彩虹：

晨早7點飛機降落，機師話密雲，窗外正在落雨。步出機場，雨開始轉大，我地急步跑到私家車上。當地人話琴日天氣仲好好，今朝先正落雨，心諗唔通我地咁黑仔？？？ 車一路開，見到自從細個果時已經好耐無見過既彩虹，雖然只得一小部份，但都非常雀躍。可能係 luck 既預兆，車繼續開，經過唔同既地區，天色真係慢慢轉好！

某日坐車去 Trou D'Eau Douce 碼頭途中，經過一處污密雲密佈，luck 又再出現。今次係一條完整拱形既彩虹，頓時又舉起我既傻瓜相機，透過車窗影過不停，希望將兒時記憶用紙張保留。對於長期生活响擠迫環境既都市人，彩虹實在係難得既景象，當地人就應該見怪不怪！


獨特既籃：

記得第1日坐响酒店大堂等 check in，忍唔住走到靠海一邊，有 d 眼瞓既眼晴頓時被一種特別燦爛既籃色，同充沛既陽光撐開左，口裡無法言語，只定眼望住個天，心裡只有不停既讚嘆，呢個係最美好既第一相遇！

之後，我發覺無論去到邊一個角落，毛里裘斯高高既天空都好似緊緊咁環抱住我，天連海、海連天，無窮無盡！而太陽伯伯只會偶然讓一下雨雲，然後雨會趁難得既機會大大灑一遍，之後太陽伯伯又會再趕出黎同大家開懷大笑！


星星：

晚間一抬頭就可以睇到滿布繁星既清澈天空，比起有光害既香港，晚間既星星顯得特別美麗同矜貴！

毛里裘斯面積比香港大，但人口只有120萬，山少，平地多，無高樓大廈，所以到處可見空置土地、耕地同遼闊既蔗田。


紅土：

响毛里裘斯您一定會注意到特別既泥土顏色，當地人稱為紅土，Le Meridien 酒店附近一個小民區命名為 Le Terre，係 the earth 既意思，遍地都係紅土。據聞紅土係火山土，營養成份豐富，加上空氣清新、陽光充沛，基本上對裁種大部份既農作物都有利。

最有名既七色土 (Terre Le Leir), 顧名思義係7種顏色既泥土。其實七色土係火山熔岩裡頭唔同礦物質同金屬，經過陽光照射後呈現黃、紅、啡、橙等顏色。

*前往方法/位置：
七色土位於西南面既 Chamarel，入場費每人 $125 盧比，可參加 Local Tour 或租車參觀。司機連車每日8小時費用為 $103 歐元 (White Sand Tours)

大大片既蔗田係毛里裘斯既標誌，標誌隨處可見。蔗糖出口曾經係毛里裘斯第一大工業，高峯期有400多間糖廠，其後政府重新調整土地用途，旅遊業先成為而家既1哥，好多糖廠都因此而荒廢，殘留煙囪作歷史記念，而家只剩低8間有運作。甘蔗响紅土上生長，唔需要太多打理，種子亦靠風力傳播，入住酒店第1日己經發覺呢 d 可愛既種子，中間啡色種子四周有白色毛毛，隨風漂蕩。當甘蔗生長到差唔多就可以收割運往糖廠製蔗糖或者 Rum 酒。為保持紅土既養份，每7年就要將土地改種薯仔，然後先可種番甘蔗。曾經到過响酒店附近既蔗田，甘蔗生得高高，非常茂盛，蔗汁仲好鮮甜添！

*前往方法/位置：
可透過 Local Tour 參觀糖廠或讓的士司機順路响蔗田停一停，可親身近距離接觸蔗田。毛里裘里的士無 Meter，大多以 A 地方與 B 地方計算，通常要議價。


自己成為 Discovery Channel 主持：

對我黎講只有 Discovery Channel 裡頭既主持先可以咁樣接觸動物。毛里裘斯有一項活動叫做 Walking with Lion，您可以近距離同獅子同行 (大約45分鐘至1個鐘)，摸下佢既背脊，同佢影相。話曬獅子都係兇猛既動物，係咪諗起都刺激呢！其實佢地仲有頑皮同撒嬌既可愛一面架！

*前往方法/位置：
Casela Nature Park，由 Local Tour 安排，費用每人$63 歐元 (White Sand Tours)


塞舌爾巨龜 (Giant Aldabra Tortoise)：

時間緊迫既話，可以响睇七色土同一地點順便睇埋，果度有幾隻巨龜用矮木柵欄圍住，可以用手觸摸佢地既手、腳、頭、殼等，佢地都絲毫不動，仍然懶洋洋咁曬太陽，木獨得黎又好可愛！如果時間充裕，可以由 Local Tour 安排到 Ile Aux Aigrettes 小島。果度係野生動物保護區，除左有塞舌爾巨龜外，仲可以碰下運氣睇下見唔見到 Pink Pigeon (據聞係絶種 Dodo 鳥既近親)，仲有爪蜥蝪 (Telfair's Shink)。


心形火山口：

毛里裘斯既形成全因幾千年前 Trou Aux 火山爆發。Trou Aux Cerfs 火山口表面直徑350米，底部直徑180米，深85米，周圍綠草如欣，更發現中間火山湖呈心形形狀，相當有趣！除火山口景色外，亦可於山上遠望山下既城市，風景怡人！

*前住方法/位置：
由於與七色土位置接近，可將兩個景點安排一齊去。


地上既雀仔：

每日都會見到唔同顏色、種類、大細既雀仔响酒店四周既地下，因為佢地都係 "為" 食羅，個咀啄過唔停，所以係地上既雀仔。另外，一早您就可以聽到佢地既歌聲，同您講 Good Morning，感覺好大自然！

用天連海、海連天、海天一色形容毛里裘斯既海絶對適合。

跟天一樣，海水同樣擁有一種燦爛既綠，兼夾著天空既籃，一層一層好有層次咁閃爍浮動住，究竟可以用咩形容詞去形容？真係好難以筆墨去形容，相信最好親眼記錄！

响酒店海灘進行毛里裘斯下水禮，更深入接觸海水就算係去東岸對出既 Ile Aue Cerfs 小島。呢個島被當地人稱為最美麗既沙灘。小島一帶既水域唔深，對我黎講海水都係透明既，玉眼可以睇到水底既海草同石頭。水温雖然帶涼，但我都受唔住引誘落水浮潛。果然係非常值得，見到唔少顏色鮮艷既珊瑚魚，好似小丑魚、尖咀檸檬、仲有比手掌更大黃黑間條既神仙魚，亦有一小群一小群既珊瑚魚 BB 响水草根部游黎游去。除此，黃褐色既鰻魚、海參、不知名既魚類，到處可見。原來响未到6呎深既淺水，水底世界都可以咁活躍，假若玩潛水既話，景象會唔會靚到暈左呢！！

上岸到 Ile Aue Cerfs 小島上既海灘，紫色、綠色既活海膽好似休哉悠哉咁瞓响海水裡頭，仲有海星小姐，都襯熱鬧走到靠岸處，與遊客交流一下！ 

*前往方法/位置：
Ile Aux Cerfs 一天團，費用每人 $78 歐元，包括由酒店到 Trou D'Eau Douce 碼頭來回接送，於雙體帆船上既飲品 (包括汔水、雞尾酒)、 BBQ 午膳及浮潛用具，更會途經 Grande Riviere Sud Est 瀑布 (White Sand Tours)

由於毛里裘斯公共交通網絡唔夠發逹，除左 Port Louis，Water Front 同 Central Market 一帶較為繁盛之外，好似其他國家既渡假 Resort 一樣，絶大部份旅客都會留响酒店用膳。所以我地都選擇左 Half Board - 早餐同晚餐都响酒店既 180 Degree 餐廳以自助形式享用。

無論早餐定晚餐，酒店都會為印度客人準備唔少既印度菜，對印度客人黎講夠曬貼心！其他客人有興趣既話都可以試下。


早餐：

早餐主要係西式，選擇都唔少！熱情果係我最鐘意既水果，味道清新，酸酸甜甜！仲有佢地既奇異果係好甜架，唔似香港既一般都酸溜溜既。最有當地特式食品就係一種黃豆薄餅 - Dholl Purri，皮薄帶淡黃色，通常我會搽上牛油同灑上玉桂糖食，質地軟軟帶香，伴上咖啡，作為朝早小小甜品，好正！响街上同 Central Market 既熟食中心都見到當地人將 Dholl Purri 沾上黃色、橙色汁料食用。煎蛋同 omelette 係最繁忙既地方，其次就係算烘麵包機。


晚餐：

至於晚餐，為免客人感覺沈悶，酒店每晚都為客人設計唔同主題既菜式。而酒店亦非常認真，都有 Dress Code 要客人遵守，短褲、膝上短裙及拖鞋通通唔合格。

星期一......厨師推介 (Chef's Buffet)
星期二......毛里裘斯之夜 (Mauritian Buffet)
星期三......地中海之夜 (Mediteranean Buffet) 
星期四......印度之夜 (Indian Buffet)
星期五......中國之夜 (Chinese Buffet)
星期六......法國之夜 (French Buffet)
星期日......海鮮之夜 (Sea Food Buffet)

我地因為行程所限，所以係無試過星期二同三兩晚既菜式。總括黎講，晚餐款式都唔少，材料亦新鮮，但大部份都覺得唔太啱口味，尤其更加唔習慣佢唔鹹唔淡既中國菜啦，所以每晚只會尊注某幾款認為好味既菜式，可能香港人都係寵壞左，生活响香港既美食天堂，到一 d 飲食文化唔太深既地方就會唔習慣！

Papaya Bar 係靠近泳池，其實响 Shells 向泳池方向再行過小小就係。

响 Papaya 食過兩次 Lunch，第二次覺得較為滿意。 Papaya Bar 主打飲品，飲品會直送沙灘上，客人可以一邊灑太陽、一邊享受凍飲，寫意非常。食物主要由 La Croque 處理，客人可坐在 Papaya Bar 帳篷內，對住個無敵海洋。

第一次 Lunch：

- 漢堡包：麵包、醬汁同所有配料都好穩妥，但唯獨個主角 - 牛肉就乾柴柴，一 d 都唔 Juicy！
- 雞尾酒 + 可樂：忘記左雞尾酒既名。酸酸橙味，開胃又清新。 

第二次 Lunch:

- 公司三文治：今次無失拖，份三文治份量唔算大，但味道做得好好，碎蛋、脆煙肉、生菜等 good matching！

- 炸薯條：ok 啦！

- Magarita 雞尾酒 + 可樂：Magarita 味道調得好好，酒既份量足夠，冰無溝淡酒既味道，比好多香港酒吧做得更好！

果日租左車同司機去幾個景點，最尾一站係 Port Louis 一帶。由於行程排得一站接一站，所以連晏都無食。到左 Water Front 見到有麥記，一於邊行邊食慳番時間睇多d野。 

- 皇家芝士漢堡 (Royal Cheese Burger)：

選左呢款同香港唔同既包。麵包一定唔同香港，比香港既軟熟、牛肉亦比酒店既漢堡好味，不過唔知會唔會係純牛肉，而芝士真係 Royal 喎，比普通香濃d既！

- 辣雞包 (Spicy Chicken)：

唔知係咪受法國人飲食文化影響，連辣雞包都有芝士，味道都好 ok 喎，但就無麥辣味！

- 大可樂：

味道就無麥分別！

如果無其他餐廳有興趣，麥記都係一個嚐試既選擇，以上3樣食品大約為 $53 港幣 (連15%稅)，比香港貴小小啦！

估唔到响毛里裘斯最滿意既一餐竟然係响船上既午餐。早前遊記提到坐雙體帆船去 Ile Aux Cerfs 小島，當日船上面既旅客大約一半係講法文，一半係講英文 (包括兩對黎渡蜜月既巴基斯坦人)，食物都以西式為主，大部份事先備妥，然後再响船上用簡單設計既炭爐燒熱，雖然如此，但無影響食物質素喎。

食物包括：

- 燒魚
- 申燒雞肉
- 蒜蓉包
- 菜絲沙律
- 薯仔雞蛋沙律
- 印度米飯

飲品：

- 用 Rum 酒調成既雞尾酒
- 汽水

以上各款食品平均都做得唔錯，而燒魚同薯仔雞蛋沙津係我既至愛。燒魚大大舊肉，肉質嫩滑，醃味清淡得宜，能保持魚肉既鮮味！而薯仔沙律既薯仔好香，肉質夠 "淋" 同滑，好味！

出海連酒店來回接送、午餐及浮潛用具，每人費手為 $78 歐元。

由於事前無做過資料搜集，只有碰運氣。响 Water Front 對開右手邊，會見到 Coast Guard 船艦，而 Coast Guard 既左手邊，有一排幾間對海既露天餐廳，環境唔錯。從入口計第二間，我地就隨意選左幫襯佢，當時食客都唔少，佢提供意粉、沙律、湯同海鮮等食品。

- 燒羊排：羊排唔算太乾，但肉質本身較瘦，所以食落唔夠滑，不過羊味就好濃，啱鐘意羊味既朋友。

- 海鮮濶麵：無想像到連一舊魚都見唔到，咁 d 海鮮究竟去左邊呢？原來厨師將 d 海鮮切到一粒粒，味道尚算 ok，但個人認為咁樣個賣相始終差d，無咁吸引，而且口感不足！

-  Phoenix 生啤同枝裝可樂：當地出產既 No. 1 啤酒，味道比較清淡。

坐响露天餐廳對住閃閃生光既海食飯，感覺休閒自在，好正呀！

毛里裘斯不但建有好多5星級酒店，仲有6星級，豪華式渡假酒店絕對唔少，因為每年毛里裘斯都吸引唔少歐洲客人，旅遊業增長迅速。

我地入住既 Le Meridien 都算係世界有名既渡假酒店，但比起毛里裘斯其他渡假酒店，已經算最平庸既一家，不過我地己經覺得好足夠喇！

酒店有泳池、海灘、Spa、Gym、閱讀室、五間餐廳、酒吧兩間、Kid's Club，而Boat House 提供各項收費既活動，例如香蕉船、潛水、獨木舟、出海釣魚、單車遊、滑水、與海豚暢泳等、亦有各式免費水上或陸上活動供入住客人，每日沙灘上會安排各類球賽，與客人同樂。如果仲覺得活動唔啱口味，酒店大堂仲有兩間旅行社 counter，一間租車公司既 counter，方便直接聯絡安排 Local Tour 到各景點遊玩。

由酒店坐車到 Water Front 只需20分鐘，可通過酒店安排，亦可自行到酒店外的士亭，自行跟司機議價，車費較酒店平。另外酒店門口左手邊步行10 分鐘可到街口既小商店，有朱古力，雪條、泳衣等簡單用品等售買。酒店內亦設有1間商店同書店。

房間有 500 呎，較為寬敞！不過床褥太軟，唔太習慣！酒店每晚會送上小小既朱古力予客人，夠貼心！

以今次格價，通過 Air Mauritius 購買 Package 較其他旅行社平宜。