我哋一行3人以自由行 package $798 + $41 保險。

上午9:15 喺葵芳搭永東直通車由香港到廣州。先經落馬州出境到皇崗入境，大約 12:00 抵達廣州長隆酒店，比預期時間早！

Check-In 大排長龍，要等到1:00 才可攞房；我哋攞埋酒店地圖及其他單張，順便搵定有咩餐廳食 lunch。

酒店房位於第 5 區，屬於新酒店部分。入到酒店房，我哋 3 個好似某個啤酒廣告嘅女人咁，見到間房好興奮好開心！嘩嘩聲！ 個浴室連廁所比預期大，我欣賞呢度設計，將浴室及廁所並排，中間以磨砂玻璃相隔，同用一個磨砂玻璃門；既環保又慳位！房間夠大，空間夠多，兩張單人床夠濶，就算我同朋友兩個女仔同床都夠瞓。好在攪手朋友好醒目，報名時問清問楚，單人床夠濶，可以唔使補 $250 加床。裝修以自然色系及柔和色調為主，感覺舒服；亦不失以動物圖案作為牆身及廁所上掛畫。趟開玻璃門，再趟開防蚊紗門，係寬敞露台，面向長隆水上世界，仲見到大喇叭一角，聽到泳客嘅歡樂聲！
房間設備除咗風筒、電子磅、夾萬之外，仲有熨斗及熨衫板！認真周到！