇唔韌唔會黐牙。
麻油雞絲飯超正，有麻油香，上面仲有雞絲，配上白米飯，好好食。
麻油麵又係超多麻油，所以好香，麵條好幼，好滑，不過就無雞絲喺上面。


到3個藥膳雞出場啦，每個都用個煲仔裝住，下面仲放過好似爐嘅野，但其實無作用，因為無點火，唔會keep 住熱。
3個藥膳雞各有特色，我最鍾意人參雞，個湯甘甘苦苦，好清熱，D雞係用機切，所以可以切成薄片，有d係脾位，好嫩，就算雞胸都唔會鞋，好淋。
麻油雞，正如個名所說，就係麻油加雞，比較惹味，不過個湯就好肥，唔似人參雞d湯可以飲。
何首烏雞，個湯黑漆漆，味道甜甜，藥味微微，都不錯，不過我自己本身就唔鍾意又咸又甜，所以無乜點飲d湯。

整體非常滿意，以雞為主嘅餐廳，香港實在找不到~

去到第四日去咗永和買早餐，都幾多人。當中不乏香港人。
餐牌好多野食，令人花多眼亂。
最後每人要了一杯豆漿，加個肉鬆蛋餅。
豆漿不推介，好甜，我飲咗1/3就give up。
肉鬆蛋餅好好味，用好似包片皮鴨嘅皮包住煎蛋同肉鬆。
香口，肉鬆咸咸地，唔錯。，放棄酒店供應嘅早餐。