Western Coop Residence屬於公寓式酒店（service apartment），位置好方便，由機場坐6001號機場巴士直達，免卻坐地鐵（地鐵站的石級真係行到怕，日日上上落落都好吃力！）將行李搬上搬落的麻煩，步行往東大門幾個大型商場（Doota、Good Morning city、Hello aPM等）都只係十零分鐘腳程，而且有體育用品地下街可以直通東大門歷史文化公園站（地鐵路線包括2、4和5號線）12號出口，去邊度都咁就腳。酒店旁邊有CU 同埋GS 25便利店，要買T Money和增值都好方便。

房間方面，乾淨整潔，空間比想像中大，甫進入房門，先有一個方形廳，左面牆上有層架和檯椅，方便拽放和點算戰利品，廳的右邊則有廚櫃和鋅盤，並有少量家電（雪櫃、微波爐、電水煲等），想買東西返酒店下廚話咁易。

廳後放左兩張單人床，床鋪的確比較窄，只有兩呎半闊，肥人可能感覺迫狹不太舒適，不過，我覺得尚可接受啦。

浴室只有企缸，最初以為房間唔提供沐浴用品，結果發現居然有洗頭水和沐浴露，不過牙刷牙膏就要自備啦！

唯一不太方便的係鎖匙只有一條，若兩個人要分頭行動時，就有少少麻煩啦～