之前大鄉里，唔知原來呢間係國際連鎖店（不過香港未有），賣既係 peri-peri chicken~
我係比佢個招牌同有時行過聞到既香味吸引咗～（我鐘意食辣）所以決定同太太一試！
我地怕佢啲餐大份（佢話 2-4 人），所以點咗半隻雞加一個 Portuguese Rolls 同 一份 Old-style chips。雖然我鐘意食辣，不過太太唔太食得，所以雞叫咗 Lemon & Herb （我另外自己加辣汁）
雞係即叫即燒，所以都要特一陣，燒出嚟啱啱好唔會過老， Lemon & Herb 都好香，酸酸咁唔會好滯。而辣汁佢有唔同辣度可以試，我覺得 extra-hot 會太辣，搶咗其它香味。大家可以自己一試。
我地好快就 KO 咗隻雞同份 chips，個 Portuguese Rolls 原來似香港既脆豬仔包，外脆內軟，唔錯，不過我地經已飽飽，食唔晒，所以就拎走咗佢。
呢個燒雞我同太太都一直想再試，好可惜香港無開分店～