搭咗幾個鐘頭車,終於黎到呢間漁村了,一落車已經見到好多香港既旅行社都黎呢間漁村食飯.
一點半先黎到,真係餓死人咩,我第一次去旅行係咁遲先食晏架,平時都係有早冇遲既.

搭咗咁耐車,先黎到第一個景點太陽島中心湖風景區門外,點知...司機搵唔到個入口,領導打電話問人啦,點知話裡面整路,所以架車唔可以駛入去,要D團友步行,D團友問領隊要行幾耐,領導話大約行45分鐘,問D團友有冇興趣入去,D團友問裡面有咩睇架,領隊話係一個公園黎既,D團友一聽到係公園,就未得黎反應,領隊就提議大家,不如行附近兩間大型商場啦,咁...都冇計啦,唔通唔行咩,我都未試過去旅行,第一個景點居然行...超市.

去到呢間肥仔偉,先行四圍影下相,再試佢地既糉,味道ok,但冇阿媽整得咁好食.

食完行過隔離,諗住買d糉返香港,點知阿媽話: 你唔好搞呀,咁多防腐劑,佢又話佢又唔係唔識包,搞到我即刻放低晒d糉.

不過d糉真係幾抵,幾蚊一隻,最大隻裹蒸糉都係賣RMB32蚊,抵啦.

食完糉,又搭咗個幾鐘既車,終於食晚飯啦....

呢間酒樓四周既環境唔錯,但個廁所就麻麻啦.

呢餐居然有碟豬雜,但我都唔食內臟,但見到同團既團友,食得津津有味,證明呢碟野好好味啦.

食完晚飯,又搭咗個幾鐘頭既車,終於黎到目的地啦....真係山長水遠先黎到.

去到盤龍峽入口,呢度真係規距多多,要D團友係大門口拎埋行李落車,跟住等領導同導遊去辦手續,好似同酒店一樣,拎行李落車冇乜問題,但係呢度係風景區門口,唔係酒店既門口呀.叫D團友係個度等,然後再拖D行李行咁鬼遠既路先番到酒店.都唔知邊個訂既規距.

今次我地住B區,有D團友住A區主樓區,我地B區有人幫我地拎行李上房,咁都唔錯.

入到房...嘩,好靚呀......唔怪得個團費咁貴啦.