次次浸完溫泉，都特別肚餓，可能因為血液循環好咗(其實可能係我大食)。今朝揀咗日式早餐，都幾豐富，又好似昨晚咁有10幾碟野，不過早餐就清淡D。有燒三文魚、豆腐鍋、漬物…..仲有白飯任裝。晨早又係食飯，真係有d唔係好慣。

溫泉酒店一般check out 時間係10點，所以食飽飽，仲有時間攤一陣睇吓電視先check out。 (我的日文係有限公司，不過好鍾意睇日本d電視，唔明但都要睇)

今朝早好hae，只係去睇個傳統習俗表演叫「湯揉」ゆもみ（yumomi），係草津名物，亦係到此一遊的標記。「湯揉」係草津的傳統習俗，女表演者會跟住音樂一邊唱歌，一邊不斷拍打泉水。呢個係以前幫助泉水降溫的方法，因為草津溫泉的水溫實在太高，成95度呀～

今日的午飯放棄咗傳統的日式料理，揀咗湯畑旁的一間西式料理-月乃井。呢間餐廳之前上網做過research，見到D甜品好靚已經好想試。一入間舖再上一層樓先係餐廳，D裝修好歐陸feel，用粉綠色做主調。如果你有去過巴黎好出名食macaron的Laudaree，會覺得成個格局都好似，不過野食就加入咗d日式元素。我叫咗個pasta set，包括有沙律、和風意粉同是日甜品。係咁優美的環景下，歎個午餐真係一樂也。

雪不斷咁落，兩日來完全冇停過，食飽飽行去西河原公園閒逛，已經滿地都係雪仲有d跣，要好小心咁行。西河原公園係另一個草津區的溫泉源頭，呢個公園入面仲有免費的露天風呂，不過可能因為太多遊客去觀光，所以而家好少人浸。成個公園都充斥住蒸氣，係咁凍的氣溫下(-1度)，入到呢個公園特別覺得暖。

四圍行下，唔經唔覺又已經到巴士出發時間。係時候行返酒店，攞噃行李，再由酒店車送去搭巴士返東京，為呢次溫泉之旅正式劃上句號。

今次來回都要搭長途巴士(3個半鐘)，所以中途一定會停道之駅(中途站)俾大家去廁所同貫野食。日本好興國內旅遊，無論係自駕定係用公共交通工具，亦因為咁d公路好完善，而途中的中途站，更可稱得上係日本名物!因為有好多野買，仲有o個區的特色手信。今次的發現係群馬縣出產的士多啤梨!只係600yen一盒，平香港一半，平新宿30%。而且好甜，好大粒，正過平時買開的博多日本士多啤梨好多!

超好味，好采買咗4盒，食到走仲有….