鳯雛响首爾都有幾間分店，例如明洞、梨大等。但由於對 Good Morning City 既老闆有感情，而 Good Morning City 又靠近港人愛住既 Co-op / Western Co-op Residence 同一幢、二幢開至凌晨3、4點既批發市場，所以較鐘意幫襯 Good Morning City。

其實所有食材都由中央分批備妥後運到各分店，包括薯仔、雞、粉條、汁料等。分店只負責將雞根據份量煮好。Good Morning City 分店老闆係一個年青男子，從佢既店您可以知道佢既個人品味。除左按 franchise 店一定規格外，牆上有部份既畫係由佢親自畫既，佢喜歡大既畫，對每幅畫既內容都有著一個故事或思想。另外，一邊食雞，您可以聽到一邊播放既清一色英文歌，全部都係佢精心挑選。若果有機會同佢傾計，您會發現佢外表係一個好靜既人，但內心有著不停既思潮。

好喇，要講番老闆煮既雞，我最鐘意佢濃濃既汁，而且愈食愈辣，但愈辣又愈想食。當中既薯仔同粉條較雞塊容易入味，所以食起黎，特別刺激！

上次到首爾食到佢媽媽親自做既泡菜，事後非常懷念，可惜今次未能食到，期待下次吧！

價錢以份量計算，最少既份量可以兩人食用，KRW20,000，即大約 HK$120。白飯另計。

去過濟洲島 o'sulloc 既茶園，可惜當日茶藝博物館無開放，所以試唔到佢既產品，尤其綠茶雪糕，真有 d 失望！

但一去到首爾明洞就發現 o'sulloc 既門市，原來佢响首爾開左幾間店專門提供綠茶同有關綠茶食品，而且產品選擇唔少，當然二話不說，馬上入店試試。

1. Freddy Green：其實係綠茶雪榚，咁大個女未食過咁好味既綠茶雪榚，個綠茶味好香，濃而唔苦，比起日本某 d 大牌子既綠茶雪榚，味道大勝幾條街，而且感覺好自然絕無添加，好正！

2. Green Tea Roll：亦係超水準之作，蛋糕除左做得軟熟外，仲有一點點黏性，唔係凈得軟淋淋，加上剛剛好既綠茶味，光係層蛋榚已經停唔到口。中間有一舊淡味忌廉，好軟好滑而唔膩，超級絕配！食過香港有一間响尖沙咀專賣唔同口味既 Egg Roll，都覺得唔錯，但 o'sulloc 就更加出色！

最後買左一包30g 既 Tropical Green Tea 送比朋友，而自己就希望下次會再有機會試下佢地既綠茶同其他產品，今次令我對綠茶產品加左唔少分！

其實以咁既優良質素，以呢個咁平既價錢响香港實在無可能，所以一定要試！

亦都係第二次幫襯，生意都係非常好，水準仍然保持得好好！

叫左二人份量既刀削蜆麵，湯底仍然好清甜，蜆新鮮又唔會有沙，刀削麵彈牙，每次連湯都要飲清。

每枱均送上泡菜一碟，呢度既泡菜係好啱我既口味。食落唔酸，有一陣好香既蒜味，帶小許辣，每次都要加添先可以滿足！

另外，呢間舖既第二紅人係泡菜餃子，肚 dump 有空間既話可以試試，但份量頗多，至少有8隻，兩個人連刀削蜆麵，一定會好飽。

個人認為，呢度既刀削麵同餃子都比明洞餃子出色好多，所以不訪走遠d，試試真味！