老實講，頭兩次出遊曼谷都找不到這家多士，直到去年一月重遊舊地時才讓我找到！(5個月內去第三次，有足夠時間俾我揾啦！)店舖位於年輕人蒲點MBK，嗰度有點似我地既旺中，雖然次次我都要兜大圈才找到其位置，但佢已成為我每次回鄉必去既食店了！

MONT歷史悠久，不過我唔知佢幾多年了，店舖裝修有提的，地方企理，枱排得頗密，因為真係好多人幫襯架，本地人同遊客皆是！採自助形式，到水吧柜枱落單後(多士及飲品)，再移玉步向前行既多士"出菜位"取飲品同多士，然後自行找座位慢慢享用。

此店出名係多士，主要在於佢有好多口味供選擇，包括最基本既牛油砂糖﹑朱古力醬﹑果占﹑奶油﹑仲有好搶眼既咖央(綠色架)，曾經諗過為左影相靚啲而點咖央，但我唔愛蛋味，所以最後都係點番最基本既牛油砂糖﹑奶油同果占(分幾次試架)！除左選擇多外，多士外脆內軟，有炭香味，其中以牛油砂糖最能食出此味，所以以後幫襯我都只點油糖多呢！

試過Mont後，我喺其他地方食到既油糖多都好一般，有時甚至稱得上難吃，亦有試過買磅方包(Mont出品)回家自製，諗住回味下，但都係食唔番喺Mont既味道，我敢話佢既多士真係全曼谷最好味既，信我啦！至於佢既飲品，陪襯嚟既啫，口渴就飲水吧！
 

這是一家人氣長龍店，以賣泰式青木瓜沙律出名，除了青木瓜沙律，還有青芒果沙律，我是於此店愛上青芒果沙律的，佢既鹹香﹑辣味把原來酸酸的芒果中既甜味帶出，嗰啲汁喺口腔內咇出嚟嗰下真係好正！吃過一次，翌日去到其他餐廳都想再吃青芒果沙律呢！

除左泰式沙律，亦有好多人點燒雞，可惜份量太大，我地食唔哂，唔敢點。其他小食中我地試過札肉同泰式燒豬肉，後者勁辣，我地食到要點糯米飯送呢。價錢唔貴，味道OK，坐得尚算舒服，去開Mango Tango既可過對面試埋呢間呀！ 

未去泰國前，我是一個不吃芒果的人，自從喺曼谷吃芒果糯米飯時試了第一口芒果，嗰種鮮甜﹑果肉厚實既質感讓人一吃愛上，甚至係欲罷不能，從此去到曼谷就變成一日一芒果了。提起芒果，定必要介紹位於 Siam Square Soi 5 既 Mango Tango。 

店舖位於街角，裝修黃黃黑黑，幾有型，入到去先係被牆上圖案所吸引，跟住就會被精緻既芒果形餐牌迷住了。全部都係同芒果有關既甜品。其中最人氣既係跟店名一樣既 Mango Tango~即芒果雪糕﹑芒果布丁同芒果半個，另可選擇加糯米飯的。芒果迷一定要嚟朝聖呀！

此店採半自助形式，自行到櫃台落單兼俾錢，跟住店員就會把甜品送上。除了即造甜品同果汁外，還可購買芒果乾及以芒果做圖案既還保袋，送禮自用一流呀！ 

呢間Swensen's真係猶如7-11咁梗有一間喺你左近。各大小商場總會見到佢既出現。Swensen's 係美國品牌雪糕，裝修都幾靚。好多顏色，同 Haagen Dazs比較係兩個唔同既感覺。一坐低店員會奉上水一杯，個玻璃杯都好靚架，只係這裡上載相片數量有限﹐未能在此分享。

雪糕款式起碼有20幾款，餐牌已set了好多唔同既甜品﹑飲品。好似我最愛既 Banana Nutty，有個 waffle 底，上面有兩球自選口味既雪糕，香蕉同nuts，咁熱鬧都係百多泰銖，抵到冇朋友。又有食過佢既 Crepe，都唔錯。同其他雪糕店一樣，有期間限定款式，好似我之前都有試過既楊桃味雪糕咁。

總之，每次去泰國，我都會幫襯佢啦！(多過一次) 唔係會囉囉攣唔安樂架！ 

其實一向都鐘意去Food Court，貪其選擇多，價錢唔貴，一個地方就可以試好多唔同種類野食。去到外地尤其係東南亞就更喜歡蒲 Food Court了。

喺曼谷基乎每個商場都有美食廣場，雖然可能每個地方賣既食物種類差不多，離唔開湯粉﹑雞飯﹑冬蔭功﹑串燒﹑鮮果吧等，但每度既食物味道﹑質素都有唔同。好似喺 JJ Mall內既 Food Court，其冬蔭功粉既湯底最好味，酸辣度適中，味道好過餐廳的。Emporioum Food Court 既牛肉湯河湯底最濃味，每次差不多都特登去食。

而環境方面，大致上差不多，Pier 21@Terminal 21 ﹑Emporium 同 Central World 既 Food Court 有一邊靠窗，景緻開揚。而 Pier 21個 theme 真係同碼頭有關，工作人員穿上水手服，佈置也有錨等。不得不提既係Paragon，由於該處有個水族館，所以個 Food Court 有大量魚缸，而魚缸內亦有魚兒暢泳，望住個缸食魚生都咪話唔搞笑！

曼谷既 Food Court 還有一個特別之處，就係付款形式，我地喺香港﹑韓國﹑新加坡等 Food Court 一般都係用現金找數，但曼谷的一係要買印有銀碼既飯票，一係喺入口派/買現金卡，到各食肆扣數，離開 Food Court 時才在出納處一併結算，免了現金找贖既麻煩。

總之，喺曼谷行街行到餓，去 Food Court 幫襯下都唔錯，除左多選擇，味道質素都唔錯，真係估唔倒喺 Food Court 都食到正野呀？！  

同 Swensen's 一樣， Hokkaido 又係好似7-11咁方便，去邊個商場都見倒佢咁滯， even 喺 Siam Square 同樣見倒 (Mango Tango 對面馬路)。我自己好鐘意飲牛奶，而北海道牛奶出名鮮濃，喺曼谷一見到我梗會幫襯。

一般嚟講我只買牛奶，但這個旅程我每日都有幫襯，所以除牛奶外，我亦試埋香蕉奶同抹茶牛奶，前者香甜，後者抹茶味濃，兩者都保留牛奶鮮味。除了牛奶，佢仲有牛奶布丁﹑乳酸/乳酪等。下次除左牛奶，我會試埋佢既錫蘭奶茶牛奶呢！ 

認識這個牌子，是從遊玩首爾時開始的。佢係美國牌子，東南亞如韓國﹑馬來西亞﹑甚至中國寧波都有分店，就是香港沒有。

BR雪糕款式多，水果味如芒果﹑椰子﹑熱情果﹑木瓜等，又大路既雲尼拿﹑草莓芝士蛋糕﹑焦糖﹑朱古力也有，特別既係棉花糖﹑三溝/雜果雪芭﹑及唔同地方既特式口味...總之讓你試勻咁多款都已吃飽啦！

我自己最愛朱古力﹑焦糖口味演變出嚟既雪糕，每次起碼吃兩球，一濃一酸，正！而且價錢唔貴，質感較 Swensen's厚濃，大家各有各好，如果喺香港開店我就有口福了！

網址：
https://www.baskinrobbins.com/content/baskinrobbins/en/products/icecream/flavors.html