喺旅程其中一晚夜番，但又未食飯，喺民宿附近找吃時看到這家光亮企理既食店，於是入去吃飯，這裡備有英文餐牌，老闆也懂一點英文，所以點菜不成問題。食物選擇不算多，有牛肋骨鍋(WON25,000)﹑水冷麵(WON4,000)﹑年糕﹑紫菜飯團(WON3,000)等，其中較特色既係芝士排骨(WON13,000 per head，二人份起)，第一次看到人家吃還以為係鐵板飯，原來面頭一粒粒既係芝士，配伯爵薯仔，上面還有三色椒，豬肋骨有7-8條，份量多且賣相吸引！芝士勁足料，跟伯爵薯仔好夾，而豬肋骨也是卷芝士同吃的，其實這食法真的好 over，兩者均肥膩，真係貪新鮮呢，所以近日香港也出現這個了！不過這裡的豬肋骨只有一個辣度，而且超辣，老闆都擔心我們吃不到，嗜辣者必大喜！

我地前後光顧了兩晚，其實第一晚吃了牛肋骨鍋，味道沒之前在仁寺洞吃的甜，少辣，但牛肋骨同樣炆得很腍，骨肉分離，價錢不貴，份量也夠。同時因為貪心，所以又點了紫菜飯團，見水冷麵不貴所以也點了，水冷麵味道一般，可能個人重口味左，所以冇以前咁鐘意食水冷麵了。反而紫菜飯團有驚喜，一碗盛著白飯﹑紫菜碎﹑蛋絲及蟹子，由食客自己搓飯團，感覺好新鮮，味道又好，我也買了好幾包紫菜回港自製手搓飯團呢！

總之這食店無論環境﹑食物均很不錯，定價合理，甚至稱得上經濟，老闆又友善，主動跟遊客﹑食客溝通，住在附近絕對幫襯得過。下次再住這裡我也會再來回味呀！

 

民宿附近其實有很多咖啡廳，有連鎖的，也有小店格局，Cafe Ciao就是其中一家。小店佈置簡單，以輕食及咖啡為主，選擇不多，其中一個早上我們到來吃早餐，點了一客芝士火腿鬆餅及Mocha，只係WON6,500，加點一杯 Americano (WON3,000)，由於這區不算商業區，也跟旅遊熱點東大門分開，所以小店人氣不多，我倆可他條地過一個早上呢！

 

這家酒店嘛... 我就不太建議住的，佢唔算好近旅遊區(要6個站才到東大門商圈)，就係同長漢坪站都有15分鐘以上既距離，當時我喺旅行社買自由行套票，揀最平既價錢所以住佢囉！(其實最平係慶南酒店，可惜冇位)

呢間酒店黑媽媽，由大堂黑到入房，所以我啲相影得唔好，請見諒。驚喜的是有自動洗pat pat馬桶，衞浴間超大，可以放一枱麻雀呀！房間(衞浴室以外)大小一般，同樣有兩台電腦可供上網。酒店大堂有免費熱飲如朱古力﹑咖啡及爆谷任飲任吃，當時係第一次見這些 offer，所以加左分！ 

第一次住民宿，房很細，不夠位開全喼(29")，但尚算乾淨，地點真的超讚，雖然坐機場巴士下車後要找好一陣子，但其位置超近乙支路3街站，去東大門﹑明洞均很方便，附近又多食肆，唯一不便是要爬樓梯，搬行李很辛苦啊！

去首爾不能不到明洞啦！首先，這區有好多找換店，兌換率較其他地區包括東大門好啲。這裡集齊食買玩既元素，要食既有名燒肉如王妃家﹑肉統領﹑部隊鍋等；整條明洞大街韓牌化妝品店雲集，又有大型百貨公司樂天及新世界座鎮，休閒服如Forever 21﹑Uniqlo﹑波鞋如 ABC Mart 等也在，還有大量潮牌，包你掃盡大小物品。又可以去M Plaza5樓免費借韓服拍照扮大長金閔大人喎！(男神李暄皇帝都得架！)

放慢腳步閒逛既又可到南山塔去，登上塔頂欣賞首爾全景，星星迷又可到星劇喺情人鎖等拍攝場景朝聖。總之，嚟明洞梗有啱你心水既活動啦！

去完N首爾塔，乘坐巴士落山，於首爾站下車，看到Lotte Mart二話不說即入內掃零食手信。除了樂天超市，首爾還有Home Plus﹑ Emart等超市，但我最愛還是逛首爾站樂天，地方大不在話下，有些手信更設專柜方便大手入貨，如柚子蜜，我在其他地方找不到，或只得一盒半盒，但這裡款式多，有時還做大特價兼很多贈品呢！附近又有 Outlet，又有可堂食既 Paris Baguette，所以大家可考慮留番時間喺呢度一次過掃手信啊！

 

一向喜愛壽司，尤以有紫菜包著的最愛，不過本人偏食，飯卷內通常包著很多我不愛吃既東西，所以忠武紫菜包飯真係開正我嗰路，只有紫菜包著白飯，靠另上既辣魷魚及辣蘿蔔提味，咁我就可以不用左挑右挑咁食魷魚同紫菜飯卷了！魷魚很辣，像我地既土魷加辣汁，好醒胃，配紫菜飯剛剛好，每份10件紫菜飯卷，蘿蔔好像可任加，魷魚則不肯定。另外點單時要先付錢，入座後店員會端上海帶湯，也是任飲，味道不怎麼樣，但可解辣勁十足既魷魚呀！

 

我是從旅遊書上認識部隊鍋的，說是打仗時美韓軍隊交換各自既糧食，包括公仔麵﹑火腿﹑年糕﹑茄汁豆等，開鍋煮成這個大雜燴充飢，自始一直流傳下來，而書中介紹既正正就是這家Nolboo。

去了多次首爾，這次終於可一試這裡既部隊鍋。餐牌照片所示，這裡有三款部隊鍋可供選擇，包括基本﹑海鮮等，我們點了最基本的，只有火腿﹑腸仔﹑年糕等，相中的芝士沒了，而且要另外加錢才有公仔麵及肉片，較我們之前在新村家庭店吃的貴之餘，公仔麵可是這個鍋重要一員，竟然不是包括在內，而要加錢才可吃，感覺欠傳神。至於味道就不過不失，始終所有材料基本上是醃製品﹑加工食品嘛，好難唔好味既，辣湯也可以。不過絕對唔會有下次了！

食店有兩層，地方算大，枱與枱之間既距離合理，座位尚算舒適，尤其我們坐在門口位置，較通風，不會食到一身油煙。

這裡提供牛﹑豬既燒肉套餐，也可散點。我們則點了豬肉套餐，內有兩隻海蝦﹑三層肉﹑豬脢肉及豬頸肉，亦有粥及凍湯，份量看似不多，但吃掉所有燒肉﹑前菜則很飽。

吃韓式燒肉一向會以生菜﹑芝麻葉或其他蔬菜包著同吃，但這裡較為特別，是以年糕代替生菜包肉吃，年糕顏色有白﹑粉紅及綠色三種，薄薄的有點透光，當然這裡也有提供生菜片。坦白講，味道不怎麼樣，只是吃法較為新鮮，貪得意既朋友可以一試。
 

相信 SchoolFood 這個名字冇人不識，在香港可是很紅既店呢！主打 Fusion韓食，平時人龍多的是，怕排大隊既我一直未試，也沒太大意欲想試，誰知在明洞行行下看到，仲要唔駛排隊，於是入去朝聖一番。

這家 SchoolFood 地方頗大，枱與枱之間夠空間感，全部木式枱椅，整體裝潢不錯，係燈光相對較暗，對坐零晨機既我倆好有催眠作用。餐牌印刷相當精美，圖文並茂，食物種類未至於好多，但同一種類既食物卻因著唔同材料而變化出更多選擇。本來好想吃賣相好靚既紫菜飯卷，奈何內有太多我不吃既東西，較早前又吃過忠武飯卷，故就不在這吃了。最後芝士控既我點了芝士蕃薯春卷(WON2,500)﹑辛辣麵(WON4,000)﹑吉烈豬扒芝士辣炒年糕(WON13,000)，以及點了一Jar Orange Cider。

整體而言，食物賣相吸引，當中芝士辣炒年糕相當大份，我地都食唔哂！但味道就不過不失，定價喺韓國算合理，但同價錢相信可以食到更多更美味既食物。所以呢！試一次就夠了，番到香港亦唔駛再幫襯呢！ 

喺明洞除了有大大小小不同既餐廳，街頭小吃亦不少，早前既篇幅就有兩張小吃相，這裡再加多數張小吃及街邊大排檔既美食吧！另外還有近期喺香港大熱既冰品呢！ 

平時去百貨只會去超市或免稅店，點解喺度提樂天百貨呢！就是如題所講，明洞樂天旁的Lotte Young Plaza 有Line精品出售，雖然價錢較貴，但台北站未開前只此一家，所以Line粉必來朝聖是也！

另外，在地下超市及美食廣場可買超滑意大利雪糕及名店馬卡龍，還有好多好多吃的可揀，人有三急又可在此解決，小休一陣再拼過呢！　

註：這裡也有好多潮牌，入貨也可啊！ 

朋友介紹必去既食點，說是不吃牛也會偷吃，所以牛魔王既我倆於這趟首爾行也到此朝聖。出了地鐵站向右直行，到有交通燈既地方過對面馬路(有間大大地既酒店的)，然後上斜巷就會看到。還好我們早到，不用排隊便能入座，即被安排埋爐吃而已，沒多久門口開始有人等位。

店員除放了兩件牛肋肉在烤爐上，也遞上大膠袋讓我們放外套，細心。又...店員會定時過來幫忙燒肉及剪小塊，邊等邊燒，終於有得吃了。牛肋肉略有牛味，調味亦佳，基本上不點汁也好吃，肉汁豐盈。

初時我們覺得這牛肋肉是好吃，卻不像朋友說得那麼誇張，但相比喺打後數天既膳食，我們就覺得這立食牛肋肉確是不錯，而且不貴，每人百元左右便吃到烤牛，在韓國真的算賺到了！(打後吃的東西不是燒肉，只是我倆有點掛念燒肉而已:P)

首爾出名咖啡店多，而 BeansBins Coffee更有點像便利店般每區都有，其最出名既莫過於是雪糕窩夫，一份可自選兩球Haagen Dazs雪糕，味道有抹茶﹑士多啤梨﹑曲奇﹑比利時朱古力及雲呢拿五款，雖然選擇不多，但抹茶﹑士多啤梨及朱古力已是我最愛既味道，夠有餘呢！雪糕固然好味，但最重要既窩夫當然不可忽略，約7寸大既窩夫烘得剛剛好，外脆內鬆化，像吃蛋糕但又稍輕一點，蛋味不會過重，甜度適中，是我吃過最好既窩夫。除了雪糕，上面還有忌廉及朱古力漿裝飾，賣相相當好看！到現在仍非常掛住呢！(其實喺首爾其他咖啡店吃既窩夫也好好味，首爾既窩夫真係唔講得笑，就是好好吃！)

當時咖啡店還在做以芒果為題既甜品，喺海報上看到甜品賣相也好吸引，貪心的我當然唔放過啦，點了芒果牛奶刨冰，牛奶刨冰奶味唔強，除了芒果及漿，還有一球芒果雪糕，所有東西夾埋一齊好凍，不過芒果太酸，令此道甜品味道大打折扣。

喺梨大既分店環境很不錯，夠大，我地坐喺窗邊可以歎住冷氣曬太陽，超舒服。人又唔多，店員亦唔會趕客，我地喺呢度坐左好一陣子才走，超寫意啊！ 

星星熱還未過，炸雞依然熱爆，講起炸雞，又怎能不提橋村呢！上次路經弘大橋村時已吃飽甜品，肚已冇位容納一直想吃既炸雞，繼而當時整個旅程已吃了兩餐，故即使有cap也未必會吃，所以十月這趟特地前來朝聖。

炸雞店黑漆漆的，唔夠光，讓雙眼有點疲倦，甫坐下研究了餐牌一會便點菜，之前在別店吃過原味及蒜味炸雞，今次決定吃韓式炸雞，橙紅色既漿汁平均沾滿整份炸雞，熱辣辣既炸雞外脆肉嫩，絕不嚡口，韓式辣醬甜酸微辣，好滋味！每份雞都有10多件，兩人吃真的好飽，即使有前菜(椰菜絲)同吃也不能消滯，但這炸雞的確好吃，如多兩三個人，可多點其他口味就好了！ 

來這店全是因為其中一個招牌抹茶甜品(WON17,800)太過吸引，喺超高大既抹茶刨冰上加了厚厚既紅豆蓉及一球抹茶雪糕，旁邊放了一件抹茶紅豆卷，一小瓶熱既抹茶，還有四粒小丸子，以及抹茶serum為刨冰調味，份量超大，好震撼！刨冰超細密，好綿滑，遠勝台灣既綿綿冰，撥開抹茶汁既外層，看到入面雪白既刨冰，仿如真既雪山一樣！抹茶味濃而不澀，可中和紅豆蓉既甜，又能為冇味既刨冰提味。由於雪糕及刨冰太好味，平時好鐘意既抹茶紅豆卷也被冷落了，味道也給比下去呢！

除了超巨型抹茶刨冰外，這裡還有好幾款造型靚既甜品，如另一款 Signature Dessert Tarte Tatin (WON10,900)，像 Apple Crumble 的變奏版(或蘋果批+拿破崙餅)，造型立體，最頂頭既蘋果脆片好香蘋果味，爽脆非常，custard 唔太甜，同鬆化酥皮及蘋果蓉頗夾。而另一款類似既甜品榛子拿破崙(WON10,800)則以焦糖﹑香橙及榛子cream為材料，餅沒前者鬆化，這個薄很多，所以較脆，但整體偏甜，嗜甜者及熱愛榛子的會大喜。

除了甜品，Be Sweet On也提供各式咖啡﹑茶， 地方大兼雅致既裝潢，確實係一個好好 hea 既地方呢！

弘大商圈是指弘益大學向外行幾條街一帶，內裡有勁多咖啡店﹑甜品店﹑多國菜食肆﹑時裝及配飾小店﹑護膚品店等等等等，又有酒吧街，每星期有一日係Ladies Night，恕我現在修心養性，冇乜興趣所以冇記住邊日啦！仲有大熱既Trickeye Museum，約埋三五知己瘋狂影相可以玩半日呀！而由於弘大係有名美術大學，故好多地方又有學生塗鴉，所以話呢區係吃喝玩樂之地呢！

 

其實要仔細行勻弘大商圈不易，前後嚟過三次，每次看都有不同，所以用了4個篇幅上載有關照片。

除了Be Sweet On及炸雞，這裡還有很多小吃及甜品啊！

2012年跟朋友夫婦一起行弘大，比我們更貓痴更貓奴既朋友一看到有貓Cafe logo即衝上去呢，飲品不怎麼樣，醉用之意不在酒嘛！

大學附近既商圈多大學生及年輕人出入，故附近無論食肆定小店，食的買的價錢相宜，故也吸引遊客前來。除此之外，因為全知賢主演既我的野蠻女友也在梨大拍攝，所以又吸引到一班粉絲來朝聖。這版就讓我上載梨大商圈既相片，下一篇幅才post梨大照片吧！

因為一套韓劇，讓很多遊客來這裡拍照，男的可能看看有沒有像全知賢一樣漂亮的女生在這出沒，女的則幻想跟片中女角一樣在這裡番學﹑拍拖等。這裡環境很美，紅葉季節也吸引不少遊客來拍照，造成過嘈及多閒人，所以大學曾一度禁止遊客入內參觀，(我也不應標這裡是景點... 羞) 現在假日才讓男生入內"觀光"呢！

在明洞篇幅提過的一家街坊部隊鍋店，比明洞那名店更正宗，至少跟麵呀！價錢也便宜，味道也佳，不過坦白說不知此食店還在不在，純粹想跟大家分享而已！

第一次到可樂洞時，我們出了地鐵站左望大大個區被圍板了，看到"市區重建"既圖片，以為整個市場暫停營業，我倆失望而回。後來從朋友既朋友口中得知圍板是另一地方。所以國慶假期決心再去一次。

這次揀啱出口，跟足指示而行，但四周人很少，去到市場所在地時... 嘩！好大呀！有一點一無望際既感覺(是的... 是誇了一點)，但一路看到是蔬果標誌既市場，小販也不多，不是所有檔也有開，總之好唔對路咁。我地繼續行，再過條大馬路，咦！似樣了...我地找到像書介紹的加工食堂，樓下是禽畜既檔口呢！上到加工食堂望下，懂普通話既店員指一指海鮮檔既方向，原來要再往後行，經過有蓋停車場才到呢！於是我地馬上起行揀海鮮去。

其實冇乜心水，行了兩三檔，見其中一檔老細較友善，於是就幫襯了一隻鱈場蟹(講價到7萬韓圜)﹑又買了三隻鮑魚(1萬韓圜)，老細送了4隻蝦給我們，跟住我們就再行，喺第二檔看到松葉蟹，4萬5韓圜一隻，買埋，就番去剛才的加工食堂了。

這個加工食堂附加費合理，油料加工費每kg5千韓圜，人頭費2千韓圜一人，汽水也是2千韓圜，所有海鮮用最簡單既方法-蒸嚟處理，以吃海鮮既鮮味，我地喺食堂額外俾左1萬8韓圜，成餐約港幣千一有找，價錢可以啦！

講回食堂，大部份是韓式的要席地而坐，得兩張枱配椅子的，整個格局好街坊feel。我們揀左韓式座位，之前無論在鷺梁津定釡山機張都有免費前菜的，但這裡卻沒有，所以我地只有乾等。先來既係鮑魚及免費蝦，前者新鮮，味道鮮甜，後者則是死蝦來的，猶幸肉質不至太脢。跟住兩隻蟹來了，如想像一樣，松葉蟹較鮮味，鱈場蟹雖較大隻兼啖啖肉，但味道較松葉蟹遜色。不過總結三次喺泡菜國食蟹既經驗，以喺機張食既最佳呢！

頭兩次去首爾時完全冇諗過去樂天世界，一來冇時間，二來家人不怎麼愛樂園，到第四次踏足此地，就把這樂園編排在其中一日，一於做個typical 遊客啦！

出左蠶室站，跟住人群走，慢慢會看到樂園吉祥物，其實我個人係幾鐘意逛樂園的，所以看到吉祥物即拍了好幾張照片，遠遠看到樂天城堡，好興奮，即去買飛。入場票分幾種，全日票﹑下午4時後入場票﹑晚間票等，入場費請參考照片。

購票後衝入樂園，先往室內走...(其實當時已忘了有城堡那邊既"外島")，地方較想像的大，大大個溜冰場，遠遠看到空中既熱氣球緩緩繞圈，不遠處也看到經典喊戲"天國的階梯"內既旋轉木馬，又有大舞台做表演，四處人來人往，氣氛熱鬧得很。邊行邊拍了幾張照片，我就拉著老公往熱氣球去。這室內熱氣球可算係人氣玩點，過左4點幾都有長長既人龍呢，等既時候我去了買什果冰條吃，味道不錯，但價錢不算平宜，3千韓圜1支呢！食完整支雪條隊仍在排，差不多一個小時後才到我們。看人玩得輕鬆，到自己喺上面時都有點怕呢！好像有4﹑5層樓高左右，繞一圈約10分鐘左右，對於唔玩機動遊戲既我們嚟講，有樣活動做下也不錯。

之後經過3D美術館，有幾幅畫讓人影相。由於十月是Halloween的月份，樂園內也設了鬼屋，不過每度都要排隊，所以我們沒有再玩其他野，只係食下熱狗，四圍影相咁。本來想買紀念品，但職業病發，硬係覺得啲禮品唔值咁貴，所以閃人。

出左樂園，我才發現漏左去城堡影相，為免帶住遺憾離開，厚住面皮問職員我地可否重新入園，重點係解釋俾佢知我地有幾白痴所以錯過左，仁慈既姐姐俾我地番入去，於是我又好興奮咁呢度影嗰度影，又同老公自拍咁，如果日頭都記得影就好了，另有一番味道呢！

講到喺首爾食海鮮，除了可樂洞，更多人去鷺梁津呢！這個漁市場除了大，檔口多，而且好集中，又喺地鐵站附近，較可樂市場佳及方便，時間緊迫既真係唔駛諗，去鷺梁津就啱哂！

兩年前去既時候唔大貪，又或就住吃，我地只買了一隻松葉蟹(28,000韓圜)﹑1萬韓圜有6隻蝦及同樣係1萬韓圜有6隻既扇貝，松葉蟹清蒸，其他兩味則用烤的處理。前者雖然少左一隻蟹腳，但我地都好滿足，啖啖肉既蟹腳吃得好爽。後者用烤的但沒有烤的香味，勝在夠鮮，蝦夠彈牙，好吃！不過樓上既加工食堂收費好像相對唔老實，我記得當時埋單要7百多港幣，以為會較香港吃的平宜好多，但勝在夠新鮮，所以嚟梗都將會 encore!!!! 

汝矣島公園吸引人之處，主要係每年櫻花季節喺輪中路兩旁開滿櫻花既大道，屆時猶如嘉年華/櫻花祭咁好熱鬧。本來4月既行程就是想去睇櫻花，可惜今年花期早了，加上下了一場大雨，我地連櫻花屍骸都睇唔到呢！雖然有點失望，但我地喺公園租單車遊一圈，沿途停下睇下風景影相，輕輕鬆鬆就過了一個好寫意既下午，這裡又有遊樂場設施，好適合一家大細嚟遊玩呢！

兩年前出遊時有對朋友夫婦住在鐘路附近，我地過去找佢地一齊玩時會先到佢地酒店，然後再出發，喺佢地酒店附近向右行，慢慢就可穿到仁寺洞，反而叫我由安國站行過去我未必識呢！(今年第二個 trip才知原來可由安國站行過去呢...haha) 而鐘路附近都多野食，所以我喺這日既行程也有提到兩家鐘路吃過既餐廳呢！

講番仁寺洞，主要大街可看到好多韓國傳統文化相關既店舖，如韓紙﹑韓國書法﹑民族手工紀念品等等，間唔中會見到韓國女士穿上傳統服飾出現，好像大長金咁！此外，這裡也有傳統茶居，可以品茗及吃韓式傳統甜點。走在大街上，如果遊客唔係太多，感覺好舒服，好有文化氣息﹑古早既味道，除了傳統店，還有兩個大型"商場"，賣既東西集新潮及手工於一身的，我也會喺下一篇介紹其中一家。總之，如有時間的話，我都建議大家行下仁寺洞呢！

這個商場，由於韓文符號拼"SS"寫出來是"人人"，故又被人稱為"人人商場"，第一次到這商場逛時覺得好正，好新鮮，好舒服！除了有樓梯，還可由斜路慢慢繞圈向上行，沿路有很多特色商店，賣的東西不便宜，但好多都是手工貨，獨一無二。一路又看到好多塗鴉，也看到一些雕塑，總之成個環境好藝術。慢慢行到上頂是餐廳來的，陽光充足，喺冬天曬住太陽嚟個Brunch或Tea定必好寫意！

這是韓國有名既綠茶店，在濟州自設茶場，此店除了出售自家綠茶葉，也有很多跟綠茶有關既物品，如護膚品。二樓及三樓是茶室，除了綠茶，還有蛋糕及各式綠茶甜品。話明係綠茶控，我又點會唔嚟朝聖吖！

等左半個鐘左右，店員安排我地入座，留低餐牌後就行開了。這裡指示唔清晰，我排了好一陣隊，到我落單時佢話我可以坐下來，店員會嚟同我落單喎！你話係咪唔交帶清楚吖！算啦！坐低左後另一店員就過來幫我地落單， 我地點了綠茶雪冰﹑綠茶卷蛋及一杯綠茶Latte。

過一陣野食來了，賣相係唔錯，但比起弘大Be Sweet On就差一大截呢！而且又貴啲喎！味道方面，綠茶卷蛋不錯，忌廉滑，綠茶味夠﹑香濃而不澀。但個雪冰就唔得了，唔夠幼細，咬到小冰粒既刨冰口感，我都係鍾意好像雪既雪冰多一點。 Maccha Latte也是一般。

首爾好多甜品店﹑咖啡店，選擇多的是... 噢！雪綠嘛... 試一次就夠呢！ 

這家餐廳沒有中文名，我由韓文符號嘗試拼寫出來，如冇錯應為"Kam Nam Mkhn Ok"，但第三字好怪，冇響音。此店地方不少，裝修平實，既有席地而坐既韓式座位，也有我們一般既枱櫈，兩者我都坐過。咁講係因為我們吃過番尋味呢！為著既，是一碗牛味濃既牛骨湯。

這裡定價唔貴，幾千韓圜已有交易，除了炆牛肋骨，分大﹑小份，價錢過萬韓圜，但味道不錯。講回牛骨湯，以韓式湯鍋盛著，湯呈奶白色，有三四件牛排骨，並有葱花裝飾，熱騰騰上桌，喝一口湯很甜﹑順喉，有牛肉味道，牛排骨肉質好軟腍，仍有肉味，邊吃邊喝，亦可拌飯同吃，到現在仍很回味。所以此行老公說明必要回來encore!!

另外我們也點了剛說到較貴的牛肋骨，調味很夠，但仍吃到牛肋骨既肉味，炆既火喉也夠，骨肉易於分離，細份都有8條骨，很快就給我們幹掉了。至於水冷麵味道一般。另外，我跟老公回去 encore時則點了牛肉鍋，才兩萬多韓圜，但配料多﹑菜及牛肉也多，吃得好痛快。這裡除了餃子，其他都非常好吃。有機會我們也會再來呢！

這食店營業時間較長，我地去完夜街(過9點)如喺附近會嚟呢度食晚飯，除了牛肉鍋，這裡還有豬骨鍋，還有一個係人蔘雞定其他既鍋可揀。前後兩次我們也吃了牛肉鍋，相對剛才提既仁寺洞餐廳，這家牛肉鍋肉既份量雖然較少，但其他配菜就好足，湯頭夠甜，好似食梗壽喜燒咁，每次我地都會加個麵落去食，價錢又實惠，真係超讚！

註：這家店全部都是韓式座位，入店後要先除鞋，有鞋柜讓客人放鞋。 

之前喺仁寺洞附近行完，諗唔到食乜，經過呢間，見到門口張易拉架有薯仔大骨湯，所以走入去吃。呢間食店真係好街坊，全部韓文字，冇譯既餐牌，我地手指牆上既圖嚟點單。全場幫襯既都係韓國人，既有阿積司，又有後生男女，有啲食客又飲酒，所以店內都幾熱鬧呢！

湯來了，見只有大骨沒有薯仔，以為嚟錯，但後來發現原來一開始係我地睇錯圖，根本係冇薯仔在內，咁唔緊要啦！就咁大醬湯也很好吃！湯帶辣，少少油，肉唔多但好入味，跟飯吃好飽肚，而且價錢平，好像7千韓圜一客，晚飯喎，抵到呢。

回港後我地都有試過整，但當然有加番薯仔啦！嚟梗去首爾希望可以食到有薯仔版本的。 

一般去完仁寺洞，我都會繼續向北行(我既前行而矣)，往三清洞進發。由石牆大道慢慢前行，兩旁有樹作蔭，人不算多，在陽光下散步，感覺好舒爽。再向前行，兩旁開始出現性格小店，有賣衣服既，有賣飾物既，也有賣鞋履既，總之同時裝有關既都可看到。

除此之外， 也有很多咖啡店﹑小吃店﹑裝潢型格或簡潔既餐廳，行到攰可以隨意找個地方嘆茶，吃件餅，稍作休息後再行過。喺巷弄裡也可找到特色小店(門面﹑裝潢﹑或賣的東西都較吸睛)﹑餐廳，總之細心行逛，會有讓人尋寶既感覺。

整條大街約分三段，都是由不同小店﹑咖啡店﹑餐廳組成，連鎖店舖相對較少，感覺較新鮮，走在這裡，感到商業味少一點，氣質多一點。

再讓大家看多些三清洞既面貌吧...

由惠化站往駱山公園行去，沿路指示不多，但總算去到駱山公園，但喺公園行左一陣，也不知道怎可到達壁畫村，失望之餘又餓，唯有落山先醫肚。吃飽後厚著面皮問店員，原來我們仍要由公園繼續向右前行(我們有向前行，但見一路冇畫冇雕塑，以為行錯而折返)，為了不帶任何遺憾回港，故再試試看，終於皇天不負有心人，讓我們找到了！(根本就是一開始笨笨呀！)

沿途由不少雕塑，到大大小小既塗鴉﹑壁畫，邊走邊像尋寶一樣，看到一幅又一幅畫作感覺很興奮，尤其是看到兩堂樓梯畫更是開心不已，相片拍完又拍，直到太陽準備落山才肯離開，聞說這裡既畫會定時變更，確實我們所見跟書本所展示的也有不同，下次到首爾想不到行程，即使再來尋畫也不錯的！ 

梨花壁畫村畫作真的不少，兩個篇幅也未能盡錄，唯有由你自己去發掘吧！

要前往梨花壁畫村，大多會經過駱山公園，雖然我們沒有好深入遊園，但也拍了不少花花照片，園內更有"野兔"，又可在公園遠眺首爾風光，是個不錯既休憩地方。

公園(山)腳下，有很多藝術館(有啲像公演亂打騷的)，又有鎖博物館，更有很多大小食店，我們也在其中一家街坊格局既食堂用餐，相當便宜，才5千韓圜便有一個定食，相當抵！ 

叫得新堂洞辣炒年糕街，賣年糕鍋既食店當然不少，但翻看旅遊書，很多都推介馬福林奶奶這家，話佢賣既辣中帶甜，年糕又煙韌彈牙喎！不過由於老公唔太好，所以我地冇試，而嚟到當日咁啱見到有啲表演，阿豬媽唱歌跳舞，非常熱鬧呢！

由於炸雞店未開，諗唔倒食乜，喺家鄉成日見Red Mango都冇幫襯過，所以就決定在此開餐，原意是想吃香蕉窩夫，但揀完一輪店員話冇做... 咁唯有食普通一級既杏仁窩夫啦！賣相冇香蕉的吸引，但窩夫一樣外脆內鬆軟，吃罷一口又接一口，超好吃，配埋芝士忌廉及果占更佳，首爾窩夫真係唔講得笑，好吃到不行呢！

去之前沒有抱太大期望，見這地方未到過，又想試下有冇機會看到紅葉，加上本身喜愛綠色，即使冇紅葉，在兩旁綠樹下拍照也很滿足。

猶如引言及上述前往方法所示，去南怡島並不容易，雖然不算難，但相對平時地鐵可至既景點絕對轉折多了，不過，正因為沒抱超大期望，登島後驚喜處處。 首先，船未泊岸前遠遠看到翠綠樹林中有幾棵紅紅黃黃既植物，就讓我幻想它們是紅葉已讓人開懷。

登島後看到用綠色樽砌出來的樹也讓我拍了幾張照片，繼而看到唔太可愛既松鼠，影出來唔夠靚既湖，都讓我感覺舒暢。最讓人興奮的三件事來了，第一是在大草地上看到好幾棵紅葉，不用疑似了，根本就是，雖然同樣實景較美，但我仍是開心滿足地拍了好多張照片。

繼而就是一路想拍的兩旁綠樹作蔭既大道，青綠色的超美，無論自拍還是影景都相當喜歡。嚟梗既trip也會到這裡，不知會否有雪，會否更美！

最後讓我真的好意外既是有鴕鳥呢！我好鐘意動物，最愛遊動物園，在這裡看到唔怕人但又有點笨既鴕鳥覺得賺左呢！即使未能去兒童大公園看動物也很開心！

島上還有很多影相位，尤其是陳年舊劇冬日戀歌既拍攝情景，又有遊樂設施如Bike Centre﹑水上活動，也看到一家家木屋，看來是讓人留島居住的，遊客登島費8千韓圜，島上也有餐廳，總之夠你消磨大半天呢！ 

這裡真的美到不行，要拍照既地方很多，小心用哂相機既電，到下一景點時冇得影相啊！

雖然登島前已在新堂及便利店吃過東西，但在島上遊玩了一陣子有啲攰，又為食啦(主因)！所以就入去這間標榜韓式傳統美食的Country Restaurant吃東西了。

食店地方不算很大，但有多張長枱，約可容納80人，食物選擇不多，主要是傳統拌飯﹑湯麵﹑煎餅及一些鍋類，老公點了傳統拌飯，而我則點了辣魷魚拌米線，味道雖然沒有特別，但也稱得上美味，我們很快就把它們幹掉呢！而且價錢比想像的化算，值得進來小休。

如不想吃韓食，附近也有其他食肆(如西餐)，又有一個賣豆沙包既涼亭，大家可以慢慢行，研究完才決定要吃什麼呢！

在來自星星的你一劇，男神同千頌伊在小法國村深深一吻訂情，因為中了男神毒，所以知道這裡很細，交通又用了不少時間，也要到此一遊。一場嚟到又係喺度喪影，總之一見到有小王子元素我就影，見到男神我又影，最後一路影一路擔心相機冇電囉。

嚟梗同團友都會再嚟，因為團友未嚟過呀！速遊後會到晨靜樹木園影燈飾，希望到時無論等觀光車或的左都唔會太嘥時間啦！

小法國村雖然地方小，但要影既地方都好多... 山長水遠嘛...點都要拍個夠！

一開始冇打算去的，又係花花草草，唔駛去啦！但最近看雜誌附送既旅遊書介紹，這裡於冬季會有燈飾，景色超美，朋友話隨意拍照已是一道好風景，所以嚟梗旅程加插了這地方，亦先在這裡跟大家介紹一下呢！

特別鳴謝 Swin Lo 提供兩張靚相

由中段踏入這條江南地下商街，向左望好，向右望也好，彷彿看不到盡頭，冇頭緒由哪兒行起，就向Etude House方向(即背住地鐵站的左邊)行，一路店舖賣既東西差不多，褲﹑衫﹑鞋﹑美妝店﹑內衣褲等等，普通衫褲大部份一萬韓圜就有交易，也買到5千韓圜的，邊快行邊scan邊買，快極都要差不多半小時才到盡頭，盡頭有賣吃的，也有座椅讓人休息，唔怕行到攰冇得回氣。

至於另外一邊，主要係賣家品呀﹑床單呀﹑甚至係園藝擺設嗰啲，有需要就行，冇的可以skip，免得費時呢！這條地下商街主要係本地人行多，仍未被港人﹑強國人攻陷，不過人還是很多，掃貨時都要小心自己荷包呀！ 

狎鷗亭也好，羅得里奧街也好，是江南那邊出名既潮服區，好多名店﹑時裝店都喺嗰區設旗艦呢！而最近開始竄紅既新沙洞，就喺林蔭大道兩旁開了很多型格店舖，時裝﹑ Accessories，型格家品也有。除此之外，Cafe也有不少，我們也有幫襯其中一家。

因為"來自星星的你"一劇，掀起左醬油蟹熱潮，新沙洞也有一條醬油蟹街，有名既PRO醬蟹也在此呢！還有，這裡有很多整形醫院，韓國真係好開明，視整容為美容，由地鐵站廣告，一路到大街建築都看到呢！

雖然我沒有潮流觸覺，來這裡純為見識，以及想看看林蔭大道兩旁綠樹(外子很喜歡這樣既大道)，不過，當你去過南怡島後，就會覺得這裡失色了！對時裝潮流有興趣既，或同我一樣有時間純粹到此一遊既，可以來hea下呀！

其實成個首爾之旅好像成日食咁，喺高速巴士站行完一輪，老公則在咖啡店內坐住等，飲過咖啡，去到新沙洞，又被我帶去另一家咖啡店再吃過飲過，真係辛苦老公呀！

這間咖啡店名為Ginkgo，地方很大，裝潢以木為主，日間陽光從露台照入店內，晚上燈全開了，在大街上也看得到燈火通明，雖然店太光亮顯得不夠hea，但座位寬敞，坐得尚算舒服。

我們點了兩杯飲品，一客雪糕蕃薯窩夫，一客杏仁芝士火腿吐司，沒想到食物質素很不錯，韓國窩夫外脆內鬆軟是常識，但內裡竟有蕃薯蓉，口感層次豐富，而且任選兩球哈根達斯雪糕呢，好好味呀！繼而吐司無論火腿﹑芝士﹑杏仁片，所有材料份量剛好，都好夾，又係意想不到既好味呢！不枉我捉老公上嚟坐呀！

雖然有多條地下街可以掃平貨，但東大門商圈仍然深受遊客歡迎，除了Doota﹑Miligoze﹑ Hello apm等，還有批發區中的U:US﹒Nuzzon等，總之要敗要拼既地方相當集中，有些地方還可講價。如第一次來首爾，或行程太趕去不到地下街的，仍會建議來東大門走一圈呀！

這家八色豚肉越做越好，名氣大到香港尖沙咀也開了一家，雖然不是有關連﹐但想止癮也不錯。講回八色豬肉，言下之意即有8款口味啦！分別為人參﹑紅酒﹑松叶﹑大蒜﹑花草﹑咖哩﹑大醬及辣醬，口味由淡至濃吃起，最好味是紅酒及大蒜，花草既香草味則太搶，而松叶則冇乜特別，應該話食唔出叫咩味呢！

除左調味，豬肉用五花腩，肥瘦相間，豬肉味夠但沒有臊味，包菜同吃或淨隊皆讚！而送既泡菜海鮮湯湯頭甜中帶辣，但入面既海鮮則不新鮮，不用浪費Quota呀！這個八色豚肉，唔止好食，又夠睇頭，這樣才三萬韓圜，影相都抵呀！如怕食唔哂，有雙拼或三拼可揀呢！

唔覺意找到姜虎東，就上去開餐，其出名之處莫過於肉平，以及可以爐邊烤蛋。本來對此店有期望，但結果係，蛋要好cher咁食，唔滑而嚡口，豬肉定牛肉我已唔記得究竟係點左邊樣，所以你話味道如何？咪冇乜特別囉！如果唔係我點會唔記得自己食過咩呢！價錢仲要唔平，可能我地相對點得多啲或貴啲卦，總之唔會再有下次啦！

相信有看"來自星星的你"既人唔會唔識DDP這個東大門最新地標，冇錯，就係劇中千頌伊吊威也發生意外既拍攝場景呢！我也是來東大門時順便打卡追星呀！

所謂DDP，就是"Dream", "Design"及"Play"的簡稱，這裡有唔同既文化展覽，也有商店售買創意用品，更有數間餐廳，其中一間是以賣健康飲品有名的果汁店呢！可以一逛！ 

這區以前有美軍駐紮，所以很多老外來這裡住，正因為多外國人，個人認為這區既消費相對較貴，找換店兌換率也較差，我去了韓國數次都沒去這裡，所以於去年10月的行程加了這區，總算是到此一遊了！

原本冇諗過嚟呢度，因為根本唔熟梨泰院，旅遊書也沒有太多篇幅介紹這區，我地係喺地鐵站上地面時看到海報才知有這店，海報內容當然就是放了這蜜瓜雪糕吸睛啦！因為五年前在北海道渡蜜月時吃過軟雪糕拼夕張蜜瓜覺得超好味，為了回味，我地就行嚟行去咁揾呢間店。

找了好一陣子，終於喺一條巷仔找到，店老闆都有點意外我地點解識嚟，解釋完一輪讓佢明白，佢在地鐵站貼海報是有作用的。初時以為店很細，原來往內行別有洞天，間了一間房可以同朋友包場咁呢！

蜜瓜軟雪糕定價唔平呀！要成19,000韓圜，軟雪糕味道唔錯，奶味夠又軟滑，但蜜瓜得面頭部份甜，食多少少未到皮已覺苦的，所以還是北海道的好吃！

幫襯嗰日除了我地及一枱客(2人)，冇人嚟呢！甚至路過既也冇，人流麻麻，唔知係咪因為Weekday關係呢！這Cafe有免費Wifi，嚟開呢區可以嚟飲下咖啡上吓網，但就唔駛特登來了！ 

問我食店喺邊，真係唔知，去到憑記憶可能都仲識行既，食店係喺地下，要行落一層，落去地方寬敞，有好幾個老外(有啲穿軍服的)已在用餐，我地隨便坐低，翻開餐牌，點了我愛吃的大醬湯(7,000韓圜而已)，老公則點了人蔘雞湯(12,000韓圜)，食物好快就到，兩樣都好味，大醬湯夠濃，豬骨夠鬆化。蔘雞湯雞肉夠滑，湯既味道也不錯，起碼唔淡，定價合理，味道唔錯，值得幫襯呢！

這是以戰爭作主題公園及博物館，吸引我去既係一個兄弟相擁既銅像，說是兩兄弟被分隔在南﹑北韓，內戰時兩兄弟喺戰場上以敵方身份相遇，繼而相擁既情景，雖然我對泡菜國歷史認識近乎零，但對於這一幕感受至深，覺得好感動，所以在最後一日唔太多行程安排下來了。

除了這銅像，還有很多舊時用過既戰機﹑坦克﹑戰艦供人拍照，另外，喺公園較入位置既博物館是要收費，對韓國歷史有興趣既朋友可以一看。 

到了遊記尾聲，點都想同大家分享下每次買啲咩戰利品既，主要係護膚品及零食，呢篇先講前者。

大家對韓國護品牌一定唔會陌生，事關已有好幾家喺香港已有專門店，就算冇舖頭，喺水貨店或網購都可能看過，我唔係化妝既人，護膚也有點懶，所以唔算好有研究，買既都係大路既牌子，最喜歡既係較貴既Primera，這牌子跟雪花秀是同一間母公司的，所以對其貨品既質量絕對有信心，最出名既係西蘭花成份既去角質啫哩及磨砂洗面膏，前者相對温和。另外佢既面膜都唔錯。

繼而鐘意既牌子都係同母公司既Innisfree，重點係貨平，如大部份店既面膜入門價是1千韓圜，這店則平50韓圜，所以平平地粗用或送人都很不錯。其次係佢既綠茶成份既潔面用品﹑日霜﹑精華﹑眼霜嗰條線都係該店皇牌。

第三個要講既牌子係Etude House，品牌行公主路線，無論店舖裝潢，定產品包裝都少女到暈，店前影相也好，買包裝也好，啱哂行少女feel既粉絲。另外，我喜歡呢個牌子主要係佢既甲油，曾經賣得好平，1千韓圜已有交易，顏色也不少，不過現在買少左了，一來佢既價錢調番高了，二來市場上選擇太多嘛！

第四個會幫襯既係Beyond，點解？我既男神金秀賢代言嘛！買products會送SooMan既海報﹑扇等紀念品，唔係唔買呀！不過中肯的說，佢既產品定價唔算高，洗面用品不錯，另外佢有頸膜﹑小腿膜及肚腩膜，賣既產品跟其他店稍有不同(雖然已被抄了)，所以都值得入去行一圈既！

下一個要講既就係Missha，因為喺香港無聲無色咁執左，唔想喺水貨店買，咁去到韓國自然就去入貨啦！朋友一般會幫襯其美思系列，而我則買甲油...是的，我愛塗甲！Missha既甲油顏色唔錯，個掃幾好掃，所以買得過既！

Tony Moly既特色是用蔬果造型作其包裝，如美白既面膜(要過水的)以蕃茄盛著，潤唇膏以桃﹑橙等盒包裝，去黑頭粉刺的雞蛋連蛋盒包裝也很吸睛，最新產品有香蕉造型既手霜及睡眠面膜，香到呢！我最近嗰轉就掃左10支呢！

G-Dragon 代言既The Saem我也買過，但產品一般，包裝只是在產品上加張包裝紙就算，定價平是主要賣點吧！至於A'Pieu，也好像跟雪花秀有關，我最記得買過一支Cool Gel係連按摩轆的，塗腳用，舒緩疲勞，才100港幣左右，幾抵玩。另外，沒有拍照的 Nature Republic也是多人搶購的，皇牌用品是蘆薈啫哩，但The Saem出品價錢更平宜，蘆薈成份更高，所以我會推介大家買The Saem。

送俾女性朋友就可以用護膚品，男性朋友﹑同事就梗係買食得架啦！想買平既主要去三大超市，分別係樂天﹑E-mart及Home Plus，但如時間太趕，喺便利店也會買到零食，另外，喺南大門也有紫菜天國(海苔天國)有大量手信俾你揀，但遊客區喎！梗會貴啲啦！自己度度啦！

樂天超市(Lotte Mart)，常去既係首爾站的，夠大，其中有柚子茶既專柜，總之唔怕買唔到吃的喝的韓國產物啦！而且內有Daiso，買下文具或銅煲也不錯，我就買Lock Lock盒，好平，即使唔係Lock & Lock也好用，抵！(夠三萬韓圜可辦退稅)除了首爾站，蠶室站﹑明洞及清涼里站也有的。

E-mart，在龍山站的I Park Mall有，另外朋友說往十里站的E-mart既貨品最平，我冇去過，不肯定，有時間自己去格價吧！

Home Plus，龍頭站的Home Plus既貨品相對冇咁齊，如住在附近(近東大門)可以去行下既！

買既內容看相也看到，主要係薯片﹑送飯既紫菜碎﹑柚子蜜﹑各式韓國蛋糕﹑餅食等等，Market O, Dr. You, Crown, Lotte, Orion...每個牌子都有其特色零食，梗有一樣啱你呢！

希望前後7篇分享對大家首爾行有幫助啦！再會！