我哋一行3人以自由行 package $798 + $41 保險。

上午9:15 喺葵芳搭永東直通車由香港到廣州。先經落馬州出境到皇崗入境，大約 12:00 抵達廣州長隆酒店，比預期時間早！

Check-In 大排長龍，要等到1:00 才可攞房；我哋攞埋酒店地圖及其他單張，順便搵定有咩餐廳食 lunch。

酒店房位於第 5 區，屬於新酒店部分。入到酒店房，我哋 3 個好似某個啤酒廣告嘅女人咁，見到間房好興奮好開心！嘩嘩聲！ 個浴室連廁所比預期大，我欣賞呢度設計，將浴室及廁所並排，中間以磨砂玻璃相隔，同用一個磨砂玻璃門；既環保又慳位！房間夠大，空間夠多，兩張單人床夠濶，就算我同朋友兩個女仔同床都夠瞓。好在攪手朋友好醒目，報名時問清問楚，單人床夠濶，可以唔使補 $250 加床。裝修以自然色系及柔和色調為主，感覺舒服；亦不失以動物圖案作為牆身及廁所上掛畫。趟開玻璃門，再趟開防蚊紗門，係寬敞露台，面向長隆水上世界，仲見到大喇叭一角，聽到泳客嘅歡樂聲！
房間設備除咗風筒、電子磅、夾萬之外，仲有熨斗及熨衫板！認真周到！

我哋喺長隆酒店門口，咁啱問咗個酒店經理，有無的士去祈福食街？

佢介紹個酒店私家車司機俾我哋，去祈福食街只需人民幣$40。最緊要安全可靠！
期間，我哋仲問司機有咩好介紹？佢建議中山小炒或對面果間食廣東菜都唔錯！

大約15分鐘車程，到達祈福食街。入到條食街，各式其式！每間餐廳係唔同菜色！
有中山小炒、廣東菜、上海菜、北京菜、拉麵、火鍋、韓國菜、蒙古菜、.........

中山小炒
我哋叫咗幾樣小菜，包括可石岐BB鴿、藕片炒絲瓜、山水蒸豆腐、燻魚。
BB鴿 - 皮包骨，無啖好食！
藕片炒絲瓜 - 藕片夠爽，絲瓜唔靚係苦嘅！
山水蒸豆腐 - 豆腐真係好滑，豆腐上面釀咗豬肉！
燻魚 - 硬不在話下，又咸咗啲！

由於，大陸食肆尚未禁煙，我哋食嘢時依然聞到煙味。

酒店住客有住客專區，只限 300 個位，先到先得！大馬戲 7:30 開場，我們 7:00 前進場，霸個好位！

多項表演，精彩絕倫，令人目不暇給！
包括空中飛人、跑馬、熊人行鋼線、5人風火輪、半空舞蹈、花式跳水、猩猩與人鎗戰表演 .... 等等。

尤其以 5人風火輪最為深刻！5 位在輪內外行走，甚至蒙眼在輪外跳繩，無安全措施底下，時間要拿掐得好準確，稍一差池便有生命危險；令觀眾看得驚心動魄、拍案叫絕！

換場景時，小丑連同雜技人員，會拋公仔送給現場觀眾或有華麗又性感的巴西舞蹈員及動物巡遊；帶動現場氣氛，我們亦樂在其中！

尾聲時候，除了全體總動員外，還有白鴒在半空飛過，為此劃上完美序幕！

唯一缺點是成個場沒有冷氣供應，只開了大風扇，仍感覺好熱！

由於我哋 3人行，買雙人套票；第3位補人民幣$75 食自助早餐。

白虎自助餐廳有多款中西美食，一應俱全！另設有 1000 個坐位。

不過，呢度最吸引我嘅並非美食！而係內在環境。一入門口，先見到紅鸛；餐廳分開兩邊，中間真係見到 4 隻白老虎。好驚喜！呢度嘅白老虎真 Hea！食完就瞓！仲有人餵，唔使自己去覓食！

中西美食，中式食物放在近門口位置，另一邊係西式食物。
中式食物：粥、中式點心、豆漿、炒飯、小菜....等等。令人眼花撩亂！
西式食物：款式不及中式食物多，有多款麵包、沙律、多款生果(全個上，並不是切開)。任君選擇！

大約 9 年之前，我同媽咪跟康泰兩天團，其中一個景點正是餘蔭山房。

當時，覺得呢度風光如畫，鯉魚池有好多鯉魚，餵魚時，一大埋游埋嚟，好開心！

事隔 9 年，今次與朋友重遊舊地，日久失修，風光不再！加上位置偏僻！身為廣東四大名園之一，恐怕已經被其他名勝取代！

我哋只走上文昌閣，入面有兩層，可讓遊客參拜；聽聞讀書人拜完可考取佳績！

其實，我哋只係逗留半個鐘！因為實在無嘢行，無咩嘢睇！人民幣$18，真係唔抵！


講真，計埋我哋 3 個，全部遊客大約 10 個。認真冷清！

以前，呢度有好幾間店舖，而家只剩唯一一間小食館同手信店。可以食薑汁撞奶、雙皮奶，人民幣$8 有交易！
我食咗熱雙皮奶，見到店員從鑊攞出嚟，仲係暖暖地，食落都幾滑；可能實在無咩生意，其中一位店員瞓覺！

由於我哋約咗酒店私家車司機，司機遲到！咁啱 3 個無 IDD ( 我帶咗 IDD 卡，忘記啟動漫遊服務，所以用不到！ ) 問售票處借用電話，售票員亦很樂意！實在太好！否則我哋只有白等！

行完餘蔭山房，專程番嚟酒店食，一來方便，二來舒服！

我哋見到白虎自助餐廳附近有部電梯，電梯隔離正是日本餐廳廣告牌，是日定食餐：人民幣$58 ( 15% 服務費)

我哋搭電梯直達日本餐廳，侍應即刻招待我哋 3 個！入到去，全間餐廳得我哋 3 個食客，好似包咗場！

我哋 3 個異口同聲要是日定食餐，人民幣$58
呢餐十分豐富！包括：薯仔沙律 ( 將薯仔打成蓉，加上蟹籽，不失為一個開胃小食！)、牛油果加州卷 ( 牛油果味道清淡，珍珠米混合醋粉，更添日式風味！)、炒雜菜 ( 顏色奪目，以黃椒絲、椰菜絲、紫椰菜絲、芽菜、紅蘿蔔絲炒成，咸味恰到好處！)，蘿蔔蓉配炸鯖魚 ( 只是暖暖地，睇落鯖魚好似腍咗，原來係蘿蔔蓉誤導！) 及面豉湯 ( 跟香港口味一樣咸咗些少！) 配白飯。

日本菜本身 colourful ！陽光襯托之下更顯得鮮艷，令賣相生色不少！

我哋食完已經急不及待回港，因為廣州實在太熱！